គណបក្សហ្វ៊ុនស៊ិនប៉ិច បន្តរកការបង្រួបបង្រួមគ្នាជាមួយគណបក្សខ្មែររួបរួមជាតិរបស់លោក ញឹក ប៊ុនឆៃ ក្រោយអវត្តមានសម្ដេចក្រុមព្រះនរោត្តម រណឫទ្ធិ។ អ្នកឃ្លាំមើល មិនជឿថា គណបក្សទាំង ២ នេះអាចរួបរួមគ្នាវិញបានទេ ហើយបើទោះជារួមគ្នាបាន ក៏មិនទទួលបានប្រជាប្រិយភាពដែរ។
មន្ត្រីគណបក្សហ្វ៊ុនស៊ិនប៉ិច រំពឹងថា ការបង្រួបបង្រួមគ្នាឡើងវិញរបស់គណបក្សក្រោមដំបូលបក្សហ្វ៊ុនស៊ិនប៉ិច នឹងធ្វើឲ្យបក្សរាជានិយមមួយនេះទទួលបានការគាំទ្រច្រើនពីប្រជារាស្ត្រ។
អ្នកនាំពាក្យបក្សហ្វ៊ុនស៊ិនប៉ិចលោក ញឿន រ៉ាដែន ប្រាប់វិទ្យុអាស៊ីសេរីថា គណបក្សនៅតែបន្តរកការរួបរួមជាមួយលោក ញឹក ប៊ុនឆៃ និងស្វាគមន៍គណបក្សផ្សេងទៀត មករួបរួមជាមួយគណបក្សហ្វ៊ុនស៊ិនប៉ិច។ លោកបន្តថា គណបក្សនេះ នឹងធ្វើសមាជនៅខែមករាខាងមុខ ដើម្បីជ្រើសតាំងបុត្រាច្បងរបស់សម្ដេចក្រុមព្រះ គឺព្រះអង្គម្ចាស់ នរោត្តម ចក្រាវុឌ្ឍ ជាប្រធានគណបក្សបន្តពីបិតារបស់ទ្រង់។
លោក ញឿន រ៉ាដែន បញ្ជាក់ថា គណបក្សនេះមិនដាក់បេក្ខជនផ្សេងឲ្យបោះឆ្នោតទេ ព្រោះតាមបណ្ដាំ គឺព្រះសពសម្ដេចក្រុមព្រះ បានប្រគល់ឲ្យបុត្រាច្បងទទួលភារកិច្ចដឹកនាំបក្សបន្ត។ លោក មានជំនឿថា បុត្រាច្បងរបស់សម្ដេចក្រុមព្រះ មានសមត្ថភាពគ្រប់គ្រាន់ក្នុងការដឹកនាំគណបក្សហ្វ៊ុនស៊ិនប៉ិច បន្តពីបិតាទ្រង់។ លោក ញឿន រ៉ាដែន បញ្ជាក់ថា ក្រុមមន្ត្រីគណបក្សហ្វ៊ុនស៊ិនប៉ិចមួយចំនួន ដែលធ្លាប់មានទំនាស់នឹងគ្នា ក៏គ្រោងនឹងចូលមកក្រាបបង្គំព្រះអង្គម្ចាស់ចក្រាវុឌ្ឍដែរ៖ «យើងនឹងគិតគូរបន្ថែមទៀត ឲ្យកាន់តែមានប្រជាប្រិយភាព ហើយជាពិសេសបុត្រារបស់លោក នឹងរៀបយុទ្ធសាស្ត្ររំលេចឡើងនូវគោលនយោបាយថ្មីៗ ឲ្យស្របទៅតាមបរិបទសម័យបច្ចេកវិទ្យាថ្មីនេះ។ អ៊ីចឹងអ្វីៗជាទុក្ខកង្វល់របស់ប្រជារាស្ត្រ ហើយនិងជាផលលំបាកអ្វីៗទាំងអស់នោះ យើងនឹងគិតគូរឲ្យបានច្បាស់ ជាពិសេសក្រោមការដឹកនាំរបស់ព្រះអង្គម្ចាស់ចក្រាវុឌ្ឍ នៅពេលខាងមុខនេះ»។
ប៉ុន្តែក្រុមមន្ត្រីចាស់ៗរបស់គណបក្សហ្វ៊ុនស៊ិនប៉ិចខ្លះ បានជំទាស់ក្នុងការជ្រើសតាំងព្រះអង្គម្ចាស់នរោត្តម ចក្រាវុឌ្ឍ ជាប្រធានបន្តពីសម្ដេចក្រុមព្រះ។ មន្ត្រីជាន់ខ្ពស់គណបក្សហ្វ៊ុនស៊ិនប៉ិចលោក ផាន់ សុទ្ធី លើកហេតុផលថា គណបក្សហ្វ៊ុនស៊ិនប៉ិចមិនមែនជាក្រុមហ៊ុនឯកជន ឬក៏ជាកម្មសិទ្ធិផ្ដាច់មុខរបស់អ្នកណាម្នាក់ ដែលអាចឡើងធ្វើប្រធានបន្តវេនគ្នាតាមតែចិត្តបានទេ។
លោកលើកទឹកចិត្តឲ្យព្រះអង្គម្ចាស់ នរោត្តម ចក្រាវុឌ្ឍ ដាក់ឈ្មោះជាបេក្ខភាពម្នាក់ ក្នុងចំណោមបេក្ខភាពផ្សេងទៀត ដើម្បីឲ្យគណៈកម្មការនាយកបោះឆ្នោត។ លោកបញ្ជាក់ថា សមាជិកបក្សហ្វ៊ុនស៊ិនប៉ិចទទួលយកតែការសម្រេចមតិភាគច្រើនរបស់គណៈកម្មការនាយកទេ ព្រោះមានតែគណៈកម្មការនេះទេ ដែលមានសិទ្ធិសម្រេចនៅពេលអវត្តមានប្រធានបក្ស៖ «បើសិនជាថ្នាក់ដឹកនាំទាំងអស់ហ្នឹង បោះឆ្នោតលោកជាប្រធាន ហ្នឹងជាប្រធានហើយ ហើយបើសិនជាបេក្ខជនណាមួយមានសក្ដានុពលជាង អាហ្នឹងអ្នកនោះជាប្រធានហើយ ក្នុងការដឹកនាំគណបក្សហ្វ៊ុនស៊ិនប៉ិចទៅ ឲ្យវារួមគ្នាជាធ្លុងមួយ»។
ជម្លោះផ្ទៃក្នុងរបស់គណបក្សហ្វ៊ុនស៊ិនប៉ិច បានកើតឡើងជាថ្មីទៀត ក្រោយពេលដែលសម្ដេចក្រុមព្រះ និងអ្នកម្ខាងអ៊ុក ផល្លា ជួបគ្រោះថ្នាក់ចរាចរណ៍កាលពីឆ្នាំ២០១៨ ហើយទ្រង់ត្រូវទៅសម្រាកព្យាបាលជំងឺនៅប្រទេសបារាំង។ ដើមចមនៃជម្លោះនេះគឺក្រុមមន្ត្រីចាស់ៗមួយចំនួន មិនពេញចិត្តនឹងការដឹកនាំរបស់ប្រធានស្ដីទី គឺព្រះអង្គម្ចាស់នរោត្តម ចក្រាវុឌ្ឍ ក្នុងការបណ្ដេញក្រុមមន្ត្រីចាស់ៗចេញពីបក្សជាបន្តបន្ទាប់។ ក្រុមមន្ត្រីបក្សទាំងនោះ ហៅការបណ្ដេញចេញនេះថា ខុសលក្ខន្តិកផ្ទៃក្នុងរបស់បក្ស។ ពួកគាត់អះអាងទៀតថា ពួកគាត់នៅតែមានឈ្មោះជាសមាជិកគណៈកម្មការនាយកដែលតម្កល់នៅក្រសួងមហាផ្ទៃ។
ជុំវិញករណីគម្រោងសមាជរបស់គណបក្សហ្វ៊ុនស៊ិនប៉ិចនេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យគណបក្សប្រជាជនកម្ពុជាលោក សុខ ឥសាន បានទេនៅថ្ងៃទី១៣ ខែធ្នូ។ តែយ៉ាងណាលោក សុខ ឥសាន ធ្លាប់បញ្ជាក់ថា គណបក្សប្រជាជនកម្ពុជាមិនព្រួយបារម្ភពីការធ្វើសមាជ ឬការរួបរួមរបស់គណបក្សណាឡើយ។
សម្រាប់ក្រុមអ្នកឃ្លាំមើលវិញ មិនទាន់ជឿជាក់ថា គណបក្សហ្វ៊ុនស៊ិនប៉ិច អាចរកការបង្រួបបង្រួមជាមួយគណបក្សផ្សេងបានទេ ខណៈគណបក្សនេះនៅបន្តការបែកបាក់ផ្ទៃក្នុងនៅឡើយ។
អ្នកសិក្សាផ្នែកច្បាប់លោក ឃី ពិសី យល់ថា គណបក្សហ្វ៊ុនស៊ិនប៉ិច ដែលធ្លាប់តែទទួលបានការគាំទ្រពីក្រុមមនុស្សវ័យចំណាស់ខ្លះនោះ នឹងកាន់តែធ្លាក់ប្រជាប្រិយភាពថែមទៀត ដោយសារគណបក្សមិនអាចដោះស្រាយជម្លោះផ្ទៃក្នុងបក្សបាន ហើយបុត្រាច្បងរបស់សម្ដេចក្រុមព្រះ គឺព្រះអង្គម្ចាស់ចក្រាវុឌ្ឍ ក៏មិនមានប្រជាប្រិយភាពដែរ គឺសឹងតែគ្មានប្រជារាស្ត្រស្គាល់ព្រះអង្គ៖ « ក្រឡេកឃើញថា ធ្លាប់បានធ្វើប៉ុន្មានដងមកហើយ តាំងតែពីសម្ដេចក្រុមព្រះនៅមានព្រះជន្មនៅឡើយគឺធ្លាប់ធ្វើហើយ ហើយក៏មានការសម្របសម្រួលពីគណបក្សប្រជាជនទៀត។ ក៏ប៉ុន្តែលទ្ធផលចុងក្រោយនៅតែបែកបាក់ដដែល។ អ៊ីចឹងសម្រាប់ខ្ញុំ គឺរូបភាពនេះមិនមានអ្វីចម្លែកទេ ហើយក៏មិនមានឥទ្ធិពលណា ឬមានការប្រែប្រួលនយោបាយក្នុងប្រទេសកម្ពុជាដែរ»។
គណបក្សហ្វ៊ុនស៊ិនប៉ិច ត្រូវបានបង្កើតដោយអតីតរណសិរ្សនៃកងកម្លាំងប្រដាប់អាវុធមួយក្រុមគាំទ្ររបបរាជានិយមរបស់ព្រះបាទនរោត្តម សីហនុ នៅទីក្រុងប៉ារីស ប្រទេសបារាំង កាលពីឆ្នាំ១៩៨១ ដោយមានការជ្រោមជ្រែងពីអាស៊ានដើម្បីទប់ទល់នឹងរដ្ឋាភិបាលសាធារណៈរដ្ឋប្រជាមានិតកម្ពុជា ដែលគាំទ្រដោយកងទ័ពវៀតណាម។
កងទ័ពរបស់គណបក្សនេះ ធ្លាប់ប៉ះគ្នាដោយអាវុធច្រើនលើកច្រើនសារជាមួយគណបក្សប្រជាជនកម្ពុជារបស់លោក ហ៊ុន សែន ។ គណបក្សហ្វ៊ុនស៊ិនប៉ិច ក៏ធ្លាប់ឈ្នះការបោះឆ្នោតរៀបចំដោយអង្គការសហប្រជាជាតិ(UNTAC) កាលពីអាណត្តិទី១ដែរ ប៉ុន្តែត្រូវបានក្រុមលោក ហ៊ុន សែន ធ្វើរដ្ឋប្រហារដណ្ដើមអំណាចកាលពីខែកក្កដាឆ្នាំ១៩៩៧។ ក្រោមការដឹកនាំរបស់សម្ដេចក្រុមព្រះនរោត្តម រណឫទ្ធិ គណបក្សហ្វ៊ុនស៊ិនប៉ិចបានធ្លាក់ប្រជាប្រិយភាព និងបែកបាក់ផ្ទៃក្នុងជាហូរហែ រហូតដល់គ្មានអាសនៈសោះនៅក្នុងរដ្ឋសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។