ទីភ្នាក់ងារព័ត៌មានរបស់កូរ៉េខាងជើងចេញផ្សាយនៅថ្ងៃទី១៥ ខែកុម្ភៈដោយបានដកស្រង់របាយការណ៍បឋមរបស់អង្គការសហប្រជាជាតិបង្ហាញថាចារកម្មកូរ៉េខាងជើងកំពុងបង្កប់ខ្លួននៅប្រទេសកម្ពុជានិងបើកអាជីវកម្មធំៗជាច្រើន រួមមាន សណ្ឋាគារ កាស៊ីណូ ទីភ្នាក់ងារទេសចរណ៍ភោជនីយដ្ឋាននិងរង្គសាលជាដើមចាប់តាំងពីពាក់កណ្តាលឆ្នាំ២០២០មក។
ភ្នាក់ងារចារកម្មម្នាក់នោះមានឈ្មោះ គឹម ជុលសុខ (Kim Chol Sok) បានបើកដំណើរការអាជីវកម្មទាំងនោះ ក្រោមឈ្មោះ សុខា (Sok Kha) តាមការបញ្ជារបស់ការិយាល័យឈ្លបយកការណ៍ទូទៅ (RGB) នៃទីភ្នាក់ងារចារកម្មកំពូលរបស់កូរ៉េខាងជើង។
របាយការណ៍របស់ក្រុមអ្នកជំនាញពិសេសរបស់អង្គការសហប្រជាជាតិដដែលបញ្ជាក់ថាក្រុមហ៊ុនមួយក្នុងចំណោមក្រុមហ៊ុនជាច្រើនដែល គឹម ជុលសុខ បើកដំណើរការទាំងនោះ គឺទីភ្នាក់ងារទេសចរណ៍ពិភពលោក ស៊ី.អេច្ច (C.H. World Travel Co. Ltd) ដែលសម្របសម្រួលការដើរលេងកំសាន្តនៅអាស៊ីបូព៌ានិងអាស៊ីអាគ្នេយ៍។
កន្លងមករដ្ឋាភិបាលកម្ពុជាបានប្រាប់ទៅក្រុមអ្នកឃ្លាំមើលការដាក់ទណ្ឌកម្មរបស់អង្គការសហប្រជាជាតិថាអាជ្ញាធរបានបិទដំណើរការរបស់ទីភ្នាក់ងារទេសចរណ៍ពិភពលោក ស៊ី.អេច្ច និងបិទគណនីរបស់ក្រុមហ៊ុននេះហើយ។ ក៏ប៉ុន្តែភ្នាក់ងារព័ត៌មានរបស់កូរ៉េខាងជើងបានរកឃើញថាទីភ្នាក់ងារទេសចរណ៍នេះនៅបន្តបើកដំណើរការនៅឡើយទេដោយគេហទំព័រហ្វេសប៊ុកក្រុមហ៊ុនបង្ហាញពីសកម្មភាពរបស់ខ្លួនកាលពី២សប្តាហ៍មុនកន្លងមកនេះ។
ទាក់ទងនឹងបញ្ហានេះអ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន ប្រាប់វិទ្យុអាស៊ីសេរីកាលពីយប់ថ្ងៃទី១៦ ខែកុម្ភៈថា រដ្ឋាភិបាលកម្ពុជាបានអនុវត្តតាមគោលការណ៍របស់អង្គការសហប្រជាជាតិដែលបានដាក់ទណ្ឌកម្មដល់រដ្ឋាភិបាលកូរ៉េខាងជើង។ក៏ប៉ុន្តែលោកនៅមិនទាន់បានទទួលរបាយការណ៍ចុងក្រោយរបស់អង្គការសហប្រជាជាតិនេះទេ៖ « ជាគោលការណ៍ខ្ញុំដឹងថា កម្ពុជាហ្នឹងបានអនុត្តតាមការដាក់ទណ្ឌកម្មរបស់យូអិន (UN) ដូចជា ការបិទភោជនីយដ្ឋាន និងកន្លែងសង់កន្លែងសិល្បៈមួយនៅខេត្តសៀមរាប គឺយើងអនុវត្តទៅតាមទណ្ឌកម្មរបស់អង្គការសហប្រជាជាតិ។ ចំពោះរឿងនេះថ្មីសំរាប់ខ្ញុំដែរ ខ្ញុំអត់ដឹងទេ ទាល់តែសួរក្រសួងការបរទេស មិនដឹងថា តើវានៅជាសញ្ជាតិកូរ៉េខាងជើងដដែល ឬដូរសញ្ជាតិ » ។
អាជ្ញាធរកម្ពុជាបានប្រាប់អង្គការសហប្រជាជាតិថា គឹម ជុលសុខ (Kim Chol Sok)មានលិខិតឆ្លងដែនការទូតក្លែងក្លាយក៏ប៉ុន្តែរបាយការណ៍របស់ អ.ស.ប.បញ្ជាក់ថា គឹម ជុលសុខ មានទំនាក់ទំនងជិតស្និទ្ធជាមួយមន្ត្រីជាន់ខ្ពស់រដ្ឋាភិបាលកម្ពុជាដែលនេះអាចមានលទ្ធភាពក្នុងការជួយធ្វើលិខិតឆ្លងដែននេះ។
របាយការណ៍របស់ អ.ស.ប. បន្តថា គឹម ជុលសុខ គឺជាអ្នកជំនួញម្នាក់ពាក់ព័ន្ធនឹងលោក ទ្រី ភាព ដែលជាម្ចាស់ក្រុមហ៊ុនរកស៊ីជួញដូរឈើខ្នាតធំដែលសហរដ្ឋអាមេរិកបានដាក់ទណ្ឌកម្មពាក់ព័ន្ធរឿងប្រព្រឹត្តអំពើពុករលួយកាលពីឆ្នាំ២០១៩។ លោក ទ្រី ភាព ក៏មានទំនាក់ទំនងជិតស្និទ្ធជាមួយលោក នាយករដ្ឋមន្ត្រី ហ៊ុន សែន រហូតដល់ប្រើប្រាស់កងកម្លាំងយោធាដើម្បីកាងនិងការពារការដឹកជញ្ជូនទំនិញខុសច្បាប់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។