រដ្ឋាភិបាល​គួរ​បង្កើត​គោល​នយោបាយ​ជួយ​សិស្ស​បាក់​ឌុប «ដែល​មាន​ជីវភាព​ខ្វះ​ខាត​ឱ្យ​មាន​តម្លាភាព»

ដោយ យ៉ង ចាន់តារា
2023.12.02
រដ្ឋាភិបាល​គួរ​បង្កើត​គោល​នយោបាយ​ជួយ​សិស្ស​បាក់​ឌុប «ដែល​មាន​ជីវភាព​ខ្វះ​ខាត​ឱ្យ​មាន​តម្លាភាព» សិស្ស​វិទ្យាល័យទាំង៣ (វិទ្យាល័យ ហ៊ុនសែន កងតាណឹង វិទ្យាល័យ ហ៊ុន សែនខ្ចៅ និងវិទ្យាល័យ ហ៊ុន សែន ពាមជីកង) ក្នុងស្រុកកងមាស ខេត្ត​កំពង់ចាម កាលពីថ្ងៃទី២៩ វិច្ឆិកា ២០២៣។
រូប៖ ហ្វេសប៊ុកលោក ហង់ ជួនណារ៉ុន

មន្ត្រី​សង្គម​ស៊ីវិល​ថា ជំនួយ​របស់​មន្ត្រីជាន់ខ្ពស់​រដ្ឋាភិបាល ឬ​អ្នក​មាន​ធនធាន​ទៅដល់​សិស្ស​ដែល​ប្រឡង​ជាប់​បាក់​ឌុប និង​មាន​ជីវភាព​ខ្វះខាត គួរតែ​ធ្វើឡើង​ប្រកប​ដោយ​តម្លាភាព សមធម៌ និង​និរន្តរភាព។ ពួកគាត់​លើកទឹកចិត្ត​ឱ្យ​រដ្ឋាភិបាល​បង្កើត​គោល​នយោបាយ​ជាក់​លាស់​ណាមួយ​សម្រាប់​ឧបត្ថម្ភ​ដល់​សិស្ស​ក្រីក្រ​ទាំងអស់​ឱ្យ​រៀន​ចប់​ចុង​ចប់​ដើម ជាជាង​ការ​ជួយ​តែ​ទៅលើ​បុគ្គល ដែល​ទទួល​បាន​ការ​ចាប់​អារម្មណ៍​ពី​មហាជន។

ប្រធាន​សមាគម​សម្ពន្ធ​និស្សិត​បញ្ញវន្ត​ខ្មែរ លោក កើត សារ៉ាយ ប្រាប់​វិទ្យុ​អាស៊ីសេរី នៅ​ថ្ងៃទី១ ខែ​ធ្នូ ថា លោក​ត្រេកអរ​ចំពោះ​ការប្រកាស​ជួយឧបត្ថម្ភ​ដល់​សិស្សានុសិស្ស​ប៉ុន្មាន​រូប​ក្នុង​រយៈ​ប៉ុន្មាន​ថ្ងៃ​មកនេះ​។ ក៏ប៉ុន្តែ លោក​បន្ត​ថា វិធី​នេះ មិនមែន​ជា​ដំណោះស្រាយ​យូរអង្វែង សម្រាប់​ជួយ​ដល់​សិស្ស​ដែល​រៀន​ពូកែ ឱ្យ​មាន​ឱកាស​បន្ត​ការសិក្សា​នោះ​ឡើយ។

លោក កើត សារ៉ាយ៖ «ខ្ញុំ​គិតថា ការដែល​ទៅ​រៀបចំ​គិតគូរ​គោលនយោបាយ រៀបចំ​យន្តការ​ឱ្យ​មាន​មូលនិធិ​ជា​លក្ខណៈ​សមធម៌​ថ្នាក់​ជាតិ​មួយ​ដែល​ផ្ដោត​ទៅ​លើ​ការ​ជួយ​សង្គ្រោះ​សម្រាប់​សិស្ស​ដែល​ងាយ​នឹង​រង​គ្រោះ​អី​ជាដើម​នេះ ទើប​ជា​រឿង​ដែល​សំខាន់ ជាជាង​ការ​បង្ហាញ​ពី​ឥរិយាបថ ឬក៏​លក្ខណៈ តួនាទី ឬក៏​វិធី​ជា​លក្ខណៈ​ឯកជន​នេះ​វា​គ្រាន់តែ​ជា​ការ​បង្ហាញ​ការ​ជួយ​សង្គ្រោះ​បែប​មួយ​ពេល ដែល​មិនអាច​ធ្វើ​ឱ្យ​ភាព​ក្រីក្រ ភាព​អត់​ឃ្លាន ឬក៏​ជនរងគ្រោះ​ជាច្រើន​ទៀត ដែល​កំពុង​រងគ្រោះ​ហ្នឹង​ទទួល​បាន​ដូចគ្នា​ទេ»

ការ​លើក​ឡើង​នេះ បន្ទាប់ពី​ប្រធាន​ក្រុម​ឧត្ដមប្រឹក្សា​ផ្ទាល់​ព្រះមហាក្សត្រ លោក ហ៊ុន សែន កាល​ពី​ថ្ងៃទី២៩ វិច្ឆិកា បាន​ប្រកាស​ជួយ​សិស្ស​ប្រុស​និទ្ទេស A ម្នាក់ មកពី​ខេត្ត​កំពត ដែល​មាន​ឪពុកម្ដាយ ជា​ជន​ពិការ អោយ​រូបគេ​បាន​ចូលរៀន​ជំនាញ វិស្វករ និង​ផ្ដល់​ការ​ស្នាក់នៅ​នៅ​ទីបញ្ជាការដ្ឋាន​អង្គរក្ស របស់​លោក ហ៊ីង ប៊ុនហៀង។ លើស​ពី​នេះ លោក ហ៊ុន សែន ក៏បាន​ប្រកាស​សាងសង់​លំនៅឋាន​ថ្មី ជួយ​ចេញ​សង​លុយ​ដែល​ជំពាក់​គេ ព្រមទាំង​ឧបត្ថម្ភ​ប្រាក់​ប្រចាំខែ ១​លាន​រៀល​(.០០០.០០០)​ដល់​គ្រួសារ​យុវជន​រូប​នេះ​ផង​ដែរ។

ទោះជា​យ៉ាងណា នៅ​មាន​សិស្ស​ពូកែ និង​សិស្ស​ក្រីក្រ​ជាច្រើន​ទៀត កំពុង​ប្រឈម​ការ​ការបោះបង់​ការ​សិក្សា​ដោយសារ​ជីវភាព ប៉ុន្តែ​ត្រូវ​បាន​លោក ហ៊ុន សែន និង​សប្បុរសជន​មើល​រំលង។

វិទ្យុ​អាស៊ីសេរី មិន​អាច​ទាក់ទង​អ្នកនាំពាក្យ​ក្រសួង​អប់រំ​យុវជន និង​កីឡា អ្នកស្រី ឃួន វិច្ឆិកា និង​អ្នកនាំពាក្យ​រដ្ឋាភិបាល លោក ប៉ែន បូណា ដើម្បី​សុំ​ការ​បកស្រាយ​រឿង​នេះ​បាន​ទេ នៅ​ថ្ងៃទី១ ខែ​ធ្នូ ដោយ​ទូរស័ព្ទ​ហៅ​ចូល តែ​គ្មាន​អ្នកទទួល។

ជុំវិញ​រឿង​នេះ នាយក​ប្រតិបត្តិ​អង្គការ​សមធម៌ លោក អៀង វុទ្ធី មាន​ប្រសាសន៍​ថា ការ​ជួយ​ឧបត្ថម្ភ និង​ទំនុកបម្រុង​របស់​ថ្នាក់ដឹកនាំ​ដល់​សិស្ស​ក្រីក្រ គឺជា​រឿង​ល្អ ក៏ប៉ុន្តែ​ការ​ជួយ​របៀប​នេះ មាន​ទម្រង់​ជា​លក្ខណៈ​បុគ្គល​តែប៉ុណ្ណោះ និង​មិនអាច​ចាត់ទុកជា​ការទទួលខុសត្រូវ​របស់​រដ្ឋាភិបាល​ឡើយ​។ លោក​យល់​ឃើញ​ថា រដ្ឋាភិបាល​គួរ​ដាក់ចេញ​នូវ​គោលនយោបាយ​ជាក់លាក់ ដើម្បី​ជួយ​ដល់​សិស្ស​ក្រីក្រ​ទូទៅ ចាប់ពី​កម្រិត​បឋម ដើម្បី​ធានា​បាន​នូវ​ការអប់រំ​ដោយ​ស្មើភាព​គ្នា និង​ទប់ស្កាត់​អត្រា​សិស្ស​បោះបង់​ការសិក្សា។

លោក អៀង វុទ្ធី៖ «អ្វី​ដែល​យើង​ចង់​ឃើញ គឺថា​កុំឱ្យ​ជំនួយ​ទាំងអស់​ហ្នឹង ទៅជា​បញ្ហា​ទៅវិញ​។ ដូច​យើង​លើក​ពី​ខាងដើម​ថា ហេតុ​អី​បានជា​មួយ​ក្រុម​ទទួល​បាន ហើយ​អ្នក​ផ្សេងទៀត​មិន​ទទួល​បាន​។ ប្រសិនជា​បែបនេះ វា​អាច​ជះឥទ្ធិពល ទៅដល់​សាធារណជន។ អាច​ថា​ផ្ដល់​ឱ្យ​តែ​មួយ​ក្រុម​អ៊ីចឹង​ទៅ»

នេះ​មិនមែន​ជា​លើកទីមួយ​ទេ ដែល​អតីត​នាយករដ្ឋមន្ត្រី លោក ហ៊ុន សែន តាំងខ្លួន​ជា​មេដឹកនាំ​ចិត្តល្អ ធ្វើអំពើ​សប្បុរស​ជា​លក្ខណៈ​បុគ្គល ដើម្បី​ទាញ​យក​ប្រជាប្រិយភាព​ពី​ប្រជាពលរដ្ឋ ដោយ​មិន​ឆ្លុះបញ្ចាំង​ពី​ទំនួល​ខុសត្រូវ​ជា​រួម។ ជាក់ស្ដែង កាល​ពី​ឆ្នាំ​២០២១ បាន​ធ្វើ​អំណោយ​ដល់​គ្រួសារ​សិស្ស​ក្រីក្រ​ម្នាក់ ដែល​ល្បី​លើ​បណ្ដាញ​សង្គម ស្ថិតនៅ​ស្រុក​បន្ទាយស្រី ខេត្តសៀមរាប ខណៈ​ដែល គ្រួសារ​របស់​សិស្ស​ជាច្រើន​ទៀត រស់នៅ​ក្នុង​ស្ថានភាព​ខ្វះ​ខាត​ដូចគ្នា​នេះ​ដែរ។

មន្ត្រី​សង្គម​ស៊ីវិល ស្នើ​ដល់​រដ្ឋាភិបាល បង្កើត​គោលនយោបាយ ជួយ​ដល់​សិស្ស​ដែល​មាន​ជីវភាព​ក្រីក្រ​ជា​រួម ជាជាង​ការប្រកាស​ជួយ​តែ​បុគ្គល​ដែល​ទទួល​បាន​ការ​ចាប់​អារម្មណ៍​លើ​បណ្ដាញ​សង្គម ដែល​ប្រៀប​បាន​ទៅ​នឹង​ការ​ជួយ​យក​មុខ ដើម្បី​ប្រជាប្រិយភាព​ខ្លួនឯង​តែប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។