រូបចម្លាក់សម័យអង្គរនឹងត្រូវដាក់តាំងពិព័រណ៍នៅចិន
2014.07.23
រូបចម្លាក់ល្បីៗចំនួន ៨០ នាសម័យអង្គរ នឹងត្រូវដាក់តាំងពិព័រណ៍នៅប្រទេសចិន ក្នុងរយៈពេល ៦ខែ ដើម្បីលើកស្ទួយ និងពង្រឹងទំនាក់ទំនងចំណងមិត្តភាពវិស័យវប្បធម៌នៃប្រទេសទាំងពីរ កម្ពុជា-ចិន។
ទីភ្នាក់ងារសារព័ត៌មានចិន ស៊ីនហួ (Xinhau) ចុះផ្សាយនៅថ្ងៃទី២៣ កក្កដា ថា ការតាំងពិព័រណ៍ចម្លាក់បុរាណខ្មែរនេះ នឹងធ្វើនៅទីតាំងពីរកន្លែងខុសគ្នា គឺនៅសារមន្ទីរចិន ទីក្រុងប៉េកាំងរយៈពេល ៣ខែ ចាប់ផ្ដើមពីថ្ងៃទី២៦ ធ្នូ ឆ្នាំ២០១៤។ បន្ទាប់មកនឹងដាក់តាំងនៅសារមន្ទីរខេត្តក្វាងទុង (Guangdong) ចាប់ពីខែមេសា ដល់មិថុនា ឆ្នាំ២០១៥។
ការតាំងពិព័រណ៍ចម្លាក់បុរាណខ្មែរជាមួយចិននេះ ធ្វើឡើងក្រោមកិច្ចព្រមព្រៀងរវាងភាគីចិន និងក្រសួងវប្បធម៌ និងវិចិត្រសិល្បៈកម្ពុជា ដែលភាគីទាំងពីរបានចុះហត្ថលេខា កាលពីថ្ងៃទី២២ កក្កដា។
ភាគីទាំងពីរអះអាងថា ការតាំងពិព័រណ៍នេះ គឺជាលើកទីមួយក្នុងប្រវត្តិសាស្ត្រក្នុងការផ្សព្វផ្សាយវប្បធម៌នៃប្រទេសទាំងពីរ ហើយរំពឹងថា ប្រទេសទាំងពីរនឹងអាចទាក់ទាញភ្ញៀវទេសចរបានច្រើនតាមរយៈការតាំងពិព័រណ៍នេះ៕