១ . លោក សម រង្ស៊ី ប្រកាសស្វាគមន៍បណ្តឹងរបស់លោក ហ៊ុន សែន រឿងចោទសម្លាប់ប្អូនថ្លៃ
មេបក្សប្រឆាំង ប្រកាសស្វាគមន៍បណ្តឹងមួយទៀតរបស់លោកនាយករដ្ឋមន្ត្រី ហ៊ុន សែន នៅចំពោះមុខតុលាការប្រទេសបារាំង ពាក់ព័ន្ធនឹងករណីដែលលោក ចោទប្រកាន់ថា លោក ហ៊ុន សែន ជាអ្នកសម្លាប់អតីតប្អូនថ្លៃរបស់ខ្លួនឈ្មោះ កូវ សាមុត កាលពីជិត៣០ឆ្នាំមុន។
២ . ចិនជំរុញឱ្យកម្ពុជាពង្រឹងសហគមន៍រួមគ្នាជាមួយចិនកាន់តែខ្លាំងឡើង
ភាគីប្រទេសចិនចាត់ទុកលោកនាយករដ្ឋមន្ត្រី ហ៊ុន សែន ជាមិត្តល្អរបស់ប្រជាជាតិចិន ហើយចិនក៏ជំរុញឱ្យមានការកសាងសហគមន៍ចិនកម្ពុជាអនាគតរួមគ្នា និងបន្តទំនាក់ទំនងមិត្តភាពចិន-កម្ពុជា ពីមួយជំនាន់ទៅមួយជំនាន់។ ការលើកឡើងរបស់ភាគីចិនបែបនេះ ស្របពេលលោក ហ៊ុន សែន កំពុងទៅទស្សនកិច្ចប្រទេសចិននៅថ្ងៃនេះ។ អ្នកឃ្លាំមើលរិះគន់ថា គម្រោងទស្សនកិច្ចរបស់លោក ហ៊ុន សែន ទៅប្រទេសចិនដើម្បីពង្រឹងអំណាច ច្រើនជាងផលប្រយោជន៍ជាតិ។
[ អានព័ត៌មានពិស្តារ... Opens in new window ]
៣. មេធាវីដើមបណ្ដឹងមិនយល់ព្រមដកបណ្ដឹងពីលោក ថាច់ សេដ្ឋា ទេ
មេធាវីដើមបណ្ដឹងមិនយល់ព្រមដកពាក្យប្ដឹងពីអនុប្រធានគណបក្សភ្លើងទៀនទេ បើទោះជាមេធាវីការពារក្ដី លោក ថាច់ សេដ្ឋា ស្នើបញ្ចប់ករណីនេះ ក្រៅប្រព័ន្ធតុលាការយ៉ាងណាក្ដី។ មន្ត្រីសង្គមស៊ីវិលនៅតែចាត់ទុកករណីឃុំខ្លួនលោក ថាច់ សេដ្ឋា ថា ជារឿងចម្លែក ព្រោះសំណុំរឿងនេះ បានកើតឡើងជាច្រើនឆ្នាំមកហើយ តែតុលាការទើបលើកយកមកចាត់ការនៅពេលនេះ។
៤ . សកម្មជនបក្សភ្លើងទៀននៅខេត្តកំពង់ធំថា អាជ្ញាធរបក្សកាន់អំណាចនៅតែគំរាមកំហែង និងលួចដកស្លាកគណបក្សពួកគេ
នៅខេត្តកំពង់ធំឯណោះវិញ សកម្មជនគណបក្សភ្លើងទៀន ចោទប្រកាន់អាជ្ញាធរបក្សកាន់ អំណាចថា នៅតែបន្តគំរាមកំហែងមកលើសមាជិកបក្សភ្លើងទៀនតាមមូលដ្ឋាន និងលួចដកស្លាកគណបក្សចោល។ មន្ត្រីសង្គមស៊ីវិលថា អាជ្ញាធរពាក់ព័ន្ធ គួរតែបើកលំហសេរីភាពនយោបាយដល់បក្សក្រៅរដ្ឋាភិបាលឱ្យបានទូលំទូលាយ។
៥ . គណបក្សកាន់អំណាច មិនចាត់ទុកសម្ដីអសុរោះ និងភាពគ្មានមេត្តាចំពោះអ្នកមាននិន្នាការនយោបាយប្រឆាំង ថាជាអំពើអសីលធម៌ឡើយ
