តុលាការ​ក្រុង​ភ្នំពេញ​ចោទប្រកាន់​លោក ថាច់ សេដ្ឋា បទល្មើស​ថ្មី​មួយ​ទៀត​គឺ​បទ​ញុះញង់

ដោយ សេក បណ្ឌិត
2023.04.29
តុលាការ​ក្រុង​ភ្នំពេញ​ចោទប្រកាន់​លោក ថាច់ សេដ្ឋា បទល្មើស​ថ្មី​មួយ​ទៀត​គឺ​បទ​ញុះញង់ លោក ថាច់ សេដ្ឋា អនុប្រធានគណបក្សភ្លើងទៀន (សំលៀកបំពាក់​ពណ៌​ស្លាទុំ) ពេលមកសវនាការ នៅថ្ងៃទី២៨ មេសា ២០២៣។
រូប៖ ពលរដ្ឋផ្ដល់ឱ្យ

សាលាដំបូង​រាជធានី​ភ្នំពេញ​ចោទប្រកាន់​បទល្មើស​ថ្មី​មួយទៀត គឺ​បទ​ញុះញង់​លើ​អនុប្រធាន​គណបក្ស​ភ្លើងទៀន លោក ថាច់ សេដ្ឋា ស្របពេល​តុលាការ​កំពូល​គ្រោង​នឹង​ប្រកាស​សាលដីកា​សុំ​នៅ​ក្រៅ​ឃុំ​បណ្ដោះអាសន្ន។ មន្ត្រី​សង្គម​ស៊ីវិល​ដែល​តាមដាន​ដំណើរ​រឿង​នេះ រិះគន់​ថា ការ​ចោទ​ប្រកាន់​លើ​លោក ថាច់ សេដ្ឋា មាន​ចរិត​នយោបាយ​ច្រើនជាង​ការអនុវត្ត​ច្បាប់។

តុលាការ​សម្រុក​បើកសវនាការ​លើ​អនុប្រធាន​គណបក្ស​ភ្លើងទៀន​លោក ថាច់ សេដ្ឋា ក្នុង​សំណុំរឿង​ពីរ​ផ្សេងគ្នា​នៅ​ថ្ងៃ​តែមួយ​។ សំណុំរឿង​ទី​១ នៅ​ព្រឹក​ថ្ងៃទី​២៨ ខែមេសា តុលាការ​កំពូល​បើក​សវនាការ​សួរ ដេញដោល​លើ​អង្គច្បាប់ នៃ​សំណើសុំ​នៅ​ក្រៅ​ឃុំ​របស់​លោក ថាច់ សេដ្ឋា។ សំណុំរឿង​ទី​២ នៅពេល​ថ្ងៃ​ដដែល​នេះ​សាលាដំបូង​រាជធានី​ភ្នំពេញ បាន​សាកសួរ​លោក ថាច់ សេដ្ឋា និង​បាន​ចោទប្រកាន់​បទល្មើស​ថ្មី​មួយទៀត​គឺ​ បទ​ញុះញង់ ទាក់ទង​ការ​បំពេញ​ទស្សនកិច្ច​របស់​លោក​ទៅ​ប្រទេស​ជប៉ុន កាលពី​ចុងឆ្នាំ​២០២២។ បទ​ចោទ​ថ្មី​នេះ​ធ្វើ​ឱ្យ​មាន​ការ​ភ្ញាក់ផ្អើល​ចំពោះ​សាច់ញាតិ និង​មេធាវី​របស់​លោក ថាច់ សេដ្ឋា។

មន្ត្រី​សង្គម​ស៊ីវិល​រិះគន់​ថា ចំណាត់​ផ្លូវច្បាប់​លើ​លោក ថាច់ សេដ្ឋា បែប​នេះ ហាក់​មាន​ចេតនា​មិន​ចង់ឱ្យ​អ្នក​នយោបាយ​ជាន់ខ្ពស់​របស់​គណបក្ស​ភ្លើងទៀន​អាច​នៅ​ក្រៅ​ឃុំ ដើម្បី​ចូលរួម​ប្រកួតប្រជែង ការបោះឆ្នោត​ថ្ងៃទី​២៣ ខែកក្កដានោះ​ទេ។

