លោក សម រង្ស៊ី មិនខ្វល់ពីរឿងតុលាការកាត់អោយជាប់ពន្ធនាគារបទញុះញង់២ករណីទៀត
2020.12.30
លោក សម រង្ស៊ី ប្រធានស្ដីទីគណបក្សសង្រ្គោះជាតិ(ខាងឆ្វេង) និងរូបភាពខាងមុខសាលាដំបូងរាជធានីភ្នំពេញ។
អាស៊ីសេរី
លោក សម រង្ស៊ី ប្រធានស្ដីទីគណបក្សសង្រ្គោះជាតិថាលោកមិនចាប់អារម្មណ៍នឹងការផ្តន្ទាទោសលោកអោយជាប់ពន្ធនាគារ ដោយតុលាការក្រុងភ្នំពេញនោះទេ ដោយលោកថាតុលាការបានធ្វើតាមបញ្ជាអ្នកនយោបាយ។
សាលាដំបូងក្រុងភ្នំពេញកាលពីថ្ងៃទី៣០ ខែធ្នូ បានប្រកាសផ្តន្ទាទោស លោក សម រង្ស៊ី ព្រះតេជព្រះគុណ ប៊ុត ប៊ុនតិញ និងសមាជិកបក្សប្រឆាំង៣នាក់ទៀត ដាក់ពន្ធនាគារពីបទញុះញង់។
លោក សម រង្ស៊ី ប្រាប់អាស៊ីសេរីកាលពីយប់ថ្ងៃទី៣០ ខែធ្នូ ថាការសម្រេចរបស់តុលាការក្រុងភ្នំពេញគឺជាសេចក្ដីសម្រេចទៅតាមអ្នកនយោបាយ ដែលលោកមិនចាំបាច់យកចិត្តទុកដាក់ទេ។ លោកថាលោកក៏មិនពិចារណាប្ដឹងទាស់អ្វីទាំងអស់ក្នុងសំណុំរឿងទាំងនេះ៖ «ខ្ញុំមិនចាំបាច់ឆ្លើយឆ្លងតវ៉ាអីទៀតទេ ព្រោះយើងដឹងលទ្ធផលមុនអស់ទៅហើយ។ លទ្ធផលហ្នឹងជាសេចក្ដីសម្រេចផ្នែកនយោបាយរបស់អ្នកនយោបាយ ដូច្នេះយើងមិនចាំបាច់ទៅលេងសើចជាមួយតុលាការហ្នឹងទេ ព្រោះតុលាការធ្វើអ្វីៗតាម បញ្ជាថ្នាក់ដឹកនាំប្រទេសកម្ពុជា ថ្នាក់ដឹកនាំនយោបាយ មិនមែនរឿងយុត្តិធម៌ មិនមែនរឿងតុលាការទេ ជារឿងនយោបាយសុទ្ធ។ យើងត្រូវជំរុញអោយមានការផ្លាស់ប្ដូរផ្នែកនយោបាយ ផ្លូវនយោបាយ ដើម្បីយើងរៀបចំប្រព័ន្ធតុលាការហ្នឹងឡើងវិញ អោយចេះកាត់ក្ដីយោងលើច្បាប់ពិតប្រាកដ មិនមែនច្បាប់នៅលើបបូរមាត់ជនផ្ដាច់ការទេ។»
សាលាដំបូងរាជធានីភ្នំពេញប្រកាសសាលក្រមកាលពីព្រឹកថ្ងៃទី៣០ ខែធ្នូ ដោយកាត់អោយលោក សម រង្ស៊ី មានទោស២ឆ្នាំក្នុងសំណុំរឿងពីរផ្សេងគ្នា។ សំណុំរឿងទី១ លោកជាប់ចោទពីបទ«ញុះញង់អោយប្រព្រឹត្តបទឧក្រិដ្ឋជាអាទិ៍» ដែលប្រព្រឹត្តលើបណ្តាញសង្គមហ្វេសប៊ុក ហើយតុលាការកាត់អោយលោកជាប់ពន្ធនាគាររយៈពេល២ឆ្នាំ និងពិន័យជាប្រាក់ចំនួន៤លានរៀល និងសងជំងឺចិត្តចំនួន២ពាន់លានរៀល។ សំណុំរឿងនេះពាក់ព័ន្ធនឹងករណី ដែលលោក សម រង្ស៊ី ត្រូវចោទថាបំភ្លៃព័ត៌មានពាក់ព័ន្ធនឹងការស្លាប់របស់ លោក ហុក ឡង់ឌី អតីតអគ្គស្នងការនគរបាលជាតិ។
