អ្នកឃ្លាំមើលថាវត្តមានវិនិយោគិនចិនមិនកើនប្រាក់ចំណូលពលរដ្ឋខេត្តព្រះសីហនុ
2017.09.03
កាស៊ីណូរបស់ជនជាតិចិន នៅតាមបណ្តោយផ្លូវឯករាជ្យ ក្នុងក្រុងព្រះសីហនុ។ រូបថតកាលពីដើមខែមិថុនា ឆ្នាំ២០១៧
RFA
មន្ត្រីអង្គការសង្គមស៊ីវិល និងប្រតិបត្តិករទេសចរភាគច្រើនបានអះអាងថា ជនជាតិចិន បង្ហាញវត្តមានច្រើនកុះករនាខេត្តព្រះសីហនុ បច្ចុប្បន្ន មិនបានបង្កើនប្រាក់ចំណូលប្រជាពលរដ្ឋទូទៅក្នុងមូលដ្ឋាននេះទេ ប៉ុន្តែបានកើនប្រាក់ចំណូលតែចំពោះបុគ្គលមានផ្ទះ សណ្ឋាគារ និងដីសម្រាប់លក់ ឬជួលឲ្យជនជាតិចិន តែប៉ុណ្ណោះ។
អ្នកឃ្លាំមើលការអភិវឌ្ឍសង្គម បានអះអាងថា អ្នកវិនិយោគទុនចិន បង្ហាញវត្តមានច្រើននាខេត្តព្រះសីហនុ មិនមានផលប្រយោជន៍ច្រើន ឬមិនបានកើនដល់ប្រាក់ចំណូលចិញ្ចឹមគ្រួសារសម្រាប់អាជីវករជនជាតិខ្មែរមានរបរតូចតាច ពិសេសពលរដ្ឋរស់នៅខេត្តជាប់ឆ្នេរសមុទ្រមួយនេះទេ។
អ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ បង្ហាញទស្សនៈថា វត្តមានអ្នកវិនិយោគទុនចិន ឬជនជាតិចិន ទាំងនោះ ពួកគេភាគច្រើនបានមករកស៊ី និងវេចលុយត្រឡប់ទៅកាន់ស្រុកគេវិញស្ទើរទាំងស្រុង។ អ្នកស្រីបន្តថា វត្តមានជនជាតិចិន នាខេត្តព្រះសីហនុ គឺមានលក្ខណៈខុសប្លែកពីភ្ញៀវទេសចរមកពីសហគមន៍អឺរ៉ុប ដោយពួកគេចូលមកទស្សនា ឬចូលមកខេត្តព្រះសីហនុ បានយកលុយមកចាយនៅខេត្តទេសចរណ៍មួយនេះ ហើយចំណេញដល់អាជីវករ និងប្រជាពលរដ្ឋមានរបរខ្នាតតូចសម្រាប់ទ្រទ្រង់ជីវភាពប្រចាំថ្ងៃ។
អ្នកស្រី សុធារី កត់សម្គាល់ថា អ្នកដែលបានទទួលផលប្រយោជន៍ភាគច្រើនតែទៅលើបុគ្គល ឬអ្នកមានសំណង់អគារធំៗមានផ្ទះសំណាក់ សណ្ឋាគារ និងក្លឹបកម្សាន្តសម្រាប់ដាក់ជួល ឬលក់ឲ្យចិន បើកធ្វើអាជីវកម្មតែប៉ុណ្ណោះ ប៉ុន្តែសម្រាប់ប្រតិបត្តិករទេសចរ ឬអាជីវករប្រកបរបរតូចតាច មិនទទួលបានប្រយោជន៍ច្រើនពីវត្តមានអ្នកជំនួញចិន និងភ្ញៀវទេសចរចិន ចូលមកខេត្តព្រះសីហនុ នោះទេ៖ «ឃើញថាវាជាឱកាសមាសពេជ្រសម្រាប់អ្នកដែលមានលុយ មានខុនដូ (Condo) ផ្ទះជួល ឬសំណង់អគារធំៗជួលឲ្យចិន តែប៉ុណ្ណោះទេ ប៉ុន្តែសម្រាប់ពលរដ្ឋខ្មែរសាមញ្ញធម្មតាបានទទួលប្រយោជន៍ពីវត្តមានវិនិយោគទុនចិន តិចតួច។ ហើយបើយើងនិយាយពីផលប៉ះពាល់វិញ គឺរាល់ថ្ងៃនេះគ្រោះថ្នាក់ចរាចរណ៍បានកើតមានស្ទើររាល់ថ្ងៃ ឬយ៉ាងហោចណាស់ក៏មានពី ១ករណីដែរ ដែលបង្កគ្រោះថ្នាក់ដោយសារការបើកបរនៅលើផ្លូវសាធារណៈរបស់ជនជាតិចិន»។
បញ្ហានេះដែរ មន្ត្រីអង្កេតនៃអង្គការលីកាដូ (LICADHO) ប្រចាំខេត្តព្រះសីហនុ លោក ស្រេង វ៉ាន់លី បានកត់សម្គាល់ថា បច្ចុប្បន្ននេះ ទាំងអ្នកវិនិយោគជនជាតិចិន និងភ្ញៀវទេសចរចិន ភាគច្រើនបានគាំទ្រនៅតាមទីតាំងបើកធ្វើអាជីវកម្មដែលមានថៅកែ ឬម្ចាស់ជាជនជាតិចិន គ្នាគេតែប៉ុណ្ណោះ។ ដូច្នេះលោកថា ទាំងប្រាក់ចំណាយ ឬប្រាក់ចំណូលដែលទទួលបានពីសេវាទិញលក់ទំនិញ និងសេវាផ្សេងៗ គឺភាគច្រើនបាននាំចូលផ្ទាល់ពីប្រទេសចិន ដោយពួកគេបានវេចលុយវិលទៅស្រុកគេវិញស្ទើរទាំងស្រុង។
លោក វ៉ាន់លី បន្តថា រាល់ថ្ងៃនេះសម្រាប់ប្រតិបត្តិករជនជាតិខ្មែរបម្រើសេវាទេសចរណ៍ខ្នាតតូច និងប្រជាពលរដ្ឋរស់នៅខេត្តព្រះសីហនុ អាចរកការងារធ្វើជាបុគ្គលិក ឬកម្មករមានតួនាទីតូចតាច និងទទួលបានប្រាក់ចំណូលទាប ព្រោះបុគ្គលជំនាញមានតួនាទីខ្ពស់ និងមានប្រាក់ចំណូលច្រើន គឺជាជនជាតិចិន៖ «ទន្ទឹមគ្នាការអភិវឌ្ឍ គឺសូមឲ្យការអភិវឌ្ឍឲ្យប្រជាពលរដ្ឋខ្មែរគាត់ទទួលបានជីវភាពក្រុមគ្រួសាររបស់គាត់រីកចម្រើន។ មិនមែនការអភិវឌ្ឍដើម្បីតែជនជាតិចិន ឬអ្នកវិនិយោគជនជាតិចិន ហើយអាចប៉ះពាល់ដល់ប្រជាពលរដ្ឋខ្មែរក្រីក្រនោះទេ»។
ចំណែកអាជីវករបម្រើវិស័យទេសចរណ៍មួយចំនួននាខេត្តព្រះសីហនុ អះអាងថាអ្នកវិនិយោគទុនជនជាតិចិន និងភ្ញៀវទេសចរចិន ហ៊ានជួលសំណង់អគារធំៗ ផ្ទះសំណាក់ សណ្ឋាគារ កាស៊ីណូ និងក្លឹបកម្សាន្តជាដើម ក្នុងតម្លៃខ្ពស់ដើម្បីបើកធ្វើអាជីវកម្ម ហើយភ្ញៀវ ឬអតិថិជនគាំទ្រភាគច្រើន គឺជាជនជាតិចិន គ្នាគេតែម្តង។