គណបក្សកាន់អំណាចចាត់ទុកថា ការពោលពាក្យអសុរោះ និងគ្មានមេត្តាចំពោះអ្នកមាននិន្នាការនយោបាយផ្ទុយពីរដ្ឋាភិបាល មិនមែនជាអំពើអសីលធម៌នោះឡើយ។ ការលើកឡើងដូច្នោះ ជាការឆ្លើយតបទៅនឹងការស្នើសុំរបស់ធម្មយាត្រាលើកកម្ពស់សីលធម៌សង្គម ដែលបានបញ្ចប់កាលពីម្សិលមិញ។ គណបក្សភ្លើងទៀន គាំទ្រចំពោះការស្នើសុំ ឱ្យអ្នកនយោបាយគ្រប់និន្នាការបញ្ឈប់ការប្រើប្រាស់ពាក្យសម្ដីមិនសមរម្យ និងត្រូវចេះអធ្យាស្រ័យឱ្យគ្នា ដើម្បីលើកកម្ពស់សាមគ្គីភាពជាតិ និងរស់នៅសុខដុមរមនាជាមួយគ្នា។
៦ . កម្ពុជាបន្តស្វាគមន៍ទេសចរចិនជាង ១រយនាក់ ខណៈមន្ត្រីសង្គមស៊ីវិលស្នើការពារសន្តិសុខ
ក្រសួងទេសចរណ៍បន្តធ្វើពិធីស្វាគមន៍ភ្ញៀវទេសចរចិនដោយជូនបាច់ផ្កា និងជូនក្រមាដល់ដល់ពួកគេនៅព្រលានយន្តហោះអន្តរជាតិភ្នំពេញ ខណៈនៅប្រទេសចិននៅតែបន្តមានករណីឆ្លងជំងឺ-១៩ ថ្មីក្នុងមួយថ្ងៃរាប់ម៉ឺននាក់។ ជាមួយគ្នានេះ មន្ត្រីសង្គមជំរុញដល់រដ្ឋាភិបាលពិចារណារឹតបន្តឹងផ្នែកសុខាភិបាល និងបង្កើនការគ្រប់គ្រងជនបរទេសឱ្យមានប្រសិទ្ធភាព ដើម្បីធានាសន្តិសុខសណ្ដាប់ធ្នាប់សង្គម។
៧ . មន្ត្រីសង្គមស៊ីវិលស្នើឱ្យមានវិធានការគ្រប់គ្រងវិធានការសុខភាពខណៈចិនបន្តចូលកម្ពុជា
មន្ត្រីសង្គមជំរុញដល់រដ្ឋាភិបាលពិចារណារឹតបន្តឹងផ្នែកសុខាភិបាលដើម្បីការពារការរាតត្បាតជំងឺកូវីដ១៩។ ការស្នើសុំនេះ ធ្វើឡើងក្រោយពីក្រសួងទេសចរណ៍បន្តធ្វើពិធីស្វាគមន៍ភ្ញៀវទេសចរចិនដោយជូនបាច់ផ្កានិងជូនក្រមាដល់ពួកគេនៅព្រលានយន្តហោះអន្តរជាតិភ្នំពេញខណៈប្រទេសចិននៅតែបន្តមានករណីឆ្លងជំងឺ-១៩ ថ្មីក្នុងមួយថ្ងៃរាប់ម៉ឺននាក់។
៨. ទីផ្សារអឺរ៉ុបទិញទំនិញពីកម្ពុជាជាង៤ពាន់លានដុល្លារក្នុងឆ្នាំ២០២២
អឺរ៉ុបនៅតែជាទីផ្សារធំទិញទំនិញពីកម្ពុជាគឺក្នុងទឹកប្រាក់ជាង៤ពាន់លានដុល្លារក្នុងឆ្នាំ២០២២កើនឡើងជាង២៥ភាគរយបើប្រៀបធៀបនឹងឆ្នាំ២០២១។
របាយការណ៍បូកសរុបលទ្ធផលការងារឆ្នាំ២០២២របស់ក្រសួងពាណិជ្ជកម្មឱ្យដឹងថាទំនិញដែលកម្ពុជាបាននាំទៅលក់នៅទីផ្សារអឺរ៉ុបក្នុងរយៈពេលមួយឆ្នាំនេះមានតម្លៃសរុប៤ពាន់៤៥លានដុល្លារ(៤ ០៤៥ លាន) កើនឡើងចំនួន ២៥,២៧ ភាគរយ ធៀបនឹងឆ្នាំ២០២១ ដែលមានចំនួន ជាង៣ពាន់២រយលានដុល្លារ (៣ ២២៩លាន)។ ទាក់ទងនឹងការនាំទំនិញទៅអឺរ៉ុបនេះកម្ពុជាប្រឈមនឹងបាត់បង់ផលប្រយោជន៍ពីប្រព័ន្ធអនុគ្រោះពន្ធ EBAបន្ថែមទៀត ដោយសារការរម្លាយប្រជាធិបតេយ្យនិងការរំលោភសិទ្ធិមនុស្ស «ធ្ងន់ធ្ងរជាប្រព័ន្ធ» បន្ទាប់ពីសហភាពអឺរ៉ុបកាត់ផ្តាច់ប្រព័ន្ធអនុគ្រោះពន្ធEBA ២០% កាលពីខែសីហា ឆ្នាំ២០២០៕
