មន្ត្រីគណបក្សភ្លើងទៀនមួយចំនួនបានអះអាងថា ពួកគាត់នឹងទៅបោះឆ្នោត ប៉ុន្តែពួកគាត់នឹងមិនបោះឆ្នោតឱ្យគណបក្សណាមួយ ឬមិនគូសអ្វីលើសន្លឹកឆ្នោតនោះទេ។ ប្រតិកម្មរបស់អ្នកគាំទ្រគណបក្សប្រឆាំងនេះ កើតឡើងក្រោយពេល លោកនាយករដ្ឋមន្ត្រី ហ៊ុន សែន ព្រមានរំលាយគណបក្សភ្លើងទៀន និងចាប់មន្ត្រីគណបក្សប្រឆាំងដាក់ពន្ធនាគារដោយលោកចាត់ទុកសកម្មភាពទាំងនេះ ជាការបំផ្លាញសិទ្ធិពលរដ្ឋ។
មន្ត្រីគណបក្សភ្លើងទៀនថា ពួកគាត់នឹងមិនបោះឆ្នោតឱ្យគណបក្សណាមួយនោះទេ បើទោះជា លោក ហ៊ុន សែន ព្រមានចាប់ដាក់ពន្ធនាគារក្ដី ព្រោះពួកគាត់នៅតែជឿថានៅក្នុងបន្ទប់បោះឆ្នោត មិននរណាម្នាក់មកចាំឃ្លាំមើលនោះទេ។
មន្ត្រីគណបក្សភ្លើងទៀន លោក ផន ផាន់ណា លើកឡើងថា ការបោះឆ្នោតដោយមិនមានវត្តមានគណបក្សភ្លើងទៀននា ពេលខាងមុខនេះ ជាការបោះឆ្នោតដោយមិនសេរី ត្រឹមត្រូវ និងយុត្តិធម៌នោះទេ។ លោក ផន ផាន់ណា បន្តថា ជុំវិញការបង្កើតច្បាប់ ដើម្បីដាក់គំនាប់ឱ្យអ្នកនយោបាយតម្រូវឱ្យត្រូវបោះឆ្នោតខាងមុខមិនបានបម្រើផលប្រយោជន៍ដល់ពលរដ្ឋខ្មែរនោះទេ។
លោក ផន ផាន់ណា៖«បើនិយាយមែនទៅខ្ញុំនឹងទៅចូលរួមបោះឆ្នោត ប្រសិនបើច្បាប់ហ្នឹងចេញ សម្រាប់សកម្មជនទៅចូលរួមបោះឆ្នោតធម្មតា ប៉ុន្តែ យើងទៅមិនប្រាកដថា ទៅគូសឱ្យគណបក្សណា ព្រោះការទៅបោះឆ្នោតសំងាត់ អីចឹងយើងអាចគូសសន្លឹកឆ្នោតចោល គូសខ្វែងចោល ឬសរសេរអ្វីមួយមិនឱ្យសន្លឹកឆ្នោតបានការទៅវាបានហើយ ប្រសិនបើ លោក ហ៊ុន សែន វិសោធនកម្មច្បាប់ចេញជារូបរាង»។
ស្រដៀងគ្នានេះ ពលករខ្មែរនៅប្រទេសថ្ងៃ លោក ម៉ៅ សារ៉ូន លើកឡើងថា លោកនឹងទៅបោះឆ្នោត តែលោកនឹងគូសសន្លឹកឆ្នោតទៅជាមិនបានការ។ លោកថា មូលហេតុដែលលោកធ្វើបែបនេះ ព្រោះគណបក្សភ្លើងទៀនអវត្តមានក្នុងការបោះឆ្នោត។
លោក ម៉ៅ សារ៉ូន៖«លោក ហ៊ុន សែន គំរាមអ៊ីចឹងបានន័យថាឱ្យប្រជាជនទូរទៅមានការព្រួយបារម្ភ ប៉ុន្តែចំណែកខ្ញុំ អត់មានការព្រួយបារម្ភទេ ព្រោះអីការយើងទៅបោះឆ្នោតជាបន្ទប់សុវត្ថិភាព មិនអាចមាននរណាមើលឃើញយើង គូសអី សរសេរអីបានទេ ខ្ញុំសូមផ្ដាំផ្ញើប្រជាពលរដ្ឋគ្រប់រូប កុំមានការព្រួយបារម្ភ ឬព្រួយអ្វីទាំងអស់»។
ប្រតិកម្មរបស់អ្នកគាំទ្របក្សប្រឆាំងនេះ កើតមានឡើងបន្ទាប់ពី លោក ហ៊ុន សែន ព្រមានរំលាយគណបក្សភ្លើងទៀនជាថ្មីទៀត និងចាប់មន្ត្រីបក្សប្រឆាំងដាក់ពន្ធនាគារដែលហ៊ានបំផ្លាញសន្លឹក។ លោក ហ៊ុន សែន ចាត់ទុកថាសកម្មភាពទាំងនេះកំពុងបំផ្លាញសិទ្ធិប្រជារដ្ឋ និងគំរាមឱ្យមន្ត្រីបក្សប្រឆាំងនៅក្នុងប្រទេសទាំងអស់ផ្ដាច់ខ្លួនពីក្រុមប្រឆាំងនៅក្រៅប្រទេស។
