អាជ្ញាធរថៃចាប់ខ្លួនជនភៀសខ្លួនខ្មែរចំនួន៣នាក់បញ្ជូនទៅឃុំខ្លួនបណ្ដោះអាសន្ននៅការិយាល័យប៉ូលិសអន្តោប្រវេសន៍ថៃ នៅរសៀលថ្ងៃទី២ កុម្ភៈ។ ជនភៀសខ្លួន និងជាសកម្មជនគណបក្សប្រឆាំងចាត់ទុកការចាប់ខ្លួននេះថា ជាការអនុវត្តតាមការស្នើសុំរបស់រដ្ឋាភិបាលខ្មែរ។
ជនភៀសខ្លួនទាំងបីនាក់ដែលអាជ្ញាធរថៃចាប់ខ្លួនជាសកម្មជនគណបក្សភ្លើងទៀនរួមមាន លោកលឹម សុខា លោក គង់ រ៉ៃយ៉ា និងលោក ផន ផាន់ណា។ អាជ្ញាធរថៃបានចោទប្រកាន់ពួកគេពីបទស្នាក់នៅប្រទេសថៃដោយខុសច្បាប់។
មន្ត្រីគណបក្សភ្លើងទៀន ដែលកំពុងភៀសខ្លួននៅប្រទេសថៃ លោក ខឹម មុន្នីកុសល ប្រាប់វិទ្យុអាស៊ីសេរីនៅថ្ងៃទី២ កុម្ភៈ ថា ប៉ូលិសថៃបានចូលចាប់ខ្លួន លោក ផន ផាន់ណា នៅបន្ទប់ស្នាក់នៅក្នុងខេត្តរាក់យ៉ង (Rayorng) ហើយបញ្ជូនទៅឃុំខ្លួននៅការិយាល័យប៉ូលិសអន្តោប្រវេសន៍ថៃនៅទីក្រុងបាងកក នៅយប់ថ្ងៃទី២ កុម្ភៈ។ ចំណែកលោក គង់ រ៉ៃយ៉ា និងលោក លឹម សុខា ត្រូវបានចាប់ខ្លួននៅក្នុងបន្ទប់ស្នាក់នៅក្នុងទីក្រុងបាងកក។
លោក ខឹម មុន្នីកុសល៖ «ហើយមួយទៀតឥឡូវនេះពួកយើងស្ថានភាពជនភៀសខ្លួន នៅបាងកកនេះតឹងតែងណាស់ ជាពិសេសនៅអគារដែលខ្ញុំកំពុងស្នាក់នៅប៉ូលិសយាមល្បាតនៅខាងក្រោមតែម្ដង យើងហ៊ានតែចុះទៅគឺចាប់ចុះទៅគឺចាប់តែម្ដង។ សូមឱ្យរដ្ឋាភិបាលថៃនឹងមេត្តាគោរពសិទ្ធិជនភៀសខ្លួន ហើយឈប់ធ្វើបាបពួកយើង ហើយឈប់តាមយាយីការរស់នៅរបស់ជនភៀសខ្លួន ដែលពួកយើងកំពុងតែជួបការលំបាកស្រាប់»។
អតីតសកម្មជនគណបក្សភ្លើងទៀន ខេត្តកំពង់ចាម លោក គង់ រ៉ៃយ៉ា ថ្លែងថា ប៉ូលិសថៃបានបញ្ជូនលោក និងគ្រួសារទៅឃុំខ្លួននៅការិយាល័យប៉ូលិសអន្តោប្រវេសន៍នៅទីក្រុងបាងកក(Bangkok)ភ្លាមៗក្រោយពេលចាប់ខ្លួន។ លោកចាត់ទុកការចាប់ខ្លួននេះថា ជាការសហការជាមួយរដ្ឋាភិបាលលោក ហ៊ុន ម៉ាណែត ដោយសារលោករិះគន់ភាពអសកម្មរបស់រដ្ឋាភិបាលក្រុងភ្នំពេញជាបន្តបន្ទាប់។
