តុលាការកំពូលសម្រេចតម្កល់សំណុំរឿងសកម្មជនបក្សប្រឆាំងលោក គង់ សំអាន ទុកជាបានការដដែលនៅព្រឹកថ្ងៃទី៤ ខែឧសភានេះ។ មេធាវីការពារក្ដី និងសង្គមស៊ីវិលយល់ថា ការសម្រេចបែបនេះជារឿងអយុត្តិធម៌ ដែលមិនស្របតាមច្បាប់។
នៅព្រឹកថ្ងៃទី៤ ខែឧសភា នេះតុលាការកំពូលបានបើកសវនាការ លើបណ្ដឹងសាទុក្ខសំណុំរឿងលោក គង់ សំអាន ប្រធានប្រតិបត្តិគណបក្សសង្គ្រោះជាតិប្រចាំស្រុកមេមត់ ខេត្តត្បូងឃ្មុំ ដោយលោកបានប្ដឹងប្រឆាំងនឹងការសម្រេចរបស់តុលាការថ្នាក់ក្រោមដែលបានកាត់ទោសឱ្យលោកជាប់ពន្ធនាគារ៧ឆ្នាំ កាលពីឆ្នាំ២០២០។
មេធាវីការពារក្ដីឱ្យលោក គង់ សំអាន គឺលោក សំ សុគង់ លើកឡើងថាការសម្រេចរបស់តុលាការកំពូលនេះតម្កល់សាលដីកាសាលាឧទ្ធរណ៍ត្បូងឃ្មុំជារឿងដែលមិនត្រឹមត្រូវហើយការលើកឡើងនោះជាការបំភ្លៃអង្គរហេតុដែលមិនស្របទៅនឹងអង្គរច្បាប់ជាក់ស្ដែង។ លោកបន្តថា សាលាដំបូងខេត្តត្បួងឃ្មុំគួរតែទម្លាក់ការចោទប្រកាន់មកលើកូនក្ដីរបស់លោក៖ «ខ្ញុំមានការសោកស្ដាយដែលតុលាការកំពូលបានសម្រេចតម្កល់សាលដីការបស់សាលាឧទ្ធរណ៍ទុកជាបានការ ដោយសារតែយើងមើលទាក់ទងទៅនឹងអង្គហេតុក៏ដូចជាអង្គហេតុហ្នឹង យើងឃើញថាមូលហេតុដែលនាំឱ្យប្ដឹងជំទាស់ យើងយល់ឃើញថា សាលាឧទរណ៍ក៏ដូចជាសាលាដំបូង ខេត្តត្បួងឃ្មុំបានបងភ្លាយអង្គហេតុ មិនជាប់ពាក់ព័ន្ធនឹងអង្គច្បាប់ » ។
លោក សំ សុគង់ បានលើឡើងបន្ថែមថាសវនាការថ្ងៃនេះដែលមានលោក គង់ ស្រ៊ីម ជាប្រធានចៅក្រមប្រឹក្សាជំនុំជម្រះបានសម្រេចបដិសេធបណ្ដឹងសាទុក្ខរបស់លោក គង់ សំអាន ដោយចាត់ទុកការសម្រេចរបស់សាលាឧទ្ធរណ៍ខេត្តត្បូងឃ្មុំដែលបានកាត់ទោសឱ្យលោកជាប់ពន្ធនាគារ ៧ឆ្នាំ ក្នុងសំណុំរឿង «រួមគំនិតក្បត់» ដដែលនេះជារឿងអយុត្តិធម៌។
ចំណែកលោកស្រី គង់ ម៉ូលី ជាកូនលោក គង់ សំអាន ប្រាប់វិទ្យុអាស៊ីសេរីនៅថ្ងៃទី៤ ខែឧសភា នេះថា លោកស្រីខកចិត្តយ៉ាងខ្លាំងចំពោះការសម្រេចរបស់តុលាការកំពូលនេះព្រោះឪពុករបស់ខ្លួនមិនបានប្រព្រឹត្តខុសច្បាប់ដូចការចោទប្រកាន់របស់តុលាការឡើយ។ លោកស្រី