ដំណឹងពីទីក្រុងបាងកកប្រទេសថៃ ឲ្យដឹងថា នាយករដ្ឋមន្ត្រីថៃ សាម៉ាក់ ស៊ុនថរ៉ៈវេត បានប្រាប់អ្នកកាសែតនៅថ្ងៃពុធនេះថា លោកបានចរចាជាមួយមេដឹកនាំភូមា ហើយបានអញ្ជើញឲ្យភូមាចូលរួមក្នុងក្រុមហ៊ុនអន្តរជាតិនៃប្រទេសផលិតស្រូវ ដែលនឹងរួមមានយៀកណាម លាវ និង កម្ពុជា ផង ដើម្បីកំណត់តម្លៃអង្ករ ។
លោកនាយករដ្ឋមន្ត្រីថៃ ក៏មានប្រសាសន៍ផងដែរថា ថៃនឹងផ្តល់ជំនួយបច្ចេកទេសដល់ប្រទេសជាសមាជិកក្នុងការកែលំអគុណភាពផលិតផលសម្រាប់នាំចេញ ។
លោកថា កម្ពុជា លាវ និងយៀកណាម បានយល់ព្រមចូលរួមក្នុងគម្រោងនេះហើយ ដែលក្រុមហ៊ុនអន្តរជាតិនេះ នឹងមានឈ្មោះថា អង្គការប្រទេសនាំចេញស្រូវ ហៅកាត់ថា អូរ៉ិក ៕