មេធាវី​ការពារ​ក្ដី​សង្ឃឹម​ថា តុលាការ​នឹង​លើក​លែង​ការ​ចោទ​ប្រកាន់​លោក ថាច់ សេដ្ឋា ១ថ្ងៃ​មុន​ប្រកាស​សាល​ក្រម

ដោយ សុជីវី
2023.09.20
មេធាវី​ការពារ​ក្ដី​សង្ឃឹម​ថា តុលាការ​នឹង​លើក​លែង​ការ​ចោទ​ប្រកាន់​លោក ថាច់ សេដ្ឋា ១ថ្ងៃ​មុន​ប្រកាស​សាល​ក្រម (ឆ្វេង) មេធាវី សឺន ជុំជួន និង​លោក ថាច់ សេដ្ឋា អនុប្រធាន​គណបក្ស​ភ្លើង​ទៀន ថត​នៅ​តុលាការ​កំពូល កាល​ពី​ថ្ងៃ​ទី២៧ ខែមេសា ឆ្នាំ២០២៣។
រូបពីពលរដ្ឋ

មេធាវី​ការពារ​ក្ដី​អនុប្រធាន​គណបក្ស​ភ្លើង​ទៀន លោក ថាច់ សេដ្ឋា សង្ឃឹមថា​សាលា​ដំបូង​រាជធានី​ភ្នំពេញ​នឹង​លើក​លែង​បទ​ចោទ​ប្រកាន់​កូនក្ដី​របស់​លោក។ មន្ត្រី​អង្គការ​សង្គម​ស៊ីវិល ស្នើ​ឱ្យ​តុលាការ​ដោះលែង​អនុ​ប្រធាន​គណបក្ស​ប្រឆាំង​រូប​នេះ ឱ្យ​មាន​សេរីភាព​វិញ។

មេធាវី​ការពារ​ក្ដី​លោក ថាច់ សេដ្ឋា សង្ឃឹម​ថា សាលា​ដំបូង​រាជធានី​ភ្នំពេញ នឹង​លើកលែង​បទ​ចោទ​ប្រកាន់​ជុំវិញ​សំណុំរឿង​ចេញ​សែក​ស្អុយ ឬ​ចេញ​សែក​ដោយ​គ្មាន​ទឹក​ប្រាក់​លើ​កូន​ក្ដី​របស់​ខ្លួន នៅ​ថ្ងៃ​ទី២១ ខែកញ្ញា។

មេធាវី​ការពារ​លោក ថាច់ សេដ្ឋា លោក សឺន ជុំជួន ប្រាប់​វិទ្យុ​អាស៊ី​សេរី​នៅ​ថ្ងៃ​ទី២០ ខែកញ្ញា​ថា ដោយសារ​នៅ​ពេល​កាត់​សេចក្ដី​កន្លង​មក ភាគី​ដើម​បណ្ដឹង​មិន​មាន​ភស្តុតាង​គ្រប់​គ្រាន់ ហើយ​លោក ថាច់ សេដ្ឋា ក៏​បាន​ដាក់​ប្រាក់​តម្កល់​គ្រប់គ្រាន់ ទាក់ទង​នឹង​ការ​ចេញ​សែក​ស្អុយ​ហើយ​នោះ ដូច្នេះ លោក​សង្ឃឹម​ថា សាលាដំបូង​នឹង​ចេញ​សាលក្រម​លើកលែង​បទ​ចោទ​ប្រកាន់​ទៅ​លើ​លោក ថាច់ សេដ្ឋា។

លោក សឺន ជុំជួន៖ «ដោយសារ​តែ​ការ​ពិភាក្សា​កន្លង​មក យើង​ពិនិត្យ​ឯកសារ​ទៅ​លើ​ភស្តុតាង​ហ្នឹង វា​មាន​ភស្តុតាង​មិន​គ្រប់​គ្រាន់ ឬ​ក៏​បង្ហាញ​អំពី​ភាព​នៃ​ច្បាប់​ដើម​អី​ជាដើម អ៊ីចឹង​យើង​សង្ឃឹម​ថា តុលាការ​នឹង​ពិចារណា​ហើយ​ឱ្យ​កូន​ក្ដី​រួច​ពី​បទ​ចោទ»

