បុគ្គលិកបនល្បែងអនឡាញចិន ឌឹសិនឆឺរី (the Century) បានដាក់ពាក្យប្តឹងទៅនាយកដ្ឋានវិវាទការងារនៃក្រសួងការងារ ដើម្បីឲ្យជួយដោះស្រាយរឿងក្រុមហ៊ុននេះ មិនព្រមដោះស្រាយបញ្ហាការងារជូនបុគ្គលិក អស់ជាច្រើនខែមកហើយ។
កម្មករនិយោជិត ដែលតំណាងដោយកញ្ញា ហ៊ឹម ហេង កញ្ញា ស្រ៊ី ស្រីលាង និងលោក រី រ៉ែន បានដាក់ពាក្យប្តឹងកាលពីចុងខែធ្នូ ឆ្នាំ ២០២១ សុំឲ្យក្រសួងការងារ ជួយធ្វើយ៉ាងណាឲ្យក្រុមហ៊ុនបនល្បែងអនឡាញ ឌឹសិនឆឺរី ដោះស្រាយបញ្ហាការងារជូនបុគ្គលិក ព្រោះជាងបីខែមកហើយ គ្មានដំណឹងអ្វីសោះពីក្រុមហ៊ុន ថា តើក្រុមហ៊ុននេះបើកឬបិទឲ្យពិតប្រាកដ។ ក្រុមបុគ្គលិកលើកឡើងក្នុងបណ្តឹងនោះ ថា ភាពមិនច្បាស់លាស់ និងគ្មានដំណោះស្រាយបែបនេះ ធ្វើឲ្យប៉ះពាល់ដល់ជីវភាពគ្រួសាររបស់កម្មករនិយោជិតយ៉ាងធ្ងន់ធ្ងរ។
បណ្តឹងនេះធ្វើឡើង ក្រោយពីកម្មករនិយោជិត ដែលក្រុមហ៊ុនឲ្យទៅធ្វើចត្តាឡីស័កតាមផ្ទះតាំងពីខែ វិច្ឆិកា ឆ្នាំ២០២១ មិនទាន់បានទទួលដំណឹងអ្វី ថា ក្រុមហ៊ុននេះនឹងហៅបុគ្គលិកឲ្យចូលធ្វើការវិញនៅថ្ងៃណា និងថាតើក្រុមហ៊ុន នឹងដោះស្រាយបញ្ហាការងារយ៉ាងដូចម្តេច។
ប៉ុន្តែ ក្នុងពេលរង់ចាំដំណឹងនេះ កម្មករនិយោជិតមួយចំនួននៃកាស៊ីណូនេះ ឱ្យដឹងថា ក្រុមហ៊ុនបែរជាលួចបើកល្បែងអនឡាញនេះវិញស្ងាត់ៗ និងរើសអើងបុគ្គលិក ដោយហៅតែបុគ្គលិកចាស់ៗណា ដែលថៅកែចូលចិត្តឲ្យចូលធ្វើការវិញ ដោយផាត់ចោលបុគ្គលិកផ្សេងទៀត ជាពិសេសបុគ្គលិក ដែលធ្លាប់ចេញតវ៉ាទាមទារសិទ្ធិការងារ។
ដំណឹងនៃការលួចបើកបនល្បែងអនឡាញ ឌឹសិនឆឺរី វិញស្ងាត់ៗនេះ បុគ្គលិកកាស៊ីណូនេះប្រាប់វិទ្យុអាស៊ីសេរី ថាធ្វើឡើងតាំងពីខែតុលា ឆ្នាំ២០២១ មកម្ល៉េះ ពោលគឺថៅកែក្រុមហ៊ុនចិននេះ លួចបើកក្រុមហ៊ុននេះឡើងវិញ តាំងពីក្នុងអំឡុងពេលដែលអាជ្ញាធរខេត្តព្រះសីហនុប្រកាសផ្អាក ដើម្បីបើកការស៊ើបអង្កេតរឿងបើកបនល្បែងអនឡាញខុសច្បាប់ និងការនាំឲ្យផ្ទុះកើតជំងឺកូវីដ-១៩ ឆ្លងបុគ្គលិកពេញកាស៊ីណូ (ឆ្លងជាង ៤០០ នាក់) និងមានស្លាប់ម្នាក់ផង ដោយសារជំងឺនេះ។
ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជាលោក ម៉ម រិទ្ធី ប្រាប់វិទ្យុអាស៊ីសេរី កាលពីថ្ងៃទី៤ ខែមករា ថា ទាំងក្រុមហ៊ុន ទាំងក្រសួងការងារ មិនបានផ្តល់ដំណឹងអ្វីទាល់តែសោះ ដល់កម្មករនិយោជិត ដែលកំពុងទន្ទឹងរង់ចាំដំណឹង និងដំណោះស្រាយការងារ។ លោកថា បច្ចុប្បន្ន កម្មករស្ទើរតែ ៩០% អត់មានបានទទួលការងារនៅឡើយទេ។ ក្នុងពេលជាមួយគ្នានេះ ក្រុមហ៊ុនបានបើកឡើងវិញដោយស្ងាត់ៗ ហើយហៅកម្មករខ្លះ ដែលខ្លួនចូលចិត្តឲ្យធ្វើការ និងរើសថ្មីខ្លះ។
លោកបន្តថា កម្មករដឹងរឿងបើកកាស៊ីណូអនឡាញនេះ វិញ ដោយសារពួកគេចូលឆែកមើលក្នុងប្រព័ន្ធអនឡាញរបស់ក្រុមហ៊ុន។ លោកចោទ ជាសំណួរថា តើកម្មករដែលក្រុមហ៊ុនឲ្យផ្អាកការងារប្រមាណ ៤០០នាក់ នោះ ថៅកែកាស៊ីណូនេះត្រូវដោះស្រាយយ៉ាងណា ម្តេចស្ងាត់ច្រៀបបែបនេះ៖ « យើងកំពុងតែមើលរឿងនេះ ថាតើល្បែងអនឡាញហ្នឹងបើកយ៉ាងម៉េច ? ធ្វើម៉េចបានបើកទៅកើត ? ហើយអាជ្ញាធរទាំងមន្ទីរការងារ ទាំងអាជ្ញាធរខេត្ត ហេតុអ្វីបានជាអត់ដឹងថា ក្រុមហ៊ុននេះចាប់ផ្តើមបើកឡើងវិញ បើសិនជាកម្មករគាត់ឃើញភស្តុតាងថា ក្រុមហ៊ុននេះបានបើកហើយ និងមានតេហៅមនុស្សចូលធ្វើការងារ ?»។
រដ្ឋាភិបាលកម្ពុជា បានចាត់ទុកល្បែងអនឡាញ ថា ជាល្បែងខុសច្បាប់ និងប្រកាសឲ្យបិទតាំងពីឆ្នាំ ២០១៩។ ក៏ប៉ុន្តែ បនល្បែងអនឡាញ ដឹសិនឆឺរី របស់ថៅកែចិន នៅក្រុងព្រះសីហនុនេះ នៅតែបើកបន្តរហូតមក រហូតដល់ផ្ទុះកើតជំងឺកូវីដ-១៩ ឆ្លងបុគ្គលិកជាង ៤០០ នាក់ គឺពេញកាស៊ីណូនេះ កាលពីចុងខែកញ្ញា ឆ្នាំ២០២១។ ក្រោយផ្ទុះជំងឺនេះខ្លាំងពេញបន្ទុកទៅហើយ ក្រុមហ៊ុននេះ នៅតែបើកដំណើរការបនល្បែងអនឡាញនេះ និងបង្ខំឲ្យបុគ្គលិកធ្វើការបន្តទាំងឈឺ រហូតដល់មានអ្នកស្លាប់ម្នាក់។ ចុងក្រោយទើបមន្ទីរការងារខេត្តព្រះសីហនុ ឲ្យបិទបណ្ដោះអាសន្ន ដើម្បីស៊ើបអង្កេត។
ឥឡូវជាងបីខែ ក្រោយការស៊ើបអង្កេតនោះ គ្មានរបាយការណ៍ ឬសេចក្តីជូនដំណឹងណាមួយរបស់អាជ្ញាធរខេត្តព្រះសីហនុ អំពីលទ្ធផលយ៉ាងណានៅឡើយ។ វិទ្យុអាស៊ីសេរី ព្យាយាមទាក់ទងមន្ត្រីខេត្តនេះ ដូចជាប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុលោក យ៉ូវ ខេមរា និងស្នងការខេត្តព្រះសីហនុលោក ជួន ណារិន្ទ តាមទូរស័ព្ទជាច្រើនថ្ងៃ និងច្រើនដង ប៉ុន្តែទូរស័ព្ទចូល គ្មានអ្នកទទួល។
