ជំទប់​ទី​២​ ឃុំ​ស្រែគរ​ពី​បក្ស​ភ្លើងទៀន​ខេត្ត​ស្ទឹងត្រែង​ប្ដេជ្ញា​ដោះស្រាយ​បញ្ហា​ប្រឈម​របស់​ពលរដ្ឋ​ឱ្យ​ល្អ

ដោយ សុជីវី
2022.06.15
Share on WhatsApp
Share on WhatsApp
ជំទប់​ទី​២​ ឃុំ​ស្រែគរ​ពី​បក្ស​ភ្លើងទៀន​ខេត្ត​ស្ទឹងត្រែង​ប្ដេជ្ញា​ដោះស្រាយ​បញ្ហា​ប្រឈម​របស់​ពលរដ្ឋ​ឱ្យ​ល្អ អតីត​មេឃុំ​ស្រែគរ ស្រុក​សេសាន ខែត្រ​ស្ទឹងត្រែង មក​ពី​គណបក្ស សម រង្ស៊ី លោក សៀក មេគង្គ ផ្ដល់​បទសម្ភាសន៍​ដល់​អាស៊ីសេរី កាល​ពី​ថ្ងៃ​ទី​២១ ខែ​មីនា ឆ្នាំ​២០១៧។
RFA

ជំទប់​ទី​២​ឃុំ​ស្រែគរ​ជាប់ឆ្នោត មក​ពី​គណបក្ស​ភ្លើងទៀន​ខេត្តស្ទឹងត្រែង គឺ​លោក សៀក មេគង្គ ប្ដេជ្ញា​ជំរុញ​ឱ្យ​មាន​ដំណោះស្រាយ រាល់​បញ្ហា​ប្រឈម​របស់​ពលរដ្ឋ​​ ដែល​រង​ផល​ប៉ះពាល់​ដោយសារ​ទំនប់​វារីអគ្គិសនី​សេសាន​ក្រោម​ពីរ។ អតីត​មេឃុំ​ស្រែគរ​រូប​នេះ សង្កេត​ឃើញ​ថា អាជ្ញាធរ​មូលដ្ឋាន​ខេត្ត​ស្ទឹងត្រែង មិនសូវ​អើពើ ដោះស្រាយ​ក្តី​កង្វល់​របស់​ពលរដ្ឋ ដែល​បដិសេធ​មិន​ទទួល​គោល​នយោបាយ​សំណង​ពី​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពីរ​នោះ​ទេ ស្រប​ពេល​ដែល​គ្មាន​វត្តមាន​គណបក្ស​ប្រឆាំង​កាល​ពី​អាណត្តិ​មុន។

ជំទប់​ទី​២​ ឃុំ​ស្រែគរ​ជាប់ឆ្នោត មកពី​គណបក្ស​ភ្លើងទៀន ស្រុក​សេសាន ប្រកាស​ជំហរ​ថា នឹង​ប្រឹងប្រែង​បំពេញ​តួនាទី និង​ភារកិច្ច​ឱ្យ​ត្រឹមត្រូវ​ក្នុងនាម​ជា​អាជ្ញាធរ​បម្រើ​ពលរដ្ឋ ដោយ​មិន​ប្រកាន់​បក្ខពួក​និយម និង​មិន​ប្រព្រឹត្ត​អំពើពុករលួយ។

ជំទប់​ទី​២​ ឃុំ​ស្រែគរ ជាប់ឆ្នោត​គណបក្ស​ភ្លើងទៀន លោក សៀក មេគង្គ ប្រាប់​វិទ្យុ​អាស៊ីសេរី នៅ​ថ្ងៃទី១៤ មិថុនា​ថា នៅ​ឃុំ​របស់​លោក​រស់នៅ​មាន​បញ្ហា​ប្រឈម​មួយ​ចំនួន ដែល​អាជ្ញាធរ​មូលដ្ឋាន​ខេត្ត​នេះ មិន​អើពើ​ដោះស្រាយ​ទាល់តែសោះ​ជាច្រើន​ឆ្នាំ​មក​ហើយ​។ លោក​បន្ត​ថា ពលរដ្ឋ​ប្រមាណ ៥០​គ្រួសារ បូករួម​ទាំង​ពលរដ្ឋ​បំបែក​គ្រួសារ ដែល​បដិសេធ​មិន​ទទួល​យក​គោលនយោបាយ​សំណង​ពី​ក្រុមហ៊ុន នៅតែ​រង់ចាំ​ដំណោះស្រាយ​ពី​អាជ្ញាធរ​ជាង ៤​ឆ្នាំ​មក​ហើយ ស្រប​ពេល​ដែល​ផ្ទះសម្បែង និង​ភូមិកំណើត របស់​ពួកគាត់​បាន​ក្លាយ​ជា​ផ្ទៃ​អាង នៃ​ទំនប់​វារីអគ្គិសនី​សេសាន​ក្រោម​ពីរ។

លោក​បន្ថែម​ថា ក្រុម​ពលរដ្ឋ​ទាំងនោះ កំពុង​រស់​នៅ​លើ​ទីទួល​សុវត្ថិភាព ដែល​ពួកគាត់​បាន​បង្កើត​ភូមិ​ថ្មី​ដោយ​ខ្លួនឯង បន្ទាប់ពី​ក្រុមហ៊ុន​បាន​បិទទ្វារ​ទឹក​ពន្លិច​ផ្ទះសម្បែង និង​ភូមិកំណើត​របស់​ពួកគាត់​កាលពី​ចុង​ឆ្នាំ​២០១៧៖ «ករណី​សំណង​នៅ​ភូមិ​ស្រែគរ​ចាស់​មិនទាន់​បាន ការ​ធ្វើ​ប័ណ្ណ​សមធម៌​ក្តី​មានការ​រើសអើង អាហ្នឹង​យើង​ឱ្យ​កែ​ឡើងវិញ​ទាំងអស់ អត់​មាន​បក្ខពួក​និយម​បាន​ហើយ​។ យើង​ប្ដេជ្ញា​ចិត្ត​ថា នឹង​ធ្វើ​អស់​លទ្ធភាព ព្រោះ​កៅអី​ពលរដ្ឋ​តែងតាំង​ឱ្យ​យើង»

លោក សៀក មេគង្គ បន្ថែម​ថា ក្រុម​ពលរដ្ឋ​ទាំងនោះ តែងតែ​ទាមទារ​សំណង​ថ្លៃ​ខូចខាត​ផ្ទះសម្បែង និង​ស្រែចម្ការ​របស់​ពួកគាត់ ប៉ុន្តែ​ក្រុមហ៊ុន និង​អាជ្ញាធរ​ខេត្ត​នេះ នៅ​មិន​ទាន់​ដោះស្រាយ​ឱ្យ​ជ្រះ​ស្រឡះ​នៅឡើយ​ទេ។ លោក​ថា ក្រុមហ៊ុន និង​អាជ្ញាធរ នៅតែ​បង្ខំ​ឱ្យ​ពលរដ្ឋ​ទាំងនោះ​ឯកភាព​ទទួល​យក​គោលនយោបាយ​សំណង ដែល​ពួកគាត់​មិន​ពេញចិត្ត​។ លោក​ថា តួនាទី​ជា​ជំទប់​ទី​២ បើ​ទោះបីជា​ពុំ​សូវ​មាន​ឥទ្ធិពល​ក្តី តែ​លោក​នឹង​រក​មធ្យោបាយ ជំរុញ​ឱ្យ​អាជ្ញាធរ​ដោះស្រាយ​បញ្ហា​ប្រឈម​ទាំងនេះ​ជូន​ពលរដ្ឋ​ឱ្យ​បាន​ឆាប់ ដើម្បី​សម្រាលទុក្ខ​លំបាក​របស់​ពលរដ្ឋ។