ចំណែកសំណុំរឿងទី២វិញ លោក សម រង្ស៊ី ជាប់ចោទពីបទ«ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម» ហើយក៏ត្រូវជាប់ទោសរយៈពេល២ឆ្នាំ និងត្រូវបង់ប្រាក់ពិន័យចំនួន៤លានរៀល។ ជាមួយគ្នានេះតុលាការក៏បានបង្គាប់អោយតាមចាប់ខ្លួន លោក សម រង្ស៊ី មកមកផ្តន្ទាទោសតាមច្បាប់។
គិតមកដល់ពេលនេះ លោក សម រង្ស៊ី ត្រូវចោទប្រកាន់តាមផ្លូវតុលាការសរុបចំនួនជាង១០ករណីហើយ ប្រសិនបើបូកសរុបចំនួនឆ្នាំ ដែលលោកត្រូវតុលាការកាត់អោយមានទោសជាប់ពន្ធនាគារនោះគឺមានចំនួនមិនតិចជាង១៧ឆ្នាំឡើយ។ ក្រៅពីនេះនៅមានរឿងក្ដីមួយចំនួនទៀតនៅមិនទាន់ត្រូវតុលាការកាត់ទោស ឬបើកសវនាការនៅឡើយ។
ក្រៅពីផ្តន្ទាទោស លោក សម រង្ស៊ី តុលាការក្រុងភ្នំពេញ នៅថ្ងៃដដែល បានកាត់អោយ ព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គម មានទោស ជាប់ពន្ធនាគារ១ឆ្នាំ៨ខែ និងពិន័យជាប្រាក់៤លានរៀលពីបទ«ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម» ។ ដូចគ្នានេះដែរ លោក ទុំ ប៊ុនថន ត្រូវជាប់ពន្ធនាគារ១ឆ្នាំ៨ខែ និងពិន័យជាប្រាក់៤លានរៀល។ ចំណែកលោក អ៊ុក ឆុំ និង លាស់ ឆេងឡាយ ត្រូវជាប់ពន្ធនាគារ១ឆ្នាំ៦ខែ និងពិន័យជាប្រាក់ក្នុងម្នាក់២លានរៀល ។ សំណុំរឿងនេះពួកគេត្រូវចោទប្រកាន់ទាក់ទងនឹងការណែនាំមិនអោយពលរដ្ឋសងបំណុលធនាគារ និងស្ថាប័នមីក្រូហិរញ្ញវត្ថុ។
ចៅក្រមសាលាដំបូងក្រុងភ្នំពេញបានបើកសវនាការសំណុំរឿងទាំងនេះកាលពីថ្ងៃទី២១ ខែធ្នូ។
មេធាវី លោក សំ សុគង់ អោយអាស៊ីសេរីដឹងថា ការសម្រេចរបស់ចៅក្រម លោក រស់ ពិសិដ្ឋ នេះបានដាក់ទោសធ្ងន់ធ្ងរពេកដល់កូនក្តីរបស់លោក។ លោកថានឹងពិភាក្សាជាមួយកូនក្ដីពីរឿងក្ដីនេះបន្ថែមទៀត៖ «ការផ្ដន្ទាទោសដាក់ពន្ធនាគាររហូតដល់២ឆ្នាំ បើយើងពិនិត្យពីមាត្រាច្បាប់ ដែលចែងពីបទញុះញង់ហ្នុងគឺកម្រិតទោសចាប់ពី៦ខែ ទៅ២ឆ្នាំ ហើយការផ្ដន្ទាទោសហ្នឹងគឺជាអតិបរមា គឺខ្ពស់បំផុតនៃច្បាប់។ ខ្ញុំជាមេធាវីមិនដែលឃើញមានតុលាការផ្ដន្ទាទោសរហូតដល់ខ្ពស់កប់បែបហ្នឹងទេ។ ទី២រឿងនេះទើបនឹងប្រកាសកាលពីព្រឹកម៉ិញ ខ្ញុំនឹងជួបពិភាក្សាជាមួយកូនក្ដី ប្រសិនបើកូនក្ដីគាត់ចង់បន្តរឿងនេះទៅសាលាឧទ្ធរណ៍ដោយសាររឿងនេះមិនយុត្តិធម៌ចំពោះគាត់ ខ្ញុំនឹងរៀបចំបណ្ដឹងឧទ្ធរណ៍ជូនពួកគាត់។»
