យុទ្ធនាការឃោសនាបោះឆ្នោតក្នុងថ្ងៃទី៦ ឧសភា ថ្នាក់ដឹកនាំនៃគណបក្សភ្លើងទៀន បន្តសកម្មភាពធ្វើយុទ្ធនាការឃោសនារកសំឡេងឆ្នោតនៅខេត្តស្ទឹងត្រែង និងខេត្តរតនគិរី នៅថ្ងៃទី២៥ និង ២៦ ឧសភា។ រីឯគណបក្សកាន់អំណាចវិញ នៅតែបន្តបញ្ជូនសកម្មជនរបស់ខ្លួនចុះចួបពលរដ្ឋតាមផ្ទះ ដោយពន្យល់ប្រាប់ពួកគាត់ ពីកម្មវិធីនយោបាយ និងសមិទ្ធផលនានារបស់គណបក្សប្រជាជនកម្ពុជា។
អ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីនៅថ្ងៃទី ២៦ ឧសភាថា មកទល់ពេលនេះ សកម្មជន និងគណៈកម្មការឃុំ/សង្កាត់នីមួយៗ នៅទូទាំងប្រទេស កំពុងធ្វើសកម្មភាពចុះចួប និងសួរសុខទុក្ខ ពលរដ្ឋ នៅតាមស្នាក់ការភូមិ/ឃុំ ដើម្បីណែនាំ ឱ្យពលរដ្ឋជ្រាបច្បាស់ ពីកម្មវិធីនយោបាយរបស់គណបក្សប្រជាជនកម្ពុជា ដែលមានប្រយោជន៍ដល់ជាតិ និងប្រជាជនពិតប្រាកដ។
លោកថា សកម្មជនគណបក្សរបស់លោក បានពន្យល់ប្រាប់ពលរដ្ឋ ពីលេខរៀងគណបក្សប្រជាជនកម្ពុជា មានលក្ខណៈផ្សេងៗ គ្នា ទៅតាមឃុំ/សង្កាត់នីមួយៗ ដើម្បីឱ្យពលរដ្ឋចង់ចាំ ជាពិសេស មនុស្សចាស់ និងវ័យជរា ដែលមានស្មារតីភ្លេចភ្លាំងច្រើន។ លោកបញ្ជាក់ថា ក្នុងថ្ងៃយុទ្ធនាការនេះ គណបក្សរបស់លោក បានហែក្បូនឃោសនារកសំឡេងឆ្នោតធ្វើឡើងត្រឹមត្រូវ ស្របតាមតាមច្បាប់ និងបទបញ្ញត្តិរបស់ គ.ជ.ប កំណត់៖ « ឃុំសង្កាត់នៅទូទាំងប្រទេសគេធ្វើដូចៗគ្នា គេធ្វើតាមផ្ទះ សំណេះជាមួយពលរដ្ឋ និយាយពីសមទ្ធផល និងកម្មវិធីនយោបាយរបស់គណបក្សប្រជាជនកម្ពុជា ហើយនិយាយពីសមិទ្ធផលឆ្លុះបញ្ចាំងពីផលប្រយោជន៍របស់ជាតិ និងប្រជាជន » ។
រីឯគណបក្សភ្លើងទៀនវិញ ថ្នាក់ដឹកនាំ នៃគណបក្សនេះ បានហែក្បូនទ្រង់ទ្រាយធំ នៅខេត្តស្ទឹងត្រែង និង ខេត្តរតនគិរី រយៈពេល ២ ថ្ងៃ ជាប់គ្នាគឺនៅថ្ងៃទី២៥ និង ២៦ ឧសភា។ យុទ្ធនាការហែក្បូនឃោសនានៅក្នុងខេត្តទាំងពីរនេះមានមនុស្សចូលរួមរាប់រយនាក់។
ក្រៅពីនេះ សកម្មជនគណបក្សភ្លើនទៀន បានចាក់មេក្រូ ចែកខិតប័ណ្ណ និងផ្សព្វផ្សាយពីគោលនយោបាយគណបក្ស នៅតាមមូលដ្ឋានក្នុងខេត្តស្ទឹងត្រែង និងខេត្តរតនគិរី៖ «គណបក្សសមរង្ស៊ី បានធ្វើសមាជវិសាមញ្ញប្តូរឈ្មោះ មកជាគណបក្សភ្លើងទៀន។ នៅថ្ងៃទី ២៧ វិច្ឆិកា ២០២១ តាមរយៈសមាជវិសាមញ្ញ គណបក្សភ្លើងទៀន ដើម្បីធ្វើសកម្មភាពនយោបាយឡើងវិញ ដោយឆ្លងកាត់ឧបសគ្គរាប់មិនអស់ទាំងផ្លូវច្បាប់ និងនយោបាយ ដើម្បីការពារផលប្រយោជន៍ជាតិ»។
មន្ត្រីជាន់ខ្ពស់គណបក្សភ្លើងទៀន លោក សុន ឆ័យ បានថ្លែងប្រាប់អ្នកគាំទ្រ របស់ខ្លួន នៅខេត្តរតនគិរី និងខេត្តស្ទឹងត្រែង ដោយប្រកាសជំហរថា សមាជិកគណបក្សភ្លើងទៀនទាំងអស់ បានយល់ច្បាស់ពី តួនាទីរបស់ខ្លួន ដើម្បីការពារសិទ្ធិសេរីភាពពលរដ្ឋ ដែលជាម្ចាស់អំណាចរបស់ខ្លួនតែមួយគត់៖ «គណបក្សភ្លើងទៀនជាគណបក្សមួយមានអាយុ ២៧ ឆ្នាំគ្រប់គ្រាន់ បម្រើឆន្ទៈពលរដ្ឋ ដោយមិនចាំបាច់នរណាមកបញ្ជា។ គណបក្សភ្លើងទៀនបង្កើតដោយខ្មែរ បម្រើតែខ្មែរមួយគត់ ក្នុងជីវិតនយោបាយ»។