លោក ថាច់ សេដ្ឋា ស្ថិត​ក្នុង​សំលៀកបំពាក់​ពណ៌​ស្លា​ទំ ដុះ​ពុកមាត់​បាន​ចូល​ទៅ​បំភ្លឺ​ក្នុង​បន្ទប់​សវនាការ នៃ​តុលាការ​កំពូល​នៃ​សំណើសុំ​នៅ​ក្រៅ​ឃុំ។ ជីវិត​ក្នុង​ពន្ធនាគារ​ជាង​១០០​ថ្ងៃ​មកនេះ លោក ថាច់ សេដ្ឋា ហាក់​សុខភាព​ទ្រុឌទ្រោម​ជាង​មុន ចំណែក​សក់ និង​ពុកមាត់​ក៏​វែង​ជាង​មុនដែរ។

មេធាវី​ការពារ​ក្ដី​លោក ថាច់ សេដ្ឋា ម្នាក់​គឺ​លោក​មេធាវី សឺន ជុំជួន រំពឹង​ថា តុលាការ​កំពូល​នឹង​ពិចារណា​ឱ្យ​កូនក្ដី​របស់​លោក​អាច​នៅ​​ក្រៅ​ឃុំ។ លោក​មេធាវី​បន្ត​ថា កូនក្ដី​របស់​លោក​ពេល​នេះ​មាន​ជំងឺ​បេះដូង​ធ្ងន់ធ្ងរ ហើយ​កូនក្ដី​របស់​លោក​ថា ក៏​មាន​ថវិកា​ជាង ៣​ម៉ឺន​ដុល្លារ​សម្រាប់​តម្កល់​នៅ​តុលា​ការ​ត្រៀម​សង​ឱ្យ​ដើមបណ្ដឹង។

លោក​មេធាវី សឺន ជុំជួន៖ «ក្នុង​នាម​ជា​សហ​មេធាវី​ការពារ​សិទ្ធិ​ឱ្យ​ជន​ត្រូវ​ចោទ​ធម្មតា​យើង​តែងតែមាន​ក្ដី​សង្ឃឹម​ក្នុង​ការ​ការពារ​សិទ្ធិ​ជន​ត្រូវ​ចោទ​ហើយ​សង្ឃឹម​ថា តុលាការ​នឹង​ពិចារណា​អ្វី​ដែល​ជា​ការ​លើក​ឡើង​របស់​មេធាវី​គឺ​នឹង​ត្រូវ​បាន​ដោះ​លែងឱ្យ​គាត់ (លោក ថាច់ សេដ្ឋា) នៅ​ក្រៅ​ឃុំ​ជា​បណ្ដោះអាសន្ន»

ស្រដៀង​គ្នា​នេះ​ដែរ ប្រពន្ធ​លោក ថាច់ សេដ្ឋា គឺ​លោកស្រី ថាច់ សុខបូរ៉ានី ស្នើ​ទៅ​តុលាការ​កំពូល​គួរ​អនុញ្ញាត​ឱ្យ​ប្ដី​លោក​អាច​នៅ​ក្រៅ​ឃុំ ដើម្បី​ឱ្យ​ប្ដី​លោកស្រី​មាន​ពេល​គ្រប់គ្រាន់​ព្យាបាល​ជំងឺ​បេះដូង។

លោកស្រី ថាច់ សុខបូរ៉ានី៖ «អ៊ីចឹង​គ្រាន់តែ​សំណូមពរ​សុំ​ឱ្យ​តុលាការ​យោគយល់​អាណិត​គាត់ (លោក ថាច់ សេដ្ឋា) ជំងឺ​បេះដូង​រើ​ឡើង​ធ្វើទុក្ខ​ហើយ​ហ្នឹង​អាណិត​ក្រុម​គ្រួសារ​ពួក​ខ្ញុំ​ដោះលែង​គាត់​មក​ជួបជុំ​គ្រួសារ​វិញ​កុំឱ្យ​បែកបាក់​ប្ដី​ប្រពន្ធ​គាត់​មក​ផ្ទះ​មក​សំបែង​អី​គាត់​ថែ​សុខភាព»

សមត្ថកិច្ច​បាន​ចាប់​ខ្លួន លោក ថាច់ សេដ្ឋា កាលពី​នៅ​ថ្ងៃទី​១៦ មករា ដោយ​ចោទប្រកាន់​ពី​បទ​មិន​បំពេញ​កាតព្វកិច្ច​ចំពោះ​ឧបករណ៍​អាច​ជួញដូរ​បាន ឬ​ចេញ​សែក​អត់​លុយ។ សំណុំរឿង​ទី​១ នេះ តុលាការ​កំពូល​គ្រោង​ប្រកាស​សាលដីកា នា​ថ្ងៃទី​៣ ខែ​ឧសភា ខាងមុខ។

មន្ត្រីជាន់ខ្ពស់​សមាគម​ការពារ​សិទ្ធិមនុស្ស​អាដហុក (Adhoc) លោក យី សុខសាន្ត សង្កេតឃើញ​ថា ភាគី​ម្ចាស់​បំណុល​ហាក់​មិន​ចង់ឱ្យ​លោក ថាច់ សេដ្ឋា មាន​ឱកាស​សង​បំណុល​ទេ តែ​ហាក់​ចង់ឱ្យ​លោក ថាច់ សេដ្ឋា ជាប់ឃុំ​ទៅវិញ។ លោក​បន្ត​ទៀត​ថា សំណុំ​រឿង​នេះ​មាន​ចរិត​នយោបាយ​ជាង​ការ​អនុវត្ត​ច្បាប់។

លោក យី សុខសាន្ត៖ «នៅ​ពេល​កូន​បំណុល​ចូលខ្លួន​សង ដូចជា​ខាង​ម្ចាស់​បំណុល​មិន​ចូលខ្លួន​សកម្ម​ក្នុង​ការ​ទាមទារ​បែរជា​ខាង​តុលាការ​រក​ភស្តុតាង​ដើម្បី​ដាក់បន្ទុក​ហាក់ដូចជា​មិន​ចង់ឱ្យ​នៅ​ក្រៅ​ឃុំ ឬ​មួយ​មិន​ចង់​ទទួល​យក។ នេះ​ជា​ការ​កត់សម្គាល់​គួរ​ណាស់​តែ​នៅពេល​គេ​សង​ហើយ​យក​សំណង​ហ្នឹង​មក​ដោះស្រាយ​ទៅ ហេតុ​អី​បានជា​ទុក​ឱ្យ​មាន​បញ្ហា​មក​ដល់​ពេល​នេះ»

ចំណែក​សំណុំរឿង​ទី២ សាលាដំបូង​រាជធានី​ភ្នំពេញ បាន​ចោទប្រកាន់​លោក ថាច់ សេដ្ឋា មួយ​ករណី​ទៀត​ពី​បទ​ញុះញង់ តាម​មាត្រា​៤៩៤ និង​មាត្រា​៩៩៥ នៃ​ក្រមព្រហ្មទណ្ឌ​។ បទ​ចោទ​ថ្មី​នេះ លោក ថាច់ សេដ្ឋា អាច​ប្រឈម​ជាប់​ពន្ធនាគារ​ពី​០៦​ខែ ទៅ​២​ឆ្នាំ ប្រសិនបើ​តុលាការ​រក​ឃើញ​ថា លោក​មាន​ទោស។

មេធាវី​ការពារ​ក្ដី​លោក ថាច់ សេដ្ឋា ម្នាក់​ទៀត​គឺ​លោក​មេធាវី កែត ឃី ឱ្យ​វិទ្យុ​អាស៊ីសេរី​ដឹង​នៅ​ល្ងាច​ថ្ងៃទី​២៨ ខែ​មេសា ថា សមត្ថកិច្ច​ដឹក​លោក ថាច់ សេដ្ឋា មក​សាលាដំបូង​រាជធានី​ភ្នំពេញ​ពេល​នេះ​ដើម្បី​សាកសួរ​ជុំវិញ​សំណុំរឿង​ថ្ងៃមួយ​ទៀត ពាក់ព័ន្ធ​ករណី​ញុះញង់ កាលពី​លោក ថាច់ សេដ្ឋា ធ្វើដំណើរ​ទៅ​ប្រទេស​ជប៉ុន ជួប​អ្នកគាំទ្រ​គណបក្ស​ភ្លើងទៀន​កាល​ចុងឆ្នាំ​២០២២​។ លោក​ឱ្យ​ដឹង​ទៀត​ថា តុលាការក្រុង​ភ្នំពេញ​សម្រេច​ចេញ​ដីកា​ឃុំខ្លួន​ថ្មី​មួយទៀត​លើ​លោក ថាច់ សេដ្ឋា ក្នុង​សំណុំរឿង​ញុះញង់​នេះ​ដែរ។

មេធាវី កែត ឃី៖ «គេ​ប្ដឹង​គាត់ គាត់​និយាយ​នៅ​ជប៉ុន​បទ​ញុះញង់​បង្ក​ឱ្យ​មាន​ភាព​រើសអើង​ធ្វើ​វឹកវរ​សង្គម»

បើ​ទោះ​ជា​តុលាការ​បន្ថែម​បទ​ចោទ​លើ​លោក ថាច់ សេដ្ឋា ទាក់ទង​ការ​ធ្វើ​ដំណើរ​ទៅ​ជួប​អ្នកគាំទ្រ​នៅ​ប្រទេស​ជប៉ុន​ក្ដី ក៏​កាលពី​លោក ថាច់ សេដ្ឋា ត្រឡប់​ចូល​ប្រទេស​កម្ពុជា​វិញ ឬ​សមត្ថកិច្ច ឬ​តុលាការ​មិន​បាន​បង្ហាញ​ការ​ចោទប្រកាន់​ឱ្យ​លោក ថាច់ សេដ្ឋា ពាក់ព័ន្ធ​បញ្ហា​រឿង​នេះ​ទេ។

ប្រធាន​អង្គការ​សម្ព័ន្ធភាព​ការពារ​សិទ្ធិមនុស្ស​កម្ពុជា ហៅ​កាត់​ថា ច្រាក់ (CHRAC) លោក រស់ សុដ្ឋា យល់​ថា ការ​ចោទប្រកាន់​លើ​លោក ថាច់ សេដ្ឋា ក្នុង​សំណុំរឿង​ថ្មី នៅ​ពេល​នេះ​ជា​ការ​បន្ថែម​ទោស​ឱ្យ​អនុប្រធាន​គណបក្ស​ភ្លើងទៀន​រូប​នេះ ជាប់ទោស​កាន់​ធ្ងន់ធ្ងរ​ថែម​ទៀត។ ទោះ​យ៉ាងណា មន្ត្រី​សង្គម​ស៊ីវិល​រូប​នេះ ចង់​ឃើញ​អ្នក​នយោបាយ​ជាពិសេស​គណបក្ស​កាន់អំណាច​គួរ​បង្ក​បរិយាកាស​ល្អ​មុន​ការ​បោះឆ្នោត​ដើម្បី​អាច​ឱ្យ​ពលរដ្ឋ​ចូលរួម​ការ​បោះឆ្នោត​ដោយ​គ្មាន​ការភ័យខ្លាច។

លោក រស់ សុដ្ឋា៖ «បន្ថែម​ទោស​ហ្នឹង​បញ្ហា​ហ្នឹង​កាន់តែ​ធ្ងន់ធ្ងរ​ទៅ ខ្ញុំ​ដល់​អ៊ីចឹង​គ្មាន​អី​ទេ មាន​តែ​រំលឹក​ដាស់តឿន​ទៅ​អ្នក​នយោបាយ​ទាំងអស់ ត្រូវធ្វើ​ម៉េច​គិតគូរ​អំពី​ជាតិ​សាសន៍​របស់​ខ្លួន​រង​ទុក្ខវេទនា​យូរ​ឆ្នាំ​យូរ​ខែ​មក​ហើយ»

លោក ថាច់ សេដ្ឋា ជា​អ្នកនយោបាយ​មាន​កំណើត​ខ្មែរ​ក្រោម​ដ៏​លេចធ្លោ​ម្នាក់​ក្នុង​ចំណោម​ក្បាល​ម៉ាស៊ីន​គណបក្ស​ភ្លើងទៀន ៤​រូប ដែល​កំពុង​ជាប់​ឃុំ ក្នុង​នោះ រួមមាន​ប្រធាន​គណៈកម្មាធិការ​ប្រតិបត្តិ​គណបក្ស​ភ្លើងទៀន​ខេត្ត​កំពង់ចាម លោក តូច ថឹង ប្រធាន​ចលនា​យុវជន​គណបក្ស​ភ្លើងទៀន​លោក ខឿន វីរ៉ាត់ ព្រមទាំង​អនុប្រធាន​ចលនា​ស្ត្រី​អ្នកស្រី នូ សិទ្ធារី ផង​ដែរ។

គិត​មក​ដល់​ថ្ងៃ​សុក្រ​ទី​២៨ មេសា លោក ថាច់ សេដ្ឋា បាន​ឃុំ​នៅ​នៅ​ពន្ធនាគារ​ព្រៃស (ម១) អស់​រយៈពេល ១០២​ថ្ងៃ​មក​ហើយ។ លោក ថាច់ សេដ្ឋា ដែល​មាន​អាយុ ៦៩​ឆ្នាំ កំពុង​មាន​ជំងឺ​ប្រចាំ​កាយ​មួយចំនួន​ដូចជា ជំងឺ​បេះដូង ជំងឺលើសឈាម និង​ជំងឺ​ទឹកនោមផ្អែម​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។