លោក គង់ រ៉ៃយ៉ា៖ «ដោយសារតែការរស់របស់ខ្ញុំមិនមានបញ្ហាជាមួយអ្នកជិតខាងទេ អ៊ីចឹងហើយទើបធ្វើឱ្យគេមានគំនុំគេខឹងចាប់ខ្លួនខ្ញុំ។ ហើយមួយវិញទៀតគឺខ្ញុំមិនដឹងថា ហេតុអីបានជាគេដឹងកន្លែងខ្ញុំស្នាក់នៅទេ ប្រហែលជាអាចតាមដានតាមលេខទូរស័ព្ទតាមដានតាមបណ្ដាញសង្គមដែលខ្ញុំប្រើប្រាស់»។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី២ កុម្ភៈ។
ជុំវិញរឿងនេះមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី យល់ឃើញថា ការចាប់ខ្លួននេះជារឿងមិនត្រឹមត្រូវឡើយ ពីព្រោះពួកគេជាជនភៀសខ្លួន ដែលទទួលស្គាល់ដោយឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) នៅទីក្រុងបាងកក។
លោក យិន ម៉េងលី៖ «ដូចខ្ញុំបានលើកអ៊ីចឹង យោងទៅលើការធ្វើបត្យាប័ន រឿងហេតុផលនយោបាយគេអត់ឱ្យមានបញ្ហាទេ ហើយហេតុផលការបញ្ចេញមតិក៏អត់មានបញ្ហាដែរ។ ហេតុផលនយោបាយធ្វើម៉េចកុំឱ្យតែប៉ះពាល់រូបរាងកាយរបស់គេ កុំប្រើប្រាស់ហិង្សា ប៉ុន្តែហេតុផលនយោបាយការយល់ឃើញការបញ្ចេញមតិទាំងអស់នេះហើយគឺជាហេតុផលនយោបាយ»។
ការចាប់ខ្លួននេះធ្វើឡើងស្របពេលកៀកថ្ងៃដែលលោកនាយករដ្ឋមន្ត្រី ហ៊ុន ម៉ាណែត គ្រោងធ្វើទស្សនកិច្ចទៅប្រទេសថៃ នៅថ្ងៃទី៧ កុម្ភៈខាងមុខ។ ថ្មីៗនេះក្រុមជនភៀសខ្លួនខ្មែរនៅប្រទេសថៃបានប្រកាសត្រៀមធ្វើបាតុកម្មប្រឆាំងវត្តមានរបស់លោក ហ៊ុន ម៉ាណែត ជាបន្តបន្ទាប់។
សព្វថ្ងៃមានជនភៀសខ្លួនខ្មែរនៅប្រទេសថៃជាង ១០០នាក់ ដែលជាសកម្មជននយោបាយបក្សប្រឆាំង សកម្មជនការងារសង្គម និងសកម្មជនដីធ្លីជាដើម។ ក្រោយស្ងប់ស្ងាត់មួយរយៈដែលពួកគេប្រឈមការចាប់បញ្ជូនទៅប្រទេសកម្ពុជា តែនៅរយៈពេលចុងក្រោយនេះ សមត្ថកិច្ចថៃដែលរដ្ឋាភិបាលប្រទេសនេះមានទំនាក់ទំនងជិតស្និទ្ធជាមួយរដ្ឋាភិបាលក្រុងភ្នំពេញ បានចាប់ខ្លួនជនភៀសខ្លួនខ្មែរជាបន្តបន្ទាប់ បញ្ជូនទៅកម្ពុជាវិញ ហើយក្រៅពីនេះ ក៏មានភៀសខ្លួនផ្សេងទៀត ត្រូវជនមិនស្គាល់មុខវាយធ្វើបាបនៅប្រទេសថៃផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។