គណបក្សសង្គ្រោះជាតិ ដែលត្រូវរបបលោក ហ៊ុន សែន រំលាយ បានចេញលិខិតអំពាវនាវ និងសម្ដែងការព្រួយបារម្ភយ៉ាងខ្លាំង ចំពោះរបាយការណ៍របស់ក្រុមលួចព័ត៌មានបច្ចេកវិទ្យាដែលក្រុម ស្រាវជ្រាវសង្ស័យមានជាប់ពាក់ព័ន្ធនឹងរដ្ឋាភិបាលចិននោះ កំពុងលុកលុយលួចយកព័ត៌មានសំងាត់ពីក្រុមបក្សប្រឆាំង អ្នកការពារសិទ្ធិមនុស្ស និងប្រព័ន្ធផ្សព្វផ្សាយ។
គណបក្សសង្គ្រោះជាតិ ចាត់ទុកថា ការព្យាយាមវាយប្រហារ និងលួចព័ត៌មាននេះ ប៉ះពាល់ដល់ ក្រុមអ្នកធ្វើការដើម្បីលើកស្ទួយសិទ្ធិមនុស្ស និងប្រជាធិបតេយ្យនៅកម្ពុជា ដែលកំពុងតស៊ូមតិ ដើម្បីសេរីភាព និងយុត្តិធម៌។
ក្រុមហ៊ុនឯកជនមួយនៅសហរដ្ឋអាមេរិកដែលនាំមុខគេក្នុងការងារតាមដានសុវត្ថិភាពលើប្រព័ន្ធអ៊ីនធឺណិតឈ្មោះហ្វាយអឺរ អាយ (FireEye) រកឃើញថា ក្រុមចោរបច្ចេកវិទ្យា ឬហេកគ័រ (Hacker)អាចមានទំនាក់ទំនងនឹងរដ្ឋាភិបាលចិន បានប្រើបច្ចេកវិទ្យាលុកលុយស្ថាប័នជាច្រើនរបស់កម្ពុជាដែលធ្វើការងារពាក់ព័ន្ធដំណើរការបោះឆ្នោត។
ក្រុមចោរបច្ចេកវិទ្យាមួយក្រុមឈ្មោះ ថិមផ៍ ភើរីស្កូប (TEMP.Periscope មានគោលដៅវាយប្រហារទៅលើស្ថាប័នរដ្ឋាភិបាល មន្ត្រីគណបក្សសង្គ្រោះជាតិ មន្ត្រីការពារសិទ្ធិមនុស្ស និងអ្នកសារព័ត៌មានដើម្បីស៊ើបការណ៍សម្ងាត់ឲ្យរដ្ឋាភិបាលចិន។
គណបក្សសង្គ្រោះជាតិ ជំរុញឲ្យរបបលោក ហ៊ុន សែន ចាត់វិធានការស៊ើបអង្កេតដោយមានអ្នកជំនាញអន្តរជាតិឯករាជ្យចូលរួមជាបន្ទាន់ ទៅលើក្រុមចោរបច្ចេកវិទ្យានេះ និងទុកអធិបតេយ្យជាតិ សន្តិសុខជាតិ ជាអាទិភាព។
ទន្ទឹមនឹងនេះ គណបក្សសង្គ្រោះជាតិ ក៏អំពាវនាវឲ្យ ប្រជាពលរដ្ឋមានវិធានការពារពារចំនួន ៥ចំណុចគឺ ត្រូវរក្សាប្រព័ន្ធកម្មវិធីនៅក្នុងឧបករណ៍ឲ្យទាន់សម័យ ផ្លាស់ប្ដូរកូដសម្ងាត់ជាប្រចាំ កុំទទួលយកសំណើ ដើម្បីដំឡើងកម្មវិធីដែលមិនស្គាល់ទៅក្នុងឧបករណ៍ប្រើប្រាស់ កុំចុចតំណភ្ជាប់មិនផ្ទាល់ ឬផ្ទាំងផ្សាយ ពាណិជ្ជកម្ម ដែលលេចឡើងភ្លាមៗ កុំបញ្ចូលព័ត៌មានផ្ទាល់ខ្លួន ដែលត្រូវការផ្ទៀងផ្ទាត់ ដូចជាព័ត៌មានលំអិត កាតឥណទាន ឈ្មោះអ្នកប្រើ ឬកូដសម្ងាត់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។