លោក ស ខេង ផ្ដល់ប្រាក់លើកទឹកចិត្ត៥ម៉ឺនដុល្លារដល់នគរបាលករណីចាប់បានក្រុមរណសិរ្ស
2018.10.03
លោក ស ខេង រដ្ឋមន្ត្រីក្រសួងមហាផ្ទៃ បានផ្ដល់ថវិកា ៥ម៉ឺនដុល្លារ ដើម្បីលើកទឹកចិត្ត ដល់កងកម្លាំងសមត្ថកិច្ច ក្នុងប្រតិបត្តិការចុះបង្ក្រាបជនសង្ស័យមួយក្រុម ដែលអាជ្ញាធររបស់លោក ហ៊ុន សែន អះអាងថា ជាប់ពាក់ព័ន្ធនឹងការជួញដូរ និងលាក់ទុកអាវុធខុសច្បាប់ ប៉ុនប៉ងផ្ដួលរំលំរបបក្រុងភ្នំពេញ។
សមត្ថកិច្ច បានចាប់ខ្លួនជនសង្ស័យកាលពីថ្ងៃទី២ តុលា ឈ្មោះ ប៊ុន ប្រសើរ នៅខេត្តព្រះវិហារ និងចោទបុរសវ័យ៤២ឆ្នាំនេះ ថា ជាសមាជិកចលនារណសិរ្សរំដោះជាតិខ្មែរ និងជាមេខ្លោងក្រុមជួញដូរអាវុធខុសច្បាប់ ប៉ុនប៉ងផ្ដួលរំលំរបបក្រុងភ្នំពេញ បង្កអសន្តិសុខ និងប្រព្រឹត្តបទល្មើសផ្សេងៗ។
ក្រោយការចាប់ខ្លួន និងបញ្ជូនខ្លួនពីខេត្តព្រះវិហារទៅសាកសួរនៅនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការនគរបាលជាតិ សមត្ថកិច្ចដកហូតបាន កាំភ្លើង អាកា៤៧ មួយដើម អាវុធខ្លីមួយដើម គ្រាប់បែក៤គ្រាប់ កាមេរ៉ា១គ្រឿង កុំព្យូទ័រ១គ្រឿង ម្សៅក្រាមពណ៌ស ១គីឡូក្រាម ម្សៅពណ៌លឿង ១គីឡូក្រាម កាំជ្រួចដែលអាចកែច្នៃធ្វើគ្រាប់បែក កែវឆ្លុះ៣គ្រឿង និងលិខិតឆ្លងដែន១។
កាលពីថ្ងៃទី២២ កញ្ញា សមត្ថកិច្ចរាជធានីភ្នំពេញបានចាប់ខ្លួនមនុស្ស ៨នាក់ ក្នុងនោះមានស្ត្រីម្នាក់ផង ដោយចោទថាលាក់ទុកអាវុធ ២៨ដើម ស្ថិតនៅសង្កាត់បន្សាំង ខណ្ឌព្រែកព្នៅ។
សាលាដំបូងរាជធានីភ្នំពេញបានសម្រេចចោទប្រកាន់មនុស្សទាំង ៨នាក់ ពីបទ រៀបចំចាត់តាំងក្រុមជនប្រដាប់អាវុធ សន្និធិអាវុធ និងរឿងគ្រឿងផ្ទុះដោយគ្មានការអនុញ្ញាត និងចូលរួមក្នុងក្រុមជនប្រដាប់អាវុធ តាមមាត្រា៤៨៥ ៤៨៦ និង ៤៨៩ នៃក្រមព្រហ្មទណ្ឌ។
ទាក់ទងនឹងរឿងនេះ ប្រធានចលនារណសិរ្សរំដោះជាតិខ្មែរ លោក សម សេរី បានបដិសេធ នៅក្នុងកិច្ចសម្ភាសន៍ជាមួយអាស៊ីសេរី កាលពីយប់ថ្ងៃទី២ តុលាថា លោកមិនជាប់ពាក់ព័ន្ធជាមួយនឹងមនុស្ស៨នាក់ ដែលសមត្ថកិច្ចបានចាប់ខ្លួននោះឡើយ។ លោក សម សេរី ចោទអាជ្ញាធរក្រុងភ្នំពេញ ថា ប្រើល្បិចកលទុច្ចរិត បង្កើតព្រឹត្តិការណ៍ និងបង្ខូចកេរ្តិ៍ឈ្មោះក្រុមរបស់លោក ដែលមិនបានប្រើអំពើហិង្សាសោះឡើយ៕