ប៉ូលិសបន្តស៊ើបអង្កេតករណីបុរសម្នាក់ត្រូវបានសម្លាប់នៅព្រះវិហារ
2013.04.06
សកម្មជនសិទ្ធិមនុស្សអាដហុក (ADHOC) បានស៊ើបអង្កេតជាបឋម ហើយរកឃើញថា បុរសដែលគេសម្លាប់នោះជាអ្នកធ្លាប់គាំទ្រគណបក្សប្រឆាំង នៅក្នុងតំបន់ដែលគាត់រស់នៅ។
តើការសម្លាប់នោះ មានជាប់ពាក់ព័ន្ធនឹងការរើសអើងផ្នែកនយោបាយ ឬយ៉ាងណា?
អង្គការសិទ្ធិមនុស្សក្រៅរដ្ឋាភិបាល និងប៉ូលិសនៃអធិការដ្ឋានស្រុកជ័យសែន កំពុងតែបន្តការស៊ើបអង្កេតថែមទៀត ចំពោះមរណភាពរបស់ប្រជាពលរដ្ឋម្នាក់ ដើម្បីតាមរកមុខជនដៃដល់ និងមូលហេតុនៃការសម្លាប់ ឱ្យបានច្បាស់លាស់ តើបណ្ដាលមកពីហេតុអ្វី?
ការអង្កេត បានចាប់ផ្ដើមបន្ទាប់ពីបុរសឈ្មោះ ហម សឿន អាយុ ៤៩ឆ្នាំ ជាអ្នកភូមិធ្មា ឃុំធ្មា ត្រូវជនមិនស្គាល់មុខ វាយសម្លាប់នឹងដំបង កាលពីថ្ងៃទី៣១ ខែមីនា ហើយអូសយកទៅដាក់ចោលនៅក្នុងខ្ទមស្រែ។
អ្នកសម្របសម្រួលរបស់សមាគមការពារសិទ្ធិមនុស្សអាដហុក ប្រចាំខេត្តព្រះវិហារ គឺលោក ឡោ ច័ន្ទ លោកបានមានប្រសាសន៍កាលពីរសៀលថ្ងៃសៅរ៍ ទី៦ ខែមេសា ថា តាមការអង្កេតរបស់លោក បានរកឃើញថា បុរសដែលគេសម្លាប់នោះ គឺជាអ្នកធ្លាប់គាំទ្រគណបក្ស សម រង្ស៊ី។ លោក ឡោ ច័ន្ទ បានសង្ស័យថា ការស្លាប់របស់បុរសម្នាក់នោះ អាចមានជាប់ពាក់ព័ន្ធដល់ការស្អប់ខាងនយោបាយ៖ «ឃាតកម្មអត់ដឹងមូលហេតុ តែតាមការស៊ើបអង្កេតរបស់ខ្ញុំ គាត់ហ្នឹងមាននិន្នាការគណបក្សប្រឆាំង ប៉ុន្តែយើងអត់ទាន់ឃើញតារាងឈ្មោះរបស់គេ មែន ឬមួយមិនមែន។ ក្រុមគ្រួសាររបស់គាត់ មានការលាក់ដែរហ្នឹង»។
ក៏ប៉ុន្តែ មន្ត្រីប៉ូលិសបានច្រានចោលការសម្លាប់ដែលថាសង្ស័យពាក់ព័ន្ធទៅលើការស្អប់ខាងគណបក្សនយោបាយនោះ។
អធិការរងនគរបាលស្រុកជ័យសែន គឺលោក ខុន សុខៃ បានមានប្រសាសន៍ថា តាមការសន្និដ្ឋានរបស់សមត្ថកិច្ច ឃាតកម្មនោះអាចមិនជាប់ពាក់ព័ន្ធនឹងគណបក្សនយោបាយទេ។ ប៉ូលិសសង្ស័យទៅលើរឿងគំនុំច្រើនជាង ពីព្រោះតែបុរសឈ្មោះ ហម សឿន ដែលស្លាប់នោះ ចូលចិត្តដើរផឹកស្រា និងរករឿងឈ្លោះជាមួយក្រុមគ្រួសារ និងអ្នកដទៃ៖ «ពន្លឺនោះ យើងកំពុងតែធ្វើការអង្កេតរាល់ថ្ងៃ ក៏ប៉ុន្តែមិនទាន់ចេញជាលទ្ធផលដែលអាចដៅមុខសញ្ញា អាចឱ្យយកទៅផ្ដន្ទាទោសបាននៅឡើយទេ។ អាចរឿងគំនុំនៅក្នុងគ្រួសារ ឬជាមួយអ្នកដទៃ ដូចជាផឹកស៊ីអីទៅ ធ្វើបាបប្រពន្ធកូន»។
ទោះយ៉ាងណា មន្ត្រីប៉ូលិសស្រុកជ័យសែន បានទទួលស្គាល់ថា បុរសដែលគេសម្លាប់នោះពិតជាធ្លាប់មានទំនាក់ទំនងជាមួយគណបក្សប្រឆាំងមែន។
លោក សៅ សូយ ជាប្រធានក្រុមការងារគណបក្ស សម រង្ស៊ី ប្រចាំឃុំធ្មា បានឱ្យដឹងថា បុរសឈ្មោះ ហម សឿន ដែលឃាតករមិនស្គាល់មុខវាយសម្លាប់នោះ គឺជាអ្នកគាំទ្រគណបក្សរបស់លោកម្នាក់នៅក្នុងចំណោមប្រជាពលរដ្ឋជាច្រើនទៀត។ លោក សៅ សូយ បានបញ្ជាក់ថា កាលពីអំឡុងយុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ អំឡុងខែមិថុនា ឆ្នាំ២០១២ កន្លងទៅ បុរសឈ្មោះ ហម សឿន នោះ ធ្លាប់បានផ្ដល់ទីធ្លាផ្ទះរបស់គាត់ឱ្យគណបក្ស សម រង្ស៊ី យកធ្វើជាកន្លែងឃោសនារកសំឡេងឆ្នោតផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
