មេបក្សប្រឆាំង លោក សម រង្ស៊ី បន្តអំពាវនាវដល់សហគមន៍អន្តរជាតិ ឲ្យដាក់ទណ្ឌកម្មលើសមាជិកគ្រួសារលោក ហ៊ុន សែន និងមន្ត្រីកំពូលៗមួយចំនួន ដែលគប់គិតគ្នាបំផ្លាញលទ្ធិប្រជាធិបតេយ្យ និងរំលោភសិទ្ធិមនុស្ស។ ប៉ុន្តែអ្នកនាំពាក្យ បក្សកាន់អំណាច យល់ថា ការអំពាវនាវរបស់លោក សម រង្ស៊ី នេះ ពុំមានតម្លៃឡើយ។
លោក សម រង្ស៊ី ថ្លែងជាភាសាអង់គ្លេសនៅក្នុងវេទិកាសេរីភាពទីក្រុងអូស្លូ (Oslo )ប្រទេសន័រវែស (Norway) ដែលរៀបចំដោយសមាជសេរីភាពពិភពលោក(WLC)កាលពីថ្ងៃទី៣ ខែមិថុនា ថា លទ្ធិប្រជាធិបតេយ្យនិងសិទ្ធិមនុស្សនៅប្រទេសកម្ពុជា បានធ្លាក់ចុះធ្ងន់ធ្ងរ។ ប្រធានស្តីទីគណបក្សសង្គ្រោះជាតិ លោក សម រង្ស៊ី បន្តថា កម្ពុជា មិនដែលស្គាល់ការបោះឆ្នោតពិតប្រាកដម្តងណាទេតាំងពីឆ្នាំ១៩៩៣មក។ ជាង៤០ឆ្នាំហើយកម្ពុជាត្រូវបានត្រួតត្រាដោយគ្រួសារលោក ហ៊ុន សែន ដែលជិះជាន់ និងសម្លាប់សិទ្ធិសេរីភាពរបស់ប្រជាពលរដ្ឋខ្មែរ។ លោកថ្លែងទៅកាន់អ្នកចូលរួមមកពីជុំវិញពិភពលោកថា ក្រោយពីលោក ហ៊ុន សែន កម្ទេចគណបក្សប្រឆាំង អ្នករិះគន់ និងអ្នកសារព័ត៌មានឯករាជ្យហើយនោះ លោកបានផ្ទេរអំណាចឲ្យកូនប្រុសគឺលោក ហ៊ុន ម៉ាណែត។ ប៉ុន្តែលោកមើលឃើញថា កូនប្រុសរបស់មេដឹកនាំផ្ដាច់ការរូបនេះ កាន់តែអាក្រក់ដើម្បីការពារកេរដំណែលឪពុករបស់ខ្លួន។ លោក ហ៊ុន ម៉ាណែត មិនត្រឹមតែមិនដោះលែងអ្នកទោសនយោបាយជាង ៦០នាក់នោះទេ ថែមទាំងចាប់អ្នកនយោបាយបក្សប្រឆាំងបន្ថែម និងបន្តបណ្តេញពលរដ្ឋចេញពីដីធ្លី។
ទោះជាយ៉ាងណា មេបក្សប្រឆាំងរូបនេះ បញ្ជាក់ថា ពលរដ្ឋខ្មែរ មិនអាចក្រោកឈរតែឯងបានទេ។ កម្ពុជា ត្រូវការការអន្តរាគមន៍ជាបន្ទាន់ពីសហគមន៍អន្តរជាតិដើម្បីការពារ និងពង្រឹងស្ថាប័នប្រជាធិបតេយ្យ និងការពារសេរីភាពរបស់ប្រជាពលរដ្ឋខ្មែរ។ លោក អំពាវនាវដល់ម្ចាស់ជំនួយអន្តរជាតិឲ្យបញ្ឈប់ផ្តល់លុយដល់របប ដែលបានរំលោភលើឆន្ទៈប្រជាពលរដ្ឋ ។ក្រៅពីនេះ លោក អំពាវនាវឲ្យសហគមន៍អន្តរជាតិ ដាក់ទណ្ឌកម្មទៅលើសមាជិកគ្រួសារលោក ហ៊ុន សែន និងបុគ្គលគន្លឹះមួយចំនួននៅក្នុងរបបដឹកនាំសព្វថ្ងៃ មានដូចជាអតីតមេប៉ូលិស និងបច្ចុប្បន្នជាឧបនាយករដ្ឋមន្ត្រីលោក នេត សាវឿន ជាដើម។ លោក សម រង្ស៊ី ជឿថា ការដាក់ទណ្ឌកម្មពីប្រទេសលោកសេរីនេះ ដើម្បីធានាថា គ្មានមុខជំនួញណាមួយជាមួយក្រុមមេដឹកនាំដែលមានបាតដៃប្រឡាក់ឈាមនិងជនផ្ដាច់ការ និងជំរុញឲ្យអ្នកកាន់អំណាច កែលម្អការគោរពសិទ្ធិមនុស្សឲ្យស្របតាមស្តង់ដារអន្តរជាតិ។
ទាក់ទងនឹងរឿងនេះ អ្នកនាំពាក្យបក្សកាន់អំណាច លោក សុខ ឥសាន សុំឆ្លើយតបយ៉ាងខ្លីថា ការអំពាវនាវរបស់លោក សម រង្ស៊ី នេះ ជារឿងដដែលៗ ប៉ុន្តែពុំបានប្រយោជន៍អ្វីឡើយ។
លោក សុខ ឥសាន៖ «តាំងពីនៅអាមេរិក អឺរ៉ុបរហូតដល់អូស្ត្រាលី សួរថា តើប្រទេសមហាអំណាចទាំងអស់ដែលខ្ញុំរៀបរាប់មិញនេះ គេយកចិត្តទុកដាក់ចំពោះការអំពាវនាវរបស់ជនទុច្ចរិតនេះទេ?អ៊ីចឹងខ្ញុំមិនបាច់ឆ្លើយតបទេ។ រាល់ការអំពាវនាវរបស់ទណ្ឌិតមេឧទ្ទាមក្រៅច្បាប់អត់តម្លៃទេ មិនបាច់ឆ្លើយតបទេ»។
ទោះជាយ៉ាងណា មកទល់ពេលនេះ មានមន្ត្រីជាន់ខ្ពស់ និងមេឈ្មួញគ្រាក់ៗ នៃរបបលោក ហ៊ុន សែន សរុប ៥នាក់ហើយ រួមទាំងគ្រួសាររបស់ពួកគេផង បានទទួលរងទណ្ឌកម្មបង្កកទ្រព្យសម្បត្តិ និងរឹតត្បិតទិដ្ឋាការពីសហរដ្ឋអាមេរិក។មន្ត្រីទាំងនោះ រួមមាន លោក ហ៊ីង ប៊ុនហៀង ដែលជាមេបញ្ជាការនៃបញ្ជាការដ្ឋានអង្គរក្សរបស់លោក ហ៊ុន សែន លោក គន់ គីម លោក ចៅ ភិរុណ លោក ទៀ វិញ និងលោក ទ្រី ភាព ដែលជាឈ្មួញឈើល្បីឈ្មោះ។ ទន្ទឹមនឹងនេះ សហរដ្ឋអាមេរិក ក៏បានដាក់ទណ្ឌកម្មលើក្រុមហ៊ុនគ្រប់គ្រងដោយរដ្ឋអំណាចចិន ឈ្មោះ UDG ដែលកំពុងអនុវត្តគម្រោងអភិវឌ្ឍន៍ខ្នាតយក្សនៅតំបន់តារាសាគរក្នុងខេត្តកោះកុង។ ដោយឡែក គ្រួសារលោក ហ៊ុន សែន មានទាំងកូនបង្កើត និងកូនប្រសារ ព្រមទាំងក្រុមមន្ត្រីជាន់ខ្ពស់ជាច្រើនរូបទៀត ដូចជា លោក ស ខេង លោក ទៀ បាញ់ លោក អូន ព័ន្ធមុនីរ័ត្ន លោក កើត រិទ្ធ និងលោក ឱម យិនទៀង ជាដើម ក៏ជាប់ឈ្មោះក្នុងបញ្ជីខ្មៅនៃការដាក់ទណ្ឌកម្មរបស់សហរដ្ឋអាមេរិកដែរ។
ប្រធានអង្គការសម្ពន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីសប្រចាំអូស្ត្រាលីលោក អ៊ិន ណាត មានប្រសាសន៍ថា ប្រសិនបើរដ្ឋាភិបាលកម្ពុជា នៅតែមិនព្រមស្តារប្រជាធិបតេយ្យ និងការគោរពសិទ្ធិមនុស្ស ឲ្យស្របតាមរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីសទេ ការអំពាវនាវរបស់លោក សម រង្ស៊ី ឲ្យដាក់ទណ្ឌកម្មពីប្រទេសលោកសេរី នឹងមានឥទ្ធិពល។
លោក អ៊ិន ណាត៖ «បញ្ហាប្រទេសកម្ពុជារាល់ថ្ងៃនេះ គឺវាជាបញ្ហានយោបាយដែលធ្វើឲ្យរាំងស្ទះគ្រប់ផ្នែកនៃការអភិវឌ្ឍប្រទេស។ ខ្ញុំមើលឃើញថា មានកិច្ចព្រមព្រៀងសន្តិភាពទីក្រុងប៉ារីសទេ ដែលអាចជួយប្រទេសខ្មែរបាន»។
មិនមែនតែលោក សម រង្ស៊ី ទេ រដ្ឋាភិបាលប្រទេសប្រជាធិបតេយ្យធំៗ និងក្រុមអង្គការជាតិ និងអន្តរជាតិ តែងដាស់តឿនម្តងហើយម្តងទៀតឲ្យរដ្ឋាភិបាលលោក ហ៊ុន ម៉ាណែត ស្តារប្រជាធិបតេយ្យ និងគោរពសិទ្ធិមនុស្សឡើងវិញ។ អ្នកឃ្លាំមើលយល់ថា រដ្ឋាភិបាលលោក ហ៊ុន ម៉ាណែត នឹងមិនអាចជៀសផុតពីការដាក់ទណ្ឌកម្មពីប្រទេសលោកសេរីនោះទេ ប្រសិនបើផ្គើនមិនព្រមស្ដារប្រជាធិបតេយ្យ និងការគោរពសិទ្ធិមនុស្សទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។