ពលរដ្ឋចំនួន ៥នាក់ ដែលតំណាងឱ្យប្រជាពលរដ្ឋ ១.៥០០នាក់ នៅព្រឹកថ្ងៃទី១៩ ខែកញ្ញានេះ បាននាំគ្នាដាក់ញត្តិស្នើសុំក្រសួងមហាផ្ទៃ ឱ្យឈប់ផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍។ មន្ត្រីសង្គមស៊ីវិល គាំទ្រញត្តិរបស់ក្រុមប្រជាពលរដ្ឋ ហើយថា ការស្នើសុំនេះ មិនមែនជាការរើសអើងជាតិសាសន៍នោះទេ ប៉ុន្តែគឺជាការដែលគិតពីផលប្រយោជន៍ប្រជាពលរដ្ឋខ្មែរ និងការការពារបូរណភាពទឹកដី។
តំណាងក្រុមយុវជន លោក ថេល ធីលែន ប្រាប់វិទ្យុអាស៊ីសេរីថា ញត្តិដែលលោកបានដាក់ជូនក្រសួងមហាផ្ទៃ បានភ្ជាប់ស្នាមមេដៃ និងលេខអត្តសញ្ញាណប័ណ្ណពីប្រជាពលរដ្ឋ ១.៥០០នាក់ គាំទ្រស្នើសុំឱ្យក្រសួងមហាផ្ទៃ បញ្ឈប់ការផ្ដល់លិខិតស្នាក់នៅអចិន្ត្រៃយ៍ដល់ជនអន្តោប្រវេសន៍។ លោក ថេល ធីលែន បន្ថែមថា បច្ចុប្បន្នមានជនជាតិវៀតណាមរាប់ពាន់នាក់ កំពុងសម្រុកចូលមកកម្ពុជា តាមច្រករបៀងព្រំដែន ដើម្បីមកធ្វើប័ណ្ណស្នាក់នៅអចិន្ត្រៃយ៍ ហើយនេះគឺជាការគំរាមកំហែងដល់សុវត្ថិភាពប្រទេសជាតិ ពីព្រោះជនជាតិវៀតណាមមិនដែលបោះបង់គំនិតឈ្លានពានទឹកដីកម្ពុជានោះទេ។ ជាមួយគ្នានេះ លោក ថេល ធីលែន បន្ថែមថា ប្រសិទ្ធិភាពក្នុងការគ្រប់គ្រងជនអន្តោប្រវេសន៍នៅកម្ពុជា ខុសពីការគ្រប់គ្រងជនអន្តោប្រវេសន៍នៅប្រទេសអាមេរិក (United State) ព្រោះជនអន្តោប្រវេសន៍នៅកម្ពុជាភាគច្រើនជាជនជាតិចិន និងវៀតណាម ហើយពួកគេទាំងនោះ ភាគច្រើនរកស៊ីខុសច្បាប់ និងតែងតែបង្កបញ្ហាដល់សង្គមជាតិ៖ « ភាគច្រើនអសន្តិសុខ និងបញ្ហានានារបស់សង្គមគឺកើតចេញពីជនអន្តោប្រវេសន៍វៀតណាមហើយនិងចិននេះឯង ដូចជាគ្រឿងញៀន ពេស្យាចារ ចោរកម្ម ការជួញដូរមនុស្ស ការលាងលុយកខ្វក់នានាហ្នឹង សុទ្ធតែកើតចេញពីជនអន្តោប្រវេសន៍។ យើងផ្ដល់សិទ្ធិឱ្យគាត់កាន់តែទូលំទូលាយទៀត អញ្ចឹងសង្គមជាតិយើងប្រាកដជាមានហានិភ័យ និងបញ្ហាជាច្រើនប៉ះពាល់ដល់សុខុមាលភាពរបស់ប្រជាពលរដ្ឋខ្មែរយើង»។
វិទ្យុអាស៊ីសេរីនៅពុំអាចទាក់ទងអ្នកនាំពាក្យក្រសួងមហាផ្ទៃលោក ខៀវ សុភ័គ ដើម្បីផ្ដល់ការបកស្រាយអំពីញត្តិនេះបាននៅឡើយទេនៅថ្ងៃទី១៩ ខែកញ្ញា។ ទោះជាយ៉ាងណា មន្ត្រីរដ្ឋបាលក្រសួងមហាផ្ទៃ បានទទួលយកញត្តិរបស់ក្រុមប្រជាពលរដ្ឋកាលពីព្រឹកថ្ងៃទី១៩ ខែកញ្ញា ដោយតំណាងប្រជាពលរដ្ឋទាំង៥នាក់ ដើរយកញត្តិទៅដាក់ដល់ការិយាល័យរដ្ឋបាលក្រសួងមហាផ្ទៃតែម្ដង ប៉ុន្តែមន្ត្រីរដ្ឋបាលក្រសួងមហាផ្ទៃមិនបានឆ្លើយតបចំពោះញត្តិនេះថាយ៉ាងណានៅឡើយទេ។
ជុំវិញរឿងនេះដែរ អ្នកនាំពាក្យសមាគមអាដហុក លោក សឹង សែនករុណា យល់ឃើញថា ការដាក់ញត្តិរបស់ក្រុមយុវជននេះ គឺជាការបំពេញភារកិច្ចក្នុងនាមជាពលរដ្ឋ ដែលស្របតាមច្បាប់រដ្ឋធម្មនុញ្ញមាត្រា៣៥ ដែលបានចែងថា ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ ហើយសេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងម៉ត់ចត់ពីអង្គការរដ្ឋ។ លោក សឹង សែនករុណា បន្ថែមថា រដ្ឋាភិបាលគួរពិចារណាឡើងវិញចំពោះការស្នើរបស់ក្រុមប្រជាពលរដ្ឋនេះ ហើយក្រសួងពាក់ព័ន្ធគួររឹតបន្តឹងការអនុវត្តច្បាប់ជនអន្តោប្រវេសន៍ ជាជាងការចេញលិខិតស្នាក់នៅអចិន្ត្រៃយ៍ដល់ជនអន្តោប្រវេសន៍ទាំងនេះ។ បន្ថែមពីនេះ លោក សឹង សែនករុណា លើកឡើងថា ការស្នើសុំរបស់ប្រជាពលរដ្ឋទាំងនេះ មិនមែនជាការរើសអើងជាតិសាសន៍អ្វីនោះទេ ប៉ុន្តែគឺជាការគិតគូរពីបូរណភាពទឹកដី និងជីវភាពរស់នៅរបស់ប្រជាពលរដ្ឋខ្មែរ តាមរយៈការកាត់បន្ថយសកម្មភាពខុសច្បាប់របស់ជនអន្តោប្រវេសន៍តែប៉ុណ្ណោះ៖ « លក្ខណៈជាសកល ថ្វីត្បិតតែគេមិនឱ្យមានការរើសអើងមែន ប៉ុន្តែបញ្ហានេះវាហាក់ដូចជាមិនមានន័យបញ្ជាក់ទៅលើបញ្ហារើសអើងទេ ពីព្រោះជនជាតិវៀតណាមគេមានប្រទេសរបស់គេដែរ យើងក៏មានប្រទេសរបស់យើង ហើយពលរដ្ឋយើងក៏គេមានសិទ្ធិក្នុងការស្រលាញ់ប្រទេស ស្រលាញ់ទឹកដី គេចង់រក្សាទឹក រក្សាដីប្រទេសហ្នឹងដើម្បីជាប្រយោជន៍ដល់ពលរដ្ឋខ្មែរផងដែរ»។
បន្ទាប់ពីដាក់ញត្តិនៅក្រសួងមហាផ្ទៃ លោក ថេល ធីលែន បានប្រកាសថា លោកនឹងប្រមូលផ្ដុំប្រជាពលរដ្ឋតវ៉ាដោយអហិង្សានៅទីលានប្រជាធិបតេយ្យ ដើម្បីស្នើសុំឱ្យរដ្ឋាភិបាល បញ្ឈប់ផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ និងស្នើសុំកុំឱ្យបង្រៀនអក្សរសាស្ត្រវៀតណាម នៅសកលវិទ្យាល័យភូមិន្ទភ្នំពេញ ក្រោយពីពិធីភ្ជុំបិណ្ឌនេះ។ កន្លងមក ប្រជាពលរដ្ឋ មន្ត្រីអង្គការសង្គមស៊ីវិល និងគណបក្សភ្លើងទៀន បានបង្ហាញក្ដីបារម្ភថា ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍នេះ គឺជាការលើកទឹកចិត្តដល់ជនអន្តោប្រវេសន៍ខុសច្បាប់ និងធ្វើឱ្យជនអន្តោប្រវេសន៍ខុសច្បាប់ចូលមករស់នៅកម្ពុជាកាន់តែច្រើនថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។