អតីត​ប្រធាន​គណបក្ស​អំណាច​ខ្មែរ លោក សួន សេរីរដ្ឋា បង្កើត​គណបក្ស​ថ្មី

ដោយ ជុន ច័ន្ទបុត្រ
2019-03-20
អ៊ីម៉ែល
មតិ
Share
បោះពុម្ព
ប្រធាន​គណបក្ស អំណាច​ខ្មែរ លោក សួន សេរីរដ្ឋា ផ្ដល់​បទសម្ភាសន៍​ដល់​អ្នក​កាសែត​កាល​ពី​ថ្ងៃ​ទី​១ ខែ​តុលា ឆ្នាំ​២០១៥ ពេល​លោក​មក​ដល់​រាជធានី​ភ្នំពេញ។
ប្រធាន​គណបក្ស អំណាច​ខ្មែរ លោក សួន សេរីរដ្ឋា ផ្ដល់​បទសម្ភាសន៍​ដល់​អ្នក​កាសែត​កាល​ពី​ថ្ងៃ​ទី​១ ខែ​តុលា ឆ្នាំ​២០១៥ ពេល​លោក​មក​ដល់​រាជធានី​ភ្នំពេញ។
Photo provided

អតីតប្រធាន​គណបក្ស​អំណាច​ខ្មែរ លោក សួន សេរីរដ្ឋា សម្រេច​បង្កើត​គណបក្ស​នយោបាយ​ថ្មី​មួយ​ទៀត បន្ទាប់​ពី​បក្ស​ចាស់​របស់​លោក ត្រូវ​បាន​លោក សួង​ សុភណ្ឌ យក​ទៅ​គ្រប់គ្រង នៅ​ពេល​លោក​កំពុង​ជាប់​នៅ​ក្នុង​ពន្ធនាគារ។

លោក សួន សេរីរដ្ឋា ឲ្យ​អាស៊ី​សេរី​ដឹង​ថា មាន​ឈ្មោះ​ពីរ​សម្រាប់​គណបក្ស​ថ្មី​របស់​លោក ដែល​នឹង​ត្រូវ​ដាក់​ឲ្យ​គណៈ​ស្ថាបនិក​បក្ស និង​ក្រុម​ប្រឹក្សា​នយោបាយ បោះ​ឆ្នោត​ជ្រើស​នៅ​ចុង​សប្ដាហ៍​នេះ។ ឈ្មោះ​ថ្មី​ទាំង​ពី​នោះ ទី១ ដាក់​ថា «គណបក្ស​ខ្មែរ​កែ​ទម្រង់» ហើយ​ឈ្មោះ​ទី២ ដាក់​ថា «គណបក្ស​ផ្ដល់​អំណាច​ពលរដ្ឋ» ដែល​ស្ថិត​ក្រោម​បាវចនា​រួម​ថា «ជាតិ ទឹកដី សេរីភាព»«អ្វី​ដែល​យើង​រៀប​ចំ​ធ្វើ​នេះ គឺ​ដើម្បី​បន្ត​បេសកកម្ម​នយោបាយ​ទាំង​អស់ ដើម្បី​ឆ្លើយ​តប​ទៅ​នឹង​ការ​ចង់​បាន​របស់​ក្រុម​អ្នក​​គាំទ្រ​នៅ​ក្នុង​អតីត​គណបក្ស​អំណាច​ខ្មែរ ដែល​ពី​មុន​យើង​បាន​ដំណើរ​ការ។ អ៊ីចឹង! អ្វី​ដែល​បាន​បាន​រៀប​នេះ គ្រាន់​តែ​ជា​ឈ្មោះ​និង​ស្លាក​សញ្ញា​ថ្មី ដើម្បី​សុំ​ឲ្យ​ក្រសួង​មហាផ្ទៃ​ទទួល​ស្គាល់​តែ​ប៉ុណ្ណោះ តែ​អ្វី​ផ្សេងៗ ទាំង​អស់​គឺ​នៅ​ដដែល»

នៅ​សប្ដាហ៍​ក្រោយនេះ លោក​ សួន សេរីរដ្ឋា នឹង​ដាក់​ពាក្យ​ស្នើ​សុំ​បង្កើត​គណបក្ស​ថ្មី ក្រោម​ឈ្មោះ​ថ្មី និង​ស្លាក​ថ្មី នៅ​ក្រសួង​មហាផ្ទៃ​ទៅ​តាម​ផ្លូវ​ច្បាប់។

លោក សួន សេរីរដ្ឋា ត្រូវ​បាន​តុលាការ​ចោទ​ប្រកាន់​លោក ចំនួន ៣បទល្មើស កាល​ពី​ថ្ងៃ​ទី១៤ ខែ​សីហា ឆ្នាំ​២០១៧ គឺ​បទ​ញុះញង់​កុំ​ឱ្យ​យោធិន​ស្ដាប់​បង្គាប់ បទ​ធ្វើ​ឱ្យ​ខូច​ទឹកចិត្ត និង​បទ​ញុះញង់​ឱ្យ​ប្រព្រឹត្ត​បទ​ឧក្រិដ្ឋ ជា​អាទិ៍ នៃ​ក្រម​ព្រហ្មទណ្ឌ បន្ទាប់​ពី​លោក​បញ្ចេញ​មតិ​តាម​ហ្វេសប៊ុក (Facebook) របស់​លោក កាល​ពី​យប់​ថ្ងៃ​សៅរ៍ ទី១២ ខែ​សីហា ឆ្នាំ២០១៧ នោះ ទាក់ទង​នឹង​ការ​បញ្ជា​កងទ័ព ឱ្យ​ទៅ​ត្រៀម​ប្រយុទ្ធ​នឹង​កងទ័ព​ឡាវ។

ក្រោយ​មក អតីត​ប្រធាន​គណបក្ស​អំណាច​ខ្មែរ លោក សួន សេរីរដ្ឋា ត្រូវ​បាន​ដោះលែង ​កាល​ពី​យប់​ថ្ងៃ​ទី២៣ ខែ​សីហា ឆ្នាំ​២០១៨ ក្រោយ​​ព្រះមហាក្សត្រ ត្រាស់​បង្គាប់​ឲ្យ​លើកលែង​ទោស នៅ​ថ្ងៃ​ដដែល​នោះ បន្ទាប់​ពី​បាន​សរសេរ​លិខិត​សុំ​ទោស​ទៅ​លោក ហ៊ុន សែន។ ក្នុង​លិខិត​ចុះ​ថ្ងៃ​ទី២៣ ខែ​សីហា​នោះ លោក សួន សេរីរដ្ឋា សុំ​​អភ័យ​ទោស​​ជា​​លើក​ទី​ពីរ និង​សោក​ស្ដាយ​នូវ​រាល់​កំហុស​ឆ្គង​កន្លង​មក ហើយ​សន្យា​ថា លោក​នឹង​មិន​សរសេរ ឬ​និយាយ​អ្វី​ដែល​ធ្វើ​ឲ្យ​ប៉ះពាល់​ដល់​កិត្តិយស​ជាតិ និង​លោក ហ៊ុន សែន ដោយ​គ្មាន​ការ​ពិចារណា​ត​ទៅ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល