អាមេរិក​ជំរុញ​រដ្ឋាភិបាល​វៀតណាម​ដោះលែង​សកម្មជន​ខ្មែរក្រោម​ដែល​កំពុង​ជាប់ឃុំ

ដោយ យ៉ង ចាន់តារា
2024.04.02
អាមេរិក​ជំរុញ​រដ្ឋាភិបាល​វៀតណាម​ដោះលែង​សកម្មជន​ខ្មែរក្រោម​ដែល​កំពុង​ជាប់ឃុំ អ្នកនាំពាក្យ​ក្រសួង​ការបរទេស​សហរដ្ឋអាមេរិក លោក ម៉ាត់ហ្ស៊ូ មីលឺ (Matthew Miller)។
AP

ក្រសួងការបរទេស​សហរដ្ឋអាមេរិក​ជំរុញ​ទៅកាន់​រដ្ឋាភិបាល​វៀតណាម​ឱ្យ​ដោះលែង​សកម្មជន​ខ្មែរក្រោម​។ ប្រតិកម្ម​របស់​រដ្ឋាភិបាល​សហរដ្ឋអាមេរិក​នេះ ធ្វើឡើង​ក្រោយ​ពេល​អាជ្ញាធរ​នៃ​រដ្ឋាភិបាល​បក្សកុម្មុយនិស្ត​វៀតណាម​បន្ត​ចាប់ឃុំខ្លួន​ព្រះសង្ឃ និង​ពលរដ្ឋ​ខ្មែរក្រោម​ជា​បន្តបន្ទាប់​ក្នុង​រយៈពេល​មួយ​សប្ដាហ៍​ចុងក្រោយ​នេះ។

ក្រសួង​ការបរទេស​សហរដ្ឋ​អាមេរិក​ចាត់ទុក​ការចាប់​ឃុំខ្លួន និង​កាត់ទោស​សកម្មជន​ខ្មែរក្រោម​នៅក្នុង​ប្រទេស​វៀតណាម គឺជា​ការរំលោភ​សិទ្ធិមនុស្ស និង​សិទ្ធិសេរីភាព​ជា​មូលដ្ឋាន​នៅ​ក្នុង​ប្រទេស​នេះ។

អ្នកនាំពាក្យ​ក្រសួង​ការបរទេស​សហរដ្ឋអាមេរិក លោក ម៉ាត់ហ្ស៊ូ មីលឺ (Matthew Miller) កាលពី​ថ្ងៃ​១ ខែមេសា បានចេញ​សេចក្ដីថ្លែងការណ៍​សម្ដែង​ក្ដីបារម្ភ​របស់​សហរដ្ឋ​អាមេរិក​ទៅលើ​រដ្ឋាភិបាល​ប្រទេស​វៀតណាម​ដែល​បាន​ប្រើប្រាស់​តុលាការ​ដើម្បី​បង្ក្រាប​ទៅលើ​សេរីភាព​ខាង​សាសនា និង​ជំនឿ។

លោក ម៉ាត់ហ្ស៊ូ មីលឺ លើកឡើង​ថា សហរដ្ឋអាមេរិក​មាន​ការព្រួយបារម្ភ​យ៉ាងខ្លាំង​ចំពោះ​ការ​កាត់ទោស​ក្នុងប្រទេស​វៀតណាម ជាពិសេស​ការផ្ដន្ទាទោស​ទៅលើ​អ្នកតស៊ូ​មតិ​ដើម្បី​សេរីភាព​សាសនា​ចំនួន ៥ នាក់​ចាប់​តាំងពីខែ​មករា ឆ្នាំ​២០២៤ មក។

ក្នុង​ចំណោម​អ្នកតស៊ូ​មតិ​ដើម្បី​សេរីភាព​សាសនា​ទាំង​៥​នាក់​នោះ មាន​បីនាក់​ជា​សកម្មជន​ខ្មែរក្រោម រួមមាន លោក តោ ហ្វាងចឿង លោក ថាច់ កឿង និង​លោក យ័ញ មិញក្វាង ។ ពួកគេ​ត្រូវបាន​តុលាការ​វៀតណាម​កាត់ទោស​ឱ្យ​ជាប់ពន្ធនាគារ​ចន្លោះ​ពី​៣ ឆ្នាំ​៦ ខែ ដល់​៤​ឆ្នាំ កាលពីដើម​ខែកុម្ភៈ និង​ថ្ងៃទី​២០ មីនា ក្រោម​បទចោទប្រកាន់​«​កេងចំណេញ​លើ​សិទ្ធិសេរីភាព និង​លទ្ធិប្រជាធិបតេយ្យ​» តាម​មាត្រា ៣៣១ នៃ​ក្រមព្រហ្មទណ្ឌ​របស់​ប្រទេស​វៀតណាម។

សេចក្ដីថ្លែងការណ៍​ដដែល​របស់​ក្រសួងការបរទេស​អាមេរិក​លើកឡើង​ទៀត​ថា សហរដ្ឋអាមេរិក​ជំរុញ​ទៅ​កាន់​រដ្ឋាភិបាល​ប្រទេស​វៀតណាម​ឱ្យ​គោរព​សិទ្ធិ​បុគ្គល​ក្នុង​ការ​អនុវត្ត​សេរីភាព​នៃ​ការ​បញ្ចេញមតិ ការបង្កើត​សមាគម ការគោរព​សាសនា និង​ជំនឿ​។ សហរដ្ឋអាមេរិក​ក៏​អំពាវនាវ​ជាថ្មី​ដល់​រដ្ឋាភិបាល​វៀតណាម​ឱ្យ​ដោះលែង​អ្នកទោស​មនសិការ​ទាំង​អស់នេះ។

វិទ្យុ​អាស៊ីសេរី​មិនទាន់​អាច​សុំ​ការឆ្លើយតប​រឿងនេះ​ពី​ស្ថានទូត​វៀតណាម​ប្រចាំ​នៅ​កម្ពុជា​បានទេ នៅ​ថ្ងៃទី២ ខែ​មេសា

គិត​មក​ទល់​ពេល​នេះ មាន​ព្រះសង្ឃ និង​ពលរដ្ឋ​ខ្មែរក្រោម​ចំនួន ១២ អង្គ​/​នាក់​ហើយ​ត្រូវ​អាជ្ញាធរ​វៀតណាម​ចាប់ខ្លួន​ដាក់ពន្ធនាគារ ក្នុងនោះ​៤​នាក់​ត្រូវបាន​តុលាការ​វៀតណាម​កាត់ទោស​រួចហើយ​ឱ្យ​ជាប់​ពន្ធនាគារ​ចន្លោះ​ពី ២​ដល់​៤​ឆ្នាំ។

ជុំវិញ​រឿងនេះ អគ្គលេខាធិការ​សមាគម​ខ្មែរ​កម្ពុជា​ក្រោម​ដើម្បី​សិទ្ធិមនុស្ស​និង​អភិវឌ្ឍន៍ លោក​បណ្ឌិត សឺន ជុំជួន មានប្រសាសន៍​ថា ការជំរុញ​របស់​សហរដ្ឋ​អាមេរិក​ទៅកាន់​រដ្ឋាភិបាល​វៀតណាម​នេះ​គឺជា​ការ​លើកឡើង​ដ៏​ល្អ​ដើម្បី​គាំទ្រ​ដល់​ជនជាតិ​ដើម​ខ្មែរក្រោម និង​ជនជាតិភាគតិច​ផ្សេងទៀត​ដែល​កំពុង​រង​ទុក្ខបុកម្នេញ​ដោយសារ​ការ​អនុវត្ត​សិទ្ធិសេរីភាព​របស់ខ្លួន។

លោក​បណ្ឌិត សឺន ជុំជួន៖ «ជា​រឿង​មួយ​យើងខ្ញុំ​សូម​គាំទ្រ​ទៅលើ​ការអំពាវនាវ​របស់​សហរដ្ឋ​អាមេរិក យើង​ក៏​ស្នើ​ដែរ​សូមឱ្យ​គាត់​សរសេរ​ឱ្យចំ​ឧទាហរណ៍​ថា​លោក តោ ហ្វាងចឿង លោក ថាច់ កឿង​ជាដើម​ហ្នឹង ពួកគាត់​គឺជា​ជនជាតិដើម ប្រសិនបើ​គាត់​ប្រើប្រាស់​ជា​ពាក្យ​ជនជាតិ​ដើម​គឺជា​រឿង​ល្អ​ដែរ»។

អាជ្ញាធរ​វៀតណាម​ខេត្ត​លង់​ហោ​ដែល​វៀតណាម​ហៅថា​ខេត្ត វិញ ឡុង (Vinh Long ) កាលពី​ថ្ងៃទី​២៦ និង​ថ្ងៃទី ២៨ ខែមីនា បាន​ចាប់​ផ្សឹក​ព្រះសង្ឃ​គង់នៅ​វត្ត​ប្រជុំ​ពល​មង្គលបូរី ឬ​ហៅថា​វត្ត​ទ្រនំ​សេក​ចំនួន​៥​អង្គ និង​ចាប់ឃុំខ្លួន​ពលរដ្ឋ​ខ្មែរក្រោម​ចំនួន​បីនាក់​តាម​មាត្រា ៣៣១ និង ១៥៧ នៃ​ក្រមព្រហ្មទណ្ឌ​វៀតណាម​។ ក្នុង​ចំណោម​ព្រះសង្ឃ​ទាំង ៥ អង្គ​នោះ​រួមមាន ព្រះចៅអធិការ​វត្ត​ទ្រនំសេកព្រះ​ភិក្ខុ ថាច់ ចន្ទតារា និង​ព្រះ​ភិក្ខុ យឿង ខាយ ដែល​ជា​សកម្មជន​សង្ឃ​ខ្មែរក្រោម​ធ្លាប់បាន​ចូលរួម​យ៉ាងសកម្ម​ក្នុង​ការ​ផ្សព្វផ្សាយ​សិទ្ធិ​ជនជាតិ​ដើម​ដល់​ពលរដ្ឋ​ខ្មែរក្រោម និង​ធ្លាប់​ត្រូវ​បាន​អាជ្ញាធរ​វៀតណាម​ឃាត់ខ្លួន​សួរចម្លើយ​នៅ​ប៉ុស្តិ៍នគរបាល​ជាច្រើន​ដង។

លើស​ពី​នេះ​ទៅ​ទៀត អាជ្ញាធរ​វៀតណាម​ខេត្ត​លង់​ហោ កាលពី​ថ្ងៃទី ០១ ខែមេសា បានដាក់​កម្លាំង​ជាច្រើន​នាក់ និង​ប្រើ​គ្រឿងចក្រ​ឈូស​កម្ទេច​សាលាឆទាន​នៅ​ភូមិ​កន្រែង ខណៈដែល​សាលាឆទាន​នេះ​ត្រូវបាន​ដឹកនាំ​សាងសង់​កាលពី​ប៉ុន្មាន​ឆ្នាំ​មុន ដោយ​ចៅអធិការ​វត្ត​ទ្រនំសេក ព្រះតេជព្រះគុណ ថាច់ ចន្ទតារា និង​សកម្មជន​ខ្មែរក្រោម លោក គឹម ឃីម។ ពលរដ្ឋ​ខ្មែរក្រោម​ចាត់ទុក​សាលាឆទាន​នេះ​គឺជា​ជាទី​សក្ការបូជា ធ្វើ​បុណ្យទាន​ជុំគ្នា និង​បង្ហាត់បង្រៀន​អក្សរសាស្ត្រ​ខ្មែរ​ដល់​កុមារា កុមារី និង​យុវជន​ខ្មែរក្រោម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
លោក ហ៊ុន សែន បដិសេធ​ការ​ចោទ​របស់​វៀតណាម ​ដែល​ថា ព្រែក​ជីកហ្វូណន​សម្រាប់​សម្រួល​វត្តមាន​យោធា​ចិន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។