អ្នកប្រើប្រាស់បណ្ដាញសង្គមមួយចំនួនរិះគន់លើវិធានការរបស់អាជ្ញាធរអគ្គិសនីកម្ពុជាកាលពីថ្ងៃទី៤ខែកក្កដាដែលបានប្រកាសឲ្យអ្នកប្រើប្រាស់ថាមពលពន្លឺព្រះអាទិត្យ ឬផ្ទាំងសូឡាត្រូវទៅធ្វើស្វ័យប្រកាសប្រាប់តំណាងអគ្គិសនីជាមុនសិន។
អាជ្ញាធរអគ្គិសនីអះអាងថាការធ្វើស្វ័យប្រកាសនេះ ដើម្បីចង់ដឹងពីចំនួនពលរដ្ឋប្រើប្រាស់ និងការពារ ការជ្រាបចរន្ត នៅពេលមានការតបណ្ដាញនៅក្បែរអ្នកប្រើប្រាស់ប្រព័ន្ធសូឡាដោយតភ្ជាប់ពីបណ្តេញអគ្គិសនីជាតិ។
ទោះយ៉ាងណាក្តីអ្នកប្រើប្រាស់បណ្តេញសង្គមថា រដ្ឋាភិបាលធ្វើបែបនេះមិនមែនដើម្បីជួយប្រជាពលរដ្ឋក្រីក្រទេផ្ទុយទៅវិញគឺជាវិធីថ្មីមួយទៀតដើម្បីសង្កត់កពលរដ្ឋបន្ថែមលើការជំរិតទារពន្ធនិងករណីផ្សេងៗ ទៀត។
អ្នកប្រើបណ្តេញសង្គម ក្រោយពីឃើញប្រកាសពីអាជ្ញាធរអគ្គិសនីកម្ពុជាអំពីការគ្រប់គ្រងការប្រើប្រាស់ពន្លឺព្រះអាទិត្យ អ្នកដែលធ្លាប់ប្រើផ្ទាំងសូឡាដើរដោយពន្លឺព្រះអាទិត្យនោះ ពួកគាត់ខ្លះ បានសម្រេចចិត្ត រុះរើបន្ទះសូឡាចេញពីដំបូលផ្ទះវិញ ដោយខ្លាចរដ្ឋយកពន្ធ ឬផាកពិន័យជាដើម។
ម្ចាស់គណនីហ្វេសប៊ុកមួយដែលដាក់ឈ្មោះថា ខេង សៅ (Khéñġ Säō)៖ បានផុសរូប អំពូលសូឡា និងចង្កៀងប្រេងកាត ដោយដាក់ចំណងជើងលើគណនីហ្វេសប៊ុករបស់ខ្លួនថា គ្មានអ្វីល្អដូចរបស់ដូនតាយើងទេ! ជាមួយគ្នានោះ លោកក៏បានសរសេរ នៅលើរូបភាពទាំងពីរនោះផងដែរថា លាហើយសូឡា ស្វាគមន៍ចង្កៀងប្រេងកាត !
អ្នកខ្លះទៀតបញ្ចេញទស្សនៈថា សម្បត្តិធម្មជាតិនៅលើលោកនេះ ដូចគ្មានអ្វីសេសសល់ខ្លះសម្រាប់ប្រជាពលរដ្ឋប្រើប្រាស់ជាប្រយោជន៍ដល់ជីវិតរស់នៅប្រចាំថ្ងៃនោះឡើយ។
ម្ចាស់គណនីហ្វេសប៊ុកមួយទៀត ដែលដាក់ឈ្មោះថា ព្រីម ផូមី (Prim Phoumy)៖ បានសរសេរឌឺដងជុំវិញរឿងនេះដែរថា « ថ្ងៃនេះអគ្គិសនីកម្ពុជាហៅអ្នកប្រើផ្ទាំងសូឡាឲ្យសុំការអនុញ្ញាត។ តិចលោ ថ្ងៃស្អែករដ្ឋាករទឹក ហៅអ្នកប្រើទឹកភ្លៀងទៅសុំការអនុញ្ញាតដែរទៅ ....? »
ចំណែកម្ចាស់គណនីហ្វេសប៊ុកមួយផ្សេងទៀត ដែលដាក់ឈ្មោះថា ម៉ាក់ធារី ខ្មែរក្រោម៖ បានបញ្ចេញមតិដោយដាក់ជាសំណួរថា «ព្រះអាទិត្យជារបស់រដ្ឋគ្រប់គ្រង ចុះខ្យល់ព្យុះ ផ្គររន្ទះបាញ់ អ្នកណាគ្រប់គ្រង?
