កញ្ញា ឯក សុជាតា ហៅ សាសា អតីតពិធីការនីទូរទស្សន៍ ស៊ីធីអិន (CTN) ប្រកាសភ្លាមៗបដិសេធការសុំទោសជាសាធារណៈ និងរាល់ការសម្រុះសម្រួលសងសំណងជាប្រាក់ណាមួយពីលោកឧកញ៉ា សុខ ប៊ុន ដែលបានប្រើអំពើហិង្សាលើរូបនាង ត្រូវបានបណ្ដាញសង្គមហ្វេសប៊ុក (Facebook) ផ្សព្វផ្សាយពីខ្សែវីដេអូនៃការប្រើអំពើហិង្សានោះ ចែកចាយពីមួយទៅមួយនោះ។
ការប្រកាសមិនទទួលយកការសុំទោស ឬសំណងនេះ ស្របពេលរដ្ឋមន្ត្រីក្រសួងមហាផ្ទៃ លោក ស ខេង ចេញបទបញ្ជាឲ្យតាមចាប់ខ្លួនឧកញ៉ារូបនេះមកផ្ដន្ទាទោសតាមច្បាប់។
កញ្ញា ឯក សុជាតា ហៅ សាសា ចាត់ទុកការសុំទោសរបស់ លោកឧកញ៉ា សុខ ប៊ុន នាយកក្រុមហ៊ុន សុខ ប៊ុន គ្រុប (SBG) និងក្រុមហ៊ុនវាយតម្លៃអចលនវត្ថុនៅកម្ពុជា លើការវាយតម្លៃលើរូបនាងជាការសម្ដែងប៉ុណ្ណោះ ហើយនាងផ្ដាំទៅ លោក សុខ ប៊ុន វិញថា មិនគួរគេចវេះនោះទេ និងត្រូវតែហ៊ានមកទទួលខុសចំពោះមុខច្បាប់។
ការលើកឡើងរបស់អតីតពិធីការនីទូរទស្សន៍ ស៊ីធីអិន នៅពេលនេះ ធ្វើឡើងបន្ទាប់ពីលោកឧកញ៉ា សុខ ប៊ុន ប្រកាសទទួលកំហុសសុំទោសកញ្ញាជាសាធារណៈ និងប្រកាសលាឈប់ពីងារជាឧកញ៉ា និងមុខងារបច្ចុប្បន្នទាំងអស់ ដែលធ្វើឡើងតាមលិខិតមួយច្បាប់ដែលត្រូវបានផ្សព្វផ្សាយនៅក្នុងបណ្ដាញសង្គមនៅថ្ងៃទី១៤ កក្កដា។ លើសពីនេះ នៅក្នុងលិខិតនោះ លោក សុខ ប៊ុន បានស្នើសុំចូលរួមជាវិភាគទានជួយព្យាបាលដល់កញ្ញាចំនួន ១០ម៉ឺនដុល្លារ ដែលកាលពីមុនលោកឲ្យមេធាវីរបស់លោកទៅសម្របសម្រួលជាមួយក្រុមគ្រួសារ សាសា សងសំណងតែ ៤ម៉ឺនដុល្លារ។
ទោះបីជាមានការសុំទោស និងសន្យាសងសំណងយ៉ាងនេះក្ដី កញ្ញា ឯក សុជាតា ហៅ សាសា បានប្រាប់វិទ្យុអាស៊ីសេរី នៅថ្ងៃទី១៤ កក្កដា ថា កញ្ញា និងក្រុមគ្រួសារ សោកស្ដាយចំពោះទង្វើរបស់ លោក សុខ ប៊ុន ដែលមិនព្រមទទួលខុសចំពោះមុខច្បាប់ និងតែងតែព្យាយាមប្រើប្រាស់មធ្យោបាយផ្ដល់សំណង ដើម្បីបញ្ចប់សំណុំរឿងក្រៅច្បាប់បែបនេះ។ កញ្ញា សាសា បានបន្តថា ទាំងកញ្ញា និងក្រុមគ្រួសារ នៅតែរក្សាជំហរយកច្បាប់ជាធំ ព្រោះគ្រួសារកញ្ញាមិនស្រឡាញ់លុយជាងច្បាប់នោះទេ។ កញ្ញាបញ្ជាក់ថា