ប្រតិបត្តិករមួយចំនួនឲ្យដឹងថា ភាគច្រើននៃអ្នកវិនិយោគទុនចិន ចាប់យកជំនួញលើវិស័យឧស្សាហកម្ម រោងចក្រ សណ្ឋាគារ កាស៊ីណូ ក្លឹបកម្សាន្ត និងភោជនីយដ្ឋានជាដើម ក្នុងនោះភ្ញៀវទេសចរចិន ដែលធ្វើដំណើរមកកម្សាន្តខេត្តព្រះសីហនុ ជាអតិថិជនគាំទ្រការធ្វើជំនួញរបស់អ្នកវិនិយោគទុនចិន ទាំងនោះ។
អាជីវករភាគច្រើនបានអះអាងថា ពួកគេទទួលបានប្រាក់ចំណូលពីភ្ញៀវជនជាតិចិន មករកសេវាបម្រើការធ្វើអាជីវករលក់ដូរទំនិញ សេវាបម្រើលក់ម្ហូបអាហារ និងសេវាដឹកជញ្ជូនជាដើម គឺមានចំនួនតិចតួចប៉ុណ្ណោះ។
ផ្ទុយពីការអះអាងនេះ សម្រាប់អ្នកមានសំណង់អគារធំៗសម្រាប់ដាក់ជួល ឬលក់ មានដូចជាអគារសំណង់ធំៗ ផ្ទះសំណាក់ សណ្ឋាគារ ក្លឹបកម្សាន្តឌីស្កូ និងក្លឹបខារ៉ាអូខេជាដើមនាខេត្តព្រះសីហនុ សម្រាប់លក់ ឬជួលឲ្យជនជាតិចិន បានគាំទ្រវត្តមានជនជាតិចិន ហូរចូលមកមូលដ្ឋានខេត្តទេសចរណ៍មួយនេះ។ ឈ្មួញទាំងនោះចាត់ទុកវត្តមានរបស់ជនជាតិចិន ឬអ្នកវិនិយោគិនចិន ដែលបានជួលអគារធំៗមានផ្ទះសំណាក់ សណ្ឋាគារប្រណិតៗ និងក្លឹបកម្សាន្តជាដើម ក្នុងតម្លៃខ្ពស់ថា បានបង្កើនប្រាក់ចំណូលសម្រាប់ជំនួញពួកគេមានកំណើនខ្ពស់។
ដោយឡែកងាកមកភ្ញៀវទេសចរជាតិដែលចូលទៅកម្សាន្តខេត្តព្រះសីហនុ ភាគច្រើនបានរអ៊ូរទាំថា វត្តមានជនជាតិចិន បង្ហាញវត្តមានច្រើនកុះករបានបង្កឲ្យមានភាពរញ៉េរញ៉ៃ និងប៉ះពាល់ដល់វិស័យទេសចរណ៍នាមូលដ្ឋាននេះទៅវិញ។ ភ្ញៀវជាតិឲ្យដឹងថា កន្លងទៅនេះ ពួកគេសង្កេតឃើញមានបុគ្គលជនជាតិចិន ខ្លះបានបង្ហាញអត្តចរិតកោងកាច វាយកាប់ចាក់គ្នានៅតាមទីសាធារណៈបង្កឲ្យមានការភ័យខ្លាចដល់ប្រជាពលរដ្ឋ និងភ្ញៀវទេសចរចម្រុះជាតិសាសន៍ ដែលចូលមកទស្សនាខេត្តព្រះសីហនុ ដោយបង្ហាញកាយវិការមិនខ្លាចញញើតកម្លាំងសមត្ថកិច្ចថែមទៀតផង។
ត្រង់ចំណុចនេះ ភ្ញៀវទេសចរជាតិសំណូមពរដល់រដ្ឋបាលខេត្តព្រះសីហនុ ពិសេសកម្លាំងនគរបាល និងកងរាជអាវុធហត្ថខេត្តនេះ ត្រូវយកចិត្តទុកដាក់ទៅលើសកម្មភាពរបស់ជនជាតិចិន បង្ហាញវត្តមានក្នុងមូលដ្ឋាននេះឲ្យបានជាប្រចាំ ដើម្បីកុំឲ្យប៉ះពាល់ដល់វត្តមានភ្ញៀវទេសចរបរទេសដទៃទៀត ជាពិសេសកុំឲ្យប៉ះពាល់ដល់កិត្តិយសខេត្តព្រះសីហនុ ដែលត្រូវរដ្ឋាភិបាលប្រសិទ្ធិនាមថាជា «តារារះនាទិសនិរតី»។