ស្នើឱ្យតុលាការទម្លាក់ចោលការចោទប្រកាន់ព្រោះឪពុកលោកស្រីជាគ្រូបង្រៀនដែលស្រឡាញ់មាតុភូមិពិតប្រាកដមិនមែនជាជនក្បត់ជាតិដូចការចោទប្រកាន់នោះទេ៖ « សំណូមពរឱ្យខាងរដ្ឋាភិបាលគួរចរចាកុំយកគ្នាជាសត្រូវ ព្រោះគាត់ជាមនុស្សស្លូតបូតមិនសមណាយកគាត់ទៅឃុំឃាំងដោយអយុត្តិធម៌ទាំងនោះទេ។ សូមឱ្យដោះលែងគាត់ ឱ្យគាត់មានសេរីភាពឡើងវិញ » ។
ជុំវិញរឿងនេះមន្រ្តីកាពារសិទ្ធិមនុស្សនៅសមាគមអាដហុកលោក សឹង សែនករុណា បានលើកឡើងថាការសម្រេចបដិសេធរបស់តុលាការជុំវិញពាក្យបណ្ដឹងសាទុក្ខរបស់លោក គង់ សំអាន នេះជារឿងនយោបាយដែលកម្ពុជាកំពុងតែប្រើប្រាស់ប្រព័ន្ធតុលាការដើម្បីធ្វើទុក្ខបុកម្នេញលើអ្នកគាំទ្របក្សប្រឆាំង។ លោកបន្តថា ការសម្រេចរបស់តុលាការនេះមិនស្របតាមច្បាប់នោះទេព្រោះលោក គង់ សំអាន ជាអ្នកនយោបាយដែលអនុវត្តតួនាទីស្របនឹងច្បាប់រដ្ឋធម្មនុញ្ញ៖ « ចឹងករណីនេះយើងយល់ថា ស្ថានភាពបែបនេះលោក គង់ សំអាន មិនទទួលបាននូវយុត្តិធម៌ទេ ហើយមួយទៀត ក្នុងនាមយើងសង្គមស៊ីវិលធ្លាប់លើកឡើងដែរ ដើម្បីសម្រួលស្ថានការណ៍នយោបាយនៅកម្ពុជា ថ្នាក់ដឹកនំានយោបាយក៏ដូចជាគណបក្សកាន់អំណាចដែលនាំរដ្ឋាភិបាល គួរតែពិនិត្យនឹង កែប្រែស្ថានភាពនេះពីស្ថានភាពតានតឹងរង់ការរិះគន់ពីអន្តរជាតិនឹងក៏គួរតែបើកលំហរនៃសិទ្ធិសេរីភាពផ្នែកនយោបាយ ក៏ដូចជាគោរពសិទ្ធិមនុស្សឡើងវិញផងដែរ » ។
វិទ្យុអាស៊ីសេរីមិនអាចទាក់ទង លោក គង់ ស្រ៊ីម ប្រធានចៅក្រមប្រឹក្សាជំនំជម្រះដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៤ ខែឧសភា ដោយទូរស័ព្ទចូលតែគ្មានអ្នកទទួល។
សាលាដំបូងខេត្តត្បូងឃ្មុំ បានកាត់ទោសឱ្យសកម្មជនបក្សសង្គ្រោះជាតិ ចំនួន៧នាក់ ក្នុងសំណុំរឿង «រួមគំនិតក្បត់» ក្នុងនោះមានជនជាប់ចោទ២នាក់ជាប់ពន្ធនាគារ៥ឆ្នាំ និង៥នាក់ទៀតជាប់ពន្ធនាគារ៧ឆ្នាំ កាលពីខែកុម្ភៈ ឆ្នាំ២០២០ កន្លងទៅ។ ក្នុងចំណោមជនជាប់ចោទទាំង៧រូបនោះ គឺមានតែលោក គង់ សំអាន ម្នាក់គត់ដែលជាប់ពន្ធនាគារ ក្រៅពីនោះ គឺតុលាការបានអនុញ្ញាតឱ្យពួកគេនៅក្រៅឃុំបណ្ដោះអាសន្ននិងខ្លះទៀតកំពុងរស់នៅក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។