ពលករខ្មែរនៅថៃប្រមាណ ៤សែននាក់នឹងរួមដំណើរជាមួយលោក សម រង្ស៊ី មកកម្ពុជា ទោះមានការព្រមាន
2019.01.25
ក្រុមយុវជន និងក្រុមពលករដែលគាំទ្រគណបក្សសង្គ្រោះជាតិ ធ្វើការនៅប្រទេសថៃ ប្ដេជ្ញាថា នឹងរួមដំណើរជាមួយ លោក សម រង្ស៊ី និងក្រុមអ្នកប្រជាធិបតេយ្យ ចូលប្រទេសកម្ពុជាវិញនៅពេលឆាប់ៗ។ ពួកគេអះអាងថា ពួកគេមិនខ្លាចការរួមដំណើរជាមួយនឹងក្បួនវិលចូលស្រុកវិញ នៃក្រុមអ្នកនយោបាយប្រឆាំង និងក្រុមអ្នកប្រជាធិបតេយ្យនោះទេ។
តំណាងយុវជនសង្គ្រោះជាតិនៅប្រទេសថៃឱ្យដឹងថា ក្រុមយុវជន និងពលករនៅក្រៅប្រទេស មិនខ្លាចរអានឹងសម្ដីរបស់លោក ហ៊ុន សែន ដែលគំរាមថានឹងចាប់ខ្លួន និងតាមធ្វើទុក្ខបុកម្នេញ អ្នករួមដំណើរជាមួយនឹងក្បួនវិលចូលស្រុកវិញនោះទេ។
មេដឹកនាំការប្រមូលយុវជន និងពលករចំណាកស្រុកម្នាក់ លោក លី រតនរស្មី ប្រាប់អាស៊ីសេរីថា ទឹកចិត្តរបស់យុវជន និងពលករចំណាកស្រុក ស្វិតស្វាញណាស់ក្នុងរឿងនេះ។ លោកប៉ាន់ស្មាន និងរំពឹងទុកថា យ៉ាងហោចណាស់ មានយុវជន និងពលករចំណាកស្រុក ប្រមាណ ៤សែននាក់ នឹងរួម ដំណើរជាមួយលោក សម រង្ស៊ី និងអ្នកនយោបាយដទៃទៀតវិលចូលស្រុកវិញ នៅក្នុងពេលឆាប់ៗខាងមុខ៖ «យើងបានរៀបចំខ្លួនជាស្រេចដើម្បីនឹងដើរចូលទៅ ជាមួយលោកប្រធានស្ដីទីគណបក្សសង្គ្រោះជាតិ ក៏ដូចជាបងប្អូនជនរួមជាតិ ក៏ដូចជាបងប្អូនថ្នាក់ដឹកនាំគណបក្សសង្គ្រោះជាតិ ដែលស្រលាញ់លទ្ធិប្រជាធិបតេយ្យពិតប្រាកដ វាសំខាន់បំផុតសម្រាប់ពួកយើងទាំងអស់គ្នា គឺយើងដើរចូលនេះដើម្បីទាមទារ មិនមែនក្នុងន័យថាដើរតាមលោកប្រធាន សម រង្ស៊ី ម្នាក់ទេ គឺយើងមានលោកប្រធាន កឹម សុខា គឺជាប្រធានគណបក្សសង្គ្រោះជាតិ។ យើងទៅនេះ គឺយើងទាមទារឱ្យ ដើម្បីឱ្យរបបលោក ហ៊ុន សែន ដែលយើងហៅថារបបក្រុងភ្នំពេញនេះ ប្រគល់នូវអ្វីទាំងអស់មកគណបក្សសង្គ្រោះជាតិមកវិញ»។
លោក លី រតនរស្មី អះអាងបន្ថែមថា ការក្រោកទាមទាររបស់ក្រុមពលករខ្មែរចំណាកស្រុកនៅពេលនេះ គឺធ្វើឡើងដើម្បីទាមទារសិទ្ធិសេរីភាព និងប្រជាធិបតេយ្យជូនពលរដ្ឋខ្មែរដែលកំពុងរស់នៅក្រោមរបបក្រុងភ្នំពេញ និងទាមទារឱ្យរបបក្រុងភ្នំពេញគោរពលទ្ធិប្រជាធិបតេយ្យ ឱ្យបានត្រឹមត្រូវឡើងវិញ។
ចំណែក តំណាងយុវជន និងពលករនៅឯប្រទេសកូរ៉េខាងត្បូងឯណោះវិញ ក៏គាំទ្រការវិលត្រលប់របស់លោក សម រង្ស៊ី និងក្រុមអ្នកប្រជាធិបតេយ្យ ចូលកម្ពុជាវិញដែរ។ លោក យឹម ស៊ីណន ប្រសាសន៍ថា ថ្វីត្បិតតែនៅឆ្ងាយ ក្រុមលោក ចូលរួមសាទរចំពោះការវិលចូលស្រុកវិញនេះ៖ «មិនត្រឹមតែយុវជននៅកូរ៉េ យុវជននៅថៃ យុវជននៅជប៉ុន និងនៅម៉ាឡេស៊ី ឬក៏មហាជនទូទាំងពិភពលោកទេ ដែលគេស្រលាញ់ដែលគេស្រលាញ់សេរីភាព ស្រលាញ់លទ្ធិប្រជាធិបតេយ្យ គឺចង់ឃើញការវិលត្រឡប់ទៅវិញរបស់លោក សម រង្ស៊ី និងសមាជិករបស់គណបក្សសង្គ្រោះជាតិទាំងអស់។ យើងដឹងហើយថា ការធ្វើនយោបាយជោគជ័យទៅបាន ឬលទ្ធផល វាអាស្រ័យលើសកម្មភាពនៅក្នុងប្រទេស។ អ៊ីចឹងខ្ញុំជឿថា នេះគឺជាជីវិតនយោបាយចុងក្រោយរបស់លោកប្រធាន សម រង្ស៊ី ដែលគាត់បានសន្សំ ដែលគាត់បានកសាងរយៈពេលជាង ម្ភៃឆ្នាំមកនេះ គឺជាជីវិតនយោបាយចុងក្រោយរបស់គាត់។ ខ្ញុំសប្បាយចិត្ត ហើយក្នុងនាមចលនាយុវជនសង្គ្រោះជាតិ នៅកូរ៉េ ក៏មានការគាំទ្រខ្ពស់ផងដែរ ដែលបានឮដំណឹង និងការសម្រេចរបស់គណៈ អចិន្ត្រៃយ៍ ក៏ដូចជាការប្រជុំប៉ុន្មានថ្ងៃមុននេះ ដែលតម្រូវ និងសម្រេចឱ្យគាត់ចូលទៅកម្ពុជាវិញ»។
ទន្ទឹមនិងនេះ លោក ស៊ីណន មានប្រសាសន៍ថា លោកកំពុងតែរៀបចំការជួបជុំដ៏ធំមួយនៃអ្នកនិយមប្រជាធិបតេយ្យនៅទីនៅក្រុងសេអ៊ូល និងក្រុងខ្វាជូ នៃប្រទេសកូរ៉េខាងត្បូង។ ការជួបជុំដែលនឹងមានការចូលរួមពីអ្នកនយោបាយ តំណាងអង្គការសង្គមស៊ីវិល រួមនិងអ្នកតាមដាន និងអ្នកវិភាគនយោបាយផងនោះ នឹងគ្រោងធ្វើរយៈពេលបីថ្ងៃ ហើយត្រូវបានគេដាក់ឈ្មោះថា ជាសមាជអ្នកប្រជាធិបតេយ្យដើម្បីសង្គ្រោះជាតិ។
ការប្ដេជ្ញាចិត្តរបស់ក្រុមអ្នកគាំទ្រគណបក្សសង្គ្រោះជាតិ និងក្រុមអ្នកប្រជាធិបតេយ្យពីគ្រប់ទិសទីនាពេលនេះ គឺធ្វើឡើងបន្ទាប់ពីអតីតប្រធានគណបក្សសង្គ្រោះជាតិលោក សម រង្ស៊ី បានប្ដេជ្ញាថា នឹងត្រឡប់ចូលទៅកាន់ប្រទេសកម្ពុជាវិញ ដើម្បីតស៊ូប្រឆាំងនឹងរបបរបស់លោក ហ៊ុន សែន។
កាលពីថ្ងៃទី២០ ខែមករា ឆ្នាំ២០១៩ មន្ត្រីជាន់ខ្ពស់របស់គណបក្សសង្គ្រោះជាតិមួយចំនួនបានជួបប្រជុំគ្នា នៅទីក្រុងឡូវែល រដ្ឋម៉ាសាឈូសេត សហរដ្ឋអាមេរិក ដើម្បីពិភាក្សាលើផែនការនៃ ការវិលត្រឡប់ចូលស្រុកវិញរបស់លោក សម រង្ស៊ី។ ការប្រជុំនេះបានសម្រេចអនុវត្តន៍នូវវិធានការមួយចំនួន ដូចជាការរៀបចំបង្កើតក្រុមការងារសម្រាប់ទទួល លោក សម រង្ស៊ី ការពង្រីកសកម្មភាពការទូត ពង្រីកការផ្សព្វផ្សាយព័ត៌មានជុំវិញបញ្ហាកម្ពុជា ទំនាក់ទំនងជាមួយអ្នកប្រជាធិបតេយ្យ និងផែនការថវិកាជាដើម។
មេដឹកនាំរបបក្រុងភ្នំពេញលោក ហ៊ុន សែន កាលថ្ងៃទី២៥ ខែមករា បានថ្លែងនៅចំពោះមុខក្រុមកម្មករថា លោកកំពុងរង់ចាំ ការវិលត្រឡប់ចូលស្រុកវិញរបស់លោក សម រង្ស៊ី យ៉ាងអន្ទះសា ប៉ុន្តែលោករំឭកដល់អ្នកអមដំណើរផ្សេងទៀត កុំឱ្យចូលរួមប្រសិនបើមិនចង់ចូលគុកនោះទេ។ លោកព្រមានថាលោកនឹងចាត់ការ បើទោះបីជាមានវត្តមានរបស់មន្ត្រីអង្គការសហប្រជាជាតិអមដំណើរមកជាមួយយ៉ាងណាក្តី៖ «ប្រកាសទៅ ផែនការ រៀបចំយ៉ាងម៉េច អីយ៉ាងម៉េច? អាណា ទៅពីខាងណា? ទៅព្រលានយន្តហោះណា? ស្អីកន្លែងណា? ទៅរង់ចាំត្រង់ណា? អង្គការសហប្រជាជាតិអមដំណើរមកពេលណា? ធ្វើទៅ! អញ្ជើញ តើ! ហ៊ុន សែន ចាត់ការរបៀបណា? ខ្ញុំអត់ចង់តមាត់ តកអីទេ ព្រោះខ្ញុំចង់ឱ្យអ្នកមកទីកន្លែងដែលអ្នកត្រូវនៅ តាមសាលក្រមរបស់តុលាការ ខ្ញុំចង់ណាស់ ខ្ញុំចាំ ខ្ញុំរង់ចាំអន្ទះសា យ៉ាងអន្ទះសា។ អ្នកត្រូវដឹងសាលក្រមរបស់តុលាការ ម្សិលមិញសម្ដេចក្រឡាហោម បានប្រកាសហើយថា បានទទួលដីកាចាប់ខ្លួនអាហ្នឹងហើយ ដូច្នេះមានស្អី? ស្ដាយណាស់ដែលឱ្យអ្នកឯងរត់រួច ហើយឥឡូវបានអ្នកឯងមកវិញ គឺស្មើនឹងរកអុសប្រទះឈើងាប់ ហើយអ្នកដែលមិនពាក់ព័ន្ធ មិនចង់ចូលគុក កុំចង់ចូលប្រថុយជាមួយ»។
បើទោះបីជាមានការព្រមានធ្ងន់ៗពីសំណាក់មេដឹកនាំរបបក្រុងភ្នំពេញ យ៉ាងនេះក្អី ក៏ក្រុមអ្នកគាំទ្រគណបក្សសង្គ្រោះជាតិដែលកំពុងធ្វើការចំណាកស្រុកនៅក្រៅប្រទេស នៅតែប្ដេជ្ញាចិត្តថានឹងចូលរួមជាមួយលោក សម រង្ស៊ី ដើម្បីវិលត្រឡប់ទៅកាន់ប្រទេសកម្ពុជាវិញ។
តំណាងយុវជនសង្គ្រោះជាតិនៅក្រៅប្រទេស នៅតែជឿជាក់ថា ការលះបង់របស់លោក សម រង្ស៊ី ក្រុមអ្នកនយោបាយប្រឆាំង និងក្រុមអ្នកប្រជាធិបតេយ្យ នៅពេលនេះ អាចនឹងប្ដូរបានមកវិញនូវអ្វីមួយសម្រាប់អ្នកគាំទ្រគណបក្សសង្គ្រោះជាតិ និងប្រទេសកម្ពុជាជាមិនខាន៕