៩ . កម្ពុជាកម្ទេចអាវុធផលិតដោយសហរដ្ឋអាមេរិកជាង៦០០ដើមក្នុងរយៈពេលជាងមួយឆ្នាំ
អាជ្ញាធរកម្ពុជាបានកម្ទេចអាវុធចាស់ៗដែលផលិតដោយសហរដ្ឋអាមេរិក ជាង៦០០ដើម ក្នុងរយៈពេលមួយឆ្នាំកន្លងមកនេះ។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាលោក បាទ្រីក ម័រហ្វី (Patrick Murphy) បានសរសរនៅលើបណ្ដាញធ្វីតធឺ (Twitter) របស់លោកថាលោកបានទៅចូលរួមមើលពីរបៀបបំផ្លាញអាវុធនៅក្នុងខែត្រកំពង់ឆ្នាំងដែលគម្រោងនេះ ជាមូលនិធិមនុស្សធម៌( Golden West) របស់សហរដ្ឋអាមេរិកសហការជាមួយកងយោធពលខេមរភូមិន្ទ។ លោកបញ្ជាក់ថា ការកម្ទេចឬបំផ្លាញអាវុធចាស់ៗចោលនេះដើម្បីធានាដល់សុវត្ថិភាពនិងជីវភាពរស់នៅរបស់ប្រជាពលរដ្ឋ។
អាជ្ញាធរកម្ពុជាបានយកអាវុធដែលផលិតនៅសហរដ្ឋអាមេរិកទៅកម្ទេចចោលនេះនៅក្រោយពេលលោកនាយករដ្ឋមន្ត្រី ហ៊ុន សែន កាលពីថ្ងៃទី១០ ខែធ្នូ ឆ្នាំ២០២១ បានបញ្ជាឱ្យអង្គភាពប្រដាប់អាវុធទាំងអស់យកអាវុធនិងសម្ភារយោធាអាមេរិកទៅរក្សាទុកក្នុងឃ្លាំងឬយកទៅកម្ទេចចោលតាមភាពជាក់ស្ដែង។ប្រតិកម្មរបស់លោក ហ៊ុន សែន ទាំងកម្រោលនេះ ធ្វើឡើងបន្ទាប់ពីក្រសួងពាណិជ្ជកម្មអាមេរិកបានដាក់ទណ្ឌកម្មហាមលក់អាវុធនិងសម្ភារយោធាឱ្យកម្ពុជាដោយសារតែរដ្ឋាភិបាលលោក ហ៊ុន សែន បានរំលោភសិទ្ធិមនុស្ស ប្រព្រឹត្តអំពើពុករលួយ បំផ្លាញប្រជាធិបតេយ្យ និង កម្ពុជាស្ថិតនៅក្រោមឥទ្ធិពលចិន៕
១០. រោគសញ្ញានៃជំងឺពងបែកដៃជើងមាត់ លើកុមារនិងវិធីព្យាបាល ?
ជំងឺពងបែកដៃជើងនិងមាត់ឬភាសាអង់គ្លេសហៅថា (Hand, Foot and Mouth disease) គឺជាជំងឺឆ្លងដែលតែងតែកើតលើក្មេងអាយុតិចជាង១០ឆ្នាំជាពិសេសក្មេងអាយុ ក្រោម៥ឆ្នាំ។ ជំងឺនេះកំពុងផ្ទុះនិងរាតត្បាតឡើងវិញនៅប្រទេសកម្ពុជាបណ្តាលឲ្យកុមារជាច្រើននាក់បាត់បង់ជីវិត។ តើជំងឺពងបែកដៃជើងនិងមាត់ជាជំងឺអ្វី ? ហើយគេអាចមានវិធីណាខ្លះដើម្បីបង្ការការឆ្លងជំងឺនេះ?
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។