រីឯគណបក្សនយោបាយមួយចំនួនទៀតរួមមាន គណបក្សឆន្ទៈខ្មែរ គណបក្សខ្មែរស្រឡាញ់ជាតិ គណបក្សយុវជនកម្ពុជា គណបក្សប្រជាធិបតេយ្យមូលដ្ឋាន និង គណបក្សសំបុកឃ្មុំសង្គមប្រជាធិបតេយ្យ រួមទាំងគណបក្សមួយចំនួនទៀត បន្តធ្វើសកម្មភាពឃោសនារកសំឡេងឆ្នោតទ្រង់ទ្រាយតូចៗ ដោយចាក់មេក្រូចល័ត បិទបដាតាមដើមឈើ និងចែកខិតបណ្ណ នៅតាមឃុំ/សង្កាត់នាខេត្តមួយចំនួន។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីអ្នកនាំពាក្យ គ.ជ.ប លោក ហង្ស ពុទ្ធា បាននៅឡើយទេ នៅថ្ងៃទី ២៦ ឧសភា ដោយទូរសព្ទហៅចូល តែគ្មានអ្នកលើក។
ប៉ុន្តែប្រធានគណៈកម្មការជាតិរៀបចំការបោះឆ្នោត ហៅកាត់ថា គ ជ ប លោក ប្រាជ្ញ ចន្ទ បានចេញសេចក្តីជូនដំណឹងមួយកាលពីថ្ងៃទី ២៥ ឧសភាដោយណែនាំឱ្យគ្រប់គណបក្សនយោបាយទាំងអស់ មិនត្រូវធ្វើសកម្មទិញទឹកចិត្តម្ចាស់ឆ្នោត ដោយធ្វើសកម្មភាពផ្តល់ជាមធ្យោបាយ ថវិកា និងសម្ភារៈបរិក្ខារផ្សេងៗ។
លោករំឭកឱ្យ គ្រប់គណបក្សនយោបាយទាំងអស់ ត្រូវគោរពឱ្យបានខ្ជាប់ខ្ជួននូវច្បាប់ និងបទបញ្ញត្តិរបស់គ.ជ.ប ក្នុងថ្ងៃធ្វើយុទ្ធនាការនេះ។
ជុំវិញរឿងនេះ នាយកប្រតិបត្តិអង្គការនិចហ្វិក (NICFEC) លោក សំ គន្ធាមី មើលឃើញថា យុទ្ធនាការឃោសនាបោះឆ្នោតកន្លងទៅនេះ មានគណបក្សធំៗចំនួន២ បានធ្វើសកម្មភាពឃោសនារកសំឡេងឆ្នោតលេចធ្លោជាងគេ គឺគណបក្សប្រជាជនកម្ពុជា និងគណបក្សភ្លើងទៀន។ រីឯគណបក្សផ្សេងៗទៀត បានហែក្បូនទ្រង់ទ្រាយតូចៗ ដោយមានរថយន្ត និងម៉ូតូ ជាមធ្យោបាយធ្វើដំណើរ។
លោកបញ្ជាក់ថា ក្នុងចំណោមគណបក្សនយោបាយទាំងអស់ មានគណបក្សភ្លើងទៀន ប្រឈមបញ្ហាច្រើនជាងគេរួមមាន អាជ្ញាធរហាមគណបក្សនេះមិនឱ្យចូលក្រុងតាខ្មៅ ក្រោមហេតុផលស្ទះចរាចរណ៍ ហើយក្រសួងមហាផ្ទៃថ្មីៗនេះក៏បានចេញលិខិតជំទាស់ ករណីតែងតាំងលោក សុន ឆ័យ ជាអនុប្រធានគណបក្សភ្លើងទៀន ផ្ទុយពីលក្ខន្តិកៈគណបក្សនយោបាយ៖ «អាហ្នឹងយើងឃើញ មានបញ្ហាច្រើនគឺគណបក្សភ្លើងទៀនទេ បើគណបក្សផ្សេងៗទៀត ក្រៅពីភ្លើងទៀន ក្នុងចំណោម ១៥ទៀត ដូចអត់មានបញ្ហាអី។ ឃើញមានឡានច្រើនមែន គណបក្សភ្លើងទៀន តែលក្ខណៈស៊ីវិលទេ គ្រាន់តែបិទ Logo តិចៗ គណបក្សហែ»។
យុទ្ធនាការរកសំឡេងឆ្នោតរបស់គណបក្សនយោបាយទាំង១៧ ដែលចូលរួមការបោះឆ្នោតថ្នាក់ក្រោមជាតិថ្ងៃទី៥ ខែមិថុនា ខាងមុខ មានរយៈ ១៤ថ្ងៃចាប់ផ្ដើមពីថ្ងៃទី២១ ខែឧសភា ដល់ថ្ងៃទី០៣ខែមិថុនាខាងមុខ។ ច្បាប់បោះឆ្នោតអនុញ្ញាតឱ្យគណបក្សនយោបាយហែក្បួនទ្រង់ទ្រាយធំនៅតាមមូលដ្ឋានរបស់ខ្លួនត្រឹមពីរដងប៉ុណ្ណោះ ក្នុងកំឡុងពេលឃោសនាបោះឆ្នោត តាមឃុំ/សង្កាត់នីមួយៗ៕