ទោះ​ជា​យ៉ាង​ណា​ក្ដី នៅ​ថ្ងៃ​ប្រកាស​សាលក្រម​នៅ​ថ្ងៃ​ទី២១ ខែកញ្ញា សាលា​ដំបូង​រាជធានី​ភ្នំពេញ ក៏​នឹង​បើក​សវនាការ​លើក​ដំបូង​ជុំវិញ​បទ​ចោទ​ប្រកាន់ ២ផ្សេង​ទៀត គឺ​បទ​ញុះញង់​បង្ក​ឱ្យ​មាន​ស្ថាន​ភាព​វឹកវរ​ក្នុង​សង្គម និង​បទ​ញុះញង់​ឱ្យ​មាន​ការ​រើសអើង​ពូជសាសន៍ ទៅ​លើ​លោក ថាច់ សេដ្ឋា ផង​ដែរ។ សាលា​ដំបូង​រាជធានី​ភ្នំពេញ បាន​ចោទ​ប្រកាន់​លោក​បែប​នេះ ដោយ​ផ្អែក​ទៅ​លើ​ការ​ថ្លែង​សារ​របស់​លោក ថាច់ សេដ្ឋា ក្នុង​ពេល​បំពេញ​ទស្សនៈ និង​ជួប​អ្នកគាំទ្រ​គណបក្ស​ភ្លើង​ទៀន នៅ​ប្រទេស​ជប៉ុន​កាល​ចុង​ឆ្នាំ២០២២ និង​នៅ​ប្រទេស​កូរ៉េ​ខាង​ត្បូង កាល​ពី​ដើម​ឆ្នាំ២០២៣។ ទោះ​យ៉ាង​នេះ​ក្ដី កាល​ពី​ខែឧសភា​កន្លង​ទៅ លោក ថាច់ សេដ្ឋា ក៏​បាន​បដិសេធ​បទ​ចោទ​ប្រកាន់​ទាំង​ពីរ​នេះ​ដែរ ដោយ​លោក​អះអាង​ថា ការ​លើក​ឡើង​របស់​លោក​គ្រាន់​តែ​ជា​ការ​ចែក​រំលែក​ចំណេះ​ដឹង​ប្រវត្តិ​សាស្ត្រ​តែ​ប៉ុណ្ណោះ។

ស្ថិត​ក្នុង​វ័យ ៧០ឆ្នាំ​ទៅ​ហើយ​នោះ លោក ថាច់ សេដ្ឋា ត្រូវ​បាន​សមត្ថកិច្ច​ក្រុង​ភ្នំពេញ ចាប់​ខ្លួន​កាលពី​ល្ងាច​ថ្ងៃ​ទី១៦ ខែ​មករា ហើយ​ការ​ចាប់​ខ្លួន​នេះ​នៅ​ពេល​លោក​មាន​ជំងឺ​ធ្ងន់ធ្ងរ​ប្រចាំ​កាយ​ជាច្រើន រួម​មាន​ជំងឺ​ខ្សោយ​បេះដូង លើស​ជាតិ​អាស៊ីដ និង​លើស​ជាតិ​ស្ករ​ជា​ដើម។ ដោយសារ​ស្ថាន​ភាព​ជំងឺ​ធ្ងន់ធ្ងរ​នេះ គ្រួសារ​លោក ថាច់ សេដ្ឋា តែង​ទទូច​ដល់​តុលាការ​ដោះលែង​លោក​ឱ្យ​មាន​សេរីភាព​ឡើង​វិញ​ដើម្បី​មាន​ឱកាស​រស់​នៅ​ជួបជុំ​គ្រួសារ និង​ព្យាបាល​ជំងឺ​នៅ​ខាង​ក្រៅ​ពន្ធនាគារ។