ប្រតិកម្មពីអ្នកប្រើប្រាស់បណ្តាញសង្គមយ៉ាងដូច្នេះ បន្ទាប់ពីអាជ្ញាធរអគ្គិសនីកម្ពុជា ព្រមានថា បើអ្នកប្រើប្រាស់ថាមពលពន្លឺព្រះអាទិត្យ ឬផ្ទាំងសូឡាមិនធ្វើស្វ័យប្រកាសប្រាប់តំណាងអគ្គិសនីជាមុនសិននោះទេ អ្នកនោះនឹងត្រូវរងការបង់ថ្លៃប៉ះប៉ូវ ឬផាកពិន័យជាដើម។ ប៉ុន្តែភ្លាមៗ ក្រោយពីមានការរិះគន់ខ្លាំងជុំវិញរឿងនេះ អាជ្ញាធរអគ្គិសនីកម្ពុជា បានធ្វើសន្និសីទសារព័ត៌មាន បកស្រាយអំពីសេចក្ដីប្រកាសរបស់ខ្លួន និងបញ្ជាក់កែប្រែជាថ្មីថា ប្រព័ន្ធសូឡាដែលមិនភ្ជាប់ជាមួយជាបណ្ដាញអគ្គិសនីជាតិ ហើយដែលមានទំហំ និងអនុភាពចាប់ពី ៨០វ៉ាត់ រហូតដល់ ១ពាន់វ៉ាត់ ឬលើសពីនេះមិនតម្រូវឱ្យធ្វើស្វ័យប្រកាស ឬជូនដំណឹងដល់អាជ្ញាធរអគ្គិសនីកម្ពុជាឡើយ។
ទោះយ៉ាងណាក្តីមាត្រា៥៨រដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣ចែងថា ៖ ទ្រព្យសម្បត្តិរបស់រដ្ឋមានជាអាទិ៍ ដីធ្លីក្រោមដី ភ្នំបាតសមុទ្រក្រោមបាតសមុទ្រឆ្នេរសមុទ្រអាកាស កោះ ទន្លេ ព្រែក ស្ទឹង បឹងព្រៃឈើធនធានធម្មជាតិមជ្ឈមណ្ឌលសេដ្ឋកិច្ច វប្បធម៌មូលដ្ឋានការពារប្រទេសសំណង់ផ្សេងទៀតដែលបានកំណត់ថាជារបស់រដ្ឋ។
តាមរយៈមាត្រា៥៨នៃរដ្ឋធម្មនុញ្ញ អត់មានរាប់បញ្ចូលពន្លឺព្រះអាទិត្យជាទ្រព្យសម្បត្តិរបស់រដ្ឋនោះទេ។
ម្ចាស់គណនីហ្វេសប៊ុក ដែលដាក់ឈ្មោះថា៖ អ៊ំ ជ័យ បានមានចម្ងល់ថា «ចុះ បើព្រះអាទិត្យ មិនឃើញមាន នៅក្នុងច្បាប់រដ្ឋធម្មនុញ្ញផង។ រឺគេទើបបង្កើតច្បាប់ថ្មី នៅក្នុងមាត្រាណាដឹង លោក ម្ចាស់...?
អ្នកប្រើប្រាស់បណ្តេញសង្គមម្នាក់ទៀតដាក់ឈ្មោះថា អឿន សំ(Oeun Sum) បានបញ្ចេញទស្សនៈ ឌឺដងថា ពន្លឺព្រះអាទិត្យ ជារបស់រដ្ឋ ខ្ញុំសំណូមពររដ្ឋជួយសារ៉េ កម្ដៅកម្ពុជា អាចគ្រប់គ្រងព្រះអាទិត្យបានហើយ បន្តិចទៀតទឹក ដី ភ្លើង ខ្យល់ ក្លាយជាកម្មសិទ្ធិរបស់រដ្ឋាភិបាលទាំងអស់។
ចំណែកអ្នកប្រើប្រាស់បណ្ដាញសង្គមម្នាក់ទៀតដែលដាក់ឈ្មោះថា សុវណ្ណារ៉ា ឯម (Sovannara Em) ក៏បានពោលចំអក ជុំវិញរឿងគ្រប់គ្រងព្រះអាទិត្យនេះដែរ។
គាត់បានសរសេរលើទំព័រហ្វេសប៊ុករបស់លោកថាសំណើចសន្តិភាព កាលពីឆ្នាំ២០១៧រំលាយព្រះអាទិត្យ មកដល់ ២០២៤ក្លាយជាម្ចាស់ព្រះអាទិត្យវិញ!៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។