អ្វីដែលរូបកញ្ញា និងក្រុមគ្រួសារកញ្ញាចង់បាន គឺចង់ឃើញតុលាការកាត់សេចក្ដីរឿងនេះតាមផ្លូវច្បាប់ និងយុត្តិធម៌ ដើម្បីជាគំរូមួយដល់ជនរងគ្រោះដទៃទៀត៖ «គាត់មិនគួរបន្តអូសបន្លាយពេលវេលារហូតជិតកន្លះខែនោះទេ ដូច្នេះគ្រួសារខ្ញុំមិនអាចទទួលយកបាន និងគ្មានន័យនោះទេ ព្រោះភ្លើងវាបានឆាបឆេះរួចទៅហើយ។ គ្រួសារខ្ញុំមិនសំខាន់រឿងលុយនោះទេ លើសពីនេះ លិខិតដែលគាត់សុំសងសំណងឲ្យខ្ញុំ ១០ម៉ឺនដុល្លារ គាត់មិនគួរណាធ្វើអ៊ីចឹងនោះទេ ព្រោះគាត់ក៏មានមុខមាត់ ឋានៈ បុណ្យស័ក្តិនៅក្នុងសង្គមម្នាក់ដែរ»។
នៅក្នុងវីដេអូឃ្លីបដែល កញ្ញា សាសា អះអាងថា លោកឧកញ៉ា សុខ ប៊ុន បានប្រើអំពើហិង្សាលើរូបនាងកាលពីរាត្រីរំលងអាធ្រាត្រថ្ងៃទី២ កក្កដា នោះ គឺឃើញមានការប្រកែកគ្នារវាងក្រុមឧកញ៉ា សុខ ប៊ុន និងកញ្ញា សាសា។ ភ្លាមៗនេះ កញ្ញា សាសា បានយកទូរស័ព្ទដៃគប់ទៅលើក្រុមលោកឧកញ៉ា សុខ ប៊ុន ស្រាប់តែ លោក សុខ ប៊ុន និងអង្គរក្សប្រើអំពើហិង្សាលើ កញ្ញា សាសា ឲ្យរបួស។ កញ្ញា សាសា បញ្ជាក់ថា ស្ថានភាពរបួសរបស់នាងបានធូរស្បើយបន្តិចហើយ បន្ទាប់ពីនាងបានទៅព្យាបាលជំងឺនៅប្រទេសថៃ។
ទន្ទឹមនឹងជនរងគ្រោះអន្ទងឲ្យសមត្ថកិច្ចចាប់ខ្លួនលោកឧកញ៉ា សុខ ប៊ុន យកមកផ្ដន្ទាទោសតាមច្បាប់នេះ នៅក្នុងពិធីផ្សព្វផ្សាយអំពីបញ្ហាព្រំដែន និងបង្គោលខណ្ឌសីមាជូនដល់អាជ្ញាធរខ្មែរទូទាំងប្រទេស នៅថ្ងៃទី១៤ កក្កដា លោកឧបនាយករដ្ឋមន្ត្រី ស ខេង និងជារដ្ឋមន្ត្រីក្រសួងមហាផ្ទៃ បានចេញបទបញ្ជាឲ្យកម្លាំងប្រដាប់អាវុធគ្រប់ជាន់ថ្នាក់ តាមចាប់លោកឧកញ៉ា សុខ ប៊ុន ដែលវាយដំលើ កញ្ញា សាសា យកមកផ្ដន្ទាទោសឲ្យបាន ទោះជាជនរូបនេះរត់ទៅដល់ទីណាក៏ដោយ។ លោក ស ខេង ក៏ហាមមិនឲ្យអ្នកធំណាម្នាក់រត់ការជួយសម្របសម្រួលក្នុងករណីនេះដែរ។
