ព្រះសង្ឃខ្មែរនៅឯនាយសមុទ្រថាការយករូបទង់ជាតិខ្មែរដាក់ស្បែកជើងឬខោក្នុងគឺជាការប្រមាថដល់ជាតិ និងព្រះមហាក្សត្រ។ ស្ថាបនិកបណ្តាញព្រះសង្ឃឯករាជ្យដើម្បីយុត្តិធម៌សង្គមព្រះតេជព្រះគុណ ប៊ុត ប៊ុនតិញ មានថេរដីកាថាស្មារតីជាតិនិងវត្ថុដែលជាទីសក្ការៈរបស់ជាតិដែលធំជាងគេគឺទង់ជាតិ។ បន្ទាប់មកទៀត គឺព្រះបដិមា។
ព្រះអង្គថា បើរបស់អស់ទាំងនេះត្រូវគេយកទៅធ្វើជាស្បែកជើងឬខោស្លៀក នៅក្រោមជើងឬក្រោមគូទបែបនេះគឺជាការជាន់ឈ្លី និងប្រមាថមួយដ៏អាក្រក់ដែលមិនគួរអត់ឱនឲ្យបាន៖ «ព្រះមហាក្សត្រលោកយាងទៅត្រង់ណា ឃើញទង់ជាតិខ្មែរ លោកឱនព្រះសិរសា ។ ដូច្នេះបើយកទង់ជាតិខ្មែរយកទៅធ្វើស្បែកជើង មានន័យថា ជាន់ព្រះសិរសា របស់ព្រះមហាក្សត្រ ។ អាហ្នឹង ប្រមាថហើយ ! ប៉ុន្តែយើងមើលមិនឃើញថា មិនអី ! ដល់តែរឿងដែលអី គ្រាន់តែគ្នាបញ្ចេញមតិប៉ះពាល់ព្រះមហាក្សត្រ ថាប្រមាថចាប់គ្នាដាក់គុក ។ ដល់តែគេយករបស់នៅលើព្រះសិរសា របស់នៅក្បាល ព្រះមហាក្សត្រ ទៅធ្វើទ្រនាប់ជើង យើងអត់ ថាខុស យើង អត់ព្រមចាត់វិធានការ»។
ប្រតិកម្មនេះធ្វើឡើងក្រោយពីអ្នកប្រើប្រាស់បណ្តាញសង្គមហ្វេសប៊ុកជាច្រើនបានចែករម្លែករូបភាពស្បែកជើងផ្ទាត់ស្បែកជើងប៉ាតា និងខោក្នុងស្រ្តី ដែលមានរូបទង់ជាតិខ្មែរ និងដែលគេដាក់លក់តាមអនឡាញយ៉ាងព្រោងព្រាត។
ឆ្លើយទៅនឹងសំណួររបស់វិទ្យុអាស៊ីសេរីដែលសួរថា តើការយល់ឃើញបែបនេះ ព្រះអង្គមិនខ្លាចគេចោទថា ព្រះអង្គមានទស្សនៈជាតិចង្អៀតចង្អល់ខ្លាំងពេកដែរឬយ៉ាងណាព្រះអង្គមានថេរដីកាថាទង់ជាតិនេះអាចយកទៅប្រើបានដែរ និងសមរម្យ និងគួរអនុគ្រោះបានដូចក្នុងករណីដូចជាយកវាទៅដេរឬដាក់លើក្រម៉ាបង់កអាវ មួក ក្រវ៉ាត់ក ដែលនៅខ្ពស់លើចង្កេះ។
ទោះជាយ៉ាងនេះក្តីមន្ត្រីជាន់ខ្ពស់របស់អាជ្ញាធរជាតិអប្សរាឯណោះទៅវិញលោកចាត់ទុកនេះក៏ជាបញ្ហាដែរឲ្យតែយកទង់ជាតិយកមកធ្វើជាឈុតសម្លៀកបំពាក់។ ថ្លែងទៅកាន់អ្នកសារព័ត៌មាននៅមុខអង្គរវត្ត កាលពីថ្ងៃទី៧ ខែមីនា អគ្គនាយករង និងជាអ្នកនាំពាក្យអាជ្ញាធរជាតិអប្សរា លោក ឡុង កុសល ថាអាជ្ញាធរនេះ បានតម្រូវឲ្យក្រុមហ៊ុនថតចម្រៀងវីដេអូមួយដកឈុតសម្លៀកបំពាក់ និងឯកសណ្ឋាន ដែលធ្វើពីទង់ជាតិខ្មែរចេញ។ លោក ឡុង កុសល ថាឈុតទាំងនោះ មិនខុសអ្វីនោះទេ គ្រាន់តែវាមិនសមរម្យ និងប៉ះពាល់ខ្លាំងដល់កិត្យានុភាពរបស់ជាតិ។
ការយកទង់ជាតិខ្មែរទៅកាត់ជាស្បែកជើងឬខោក្នុងរបស់ស្រ្តីជាដើមនេះនៅតែបន្តកើតមាន និងមានដាក់លក់តាមបណ្តាញទីផ្សារអនឡាញអន្តរជាតិ Amazon ថែមទៀតផង។
ព្រះតេជព្រះគុណ ប៊ុត ប៊ុនតិញ ថាក្រសួងពាក់ព័ន្ធជាច្រើនត្រូវទទួលខុសត្រូវក្នុងរឿងនេះ។ព្រះអង្គថាជាពិសេសទីស្តីការគណៈរដ្ឋមន្រ្តីដែលជាភ្នែកជាច្រមុះរបស់រដ្ឋាភិបាលគួរធ្វើការឲ្យបានល្អជាងនេះដើម្បីទប់ស្កាត់បញ្ហានេះ៖ «រដ្ឋាភិបាលមានតួនាទីធំណាស់ ! រដ្ឋាភិបាលត្រូវ ចេញវិធានការទៅឲ្យក្រសួង សាម៉ីពាក់ព័ន្ធហ្នឹង ធ្វើការត្រួតពិនិត្យ ទៅលើផលិតផលដែលគេផលិតពាក់ព័ន្ធជាមួយនឹងវត្ថុដែលជាទីសក្ការៈរបស់ខ្មែរ ។ វត្ថុដែលជាទីសក្ការៈរបស់ខ្មែរហ្នឹង ធំជាងគេជាទីសក្ការៈរបស់ជាតិ គឺទង់ជាតិហ្នឹងហើយ។ មិនចាត់វិធានការ អ្នកដែលបណ្ដែតបណ្ដោយឲ្យ ជាតិខ្មែរអត់តម្លៃ គឺរដ្ឋាភិបាលហ្នឹង ហើ យ»។
វិទ្យុអាស៊ីសេរី មិនទាន់អាចសុំការបំភ្លឺជុំវិញរឿងនេះពីប្រធានអង្គភាពអ្នកនាំពាក្យរដ្ឋាភិបាលគឺលោក ផៃ ស៊ីផាន បាននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។