សង្គមស៊ីវិល ស្នើដល់អាជ្ញាធរបើកយុទ្ធនាការបោសសម្អាតគ្រឿងញៀនទ្រង់ទាយធំ។ ការលើកឡើងនេះ ក្រោយពីអាជ្ញាធរបង្ក្រាបគ្រឿងញៀនជាបន្តបន្ទាប់ ក៏ប៉ុន្តែនៅពុំទាន់បង្ហាញថា បញ្ហាគ្រឿងញៀននៅកម្ពុជា មានភាពល្អប្រសើរនៅឡើយទេ។
មន្ត្រីអង្គការសង្គមស៊ីវិល កត់សម្គាល់ថា បញ្ហាអសន្តិសុខសង្គមរួមមានក្មេងទំនើង ចោរកម្ម និងឧក្រិដ្ឋកម្មភាគច្រើនកើតចេញមកពីបញ្ហាគ្រឿងញៀន។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង ប្រាប់អាស៊ីសេរីនៅថ្ងៃទី១ តុលា ថា លោកបារម្ភដល់អនាគតយុវជនកម្ពុជា ដែលជាជនងាយរងគ្រោះ នៃការប្រើប្រាស់គ្រឿងញៀន នៅពេលគ្រឿងញៀននៅតែបន្តធ្វើចរាចរណ៍នៅកម្ពុជា។ លោកបន្តថា បើទោះបីជាអាជ្ញាធរ បានខិតខំប្រយុទ្ធប្រឆាំងនឹងបញ្ហាគ្រឿងញៀននេះក៏ដោយ ក៏ប៉ុន្តែ បញ្ហាគ្រឿងញៀនមិនទាន់ធ្លាក់ចុះគួរឲ្យកត់សម្គាល់នៅឡើយទេ។
លោក យង់ គិមអេង៖ «ប្រសិនបើប្រជាពលរដ្ឋបានចូលរួមហើយ ប្រជាពលរដ្ឋមានការទុកចិត្តទៅលើយន្តការរបស់រដ្ឋាភិបាលរបស់អីត្រឹមត្រូវ ហើយគាត់មិនខ្លាចញញើតក្នុងការរាយការណ៍ពីបញ្ហាគ្រឿងញៀនទេ អាហ្នឹង គឺជាវិធានការប្រយុទ្ធប្រឆាំងរបស់រដ្ឋាភិបាលក៏មានប្រសិទ្ធភាពដែរបាទ»។
លោក យង់ គិមអេង បន្ថែមថា អាជ្ញាធរគួរតែបើកយុទ្ធនាការទ្រង់ទ្រាយធំ ដើម្បីបោសសម្អាតគ្រឿងញៀន និងស្វែងរកអ្នកនៅពីក្រោយខ្នង នៃអំពើជួញដូរគ្រឿងញៀននេះ។
លោក យង់ គិមអេង៖ «ទី១បង្ក្រាបឲ្យបាននូវអំពើពុករលួយ ហើយនិងអ្នក ដែលនៅពីក្រោយខ្នងបាទ។ ទី២ គឺទាល់តែការចុះបង្ក្រាបហ្នឹង គឺកុំមានការយោគយល់ទៅដល់សាច់ញាតិជាប់ពាក់ព័ន្ធអីហ្នឹងបាទ»។
ការលើកឡើងនេះ ក្រោយពីអគ្គស្នងការនគរបាលជាតិ បានបង្ហាញពីទិន្នន័យ នៃការបង្ក្រាបបទល្មើសគ្រឿងញៀនប្រចាំថ្ងៃ ចន្លោះពី១០ ទៅជាង ៤០ករណីជារៀងរាល់ថ្ងៃ កាលខែកញ្ញាកន្លងទៅ ហើយឃាត់ខ្លួនអ្នកជាប់ពាក់ព័ន្ធក្នុងមួយថ្ងៃចន្លោះពីជិត២០នាក់ ដល់ជាង១៥០នាក់។
វិទ្យុអាស៊ីសេរី នៅពុំទាន់អាចទាក់ទងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន និងអគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀន លោក ម៉ក់ ជីតូ ដើម្បីសុំការឆ្លើយតបបញ្ហានេះបាននៅឡើយទេ នៅថ្ងៃទី១ តុលា។
កាលពីថ្ងៃទី១៤ ខែកញ្ញា លោកនាយករដ្ឋមន្ត្រី ហ៊ុន ម៉ាណែត បានប្រគល់តួនាទីជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឱ្យទៅឧបនាយករដ្ឋមន្ត្រី នេត សាវឿន ដើម្បីដោះស្រាយបញ្ហាគ្រឿងញៀននេះ ។
លោក នេត សាវឿន បានដាក់ចេញគោលដៅអាទិភាពចំនួន៥ ដើម្បីការលុបបំបាត់ បទល្មើសគ្រឿងញៀននៅថ្ងៃខាងមុខ។ គោលដៅអាទិភាពនេះ ត្រូវបានលើកឡើងតាមរយៈអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនលោក មាស វិរិទ្ធ ក្នុងសន្និសីទសារព័ត៌មានកាលពីថ្ងៃទី១៦ កញ្ញា រួមមានកិច្ចការអប់រំផ្សាយ ការត្រួតពិនិត្យសារធាតុគីមីផ្សំ ការទប់ស្កាត់លំហូរចូលគ្រឿងញៀនមកកម្ពុជា ការទប់ស្កាត់ការកែច្នៃ និងផលិតគ្រឿងញៀននៅក្នុងស្រុក និងការលុបបំបាត់ការចែកចាយគ្រឿងញៀនតាមខារ៉ាអូខេ និងក្លឹបកម្សាន្តជាដើម។
បើទោះបីជាមានផែនការយ៉ាងនេះក្ដី ក៏ប៉ុន្តែបទល្មើសគ្រឿងញៀននៅតែកើតមានជាច្រើនដដែល។
របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនរយៈពេល ៨ខែ ដើមឆ្នាំ២០២៣ សមត្ថកិច្ច បង្ក្រាបបទល្មើសគ្រឿងញៀន បានជាង ៥ពាន់(៥,១៣៣)ករណី ឃាត់ខ្លួនជនល្មើស ជាង ១ម៉ឺន ២ពាន់(១២,៤៩១)នាក់ ចាប់យកសារធាតុញៀន ជាង២តោនកន្លះ (២,៦៥៨.៥៦គីឡូក្រាម) សារធាតុគីមីផ្សំជិត ១តោន(៩១០.៨៧គីឡូក្រាម) រួម និងវត្ថុតាងពាក់ព័ន្ធមួយចំនួនទៀត។
មន្ត្រីអង្គការសង្គមស៊ីវិលថា នៅតែស្នើដល់រដ្ឋាភិបាលបើកយុទ្ធនាការទ្រង់ទ្រាយធំ ដើម្បីបោសសម្អាតគ្រឿងញៀន ដោយគ្មានការយោគយល់ដល់អ្នកជាប់ពាក់ព័ន្ធ ជាពិសេសលុបបំបាត់អំពើពុករលួយនៅពេលចុះអនុវត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។