វិទ្យុអាស៊ីសេរី មិនអាចទាក់ទង លោក សុខ ប៊ុន ដែលកំពុងលាក់ខ្លួននេះបាននៅឡើយទេ ដើម្បីសុំការឆ្លើយតបចំពោះបញ្ហានេះ។ ប៉ុន្តែមេធាវីរបស់ លោក សុខ ប៊ុន គឺលោក យិន សុភី បានឲ្យដឹងថា បច្ចុប្បន្នសំណុំរឿងនេះកំពុងស្ថិតនៅក្នុងដៃសាលាដំបូងរាជធានីភ្នំពេញ។ លោកថា លិខិតសុំទោសរបស់កូនក្ដីលោក ដែលផ្សព្វផ្សាយក្នុងបណ្ដាញសង្គមនោះ គឺជាលិខិតពិតរបស់ លោក សុខ ប៊ុន តែលោកមិនទាន់អាចបញ្ជាក់ជុំវិញរឿងនេះយ៉ាងណាបាននោះទេ ព្រោះលោកកំពុងតែសិក្សាស្រាវជ្រាវបន្ថែមលើរឿងនេះ៖ «ចំណាត់ការបន្តយ៉ាងណា ខ្ញុំកំពុងតែសិក្សាបន្តលើរឿងនេះ ហើយខ្ញុំនឹងប្រាប់ពេលក្រោយ»។
មកទល់ពេលនេះ កញ្ញា សាសា លើកឡើងថា នាងមិនទាន់ទទួលលិខិតសុំទោសនេះនៅឡើយទេ តែនាងបានឃើញនៅក្នុងបណ្ដាញសង្គមដូចគ្នា។ កញ្ញាអះអាងថា ទោះបីជាកញ្ញាបានទទួលលិខិតនេះក្ដី តែកញ្ញាមិនព្រមតាមសំណើរបស់លោកឧកញ៉ា សុខ ប៊ុន នោះឡើយ មានតែការកាត់ទោសដោយយុត្តិធម៌ទេដែលនាងចង់បាន។
មាត្រា២១៧ នៃក្រមព្រហ្មទណ្ឌ ចែងថា ការប្រព្រឹត្តអំពើហិង្សាដោយចេតនាលើអ្នកដទៃ ត្រូវផ្ដន្ទាទោសដាក់ពន្ធនាគារពី ១ឆ្នាំទៅ ៣ឆ្នាំ និងពិន័យជាប្រាក់ពី ២លានរៀលទៅ ៦លានរៀល។
ទាក់ទងករណីនេះ ប្រធានការិយាល័យមេធាវីក្រុមអ្នកច្បាប់ លោក សុក សំអឿន បានពន្យល់ថា ការចេញលិខិតសុំទោសជាសាធារណៈរបស់ លោក សុខ ប៊ុន នៅពេលនេះ លោកថាអាចទទួលបានការសម្រាលទោស អាស្រ័យទៅលើការពិចារណារបស់តុលាការ ប៉ុន្តែទោះជាយ៉ាងណា លោកថាមិនអាចគេចផុតពីការទទួលខុសត្រូវលើបទព្រហ្មទណ្ឌបាននោះឡើយ៖ «ចំពោះច្បាប់ទោះជាមានការសុំទោសយ៉ាងណាក៏ដោយ គឺរក្សានៅក្នុងបទព្រហ្មទណ្ឌដដែល តែបើសិនជាជនរងគ្រោះសុខចិត្តទទួលការសុំទោស និងសម្រុះសម្រួល និងព្រមទទួលយកសំណង ទោសគាត់អាចសម្រាលខ្លះបាន»។
ចំពោះដំណឹងដែលថា លោក សុខ ប៊ុន រត់គេចទៅក្រៅប្រទេស ត្រូវបានអ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់នៅក្នុងពិធីផ្សព្វផ្សាយអំពីបញ្ហាព្រំដែន និងបង្គោលខណ្ឌសីមាជូនដល់អាជ្ញាធរខ្មែរទូទាំងប្រទេស នៅថ្ងៃទី១៤ កក្កដា នេះថា លោក សុខ ប៊ុន ទំនងជាមិនមែនគេចទៅក្រៅប្រទេសនោះទេ គឺកំពុងសម្ងំលាក់ខ្លួននៅក្នុងប្រទេសកម្ពុជា នៅឡើយ ហើយថា ការប្រកាសថានៅក្រៅប្រទេសរបស់លោកឧកញ៉ា សុខ ប៊ុន កន្លងមក គឺជាការបោកបញ្ឆោតសមត្ថកិច្ចប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។