សមត្ថកិច្ចរាជធានីភ្នំពេញមិនទាន់វែកមុខអ្នកលក់កាំភ្លើងឱ្យជនជាតិចិនមួយក្រុមដែលផឹកស៊ី និងដេញបាញ់បោះគ្នានៅទល់មុខព្រលានយន្តហោះរាជធានីភ្នំពេញកាលពីសប្ដាហ៍មុននៅឡើយ។ មន្ត្រីសិទ្ធិមនុស្សបារម្ភថា សកម្មភាពនៃជនបរទេសប្រើប្រាស់កាំភ្លើងបាញ់បោះនៅតាមទីសាធារណៈនឹងបន្តកើតមានដដែល ដោយសារតែសមត្ថកិច្ចអសមត្ថភាពបង្ក្រាបឱ្យដល់ឫសគល់ចំពោះមេខ្លោងដែលជួញដូរអាវុធឱ្យជនជាតិចិនមួយចំនួនប្រើប្រាស់លើទឹកដីខ្មែរ។
មន្ត្រីប៉ូលិសនៃ ស្នងការដ្ឋាននគរបាលរាជធានីភ្នំពេញនៅថ្ងៃទី១៨ ខែកុម្ភៈ បានបង្ហាញមុខជនជាតិចិនចំនួន ៥នាក់ដែលពួកគេមានជម្លោះទាស់ទែង និងប្រើប្រាស់កាំភ្លើងបាញ់គ្នានៅទល់មុខទីតាំងដែលភ្ញៀវទេសចរជាតិ និងអន្តរជាតិចេញចូលរាល់ថ្ងៃគឺអាកាសយានដ្ឋានអន្តរជាតិភ្នំពេញកាលពីថ្ងៃទី១៤ ខែកុម្ភៈ។
អ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា ប្រាប់ក្រុមអ្នកសារព័ត៌មានថា ក្នុងចំណោមជនសង្ស័យជនជាតិចិនទាំង ៥នាក់មានម្នាក់ទើបមកពីប្រទេសចិនដល់កម្ពុជាជិត ១០ថ្ងៃប៉ុណ្ណោះ ចំណែកមួយចំនួនទៀតពួកគេមានទីកន្លែងស្នាក់នៅខេត្តព្រះសីហនុ និងរាជធានីភ្នំពេញ។ លោក សំ វិច្ឆិកា បញ្ជាក់ថា ដើមចមសំខាន់ដែលខ្មាន់កាំភ្លើងម៉ាក់អាកា (AK) និងបក្ខពួកទាញកាំភ្លើងដេញបាញ់លើជនជាតិចិនមួយក្រុមទៀតនោះគឺកើតចេញពីជម្លោះនៅកន្លែងស៊ីផឹក និងជាការសងសឹកដែលជនជាតិចិនមួយក្រុមនោះប្រើកាំបិត និងដកកាំភ្លើងខ្លីភ្ជង់លើបក្ខពួកក្រុមខ្មាន់កាំភ្លើងម៉ាក់អាកា(AK)។
លោក សំ វិច្ឆិកា ឱ្យដឹងទៀតថា ខ្មាន់កាំភ្លើងម៉ាក់អាកា (AK) និងបក្ខពួកបានបញ្ជាទិញកាំភ្លើងម៉ាក់អាកា (AK) ចំនួន ២ដើមពីឈ្មួញនៅមុនហេតុការណ៍កើតឡើង ១ថ្ងៃប៉ុណ្ណោះ។ លោកអះអាងថា កម្លាំងជំនាញកំពុងស្រាវជ្រាវស្វែងរកប្រភព និងអ្នកលក់កាំភ្លើងឱ្យជនជាតិចិនទាំងនេះ។
លោក សំ វិច្ឆិកា៖ «ជនផ្ទុះអាវុធ ជនជាតិចិននេះគាត់ខឹងនឹងជនសង្ស័យម្នាក់ដែលកាន់កាំបិតចាក់គាត់មុន ចាក់ប្រមាណ ៦ ទៅ ៧ កាំបិត បណ្ដាលឱ្យរងរបួស។ អ៊ីចឹងស្អែកឡើងបុរសដែលកាន់អាវុធនេះគាត់ជាជនជាតិចិនទេ តែគាត់ទៅកុម្ម៉ង់កាំភ្លើងយើងមិនទាន់ដឹងប្រភពមកពីខាងណាទេ យើងកំពុងតែធ្វើការស្រាវជ្រាវ ហើយយកមកដើម្បីសងសឹកជាមួយក្រុមដែលធ្វើអំពើហិង្សាជាមួយគាត់។ អ៊ីចឹងដល់ពេលថ្ងៃកើតហេតុនេះ គាត់មកដល់មានការប្រទូសរ៉ាយគ្នា ហើយក៏គាត់ទាញកាំភ្លើង ទៅបាញ់ទៅគូបដិបក្ខរបស់គាត់ ប៉ុន្តែអត់មានរបួសស្នាមទេ គាត់បាញ់ផ្អបនឹងដីតែប៉ុណ្ណោះ។ ក្រោយពីកើតហេតុភ្លាមគឺពួកនេះ បានធ្វើដំណើរតាមរថយន្តមួយគ្រឿងយកទៅផ្លុងចោលនៅជិតកន្លែងកើតហេតុនោះដែរ បន្ទាប់មកយើងក៏ឃាត់ខ្លួនបានជនសង្ស័យជនជាតិចិនម្នាក់ដែលគាត់ទៅយករថយន្តដែលផ្លុងចោល។ យើងដកហូតបានកាំភ្លើង ២ដើមជាមួយកាំភ្លើងជ័រ មួយដើម ជាមួយគ្រាប់មួយចំនួន និងបង់ចំនួន ២»។
ហេតុការណ៍ផ្ទុះអាវុធពុំបង្កឱ្យមានអ្នករបួសទេ
ហេតុការណ៍ផ្ទុះអាវុធបង្កឡើងដោយជនជាតិចិននៅបរិវេណមជ្ឈមណ្ឌលកម្សាន្តរតនៈសម្បត្តិទល់មុខព្រលានយន្តហោះអន្តរជាតិភ្នំពេញកាលពីថ្ងៃទី១៤ ខែកុម្ភៈ ពុំមានអ្នករងរបួសទេ ដោយសារតែដៃគូជម្លោះរបស់ខ្មាន់កាំភ្លើងម៉ាក់អាកាទំនងបានដឹងខ្លួនមុន និងនាំគ្នារត់គេចខ្លួន។
លោក សំ វិច្ឆិកា ឱ្យដឹងថា សមត្ថកិច្ចជំនាញបានកសាងសំណុំរឿងបញ្ជូនជនសង្ស័យ ៥នាក់ទៅកាន់សាលាដំបូងរាជធានីភ្នំពេញនៅថ្ងៃទី១៨ ខែកុម្ភៈ ពាក់ព័ន្ធនឹងការចោទប្រកាន់ប្រើហិង្សាដោយចេតនាមានស្ថានទម្ងន់ទោស និងការកាន់កាប់ប្រើប្រាស់អាវុធដោយគ្មានការអនុញ្ញាត។
អត្ថបទដែលទាក់ទង៖
ក្រោយហេតុការណ៍ផ្ទុះអាវុធនេះ ឯកអគ្គរដ្ឋទូតចិនប្រចាំកម្ពុជាលោក វ៉ាង វិនពីន (Wang Wenbin) បានប្រកាសថ្កោលទោសដល់ជនបង្កហេតុ និងគាំទ្រឱ្យសមត្ថកិច្ចកម្ពុជាផ្ដន្ទាទោសឱ្យបានធ្ងន់ធ្ងរដល់ជនល្មើស។
ការប្រើប្រាស់អាវុធតាមទំនើងចិត្ត «មកពីការគ្រប់គ្រងច្បាប់ធូររលុង»
