ពលករខ្មែរធ្វើការនៅប្រទេសថៃត្អូញត្អែរពីការលំបាក ដោយសារតម្លៃវីសាការងារឡើងថ្លៃ
2024.12.08
សកម្មភាពខ្លះៗ របស់ពលករខ្មែរ ដែលធ្វើការនៅប្រទេសថៃ វិលត្រឡប់មកលេងស្រុកកំណើត ក្នុងរដូវបុណ្យទាន កាលពីខែមេសា ២០២៣។
រូប៖ អង្គការសង់ត្រាល់
ពលករខ្មែរធ្វើការនៅប្រទេសថៃត្អូញត្អែរពីជីវភាពលំបាក បន្ទាប់ពីតម្លៃសេវាធ្វើទិដ្ឋាការ ការងារ ឬវីសា អឹម.អូ.យូ (MOU) ឡើងថ្លៃជាបន្តបន្ទាប់ ដែលធ្វើឱ្យពួកគាត់ត្រូវចំណាយប្រាក់កាន់តែច្រើនសម្រាប់ធ្វើឯកសារ ខណៈការងារ និងប្រាក់កម្រៃកម្លាំងពលកម្មរបស់ពួកគាត់ កាន់តែខ្សត់ និងធ្លាក់ចុះ។ មន្ត្រីសង្គមស៊ីវិលស្នើឱ្យក្រសួងការងារកម្ពុជា គួរចុះពិនិត្យមើលក្រុមហ៊ុននាំពលករទទួលរត់ការធ្វើវីសា ដើម្បីកំណត់ពីតម្លៃសេវាកម្មឱ្យបានជាក់លាក់ និងជៀសវាងការយកតម្លៃថ្លៃហួសហេតុ។
ពលករខ្មែរធ្វើការនៅប្រទេសថៃ មួយចំនួនអះអាងថា ជីវភាពពួកគាត់បច្ចុប្បន្ន គ្មានភាពល្អប្រសើរឡើងជាងនៅស្រុកកំណើតនោះទេ ដោយសារការចំណាយលើឯកសារកាន់តែឡើងថ្លៃ។
ពលករខ្មែរធ្វើការនៅខេត្តរ៉ាក់យ៉ង (Rayong) ប្រទេសថៃ(Thai) លោកស្រី វណ្ណ ស្រីនាង ប្រាប់វិទ្យុអាស៊ីសេរី នៅថ្ងៃទី៧ ខែធ្នូ ថា លោកស្រីបានបន្តសុពលភាពវីសា អឹម.អូ.យូ (MOU) ដោយក្រុមហ៊ុននាំពលករទារថ្លៃរត់ឯកសារចំនួនជាង ៦៤០ដុល្លារ ដែលកាលពីមុនលោកស្រីចំណាយអស់តែជាង ៤រយដុល្លារប៉ុណ្ណោះ។ លោកស្រីលើកឡើងទៀតថា ចំពោះការដំឡើងថ្លៃធ្វើវីសានេះ ធ្វើឱ្យលោកស្រីមិនមានលទ្ធភាពចំណាយនោះទេ ដោយសារបច្ចុប្បន្ន ការងារនៅក្នុងស្រុកថៃ មិនសូវសម្បូរ និងរកបានកម្រៃដូចកាលពីមុនឡើយ។
លោកស្រី វណ្ណ ស្រីនាង៖ «ពិបាកដែរហ្នឹងបង យើងរកលុយអត់ទាន់ ហើយមិនមែនយើងធ្វើតែម្នាក់ឯណា ពីរនាក់អ៊ីចឹងអស់បួនប្រាំម៉ឺន (បាត) ដែរហ្នឹង។ ថ្លៃធ្វើដំណើរយើងចេញខ្លួនឯងទៀត។ ធ្វើដំបូងអស់ ១៨,០០០បាត ដើររឿងដើរឯកសារ។ ដល់ពេលដាច់វីសាតសាថ្មីអស់ ១៦,០០០បាត ឥឡូវនេះដាក់តជាថ្មី២២,០០០បាត»។
ទិដ្ឋាការ អឹម.អូ.យូ គឺជាវីសាសម្រាប់ពលករកម្ពុជា ដែលធ្វើការនៅប្រទេសថៃតាមប្រព័ន្ធអនុស្សរណៈយោគយល់គ្នា ដែលមានរយៈកាលកំណត់ ២ឆ្នាំ ហើយនៅមុនពេលអស់សុពលភាព ពលករអាចបន្តសុពលភាពជាលើកចុងក្រោយបាន ២ឆ្នាំបន្តទៀត ដោយពលករត្រូវចំណាយថ្លៃសេវាអស់តិចជាងកាលធ្វើលើកទី១។ យោងតាមការផ្សព្វផ្សាយរបស់ទីភ្នាក់ងារនាំពលករធ្វើការក្នុងប្រទេសថៃ សេវាកម្មធ្វើទិដ្ឋាការ អឹម.អូ.យូ លើកដំបូងសម្រាប់ពលករកម្ពុជា មានតម្លៃ ៣៦៦ដុល្លារ និងសេវាបន្តសុពលភាព ២ឆ្នាំបន្ទាប់ មានតម្លៃ ១៤៣ដុល្លារ។