ឃុំ​ស្រែគរ ស្រុក​សេសាន ខេត្ត​ស្ទឹងត្រែង មាន​គណបក្ស​នយោបាយ ៣ ចូលរួម​ប្រកួតប្រជែង​ការ​បោះឆ្នោត គឺ​គណបក្ស​ប្រជាជន​កម្ពុជា គណបក្ស​ភ្លើងទៀន និង​គណបក្ស​ហ៊្វុនស៊ិនប៉ិច​។ លទ្ធផល​បណ្ដោះអាសន្ន​របស់​គ..ប បន្ទាប់​ពី​រាប់​សន្លឹកឆ្នោត​បង្ហាញ​ថា គណបក្ស​ភ្លើងទៀន​ទទួល​បាន​សំឡេង ៤៥៩​សំឡេង ហើយ​គណបក្ស​ប្រជាជន​កម្ពុជា​ទទួល​បាន ៩៧៤​សំឡេង ក្នុង​ចំណោម ៥​អាសនៈ។

លោក សៀក មេគង្គ ធ្លាប់​ជាប់​ឆ្នោត​ជា​មេឃុំ ២​អាណត្តិ​ជាប់ៗ ​គ្នា គឺ​ក្នុង​អាណត្តិ​ទី៣ និង​អាណត្តិ​ទី៤ មក​ពី​គណបក្ស​ប្រឆាំង​។ ក្រោយ​ពី​រំលាយ​គណបក្ស​សង្គ្រោះ​ជាតិ នៅ​ឆ្នាំ​២០១៧ លោក​ក៏​ត្រូវ​បាន​រដ្ឋាភិបាល លោក ហ៊ុន សែន ដក​ចេញ​ពី​តំណែង​ជា​មេឃុំ។

លោក សៀក មេគង្គ ចង់​ឃើញ​អាជ្ញាធរ​គ្រប់​ជាន់ថ្នាក់ បម្រើ​ពលរដ្ឋ​ដោយ​ស្មោះ​ត្រង់ ដោយ​មិន​ប្រកាន់​និន្នាការ​នយោបាយ បក្ខពួក​និយម និង​មិន​ប្រព្រឹត្ត​អំពើពុករលួយ ទើប​ការ​អភិវឌ្ឍ​រីកចម្រើន​លឿន។

ឆ្លើយតប​រឿង​នេះ មេឃុំ​ស្រែគរ មក​ពី​គណបក្ស​ប្រជាជន​កម្ពុជា លោក ហ្វឿន ជឿន បដិសេធ​មិន​ផ្តល់​បទ​សម្ភាស​ដល់​វិទ្យុ​អាស៊ីសេរី​ទេ ដោយ​លោក​ថា កំពុង​ជាប់រវល់។

ចំណែក អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន វិញ លោក​ប្រាប់​វិទ្យុ​អាស៊ីសេរី​ថា សមាជិក​ក្រុមប្រឹក្សាឃុំ​/​សង្កាត់ មាន​ចម្រុះ​គណបក្ស​នយោបាយ ឆ្លុះ​បញ្ចាំង​ថា កម្ពុជា​បាន​អនុវត្ត​ត្រឹមត្រូវ​តាម​គោលការណ៍​លទ្ធិប្រជាធិបតេយ្យ​សេរី​ពហុបក្ស​។ លោក​បញ្ជាក់​ថា សមាជិក​ក្រុម​ប្រឹក្សាឃុំ​/​សង្កាត់​ចម្រុះ​គណបក្ស ត្រូវ​តែ​រួមគ្នា​ធ្វើ​កិច្ចការ ស្របតាម​ច្បាប់​ស្ដីពី​រដ្ឋបាល​ថ្នាក់​ក្រោម​ជាតិ ក្រោម​ការ​ពិនិត្យ និង​តាម​ពី​ក្រសួង​មហាផ្ទៃ៖ «កន្លង​ទៅ​គណបក្ស​ប្រជាជន​ធ្វើ​តែ​ម្នាក់ឯង ក៏​អភិវឌ្ឍន៍​ភូមិ​/​ឃុំ​បាន​ដែរ វា​អត់​មានអី​ទាក់ទង​នឹង សមាសភាព​បក្ស​ប្រឆាំង​ផង​ហ្នឹង។ អានេះ​យើង​គោរព​ឆន្ទៈ​ពលរដ្ឋ​ឱ្យ​បោះឆ្នោត​សមាសភាព​ចម្រុះ គណបក្ស​ត្រូវ​រួមគ្នា​ធ្វើការ»

ជុំវិញ​រឿង​នេះ មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក ខេត្តស្ទឹងត្រែង លោក ប៊ី វ៉ាន់នី យល់​ថា សមាជិក​ក្រុមប្រឹក្សាឃុំ​/​សង្កាត់ មាន​ចម្រុះ​គណបក្ស​នយោបាយ អាច​នឹង​កាត់បន្ថយ​អំពើពុករលួយ និង​ភាព​មិន​ប្រក្រតី​នៅ​មូលដ្ឋាន​បាន​ច្រើន​។ លោក​រំពឹង​ថា លោក សៀក មេគង្គ អាច​នឹង​រក​មធ្យោបាយ​ជំរុញ​ឱ្យ​មាន​ដំណោះស្រាយ​រាល់​បញ្ហា​ប្រឈម​របស់​ពលរដ្ឋ​បាន​ល្អ ប្រសើរ​ជាង សមាជិក​ក្រុម​ប្រឹក្សាឃុំ​បក្ស​តែមួយ​៖ «បេក្ខជន​គណបក្ស​ភ្លើងទៀន ជា​ឱកាស​របស់​យើង បម្រើ​ពលរដ្ឋ​ក្នុង​ឃុំ​ហ្នឹង​យើង​ត្រូវតែ ធ្វើ​យ៉ាងណា​បង្ហាញ​ស្នាដៃ​ឱ្យ​ពលរដ្ឋ​បានឃើញ គោលនយោបាយ និង ឆន្ទៈ​របស់​យើង ក្នុង​ការ​ចូលរួម​ដោះស្រាយ​បញ្ហា​ពលរដ្ឋ​ភូមិ​ឃុំ»

ឃុំ​ស្រែគរ មាន​ពីរ​ភូមិ គឺ​ភូមិ​ស្រែគរ​១ និង​ភូមិ​ស្រែគរ​២ និង​មាន​ប្រជាជន​រស់នៅ​ជាង ២​ពាន់​ ៥០០​នាក់ ស្មើនឹង​ជិត ១​ពាន់​គ្រួសារ​។ ឃុំ​នេះ​ឋិត​ក្នុង​ផ្ទៃ​អាង​នៃ​ទំនប់​វារីអគ្គិសនី​សេសាន​ក្រោម​ពីរ ហើយ​ត្រូវ​បាន​ជម្លៀស​ប្ដូរ​មក​ទីតាំង​ថ្មី ឆ្ងាយ​ពី​ភូមិ​ចាស់​ជាង ១០​គីឡូម៉ែត្រ នៅ​គ្រា​ដែល​មាន​វត្តមាន​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពី​ការ​ចុះ​សិក្សា និង​សាងសង់​ទំនប់ កាលពី​ឆ្នាំ​២០១២៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
លោក ហ៊ុន សែន ទទួល​ស្គាល់​ថា ការ​ដោះ​ស្រាយ​បញ្ហា​ភូមា ដែល​លោក​ធ្វើ​ជា​ប្រធាន​អាស៊ាន​គ្មាន​ភាព​ជឿនលឿន​ទេ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល