មន្ត្រីជាន់ខ្ពស់បក្សសង្គ្រោះជាតិថា មិនផ្ដាច់ខ្លួនពីលោក សម រង្ស៊ី តាមការចង់បានរបស់លោក ហ៊ុន សែន ឡើយ
2023.01.21
(ឆ្វេង) លោក ម៉ែន សុថាវរិន្ត្រ ជាមន្ត្រីជាន់ខ្ពស់គណបក្សសង្គ្រោះជាតិ
រូប៖ ហ្វេសប៊ុកលោក ម៉ែន សុថាវរិន្ត្រ
មន្ត្រីជាន់ខ្ពស់បក្សសង្គ្រោះជាតិមួយចំនួន ប្ដេជ្ញាចិត្តមិនផ្ដាច់ខ្លួនចេញពីប្រធានបក្សសង្គ្រោះជាតិ លោក សម រង្ស៊ី ជាថ្នូរនឹងការបានត្រឡប់ចូលកម្ពុជាវិញ តាមការចង់បានរបស់លោក ហ៊ុន សែន ឡើយ។ អ្នកវិភាគនយោបាយយល់ថា យុទ្ធសាស្ត្របំបែកបំបាក់ផ្ទៃក្នុងបក្សប្រឆាំងរបស់លោក ហ៊ុន សែន គ្មានប្រសិទ្ធភាពនោះទេ។
មន្ត្រីជាន់ខ្ពស់គណបក្សសង្គ្រោះជាតិ ដែលបច្ចុប្បន្នបាននិរទេសខ្លួននៅក្រៅប្រទេស ចាត់ទុកសម្ដី លោក ហ៊ុន សែន ដែលហៅពួកគេចូលស្រុកវិញ ដោយពុំមិនមានការចាប់ខ្លួននោះថា គ្រាន់តែជាយុទ្ធសាស្ត្របំបែកបំបាក់កម្លាំងអ្នកប្រជាធិបតេយ្យ និងជាវោហារសាស្ត្រនយោបាយ ដែលមិនអាចយកជាផ្លូវការបាននោះទេ។
មន្ត្រីជាន់ខ្ពស់បក្សសង្គ្រោះជាតិ ដែលនៅក្បែរលោក សម រង្ស៊ី គឺលោក ម៉ែន សុថាវរិន្ទ្រ ប្រាប់វិទ្យុអាស៊ីសេរីថា នៅថ្ងៃទី២០ ខែមករាថា រូបលោកចង់ឱ្យបក្សកាន់អំណាច បង្កើតវប្បធម៌ជជែកគ្នាដោះស្រាយបញ្ហានយោបាយដើម្បីឈានទៅរកបោះឆ្នោត ដោយសេរី ត្រឹមត្រូវ និងយុត្តិធម៌ ល្អជាជាងដែលចង់ឱ្យភាគីម្ខាងបែកបាក់គ្នា។
លោក ម៉ែន សុថាវរិន្ទ្រ៖ «យើងអត់អាចបោះបង់ លោក សម រង្សី បានទេ ហើយដូចគណបក្សប្រជាជន គាត់មិនអាចបោះបង់លោក ហ៊ុន សែន បានដែរ។ ដូច្នេះតើ ជាថ្នាក់ដឹកនាំយើងមិនអាចកម្ចាត់នរណាមួយទេយើងខ្មែរដូចគ្នា។ ឥឡូវខ្លាចអី លោកនាយករដ្ឋមន្ត្រីខ្លាចអី ឥឡូវនេះគាត់មានប្រជាប្រិយភាពខ្លាំងណាស់ គាត់បានផ្សាយថានៅអាមេរិក នៅក្រៅប្រទេសគាំទ្រគាត់ច្រើនណាស់ នៅស្រុកខ្មែរគាំទ្រគាត់ច្រើនណាស់ ហើយថាអ្នកចុះចូលគណបក្សប្រជាជនច្រើនណាស់ ឥឡូវនេះគេមានភ្លើងទៀន គេមានបក្សប្រឆាំងក្រៅរដ្ឋាភិបាលច្រើន ហើយឥឡូវឱ្យពួកខ្ញុំទៅវិញ មានលោកប្រធានសម រង្សី ទៅវិញ»។
ការលើកឡើងនេះ គឺបន្ទាប់ពីលោក ហ៊ុន សែន បានហៅមន្ត្រីជាន់ខ្ពស់មួយរូប គឺលោក ហូរ វ៉ាន់ និងអ្នកនយោបាយមួយចំនួនឱ្យវិលត្រឡប់មកកម្ពុជាវិញ ប្រសិនអ្នកទាំងនោះព្រមផ្ដាច់ខ្លួនពីលោក សម រង្សី។ មកទល់ពេលនេះ លោក ហូរ វ៉ាន់ មិនទាន់បញ្ជាក់អំពីជំហររបស់លោកច្បាស់លាស់យ៉ាងណានោះឡើយទេ ប៉ុន្តែកាលពីថ្ងៃទី១៩ មករា លោកប្រាប់អាស៊ីសេរីថា លោកសុំពេលពិចារណាសិន។
ចំណែកមន្ត្រីជាន់ខ្ពស់គណបក្សសង្គ្រោះជាតិម្នាក់ទៀត លោក អ៊ុំ សំអាន ក៏ប្រកាសជំហរថា មិនត្រឡប់ទៅកម្ពុជា ដូចលោក ហ៊ុន សែន ចង់បាននោះដែរ ហើយលោក អះអាងថា ពេលនេះមិនមានមន្រ្តី ឬសកម្មជនណាមួយចាញ់បោក លោក ហ៊ុន សែន នោះដែរ។ លោកថា ការហៅរបស់លោក ហ៊ុន សែន ដោយកំហឹងនេះ គ្រាន់តែដើម្បីឌឺដង ដាក់មន្ត្រីបក្សសង្គ្រោះជាតិ និងលោក សម រង្ស៊ី តែប៉ុណ្ណោះ។
លោក អ៊ុំ សំអាន៖ «ដូចក្នុងរបប ប៉ុល ពត អ៊ីចឹងឯង។ ប៉ុល ពត បានអំពាវនាវ ដល់បញ្ញវន្ត អ្នកស្នេហាជាតិហ្នឹងឱ្យចូលស្រុកវិញដើម្បីចូលរួមអភិវឌ្ឍប្រទេសជាតិ ពេលទៅដល់ ប៉ុល ពត យកទៅសម្លាប់អស់ អាហ្នឹងយើងឃើញជាក់ស្ដែងអ៊ីចឹង។ ដូច្នេះយើងមិនអាចចាញ់ល្បិចកលរបស់លោក ហ៊ុន សែន នោះទេ ដែលជាល្បិចកលរាក់កំផែល ហើយយើងទៅហ្នឹង បិទមាត់ជិតហើយ មិនហ៊ានរិះគន់បញ្ហាដែលលោកហ៊ុន សែន ដឹកនាំផ្ដាច់ការតវង្សត្រកូលនោះទេ»។
ជុំវិញរឿងនេះ ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ថ្លែងថា មកដល់ពេលនេះមិនទាន់ឃើញមានមន្ត្រីបក្សសង្គ្រោះជាតិណាមួយស្នើសុំចូលមកកម្ពុជាវិញនោះទេ។ ទោះយ៉ាងណាក្ដី លោកថា ការលើកឡើងរបស់រដ្ឋាភិបាល គឺដើម្បីឱ្យអ្នកនយោបាយ ដែលមិនជាប់ពាក់ព័ន្ធនឹងលោក សម រង្ស៊ី និងអ្នកដែលចង់ផ្ដាច់ខ្លួន អាចត្រឡប់មកកម្ពុជាវិញដោយសុវត្ថិភាព គ្រាន់តែធ្វើលិខិតស្នើសុំ ទៅតាមនីតិវិធីរបស់តុលាការឱ្យបានត្រឹមត្រូវ។
ទោះជាបែបនេះ សកម្មជនបក្សសង្គ្រោះជាតិម្នាក់ទៀត ដែលភៀសខ្លួននៅប្រទេសថៃ លោកស្រី គិន ស្រីអូន លើកឡើងថា ការវិលត្រឡប់ទៅកម្ពុជាវិញវាជាក្ដីប្រាថ្នារបស់ពលរដ្ឋគ្រប់រូប ប៉ុន្តែសម្រាប់លោកស្រីអះអាងថា មិនអាចទៅកម្ពុជាដោយពុំមានវត្តលោក សម រង្សី នោះទេ។
លោកស្រី គិន ស្រីអូន៖ «ខ្ញុំទៅស្រុកខ្មែរ ក៏ខ្ញុំមិនអាចមានសេរីភាពក្នុងការនិយាយការពិត នៅក្នុងបច្ចុប្បន្ន សង្គមដែលមានអំណាចពុករលួយធ្វើបាបប្រជាពលរដ្ឋស្លូតត្រង់ និយាយហារស្ដីការពិតមិនបាន គឺមិនមានសេរីភាពនោះទេ។ ទោះបីខ្ញុំមិនមានសុវត្ថិភាពនៅស្រុកគេ ប៉ុន្តែ ខ្ញុំអាចមានការនិយាយស្ដីការពិតឆ្លុះបញ្ចាំងក្នុងសង្គមបានខ្លះ»។
ជុំវិញរឿងនេះដែរអ្នកស្រាវជ្រាវការអភិវឌ្ឍសង្គម បណ្ឌិត មាស នី វិញ លោកមើលឃើញថា យុទ្ធសាស្ត្រកម្ចាត់របស់លោក ហ៊ុន សែន មកលើក្រុមលោក សម រង្ស៊ី នៅតែជាយុទ្ធសាស្ត្រសំខាន់ ដែលលោក ហ៊ុន សែន នៅបន្តប្រើ។ តែយ៉ាងណាលោកថា យុទ្ធសាស្ត្រកម្ចាត់នេះមិនអាចមានឥទ្ធិពលខ្លាំងនោះទេ ស្របពេលដែលលោក ហ៊ុន សែន ប្រើសារកំហែងនៅតែមាន។
បណ្ឌិត មាស នី៖ «អ៊ីចឹងបើសិនជាយើងមានការកៀរគរឱ្យចូលមកតែមួយវាអាច យើងសួរសំណួរថាតើពហុបក្សវាទៅណា? បើសិនជាយើងមានចេតនាឱ្យចូលមកតែមួយ។ បើសិនជារដ្ឋាភិបាលនៅក្នុងប្រទេសប្រជាធិបតេយ្យ គឺគេជំរុញឱ្យធ្វើម៉េច គេឱ្យពហុបក្សនឹងវាដើរ ហ្នឹងបានជាការដើរឈានទៅរកប្រជាធិបតេយ្យ បើសិនជាយើងទៅដើរគៀងប្រមូលគេ ហើយបង្ខំឱ្យចូលមកតែមួយ អាហ្នឹងគេហៅថាបាត់នូវរសជាតិប្រជាធិបតេយ្យពហុបក្ស»។
លោក ហ៊ុន សែន ដែលជាមេដឹកនាំក្រាញអំណាចយូរឆ្នាំនៅកម្ពុជា ហើយលោកប្រើតុលាការជាអាវុធ ដើម្បីកម្ចាត់គូប្រកួតនយោបាយណា ដែលហ៊ានរិះគន់លើរូបលោក។ ជាក់ស្ដែង ការប្រកាសម្ដងហើយម្ដងទៀតរបស់លោក ហ៊ុន សែន ដែលអាចសម្រេចឲ្យអ្នកណាម្នាក់ជាប់គុក ឬមិនជាប់គុកទៅតាមអារម្មណ៍របស់លោក។ អ្នកឃ្លាំមើលវាយតម្លៃថា ទង្វើនេះកាន់តែឆ្លុះបញ្ចាំងយ៉ាងច្បាស់ថា បុរសខ្លាំងរូបនេះ មានឥទ្ធិពលលើតុលាការ។
ប្រធានស្ដីទីគណបក្សសង្គ្រោះជាតិ លោក សម រង្ស៊ី ប្រតិកម្មថា ការអំពាវនាវរបស់លោក ហ៊ុន សែន ឲ្យអ្នកគាំទ្រនិងថ្នាក់ដឹកនាំបក្សប្រឆាំងនៅឯនាយសមុទ្រ ផ្ដាច់ខ្លួនពីលោក ដើម្បីបានឱកាសវិលចូលស្រុកវិញនោះ គឺជាគ្រាន់តែជាការបោកបញ្ឆោត ដើម្បីគោលបំណងបញ្ឈប់សកម្មភាពរបស់អ្នកតស៊ូ ដើម្បីសេរីភាព និងយុត្តិធម៌នៅកម្ពុជា។ មេបក្សប្រឆាំងរូបនេះបញ្ជាក់ថា ពួកលោកនៅក្រៅប្រទេស មិនចាញ់បោកលោក ហ៊ុន សែន ឡើយ ហើយផ្ទុយទៅវិញ កាន់តែពង្រឹងផ្លូវចិត្តនិងសាមគ្គីភាពកាន់តែខ្លាំងថែមទៀត។ លោក សម រង្ស៊ី បន្តថា ពេលនេះ លោក ហ៊ុន សែន កំពុងភ័យស្លន់ស្លោខ្លាចទាំងកម្លាំងបែកបាក់ផ្ទៃក្នុង និងកម្លាំងអ្នកប្រជាធិបតេយ្យ ជាពិសេស រូបលោកផ្ទាល់តែម្ដង។ ទន្ទឹមគ្នានេះ លោក ក៏អំពាវនាវឲ្យលោក ហ៊ុន សែន មានចិត្តសឿងបើកផ្លូវឲ្យលោ វិលចូលកម្ពុជាវិញផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
អត្ថបទពេញនិយម
នយោបាយ
- តំណាងរាស្ត្រសភាអឺរ៉ុប ព្រមានថា នឹងមិនមានការផ្លាស់ប្ដូរឡើយ បើអឺរ៉ុបមិនដាក់សម្ពាធលើរដ្ឋាភិបាលកម្ពុជា
- ដំណើររឿងចាប់ឃុំខ្លួន និងដោះលែងលោក យឹម ស៊ីណន
- "ការពង្រីកផ្ទៃដីទ័ពអាកាសនៅរាម នឹងនាំឱ្យសង្ស័យកាន់តែខ្លាំងពីវត្តមានទ័ពចិននៅកម្ពុជា"
- ក្រុមមេដឹកនាំបក្សភ្លើងទៀនផ្ដាំមន្ត្រីកុំចាញ់ការបំភិតបំភ័យ
- អ្នកវិភាគ និងមន្ត្រីបក្សប្រឆាំងថា លោក ហ៊ុន សែន ប្រើប្រាស់អប្បិយជំនឿដើម្បីបោកពលរដ្ឋ