ក្នុងចំណមអ្នកដែលត្រូវផ្ដន្ទាទោសនោះមានសមាជិកក្រុមប្រឹក្សាជាប់ឆ្នោតស្រុកបវេល លោក លាស់ ឆេងឡាយ និងមេឃុំឃ្លាំងមាស ស្រុកបវេល លោក អ៊ុក ឆុំ កំពុងជាប់ឃុំបណ្ដោះអាសន្ន បន្ទាប់ពីត្រូវអាជ្ញាធរចាប់ខ្លួនកាលពីថ្ងៃទី១០ ខែកក្កដា។
ក្នុងឆ្នាំ២០២០នេះ អាជ្ញាធរ បានចាប់ខ្លួន មានសកម្មជនបក្សប្រឆាំង និងសកម្មជនសិទ្ធិមនុស្ស សកម្មជន សង្គម អ្នកសារព័ត៌មាន និងយុវជនជាង៥០នាក់ហើយ។ នៅថ្ងៃទី៣០ ខែធ្នូម្សិលម៉ិញអាជ្ញាធររបបក្រុងភ្នំពេញបានបញ្ជូនស្រ្តី៣នាក់ទៅឃុំខ្លួនពន្ធនាគារព្រៃស ក្នុងនោះរួមមាន លោកស្រី ហុង អាន និង លោកស្រី សាន ស្រីនៀត និងម្នាក់ទៀតលោកស្រីប៉ៃ រ៉េន។ អ្នកទាំងបីត្រូវបានសមត្ថកិច្ចចាប់ខ្លួនកាលពីថ្ងៃទី ២៨និង២៩ ខែធ្នូ។ តុលាការបានចោទប្រកាន់អ្នកទាំង៣ពីបទបទញុះញង់ឱ្យប្រព្រឹត្តបទឧក្រិដ្ឋជាអាទិ៍។
ក្រុមអង្គការសង្គមស៊ីវិលជាតិ និងអន្តរជាតិ សុទ្ធតែចាត់ទុកថា សំណុំរឿងប្រឆាំងអ្នកនយោបាយបក្សប្រឆាំង នៅកម្ពុជា មានចរិតនយោបាយ និងជំរុញឱ្យមានការដោះស្រាយតាមបែបនយោបាយ ទើបអាចបញ្ចប់វិបត្តិនេះបានជាជាងការប្រើប្រាស់ប្រព័ន្ធតុលាការ។
ក្រុមអ្នកសិទ្ធិមនុស្សក្នុងស្រុក និងអង្គការអន្តរជាតិ រួមទាំងទីភ្នាក់ងារអង្គការសហប្រជាជាតិផង បានទាមទារអោយរដ្ឋាភិបាលកម្ពុជាបញ្ឈប់ការយាយី និងការចោទប្រកាន់ទាំងបំពានច្បាប់ លើអ្នកការពារសិទ្ធិមនុស្ស អ្នករិះគន់ អ្នកនយោបាយ ហើយត្រូវធ្វើយ៉ាងណាដោះលែងអ្នកកំពុងជាប់ឃុំដោយការចោទប្រកាន់ទាំងបំពាន ឬតាមទំនើងចិត្តអោយមានសេរីភាពទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
នយោបាយ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- ពលរដ្ឋខ្មែរនៅប្រទេសនូវែលហ្សេឡង់ធ្វើបាតុកម្មប្រឆាំងគម្រោង CLV-DTA និងទាមទារស្ដារប្រជាធិបតេយ្យ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា