អ្នកវិភាគនយោបាយវ័យក្មេង និងអ្នកធ្វើការជាមួយក្រុមយុវជនយល់ថា ការគំរាមកំហែងពីសំណាក់អាជ្ញាធរក្រុងភ្នំពេញ និងស្ថាប័នជាតិរៀបចំការបោះឆ្នោត ឬអ្នកនយោបាយណាមួយទាក់ទងនឹងសិទ្ធិបោះឆ្នោត នឹងធ្វើឱ្យយុវជនកាន់តែខឹងសម្បាខ្លាំង លែងទៅបោះឆ្នោត។ ការលើកឡើងនេះ គឺបន្ទាប់ពីក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោត (គ.ជ.ប) ព្រមានវិធានការផ្លូវច្បាប់ លើអ្នកអំពាវនាវកុំឱ្យពលរដ្ឋទៅបោះឆ្នោត និងអង្គការឃ្លាំមើលការបោះឆ្នោត ប្រសិនបើហ៊ានចេញរបាយការណ៍ប៉ះពាល់ភាពត្រឹមត្រូវរបស់គ.ជ.ប។
អ្នកវិភាគ និងក្រុមយុវជន ចាត់ទុកការគំរាមកំហែងបែបនេះថា មិនបានផ្ដល់ប្រយោជន៍សម្រាប់របបក្រុងភ្នំពេញ និងដំណើរការបោះឆ្នោតទេ។
សមាជិកក្រុមអ្នកវិភាគវ័យក្មេង លោក បុង ដែត យល់ថា យុវជនភាគច្រើន នឹងមិនទៅបោះឆ្នោតទេ ព្រោះពួកគេមើលឃើញថា ការបោះឆ្នោតអាណត្តិនេះ នឹងមិនមានលក្ខណៈប្រជាធិបតេយ្យ ដែលក្រុមយុវជនជំនាន់ក្រោយចង់បាននោះទេ។ លោកបន្ថែមថា បើទោះជារបបក្រុងភ្នំពេញ ឬគ.ជ.ប មានការគំរាមកំហែងក៏ដោយ ក៏យុវជនមិនខ្លាចដែរ ព្រោះយុវជនមានចំណេះដឹង និងចេះវិភាគស៊ីជម្រៅ ពីលទ្ធិប្រជាធិបតេយ្យពិតប្រាកដ ឬក្លែងក្លាយ។ លោកបន្តថា បើចង់ឱ្យមានការចូលរួមច្រើនក្នុងដំណើរការបោះឆ្នោត របបក្រុងភ្នំពេញ ត្រូវបើកលំហប្រជាធិបតេយ្យឡើងវិញ។ «»
អ្នកនាំពាក្យក្រសួងមហាផ្ទៃ លោក ខៀវ សុភ័គ កាលពីថ្ងៃទី១៩ ឧសភា ត្រូវបានសារព័ត៌មានក្នុងស្រុក ដកស្រង់សម្ដីថា ក្រសួងមហាផ្ទៃនឹងប្ដឹងទៅតុលាការ ដើម្បីរឹបអូសទ្រព្យសម្បត្តិ មន្ត្រីបក្សប្រឆាំង ដែលបានអំពាវនាវ មិនឱ្យពលរដ្ឋទៅបោះឆ្នោត។ មិនដឹងថាសំអាងលើច្បាប់អ្វីទេ ប៉ុន្តែ អ្នកនាំពាក្យរូបនេះ បានប្រាប់វិទ្យុក្នុងស្រុកមួយថា ការព្រមានចាត់វិធានការរឹបអូសយកទ្រព្យសម្បត្តិបែបនេះ ពីព្រោះសមត្ថកិច្ចពិបាកចាប់ខ្លួនពួកអ្នកអំពាវនាវទាំងអស់នោះ ដោយពួកគេមិនមានវត្តមាននៅកម្ពុជា។
ចំណែក អ្នកនាំពាក្យគ.ជ.ប លោក ហង្ស ពុទ្ធា វិញ ត្រូវបានកាសែតភ្នំពេញប៉ុស្តិ៍ស្រង់សម្ដី ដោយលោកបានព្រមានចំឈ្មោះ អង្គការសង្គមស៊ីវិលចំនួន ២ ដែលធ្វើការលើវិស័យបោះឆ្នោត ថាត្រូវតែទទួលខុសត្រូវ បើពួកគេហ៊ានចេញសេចក្ដីថ្លែងការណ៍ ឬរបាយការណ៍ឱ្យប៉ះពាល់ដល់ភាពត្រឹមត្រូវ សុចរិតភាព និងអព្យាក្រឹតភាពរបស់គ.ជ.ប ខណៈពួកគេមិនបញ្ជូនអ្នកសង្កេតការណ៍ចូលរួម។
អង្គការឃ្លាំមើលការបោះឆ្នោតទាំងពីរនោះ គឺ អង្គការនិចហ្វិច (Nicfec) និងអង្គការខុមហ្វ្រែល (Comfrel ) គឺបន្ទាប់ពីអង្គការទាំងពីរ ប្រកាសដកខ្លួន ពីការចូលរួមចុះឈ្មោះសង្កេតការណ៍ដំណើរការបោះឆ្នោតខាងក្នុងការិយាល័យជាមួយគ.ជ.ប ប៉ុន្តែនៅតែឃ្លាំមើលពីខាងក្រៅការិយាល័យ ដូចពលរដ្ឋម្ចាស់ឆ្នោតធម្មតា។
បន្ថែមពីនេះ មន្ត្រីជាន់ខ្ពស់របបក្រុងភ្នំពេញ បានព្រមានយុវជន និងពលរដ្ឋថា ប្រសិនបើមិនទៅបោះឆ្នោតទេ ក្រុមហ៊ុនឯកជន ស្ថាប័នរដ្ឋ នឹងមិនទទួលឱ្យចូលធ្វើការ ឬជាក្រុមគាំទ្រពួកឧទ្ទាមជាដើម។ ពលរដ្ឋខ្លះ ក៏បង្ហាញការមិនពេញចិត្ត ចំពោះអតីតប្រធានគណបក្សសង្គ្រោះជាតិ ដែលធ្លាប់លើកឡើងថា អ្នកដែលទៅបោះឆ្នោត ជាអ្នកគាំទ្រ ពេញចិត្តរបបផ្ដាច់ការ។ យុវជន ថា ការសម្រេចចិត្តទៅបោះឆ្នោត ឬមិនទៅ ជាសិទ្ធិរបស់ពួកគាត់។
នាយកប្រតិបត្តិអង្គការស្ម័គ្រចិត្តដើម្បីសង្គម ដែលជាអង្គការធ្វើការស្និទ្ធនឹងយុវជន លោក ប៉ែន សុមុនី សង្កេតឃើញថា បច្ចុប្បន្នមានយុវជនខ្លះ បានបង្ហាញការមិនពេញចិត្ត នឹងដំណើរការបោះឆ្នោត ព្រោះតែអវត្តមានបក្សប្រឆាំង ប៉ុន្តែ ក៏មានយុវជនខ្លះ នៅតែបង្ហាញការគាំទ្រដែរ។ លោក ប៉ែន សុមុនី យល់ថា ការប្រើប្រាស់វិធីសាស្ត្រគំរាមយុវជន បានប៉ះពាល់យ៉ាងខ្លាំងដល់សិទ្ធិបោះឆ្នោតរបស់អ្នកបោះឆ្នោត ព្រោះសិទ្ធិទៅបោះឆ្នោត ឬមិនទៅ ជាសិទ្ធិផ្ទាល់ខ្លួនរបស់ពលរដ្ឋជាអ្នកសម្រេច ដោយមិនត្រូវបង្ខិតបង្ខំទេ។ «»
សង្គមស៊ីវិលធ្វើការឃ្លាំមើលការបោះឆ្នោត ធ្លាប់ផ្ដល់អនុសាសន៍ឱ្យគ.ជ.ប ចាត់វិធានការចំពោះជនដែលគំរាម និងបំភិតបំភ័យអង្គបោះឆ្នោត។ អ្នកវិភាគផ្ដល់អនុសាសន៍ឱ្យរបបក្រុងភ្នំពេញ និងគ.ជ.ប គួរកុំប្រើប្រាស់វិធីសាស្ត្រគំរាម យុវជនឱ្យសោះ ព្រោះវិធីសាស្ត្រនេះ នឹងធ្វើឱ្យយុវជន កាន់តែខឹងសម្បា លែងទៅបោះឆ្នោតតាមការចង់បានពីរបបក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។