កម្មវិធីតម្លាភាពរបស់គម្រោងរោងចក្រកាន់តែប្រសើរជំរុញឲ្យមានការអនុលោមតាមបទដ្ឋានការងារ
2018.01.23
របាយការណ៍ប្រចាំឆ្នាំលើកទី៣៤ របស់គម្រោងរោងចក្រកាន់តែប្រសើរ ស្តីអំពីស្ថានភាពលក្ខខណ្ឌការងារនៅក្នុងវិស័យកាត់ដេរនៅកម្ពុជា រកឃើញថា កម្មវិធីតម្លាភាពរបស់គម្រោងនេះកំពុងតែមានឥទ្ធិពលជាវិជ្ជមានគួរឲ្យកត់សម្គាល់ ដើម្បីជំរុញឲ្យមានការអនុវត្តតាមបទដ្ឋានការងារនៅតាមបណ្ដារោងចក្រនានា។
កម្មវិធីតម្លាភាពរបស់គម្រោងរោងចក្រកាន់តែប្រសើរនេះ អនុញ្ញាតឲ្យមានការបញ្ចេញព័ត៌មានជាសាធារណៈអំពីទិដ្ឋភាពទូទៅនៃការអនុវត្តរបស់រោងចក្រនីមួយៗ ទៅលើបញ្ហាចម្បងៗពាក់ព័ន្ធនឹងលក្ខខណ្ឌការងារ។
របាយការណ៍ឲ្យដឹងថា ការកែលំអគួរឲ្យកត់សម្គាល់រួមមាន ការផ្តល់ ការបណ្ដុះបណ្ដាលដល់កម្មករនិយោជិត អំពីការជម្លៀសបន្ទាន់ និងការធានាថា ច្រកទ្វារចេញចូលរបស់រោងចក្រ មិនត្រូវបានចាក់សោក្នុងអំឡុងពេលម៉ោងធ្វើការដែលបញ្ហាទាំងពីរនេះមានសារសំខាន់បំផុតក្នុងការបង្កើនសុវត្ថិភាពដល់កម្មករនិយោជិតក្នុងករណីសង្គ្រោះបន្ទាន់។
របាយការណ៍ក៏រកឃើញផងដែរថា មានការធ្លាក់ចុះនូវអត្រានៃពលកម្មកុមារនៅតាមរោងចក្រ ពោលគឺពី ៧៤ករណី នៅពេលចេញរបាយការណ៍លើកទី៣១ មកនៅត្រឹមតែ ៤ករណី នៅពេលចេញរបាយការណ៍បច្ចុប្បន្ន។ បញ្ហាពលកម្មកុមារនៅតាមរោងចក្រ គឺជាបញ្ហាដែលមិនអាចអនុគ្រោះបានឡើយ ក្នុងចំណោមបញ្ហាផ្សេងៗដែលត្រូវបានត្រួតពិនិត្យយ៉ាងយកចិត្តទុកដាក់ដោយគម្រោងរោងចក្រកាន់តែប្រសើរ។
ក្រៅពីរបកគំហើញខាងលើនេះ បញ្ហាផ្សេងៗទៀតពាក់ព័ន្ធនឹងសុវត្ថិភាពការងារ និងសុខភាពការងារ នៅតែជាបញ្ហាប្រឈមដដែលក្នុងវិស័យកាត់ដេរនៅកម្ពុជា។ របាយការណ៍គូសបញ្ជាក់ថា ការណ៍នេះគឺដោយសារតែរោងចក្រមិនអាច ឬមិនចង់ចំណាយច្រើនទៅលើធនធានចាំបាច់នានា ដូចជា ការប្រើប្រាស់ឧបករណ៍ ភ្លើងបំភ្លឺ និងប្រព័ន្ធខ្យល់ចេញចូលជាដើម។ ជាមួយគ្នានេះដែរ រោងចក្រមួយចំនួននៅមិនទាន់មាននីតិវិធី និងគោលការណ៍ច្បាស់លាស់ ឬគ្រប់គ្រាន់ពាក់ព័ន្ធនឹងសុវត្ថិភាពការងារ និងសុខភាពការងារនៅឡើយទេ។
របាយការណ៍ប្រចាំឆ្នាំលើកទី៣៤ របស់គម្រោងរោងចក្រកាន់តែប្រសើរ ស្តីអំពីស្ថានភាពលក្ខខណ្ឌការងារនៅក្នុងវិស័យកាត់ដេរនៅកម្ពុជា ផ្អែកតាមទិន្នន័យពីរបាយការណ៍វាយតម្លៃចំនួន ៣៩៥ របាយការណ៍ ដែលប្រមូលបានមកពីការចុះត្រួតពិនិត្យនៅតាមរោងចក្រសរុបចំនួន ៤៣៩ រោងចក្រ ក្នុងចន្លោះពីថ្ងៃទី១ ខែឧសភា ឆ្នាំ២០១៦ ដល់ថ្ងៃទី៣០ ខែមេសា ឆ្នាំ២០១៧៕