ភាពក្រីក្របណ្ដាលមកពីការប្រែប្រួលអាកាសធាតុបានជំរុញឲ្យគ្រួសារកសិកររាប់ពាន់គ្រួសារធ្លាក់ខ្លួនជាទាសករធ្វើការងារនៅតាមឡឥដ្ឋដើម្បីផ្គត់ផ្គង់ឥដ្ឋឲ្យសំណង់អាគារនៅរាជធានីភ្នំពេញ។
របាយការណ៍របស់អ្នកស្រាវជ្រាវនៅសកលវិទ្យាល័យហូលូវេ (Holloway University) ផ្សាយកាលពីថ្ងៃទី១៦ តុលា ថា ពលរដ្ឋរាប់ពាន់គ្រួសារ ក្នុងនោះរួមមានទាំងកុមារ ដែលជំពាក់បំណុលគេ កំពុងធ្វើការងារក្នុងស្ថានភាពដ៏គ្រោះថ្នាក់ជាទីបំផុត ដើម្បីបំពេញតម្រូវការឥដ្ឋ ដែលរបាយការណ៍ចាត់ទុកថា ជាឥដ្ឋឈាម សម្រាប់ការសាងសង់។
របាយការណ៍បន្តថា ដើម្បីបានកម្មករមកធ្វើការងារនៅឡឥដ្ឋ ម្ចាស់ឡឥដ្ឋបានសងបំណុលជំនួសកសិករដែលជំពាក់លុយគេ ប៉ុន្តែតម្រូវឲ្យកសិករទាំងនោះធ្វើការងារនៅក្នុងឡឥដ្ឋរហូតដល់កាត់បំណុលប្រមាណពី មួយរយដុល្លារ ដល់បួនពាន់ដុល្លារ ដែលជំពាក់ម្ចាស់ឡឥដ្ឋវិញ។
កម្មករឡឥដ្ឋទាំងអស់នោះ ត្អូញត្អែរថា ពួកគេរងនូវជំងឺផ្លូវដង្ហើម ដោយសារគ្មានឧបករណ៍ការពារផ្លូវដង្ហើមបណ្ដាលមកពីការដកដង្ហើមពីចំហាយ និងធុលីឡឥដ្ឋ ហើយមានករណីខ្លះកម្មកររងគ្រោះថា្នក់ដល់ពិការអវយវៈទៀតផង។ របាយការណ៍ឲ្យដឹងទៀតថា នៅពេលណាកម្មករត្រូវការព្យាបាលជំងឺ ឬចង់សម្រាកពីការងារ ពួកគេមិនត្រូវបានអនុញ្ញាតឲ្យសមាជិកគ្រួសារទៅជាមួយនោះទេ ដើម្បីធានាថា អ្នកចាកចេញពីឡឥដ្ឋនឹងវិលត្រឡប់មកវិញ។
អង្គការការងារអន្តរជាតិ បញ្ជាក់ថា លក្ខខណ្ឌការងារនៅវិស័យសំណង់មិនត្រូវបានក្រុមអង្គការសង្គមស៊ីវិល និងរបបលោក ហ៊ុន សែន យកចិត្តដាក់ដូច វិស័យរោងចក្រកាត់ដេរនោះទេ ដោយសារតែវិស័យកាត់ដេរជាវិស័យមួយជួយសេដ្ឋកិច្ចកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។