ទោះជាបែបនេះក្ដី ពលករខ្មែរ ធ្វើការនៅខេត្តឈុនបុរី (Chonburi) លោក សុខ គឹមឡាង ឱ្យដឹងថា វីសា អឹម.អូ.យូ របស់លោកនឹងត្រូវអស់សុពលភាពនៅដើមឆ្នាំ២០២៥ ខាងមុខនេះ ប៉ុន្តែចំពោះការបន្តសុពលភាព ២ឆ្នាំបន្តទៀតនេះ ក្រុមហ៊ុននៅតែយកថ្លៃសេវា ដូចកាលធ្វើលើកទី១ ដដែល។ លោកបន្តថា តម្លៃសេវាដ៏ច្រើនលើសលប់នេះ មិនសមាមាត្រទៅនឹងប្រាក់កម្រៃរបស់ពលករ ដែលបានមកពីការលក់កម្លាំងពលកម្មឡើយ ព្រោះវីសា អឹម.អូ.យូ នេះមានសុពលភាពត្រឹមតែ ២ឆ្នាំប៉ុណ្ណោះ ហើយបន្ទាប់ពីពលករបន្តសុពលភាពរួច ពួកគាត់គ្មានសល់ប្រាក់កាសអ្វីនោះឡើយ។
លោក សុខ គឹមឡាង៖ «ចំណាយច្រើនណាស់បង និយាយទៅចំណាយច្រើនមែន ដល់ពេលត (វីសា) ម្ដងៗពិបាក។ ការងាររកស៊ីដូចតែជីវិតយើងនៅខ្មែរអ៊ីចឹង តែយើងបានតម្លៃកម្លាំងពលកម្មរាងថ្លៃបន្តិច។ តែជួនកាលយើងមកស្រុកមកអី ជំពាក់ធនាគារទៀត»។
ទាក់ទិនរឿងនេះ ទីភ្នាក់ងាររបស់ក្រុមហ៊ុននាំពលករម្នាក់ថ្លែងក្នុងលក្ខខ័ណ្ឌមិនបញ្ចេញឈ្មោះ បានអះអាងប្រាប់វិទ្យុអាស៊ីសេរីថា លោកមិនដឹងពីតម្លៃដើមរបស់វីសាការងារ ដែលរដ្ឋាភិបាលថៃបានកំណត់នោះទេ ប៉ុន្តែលោកអះអាងថា ថៅកែក្រុមហ៊ុនបានយកថ្លៃសេវាធ្វើវីសាឱ្យពលករលើសពីតម្លៃដើមជាច្រើន នៅក្នុងនោះប្រាក់ចំណេញមួយចំនួន ក្រុមហ៊ុនបានបែកចែកទៅឱ្យក្រសួងការងារ។
ពលរដ្ឋថ្លែងលាក់ឈ្មោះ៖ «មិនច្បាស់ទេប្អូនអើយ ព្រោះណាយណា (មេខ្យល់) អ្នកនាំមុខ អ្នកនាំផ្លូវ។ ច្បាប់ខ្មែរ ច្បាប់ថៃ អារឿង អឹម.អូ.យូ នាំពលករពីខ្មែរទៅធ្វើការនៅថៃ បើនិយាយតាមច្បាប់ៗខាងក្រៅ តែបើឱ្យច្បាស់លាស់អត់មានទេប្អូន។ កន្លែងខ្លះទៅ គេយក ពីរម៉ឺនប្រាំមួយពាន់ ពីរម៉ឺនប្រាំពីរពាន់ ពីរម៉ឺនបីពាន់ ពីរម៉ឺនប្រាំពាន់ ព្រោះអីច្បាប់ខ្មែរច្បាប់ថៃ ច្បាប់មានតែមាត់»។
ទន្ទឹមគ្នានេះ វិទ្យុអាស៊ីសេរី បានទទួលសេចក្ដីរាយការណ៍ពីភ្នាក់ងារក្រុមហ៊ុននាំពលករផ្សេងទៀតមកថា ក្រុមហ៊ុនភាគច្រើនបានប្រើប្រាស់អាជ្ញាប័ណ្ណក្លែងក្លាយ ដោយម្ចាស់ក្រុមហ៊ុននាំពលករ បានចំណាយលុយទិញអាជ្ញាប័ណ្ណបើកប្រតិបត្តិការនាំពលករពីក្រសួងការងារ ក្រោយមកពួកគេបានលក់ចែកចាយអាជ្ញាប័ណ្ណនោះ ឱ្យទៅអ្នកដទៃបន្តជាច្រើនអ្នកទៀត ក្រោមរូបភាពបំបែកសាខា ឬទីភ្នាក់ងារនាំពលករជាដើម។ ជាមួយគ្នានេះ មានមនុស្សមួយចំនួនដែលចេះនិយាយ និងសរសេរភាសាថៃស្ទាត់ជំនាញ បានបង្កើតសេវាកម្មធ្វើឯកសារ និងវីសានៅលើបណ្ដាញសង្គម ដោយប្រើប្រាស់អាជ្ញាប័ណ្ណខុសច្បាប់ ដែលទិញបន្តពីក្រុមហ៊ុនធំ ដែលធ្វើឱ្យតម្លៃវីសា អឹម.អូ.យូ(MOU) កាន់តែមានតម្លៃថ្លៃ។
វិទ្យុអាស៊ីសេរី មិនអាចទាក់ទងប្រធានអនុព័ន្ធការងារអមស្ថានទូតកម្ពុជាប្រចាំប្រទេសថៃ លោក ឈឹម វិបុល អ្នកនាំពាក្យក្រសួងការងារ លោក កត្តា អ៊ន និងអគ្គនាយកអន្តោប្រវេសន៍ នៃក្រសួងមហាផ្ទៃ លោក សុខ វាសនា ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី៧ ខែធ្នូ។
របាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា ចំនួនក្រុមហ៊ុននាំពលករស្របច្បាប់របស់ថៃ ដែលទទួលស្គាល់ដោយក្រសួងការងារប្រទេសថៃ មានចំនួន ៣១៧ក្រុមហ៊ុន។ ចំណែកទីភ្នាក់ងារជ្រើសរើសពលករឯកជនស្របច្បាប់របស់កម្ពុជា ដែលទទួលស្គាល់ដោយក្រសួងការងារកម្ពុជា មានចំនួន ៧៧ក្រុមហ៊ុន។
ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា (CIREA) លោក ឌិន ពុទ្ធី ស្នើឱ្យក្រសួងការងារកម្ពុជា គួរចុះពិនិត្យមើលក្រុមហ៊ុននាំពលករដែលទទួលរត់ការធ្វើវីសា ដើម្បីកំណត់ពីតម្លៃសេវាកម្មឱ្យបានជាក់លាក់ និងជៀសវាងការយកតម្លៃថ្លៃហួសហេតុ។
លោក ឌិនពុទ្ធី៖ «ប្រទេសទាំងពីរហ្នឹង គួរតែចរចាធ្វើយ៉ាងម៉េចសម្រួលឱ្យគាត់។ ជាពិសេស រដ្ឋាភិបាលកម្ពុជាគួរតែពិនិត្យពិចារណារឿងហ្នឹងឡើងវិញ ព្រោះដោយសារតែក្រុមហ៊ុនធ្វើយកតម្លៃថ្លៃណាស់វីសាហ្នឹង ហើយពួកគាត់មិនចេះអក្សរ អ្នកខ្លះក៏ចេះទៅ អ្នកខ្លះក៏មិនសូវចេះ ជួនកាលបំពេញខុសទៅវាពិបាក អ៊ីចឹងពឹងពាក់ក្រុមហ៊ុនៗបានដៃធ្វើតាមចិត្ត»។
យ៉ាងណាក៏ដោយចុះ ទីភ្នាក់ងាររបស់ក្រុមហ៊ុននាំពលករ លើកឡើងថា ដើម្បីដោះស្រាយបញ្ហាតម្លៃសេវាកម្មធ្វើវីសាសម្រាប់ពលករ លុះត្រាតែរដ្ឋាភិបាលដកសិទ្ធិពីក្រុមហ៊ុននាំពលករ មិនឱ្យបង្កើតសេវាកម្មធ្វើឯកសារសម្រាប់ពលករ ហើយរដ្ឋាភិបាលខ្លួនឯងត្រូវបង្កើតក្រុមការងារអមស្ថានទូតមួយ ដើម្បីទទួលខុសត្រូវរត់ការធ្វើឯកសារសម្រាប់ពលករ។
របាយការណ៍របស់ក្រសួងការងារឱ្យដឹងថា គិតត្រឹមពាក់កណ្ដាលឆ្នាំ២០២៤ ចំនួនពលករខ្មែរដែលកំពុងធ្វើការនៅប្រទេសថៃមានចំនួនជាង ១លាន ២សែននាក់ ក្នុងចំណោមពលករសរុបនៅក្រៅប្រទេសជាង ១ លាន ៣ សែននាក់ ប៉ុន្តែអង្គការផ្នែកសិទ្ធិការងារវាយតម្លៃថា ចំនួនពលករខ្មែរនៅថៃមានប្រមាណ ២ លាននាក់ ដោយគិតទាំងពលករស្របច្បាប់ និងមិនស្របច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
សង្គម
- ជនសង្ស័យ៥នាក់ត្រូវបានឃាត់ខ្លួនករណីក្លែងបន្លំឯកសណ្ឋានសមត្ថកិច្ចដើរជំរិតទារប្រាក់
- មន្ត្រីសិទ្ធិមនុស្សទាមទារឱ្យរដ្ឋាភិបាលទទួលខុសត្រូវលើករណីមនុស្សដណ្ដើមអាំងប៉ាវនៅផ្ទះលោក សុខ គង់ ស្លាប់និងរបួស
- អ្នកឃ្លាំមើលរិះគន់ថា អាជ្ញាធរមិនបានបង្ក្រាបមេខ្លោងបនល្បែងធំៗ ទើបទីតាំងបនល្បែងតាមអនឡាញរីករាលដាលខ្លាំង