ប៉ុន្តែលោក ជួន ណារិន្ទ ធ្លាប់អះអាងប្រាប់វិទ្យុអាស៊ីសេរី តាំងពីចាប់ផ្តើមស៊ើបអង្កេតរឿងនេះដំបូងៗមកម្ល៉េះ ថាបនល្បែងចិន ឌឹសិនឆឺរី នេះ គឺបើកដោយស្របច្បាប់ និងមានអាជ្ញាប័ណ្ណត្រឹមត្រូវ៖ « នៅក្នុងហ្នឹងកាស៊ីណូបាទ ! ពាក់ព័ន្ធនឹងកាស៊ីណូតែម្តង ! ហើយពាក្យថាកាស៊ីណូហ្នឹង គឺគេត្រូវតែអនុញ្ញាតទៅតាមគោលការណ៍ ឡៃសិន (license នៅទីតាំងហ្នឹងមានឡៃសិន (license) មានច្បាប់អនុញ្ញាតត្រឹមត្រូវ »។
ទោះបីជាលោកស្នងការខេត្តនេះ អះអាងថា ទីតាំងបនល្បែងចិននេះ មានច្បាប់អនុញ្ញាតឲ្យបើកត្រឹមត្រូវក៏ដោយ ប៉ុន្តែបនល្បែងអនឡាញ គឺជាសកម្មភាពខុសច្បាប់ ដែលរដ្ឋាភិបាលបានប្រកាសហាមឃាត់រួចទៅហើយ។ ការណ៍ដែលក្រុមហ៊ុនចិននេះ នៅតែអាចបន្តបើកបនល្បែងអនឡាញ និងមានការបញ្ជាក់ពីបុគ្គលិកជាច្រើន ថាក្រុមហ៊ុននេះ ពិតជាបើកល្បែងខុសច្បាប់នេះមែន ប៉ុន្តែអាជ្ញាធរបែរជាមិនចាត់ការ។ វិទ្យុអាស៊ីសេរីបានព្យាយាមសុំការបំភ្លឺពីអ្នកនាំពាក្យសាលាខេត្តព្រះសីហនុលោក ឃាង ភិរម្យ ដែរ ប៉ុន្តែលោកក៏មិនលើកទូរស័ព្ទ។
ទោះជាយ៉ាងណា មន្ត្រីអង្គការសង្គមស៊ីវិល និងសហជីព ធ្លាប់ព្រមានហើយថា បើគ្មានគណៈកម្មការឯករាជ្យ ដើម្បីស៊ើបអង្កេតក្នុងរឿងនេះទេ សាធារណជនទូទៅពិបាកទុកចិត្តលើលទ្ធផលនៃការស៊ើបអង្កេតរបស់អាជ្ញាធរខេត្តព្រះសីហនុតែឯងនោះណាស់។
នាយកដ្ឋានវិវាទការងារនៃក្រសួងការងារ កាលពីថ្ងៃទី៣ ខែមករា បានកោះហៅតំណាងកម្មករនិយោជិតទាំងបីនាក់នោះ ដើម្បីទៅជួបនៅនាយកដ្ឋាននេះ នៅភ្នំពេញ នៅថ្ងៃទី១១ ខែមករា។ ដោយកម្មករនិយោជិតនៅក្រុមហ៊ុនចិននេះ គ្មានតំណាងសហជីព លោក ម៉ម រិទ្ធី ថាលោកបានចាត់ចែងឲ្យមានមន្ត្រីច្បាប់ម្នាក់ ដើម្បីអមជាមួយតំណាងកម្មករនិយោជិតទាំងបីនាក់នោះ ដែលត្រូវទៅជួបមន្ត្រីការងារនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។