ដោយឡែកសម្រាប់ស្ត្រីបម្រើការងារនៅតាមក្លឹបកម្សាន្តខារ៉ាអូខេ ឬហៅខ្លីថាខេធីវី (KTV) ភាគច្រើននាខេត្តព្រះសីហនុ បានចាត់ទុកវត្តមានជនជាតិចិន ពិសេសភ្ញៀវបុរសបង្ហាញខ្លួនច្រើននាមូលដ្ឋាននេះ ថានាំឲ្យរបរកំដរភ្ញៀវនៅពេលយប់ព្រលប់របស់ពួកគេ ទទួលបានភ្ញៀវច្រើន ហើយអាចរកប្រាក់ចំណូលកើនមួយទ្វេជា ៣ដង ឬច្រើនជាងនេះ បើប្រៀបធៀបពេលមុន។
ស្ត្រីបម្រើការនៅក្លឹបខារ៉ាអូខេមួយចំនួន ឲ្យអាស៊ីសេរីដឹងថា នៅមុនពេលមានវត្តមានជនជាតិចិន ហូរចូលមកខេត្តព្រះសីហនុ គឺការកំដរភ្ញៀវជនជាតិខ្មែររបស់ពួកគេទទួលបានថវិកាក្រោម ៥០ដុល្លារសហរដ្ឋអាមេរិក ឬលើសនេះបន្តិចបន្តួចទេ ប៉ុន្តែសម្រាប់ភ្ញៀវទេសចរជនជាតិចិន វិញ កំដរពួកគេទទួលបានប្រាក់ចំណូលកើនទ្វេគុណ ដោយទទួលបានទាបបំផុតចន្លោះពីជាង ១០០ ទៅ ២០០ដុល្លារ ឬច្រើនជាងនេះ។
ទាក់ទិនបញ្ហានេះ លោក យន្ត មីន អភិបាលខេត្តព្រះសីហនុ មានប្រសាសន៍ថា អ្នកវិនិយោគទុនចិន មានវត្តមានច្រើននាមូលដ្ឋាននេះ នឹងរួមចំណែកជំរុញឲ្យខេត្តទេសចរណ៍ជាប់ឆ្នេរសមុទ្រមួយនេះមានការរីកចម្រើនគួរឲ្យកត់សម្គាល់ក្នុងប៉ុន្មានឆ្នាំចុងក្រោយនេះ ជាពិសេសតម្លៃទិញ ឬជួលអចលនទ្រព្យ និងការទិញលក់អគារសំណង់ផ្សេងៗមានតម្លៃខ្ពស់កប់ពពក ជាពិសេសជាងនេះ វត្តមានវិនិយោគិនចិន រីកចម្រើនដល់ការរកប្រាក់ចំណូលពីសេវាបម្រើសេវាទេសចរណ៍របស់ប្រតិបត្តិករ និងប្រជាពលរដ្ឋមូលដ្ឋាននេះឲ្យមានការងារធ្វើមានប្រាក់ចំណូលចិញ្ចឹមគ្រួសារកើនខ្ពស់ជាបន្តបន្ទាប់ទាំងពេលបច្ចុប្បន្ន និងទៅថ្ងៃអនាគត។
លោក យន្ត មីន ស្នើដល់កម្លាំងសមត្ថកិច្ចគ្រប់ស្ថាប័ន ប្រជាពលរដ្ឋ អាជីវករ និងផ្នែកពាក់ព័ន្ធនានា ត្រូវចូលរួមថែរក្សាសណ្ដាប់ធ្នាប់សាធារណៈ និងគាំទ្រអ្នកវិនិយោគទុនចម្រុះជាតិសាសន៍ដែលចូលមកបោះទុនវិនិយោគនាមូលដ្ឋាននេះឲ្យបានទាំងអស់គ្នា ជៀសវាងការលាបពណ៌គ្នាបង្កើតឲ្យមានជម្លោះជាតិសាសន៍រវាងជនជាតិមួយទៅជនជាតិផ្សេង បង្កឲ្យជម្លោះបន្តិចបន្តួច បង្កឲ្យក្លាយទៅជាជម្លោះធំ នាំឲ្យប៉ះពាល់ដល់សុខសុវត្ថិភាពភ្ញៀវទេសចរ និងអ្នកវិនិយោគទុន។
ជាមួយគ្នានេះ ពលរដ្ឋភាគច្រើនរស់នៅខេត្តព្រះសីហនុ បង្ហាញការមិនពេញចិត្តចំពោះឥរិយាបថបើកបររបស់ជនជាតិចិន ដែលសកម្មភាពការបើកបររថយន្តរបស់ពួកគេនៅតាមផ្លូវសាធារណៈក្នុងក្រុង ពិសេសនាពេលរាត្រីភាគច្រើន ពួកគេបានបើកបរក្នុងល្បឿនលឿន មិនគោរពច្បាប់ចរាចរណ៍ និងស្ថិតក្នុងស្ថានភាពស្រវឹងជោក ហើយតែងបង្កគ្រោះថ្នាក់ចរាចរណ៍កើតឡើងជាបន្តបន្ទាប់ដល់អ្នកធ្វើដំណើរ។
ត្រង់ចំណុចនេះ អាណាព្យាបាលសំណូមពរដល់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ឲ្យជួយចេញបទបញ្ជាមកកម្លាំងនគរបាលខេត្តព្រះសីហនុ ឲ្យបង្កើនការងារចុះត្រួតពិនិត្យ ពិសេសនៅពេលយប់ ស្នើកុំឲ្យជនជាតិចិន ទាំងនោះមានសិទ្ធិបើកបររថយន្តដោយខ្លួនឯងនាទីប្រជុំជនក្រុងព្រះសីហនុ ជាបន្តទៀត ព្រោះឥរិយាបថបើកបររបស់ជនជាតិចិន ភាគច្រើនមានល្បឿនលឿន ស្រវឹង មិនគោរពច្បាប់ចរាចរណ៍ផ្លូវគោក ឬភ្លើងបញ្ជាចរាចរណ៍ និងតែងបង្កគ្រោះថ្នាក់ចរាចរណ៍កើតមានជាច្រើនករណី។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា មានប្រសាសន៍ថា បច្ចុប្បន្នទាំងអ្នកវិនិយោគទុន និងភ្ញៀវទេសចរជនជាតិចិន ឈរនៅលំដាប់លេខរៀងទី១ ក្នុងចំណោមភ្ញៀវទេសចរ ឬអ្នកវិនិយោគទុនមកពីបរទេស មានដូចជា រុស្ស៊ី អាមេរិក វៀតណាម និងមកពីប្រទេសអង់គ្លេស ជាដើម។
យ៉ាងនេះក្តី លោក គ្រឹស្នា មិនទាន់មានតួលេខនៃចំនួនជនជាតិចិន ឬអ្នកវិនិយោគទុនចិន ដែលចូលមកខេត្តព្រះសីហនុ ទាំងភ្ញៀវទេសចរ និងមកវិនិយោគមានចំនួនប៉ុន្មាននាក់ ឬប៉ុន្មានក្រុមហ៊ុនឲ្យពិតប្រាកដទេ ដោយគ្រាន់តែបញ្ជាក់ថា អ្នកវិនិយោគទុនចិន ភាគច្រើនបានប្រកបអាជីវកម្មនៅលើវិស័យសណ្ឋាគារ កាស៊ីណូ ភោជនីយដ្ឋាន និងក្លឹបកម្សាន្ត ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