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត លើកឡើងថា ចំណាត់ការគ្រប់គ្រងជនអន្តោប្រវេសន៍របស់សមត្ថកិច្ចកម្ពុជានៅធូររលុង ហើយលោកថា ការអនុវត្តធូររលុងបែបនេះគឺជា ឱកាសសម្រាប់ក្រុមជនល្មើសប្រព្រឹត្តបទល្មើស និងប្រើប្រាស់កាំភ្លើងតាមទំនើងចិត្តបង្កអសន្តិសុខដល់សង្គមកម្ពុជា។ ក្រៅពីនេះ លោករិះគន់ថា អាជ្ញាធរក៏មិនបានគ្រប់គ្រងអាវុធជាតិផ្ទុះឱ្យមានប្រសិទ្ធភាពនោះដែរ ដោយសារតែជាញឹកញយជនបរទេសមួយចំនួននៅតែអាចមានកាំភ្លើងប្រើប្រាស់បាញ់បោះសេរី នៅពេលពួកគេមានជម្លោះទាស់ទែងគ្នា។
លោក អំ សំអាត៖ «បញ្ហាជនបរទេសមួយចំនួនហ្នឹងគឺបង្កបទល្មើសជាច្រើនដែលធ្វើឱ្យប៉ះពាល់មុខមាត់កម្ពុជាយើង អ៊ីចឹងហើយបានជាកន្លងមកយើងឃើញមានការណ៍ដែលប្រព្រឹត្តការចាប់ជំរិត ការបាញ់សម្លាប់ការប្រើអំពើហិង្សាផ្សេងៗ ឬទាក់ទងទៅដល់ប្រព្រឹត្តបទល្មើសការជួញដូរមនុស្ស ការឆបោកតាមប្រព័ន្ធអនឡាញជាដើម អាហ្នឹងទាក់ទងនឹងការគ្រប់គ្រងជនអន្តោប្រវេសន៍»។
លោក អំ សំអាត បន្ថែមទៀតថា ករណីជនជាតិចិនដែលប្រើប្រាស់អាវុធបាញ់បោះនៅកម្ពុជាបានកើតមានជាហូរហែ ប៉ុន្តែសមត្ថកិច្ចកម្ពុជាហាក់ខកខានក្នុងការស្វែងរកមេខ្លោងធំៗដែលជាអ្នកចរាចរ និងលក់អាវុធឱ្យជនជាតិចិនមួយចំនួនប្រើប្រាស់។ លោកបន្តថា សមត្ថកិច្ចនៃស្ថាប័នជំនាញគួរបង្ហាញឆន្ទៈឱ្យបានម៉ឺងម៉ាត់ ដើម្បីស្វែងរកឈ្មួញជួញដូរអាវុធនៅកម្ពុជាលក់ឱ្យជនបរទេស ព្រោះលោកថា ករណីជនបរទេសផ្ទុះអាវុធជាបន្តបន្ទាប់នេះគឺជាការគំរាមកំហែងធ្ងន់ធ្ងរដល់សន្តិសុខសង្គម សុវត្ថិភាពពលរដ្ឋ និងជារូបភាពមួយបង្កការភ័យខ្លាចដល់ភ្ញៀវទេសចរអន្តរជាតិមិនហ៊ានចូលមកកម្សាន្តនៅកម្ពុជា។
រយៈពេលពេញមួយឆ្នាំ២០២៤ កន្លងទៅកម្លាំងសមត្ថកិច្ចបានបង្ក្រាបបទល្មើសជាង ៤រយករណី (៤៤៩ករណី) និងបានឃាត់ខ្លួនជនសង្ស័យជាង ៦រយនាក់ (៦៥៩នាក់) នៅក្នុងទីតាំងភូមិសាស្ត្ររាជធានីភ្នំពេញ។ ក្នុងនោះមានបទល្មើសឧក្រិដ្ឋចំនួន ៦៨ករណីត្រូវបានសមត្ថកិច្ចបង្ក្រាប និងបានឃាត់ខ្លួនជនសង្ស័យជាង ១រយនាក់ (១៤០នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។