ស្នងការនគរបាលខេត្តព្រះសីហនុ លោក ជួន ណារិន្ទ ប្រាប់អាស៊ីសេរី ថា សមត្ថកិច្ចមិនទាន់ចាប់បានជនដៃដល់ ជាជនជាតិចិន ដែលបាញ់សម្លាប់ជនជាតិដូចគ្នា នៅមុខសណ្ឋាគារខ្សាច់ ស ក្នុងក្រុងព្រះសីហនុ កាលពីរសៀលថ្ងៃទី៦ ឧសភានៅឡើយទេ។ ប៉ុន្តែ ចាប់បានជនជាតិចិនម្នាក់ ជាសហចារីរបស់ជនដៃដល់។
កាលពីរសៀល ថ្ងៃទី០៦ ឧសភា សមត្ថកិច្ច អះអាងថា មាន ករណីបាញ់សម្លាប់ជនជាតិចិនម្នាក់ ឱ្យស្លាប់ភ្លាមៗ នៅនឹងកន្លែង នៅខេត្តព្រះសីហនុ។ លោក ជួន ណារិន្ទ ថា ជនរងគ្រោះ និងសង្ស័យ សុទ្ធតែជាជនជាតិចិន។ ជនសង្ស័យ មានគ្នា ២នាក់ ម្នាក់គឺជា ខ្មាន់កាំភ្លើង និងម្នាក់ទៀត ជាសហចារី ឬអ្នកជួយក្នុងករណីឃាតកម្មនេះ។
ជនសង្ស័យ ដែលសមត្ថកិច្ចចាប់បាន កាលពីថ្ងៃទី០៦ ឧសភា គឺជា សហចារី ឯខ្មាន់កាំភ្លើង កំពុងតាមចាប់ខ្លួន។ លោក ណារិន្ទ ថា ជនជាតិចិន ទាំង៣នាក់ មានខ្លះ កាន់ទិដ្ឋាការ (Visa) ប្រភេទទេសចរណ៍ និងខ្លះមកកម្ពុជា ដើម្បីប្រកបការងារ។ បច្ចុប្បន្នជនសង្ស័យម្នាក់ ដែលចាប់បាន កំពុងស្ថិតក្នុងនីតិវិធីស៊ើបសួររបស់សមត្ថកិច្ច ហើយបើផុតរយៈពេល៤៨ម៉ោង សមត្ថកិច្ចនឹងដាក់លិខិតទៅស្ថាប័នអយ្យការ ស្នើសុំ១២ម៉ោងបន្ថែមទៀត ដើម្បីបន្តនីតិវិធីស៊ើបសួរ ព្រោះការសួរនាំនៅ មានភាពសង្ស័យច្រើន។ សមត្ថកិច្ច មិនទាន់មានប្រភពថា ជនជាតិចិន ទាំងនោះ បានកាំភ្លើងមកពីណាទេ។ ឯសាកសពរបស់ជនជាតិចិនរងគ្រោះ ត្រូវបានសមត្ថកិច្ចបញ្ជូនមកកាន់អគ្គស្នងការនគរបាលជាតិ នៅរាជធានីភ្នំពេញ ដើម្បីឱ្យកម្លាំងជំនាញធ្វើកោសល្យវិច័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។