ជុំវិញ​រឿង​នេះ​ដែរ នាយក​ទទួលបន្ទុក​កិច្ចការ​ទូទៅ​នៃ​អង្គការ​ឃ្លាំ​មើល​សិទ្ធិមនុស្ស ​លីកាដូ (LICADHO) លោក អំ សំអាត មាន​ប្រសាសន៍​ថា ដោយសារ​សំណុំរឿង​លោក ថាច់ សេដ្ឋា ត្រូវ​បាន​សហគមន៍​អន្តរជាតិ​ចាត់​ទុក​ថា ជា​រឿង​នយោបាយ ដូច្នេះ​រដ្ឋាភិបាល​នឹង​ទទួល​បាន​ការ​សាទរ​ពី​សហគមន៍​អន្តរជាតិ ប្រសិន​បើ​តុលាការ​សម្រេច​លើកលែង​បទ​ចោទ​ប្រកាន់ និង​ដោះលែង​ឱ្យ​លោក ថាច់ សេដ្ឋា ឱ្យ​មាន​សេរីភាព​វិញ។

លោក អំ សំអាត៖ «អាជ្ញាធរ​ពាក់ព័ន្ធ​ទាំងអស់​រួម​ទាំង​រដ្ឋាភិបាល លោក​គួរ​តែ​ពិនិត្យ​និង​ពិចារណា​ផង ជា​ពិសេស សម្រាប់​សកម្មជន​គណបក្ស​នយោបាយ សកម្មជន​សិទ្ធិមនុស្ស ដែល​យើង​ឃើញ​ថា​កន្លង​មក ក៏​ជា​វប្បធម៌​ល្អ​ដែរ ដែល​មាន​ការ​បន្ធូរបន្ថយ​នូវ​បរិយាកាស​តាន​តឹង​ផ្នែក​នយោបាយ ឬ​ក៏​សិទ្ធិមនុស្ស ឬ​ក៏​លទ្ធិ​ប្រជាធិបតេយ្យ​ហ្នឹង គឺ​មាន​ការ​សម្រប​សម្រួល​ដោះលែង​ឱ្យ​ពួកគេ​មាន​សេរីភាព​វិញ អា​ហ្នឹង​ក៏​វា​ម្យ៉ាង​ដែរ ដើម្បី​បើក​លំហ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស»

គិត​មក​ដល់​ថ្ងៃពុធ ទី២០ កញ្ញា លោក ថាច់ សេដ្ឋា បាន​ឃុំ​នៅ​នៅ​ពន្ធនាគារ​ព្រៃ​ស (ម១) អស់​រយៈ​ពេល ២៣៥ថ្ងៃ​មក​ហើយ។ ក្រុម​អង្គការ​ជាតិ និង​អន្តរជាតិ​ព្រមទាំង​ប្រទេស​ប្រជាធិបតេយ្យ ចាត់​ទុក​ការ​ចោទ​ប្រកាន់​លោក ថាច់ សេដ្ឋា ជា​បន្ត​បន្ទាប់​មក​នេះ គឺជា​រឿង​នយោបាយ​សុទ្ធសាធ និង​ទាមទារ​ឲ្យ​ដោះ​លែង​អ្នក​នយោបាយ​ចាស់​វស្សា​រូប​នេះ​វិញ​ជា​បន្ទាន់ ដើម្បី​លើក​កម្ពស់​ការ​គោរព​សិទ្ធិមនុស្ស និង​លទ្ធិ​ប្រជាធិបតេយ្យ​នៅ​កម្ពុជា៕

អត្ថបទពេញនិយម
នយោបាយ
តើ​ការ​ដឹកនាំ​របស់នាយករដ្ឋមន្ត្រី​កម្ពុជា និង​ថៃ ដូច​ឬ​ខុស​ដូចម្ដេច​ខ្លះ ក្នុង​រយៈ​ពេល​៣​ខែ​នេះ?
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។