គណៈកម្មការរៀបចំបុណ្យបណ្ឌិត កែម ឡី ថាពិធីបុណ្យ១០០ថ្ងៃអាចនឹងធ្វើនៅវត្តថាន់
2016.09.27
ប្រជាពលរដ្ឋចូលរួមគោរពវិញ្ញាណក្ខន្ធសពលោកបណ្ឌិត កែម ឡី នៅថ្ងៃទី១៧ ខែកក្កដា ឆ្នាំ២០១៦។ RFA/Chuop Sereyroth
RFA/Chuop Sereyroth
គណៈកម្មការរៀបចំពិធីបុណ្យខួប ១០០ថ្ងៃនៃសពលោកបណ្ឌិត កែម ឡី មានសញ្ញាអំពីទីតាំងធ្វើបុណ្យហើយនៅពេលនេះ ក៏ប៉ុន្តែសមាជិកគណៈកម្មការរៀបចំពិធីបុណ្យនេះកំពុងពិភាក្សាគ្នា ដើម្បីជូនដំណឹងទៅអាជ្ញាធរបន្ថែមទៀត។
អ្នកនាំពាក្យ និងជាសមាជិកគណៈកម្មការរៀបចំពិធីបុណ្យ ១០០ថ្ងៃនៃសពបណ្ឌិត កែម ឡី គឺលោក សៅ កុសល ឲ្យដឹងនៅល្ងាចថ្ងៃអង្គារ ទី២៧ កញ្ញា ថា ទីតាំងសម្រាប់រៀបចំពិធីបុណ្យនៅរាជធានីភ្នំពេញ អាចនឹងធ្វើបាននៅវត្តថាន់ ក្នុងសង្កាត់ទន្លេបាសាក់ ខណ្ឌចំការមន។
លោក សៅ កុសល ថ្លែងបន្តថា នេះជាសញ្ញាល្អមួយបន្ទាប់ពីគណៈកម្មការព្យាយាមសុំទៅព្រះចៅអធិការវត្តនេះ៖ «ខ្ញុំបានជួបព្រះចៅអធិការវត្តថាន់ នោះ ព្រះគ្រូចៅអធិការលោកមានសង្ឃដីកាឯកភាពឲ្យធ្វើ គ្រាន់តែថា សុំបន្តទំនាក់ទំនងទៅអាជ្ញាធរបន្តទៀតទៅ។ ចំពោះលោកអត់បញ្ហាអីទេ»។
ទោះបីជាទទួលបានសញ្ញាអំពីការផ្ដល់ទីតាំងពីព្រះចៅអធិការវត្តថាន់ ដូច្នេះក្ដី ក៏ទីតាំងនេះហាក់នៅមិនទាន់ប្រាកដប្រជានៅឡើយទេ រហូតទាល់តែមានការយល់ព្រមពីអាជ្ញាធរសាលារាជធានីភ្នំពេញ។ គណៈកម្មការរៀបចំពិធីបុណ្យ ១០០ថ្ងៃនៃសពបណ្ឌិត កែម ឡី បានជួបប្រជុំគ្នាសម្រេចការងារនេះ ហើយនឹងធ្វើលិខិតទៅអាជ្ញាធរសាលារាជធានីភ្នំពេញយ៉ាងយូរ ២ថ្ងៃទៀត៖ «យើងនឹងធ្វើលិខិតទៅក្រុង ដើម្បីរៀបចំកម្មវិធីហ្នឹង។ យើងថា យើងបានព័ត៌មានពីព្រះចៅអធិការវត្តហើយ យើងជូនដំណឹងទៅអាជ្ញាធរ ដើម្បីបញ្ជាក់ថា បុណ្យនឹងធ្វើនៅវត្តថាន់។ ចាំមើលប្រតិកម្មរបស់អាជ្ញាធរយ៉ាងម៉េចដែរចំពោះបញ្ហាហ្នឹង ព្រោះកាលពីម្សិលម្ង៉ៃ វី.អូ.ឌី (VOD) បានសម្ភាសទៅលោក ឃួង ស្រេង អភិបាលរងរាជធានីភ្នំពេញ ហើយលោកបានមានប្រសាសន៍ថា ចំពោះអាជ្ញាធរអត់មានបញ្ហាអីទេ ឲ្យតែលោកឯកភាពធ្វើនៅទីណា គឺធ្វើនៅទីនោះទៅ»។
ពាក់ព័ន្ធបញ្ហានេះ អភិបាលរងសាលារាជធានីភ្នំពេញ លោក ឃួង ស្រេង មានប្រសាសន៍នៅល្ងាចថ្ងៃទី២៧ កញ្ញា ថា ខាងលោកមិនទាន់ដឹងថាសម្រេចយ៉ាងណាទេ ព្រោះលោកមិនទាន់ទទួលបានលិខិតផ្លូវការពីអ្នករៀបចំបុណ្យនៅវត្តថាន់ នេះនៅឡើយ។
គណៈកម្មការរៀបចំពិធីបុណ្យ ១០០ថ្ងៃនៃសពបណ្ឌិត កែម ឡី ធ្លាប់ស្នើសុំទីតាំងនៅវត្តបទុមវតី ម្ដងហើយកាលពីពេលថ្មីៗនេះ ប៉ុន្តែសាលារាជធានីភ្នំពេញបានបដិសេធ។
កាលពីថ្ងៃសុក្រ ទី២៣ កញ្ញា បានចេញសេចក្ដីប្រកាសព័ត៌មានដល់សាធារណជនអំពីកម្មវិធីរយៈពេល ៤ថ្ងៃនៃការរៀបចំពិធីបុណ្យនេះ គឺចាប់ពីថ្ងៃទី១៤ ដល់ថ្ងៃទី១៧ ខែតុលា។ កម្មវិធីថ្ងៃទី១៤ ដល់ថ្ងៃទី១៥ តុលា នៅរាជធានីភ្នំពេញ។ ថ្ងៃទី១៦ តុលា ហែរូបសំណាករបស់លោកបណ្ឌិតទៅខេត្តតាកែវ ហើយកិច្ចបង្ហើយបុណ្យនៅថ្ងៃទី១៧ តុលា នៅផ្ទះសពឯខេត្តតាកែវ នោះ។
សម្រាប់ទីតាំងធ្វើបុណ្យនៅភ្នំពេញ មិនទាន់មានច្បាស់លាស់ ព្រោះមិនទាន់បានអនុញ្ញាតពីអាជ្ញាធរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