គ្លីនិក(Clinic) ព្យាបាលធ្មេញមួយកន្លែងក្នុងក្រុងសៀមរាប ដែលក្រុមប្រដាប់អាវុធ ប្រើកាំភ្លើងចូលទៅរំដោះអ្នកទោសជាជនជាតិតៃវ៉ាន់ម្នាក់កាលពីសប្តាហ៍មុន នៅតែបើកដំណើរការធម្មតា ក៏ប៉ុន្តែហាក់ស្ងប់ស្ងាត់បន្តិច។
អាជីវករលក់ដូរនៅជុំវិញគ្លីនិកនោះព្រួយបារម្ភពីអសន្តិសុខសង្គមប៉ះពាល់សុវត្ថិភាពភ្ញៀវទេសចរនិងមុខរបររបស់ពួកគាត់។
ពេលនេះស្ថានភាពគ្លីនិក(Clinic) ព្យាបាលធ្មេញ ជុំ ចិន្តា បើទោះបីជាបើកដំណើរការធម្មតាក្តី ក៏ប៉ុន្តែបើមើលពីខាងក្រៅហាក់ស្ងប់ស្ងាត់ ពុំសូវឃើញបុគ្គលិកធ្វើការដូចមុននោះឡើយ។
រីឯស្ថានភាពអ្នកលក់ដូរ និងពលរដ្ឋរស់នៅជុំវិញទីនោះ ក៏ស្ងប់ស្ងាត់ដែរ ដោយមានពលរដ្ឋខ្លះចាប់អារម្មណ៍ពីរឿងនេះ និងពលរដ្ឋខ្លះទៀតហាក់មិនសូវចាប់អារម្មណ៍នោះឡើយ ដោយសារពួកគាត់គិតតែរឿងមុខរបរលក់ដូរចិញ្ចឹមក្រពះ។
គ្លីនិកនេះឋិតនៅជាប់ផ្លូវជាតិលេខ៦ ក្នុងភូមិតាធុល សង្កាត់ស្វាយដង្គុំ ក្រុងសៀមរាប នៅចំណុចកណ្តាលទីប្រជុំជន។
អាជីវករ អ្នករត់ម៉ូតូកង់បី និងពលរដ្ឋរស់នៅជុំវិញទីនោះ ភាគច្រើនមិនហ៊ាននិយាយពីរឿងនេះទេ ព្រោះពួកគាត់បារម្ភពីសុវត្ថិភាពផ្ទាល់ខ្លួន។
អាជីវករលក់ដូរ នៅក្បែរគ្លីនិកនេះ ថ្លែងសុំមិនបញ្ចេញឈ្មោះ ប្រាប់វិទ្យុអាស៊ីសេរី នៅថ្ងៃទី២២ សីហា ថា ថ្ងៃកើតហេតុលោកស្រី មិនចាប់អារម្មណ៍ថា នឹងមានករណីកើតឡើងដូច្នេះទេ ដោយគ្រាន់តែឃើញរថយន្តបើកចេញចូលគ្លីនិកធម្មតាៗប៉ុណ្ណោះ។
លោកស្រីថា បាតុភាពនេះហាក់កើតឡើងដោយស្ងៀមស្ងាត់ ហើយភ្ញាក់ផ្ញើលនៅគ្រាដែលមានប៉ូលិសមកច្រើន និងផ្សព្វផ្សាយតាមបណ្តាញសង្គម ពេលសមត្ថកិច្ចចាប់ខ្លួនជនល្មើសប្រើប្រាស់កាំភ្លើងគ្រប់ដៃ។
«ឃើញតែឡានពេទ្យ និងប៉ូលិសចម្រុះ ហើយខ្ញុំស្មានតែគេមក តាមឡានកូរ៉េ រឿងពន្ធរឿងអី?តែតាមពិតមិនដឹងផងហ្នឹង»។
ពលរដ្ឋរស់នៅក្រុងសៀមរាប លោក ម៉ាលី សានី យល់ថា តំបន់ទេសចរណ៍ប្រវត្តិសាស្ត្រ មិនគួរកើតមានករណីដូច្នេះទេ ព្រោះប៉ះពាល់ភ្ញៀវទេសចរ ដែលជាប្រភពប្រាក់ចំណូលយ៉ាងសំខាន់របស់ពលរដ្ឋ៖
លោក ម៉ាលី សានី៖ «តក់ស្លុតពេលឃើញខេត្តរបស់យើងមានជនបរទេស ប្រើប្រាស់អាវុធខុសច្បាប់។សំណូមពរខេត្តសៀមរាប សូមថែរក្សា សុខសុវត្ថិភាព និងសុវត្ថិភាពប្រជាជនក្នុងខេត្ត»។
កាលពីព្រឹកថ្ងៃទី១៧ សីហា ជនល្មើសមានគ្នា ៥នាក់ពាក់ស្រោមមុខខ្មៅ ប្រដាប់ដោយកាំភ្លើងតកាណុងគ្រប់ដៃចូលរំដោះអ្នកទោសជនជាតិតៃវ៉ាន់ឈ្មោះ ឆេន ស៊ីនហាន (Chen hsin han) ជាប់ទោសចំនួន ៥២ឆ្នាំ ពីបទជួញដូរគ្រឿងញៀន។
ករណីនេះកើតមានឡើង ដោយសារមន្ត្រីពន្ធនាគារបានបញ្ជូនអ្នកទោសរូបនោះទៅព្យាបាលធ្មេញនៅគ្លីនិកធ្មេញ ជុំ ចិន្តា ក្នុងក្រុងសៀមរាប។
ចៅសង្កាត់រងទី២ ក្នុងក្រុងសៀមរាប លោក នង ធារ៉ា គិតថា បាតុភាពនេះ ឆ្លុះបញ្ចាំងពីភាពអនាធិតេយ្យ ដែលជនបរទេសប្រើប្រាស់កាំភ្លើងក្នុងប្រទេសកម្ពុជា ធ្វើឱ្យពលរដ្ឋ និងភ្ញៀវទេសចរបារម្ភពីអសន្តិសុខសង្គម និងសុវត្ថិភាព។
លោក នង ធារ៉ា៖«ជនជាតិចិនមានឱកាសកាន់កាប់កាំភ្លើងខុសច្បាប់វាបង្ក ភាពភ័យខ្លាចដល់ជនបរទេសមកទស្សនា និងលេងកម្សាន្ត តំបន់ទេសចរបុរាណប្រវត្តិសាស្ត្រ។ វាជារឿងចម្លែកដែលជនបរទេសមានឱកាសកាន់កាប់កាំភ្លើងខុសច្បាប់»។
អគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀន លោក ម៉ក់ ជីតូ ប្រាប់វិទ្យុអាស៊ីសេរី កាលពីថ្ងៃទី២១ ខែសីហាថា ពេលនេះ សមត្ថកិច្ចបានឃាត់ខ្លួនជនសង្ស័យចំនួន ៨នាក់ ក្នុងនោះមាន ជនជាតិខ្មែរសញ្ជាតិអាមេរិក ៦នាក់ និងជនជាតិចិន ២នាក់ ដែលសមត្ថកិច្ចចោទថា ជាក្រុមស៊ីឈ្នួលធ្វើសកម្មភាពរំដោះអ្នកទោសនៅខេត្តសៀមរាប។
លោកបន្ថែមថា សមត្ថកិច្ចនៅបន្តស្រាវជ្រាវតាមចាប់ខ្លួនអ្នកពាក់ព័ន្ធបន្ថែមទៀត។
ជុំវិញរឿងនេះ មន្ត្រីអ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ថា អាជ្ញាធរគួរតែអនុវត្តច្បាប់ និងចាប់ខ្លួនអ្នកពាក់ព័ន្ធមកផ្តន្ទាទោសតាមច្បាប់ឱ្យបានត្រឹមត្រូវ ដើម្បីប៉ះប៉ូវផ្លូវចិត្តរបស់ពលរដ្ឋខេត្តសៀមរាប ដែលបារម្ភពីអសន្តិសុខសង្គម និង សុវត្ថិភាពភ្ញៀវទេសចរ។
លោក ស៊ឹង សែនករុណា៖ «បើសិនជាបើកការស៊ើបអង្កេតបន្តសកម្ម ហើយចាប់បានជនប្រព្រឹត្តពិតប្រាកដជាបន្តបន្ទាប់ ជារឿងល្អ ដែលធ្វើឱ្យមហាជនមានអារម្មណ៍ល្អប្រសើរឡើងវិញ។ ជនប្រដាប់អាវុធទៅរំដោះអ្នកទោស ធ្វើឱ្យពលរដ្ឋព្រួយបារម្ភ ពាក់ព័ន្ធសន្តិសុខ និងសុវត្ថិភាពពួកគាត់»។
ទោះជាយ៉ាងណាក្ដី ជនសង្ស័យទាំង ៨នាក់ ដែលសមត្ថកិច្ចបង្ក្រាបបាននោះ អគ្គស្នងការដ្ឋាននរបាលជាតិនៅមិនទាន់បង្ហាញរបាយការណ៍ពាក់ព័ន្ធនឹងលិខិតឯកសារជនសង្ស័យទាំងនោះ ឱ្យលម្អិតនៅឡើយទេ។ រីឯកសារពាក់ព័ន្ធនឹងការប្រើប្រាស់អាវុធខុសច្បាប់នានា ក៏សមត្ថកិច្ចមិនទាន់បង្ហាញនៅឡើយដែរ។ ពេលនេះ ជនសង្ស័យទាំងនោះ កំពុងឃុំខ្លួននៅពន្ធនាគារក្នុងរាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។