លោក ហ៊ុន សែន៖«ឥឡូវវាព្រហើន ស្រែកមកទៀតណាស់ថា ឱ្យចូលទៅគូសបំផ្លាញសន្លឹកឆ្នោត អ៊ីចឹងហែងចាំមើលជាប់គុកប៉ុន្មាន ហើយចាំមើលបង់ផាកប៉ុន្មាន ហ្អែងបង្កអុកឡុកទៀត ទៅ!សាកទៅ!ហើយអាពួកនៅខាងក្រៅ ពួកអាក្រុមនេះកំពុងតែរុញច្រានឱ្យយើងឆ្ពោះទៅរកការរំលាយគណបក្សដែលបញ្ជាពីខាងក្រៅ»។
លោក ហ៊ុន សែន បញ្ជាឱ្យមន្ត្រីរបស់លោកសិក្សាពីលទ្ធភាពកែច្បាប់បោះឆ្នោត ដើម្បីដកហូតសិទ្ធិឈរឈ្មោះបោះឆ្នោតរបស់អ្នកនយោបាយទាំងឡាយណាដែលមិនទៅបោះឆ្នោតជាតិជ្រើសតាំងតំណាងរាស្ត្រអាណត្តិទី៧ នៅថ្ងៃទី២៣ ខែកក្កដា ខាងមុខនេះ។ ការបញ្ជានេះធ្វើឡើងនៅក្នុងសារជាសំឡេងមួយផ្សាយកាលពីយប់ថ្ងៃទី១២ ខែមិថុនា នៅលើទំព័រតេឡេក្រាម (Telegram) របស់លោក ហ៊ុន សែន។
នាយកប្រតិបត្តិអង្គការ ឃ្លាំមើលការបោះឆ្នោតនៅកម្ពុជាហៅកាត់ថា និចហ្វិច (Nicfec) លោក សំ គន្ធាមី លើកឡើងថា ការបោះឆ្នោតគឺជាសេរីភាពរបស់ពលរដ្ឋគ្រប់រូប មិនមែនជាការបង្ខំនោះទេ។ បន្ថែមពីនេះ លោក សំ គន្ធាមី លើកឡើងថាករណីដែលពលរដ្ឋណាទៅបោះឆ្នោត តែមិនចង់បោះឱ្យគណបក្សនយោបាយណាមួយ ពួកគាត់អាចធ្វើបាន ព្រោះការបោះឆ្នោតគឺសំខាន់មិនមាននរណាម្នាក់មកឃ្លាំមើលនោះឡើយ។
លោក សំ គន្ធាមី៖«ទេ!យើងទៅបោះឆ្នោត បោះជាសំងាត់តើ យើងចូលបន្ទប់បោះឆ្នោតជាសំងាត់តើយើងគូសនរណា បក្សណាមាននរណាដឹងយើង លុះត្រាតែយើងប្រាប់គេ មិចគេហៅថាការបោះឆ្នោតជាសំងាត់ យើងបោះឆ្នោតឱ្យនរណាស្រេចតែយើងតើ មាននរណាទៅដឹងលុះត្រាតែយើង ដើរស្រែកប្រាប់គេ ថាបោះឱ្យអ្នកនេះ បោះឱ្យអ្នកនោះ»។
គេនៅមិនទាន់ដឹងច្បាស់នៅឡើយទេថា តើការគ្រោងកែច្បាប់បោះឆ្នោតដកហូតសិទ្ធិឈរឈ្មោះបោះឆ្នោតរបស់អ្នកនយោបាយដែលខកខានមិនបានទៅបោះឆ្នោតនៅខែ កក្កដាខាងមុខនេះ នឹងមានរយៈពេលកំណត់យូរប៉ុណ្ណា ហើយក្នុងលក្ខខណ្ឌណាទើបពួកគេអាចទទួលបានសិទ្ធិឈរ ឈ្មោះបោះឆ្នោតនេះមកវិញ។ ទោះយ៉ាងណា លោក ហ៊ុន សែន គូសបញ្ជាក់ថា ការដកហូតសិទ្ធិឈរឈ្មោះបោះឆ្នោតរបស់អ្នកនយោបាយនេះ ធ្វើឡើងតែចំពោះអ្នកនយោបាយណាដែលមិនបានទៅបោះឆ្នោតដោយគ្មានមូលហេតុ«សមរម្យ»តាម ផ្លូវច្បាប់ នៅមុនការឈរឈ្មោះបោះឆ្នោតរបស់ពួកគេតែប៉ុណ្ណោះ។ លោកថា ពួកគេនៅតែមានសិទ្ធិទៅបោះឆ្នោតក្នុងនាមជាពលរដ្ឋដដែល។ លោក ហ៊ុន សែន មិនបានបញ្ជាក់លម្អិតថា តើអ្វីខ្លះជាមូលហេតុ «សមរម្យ» តាមផ្លូវច្បាប់នៃការមិនបានទៅបោះឆ្នោតនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។