ស្ត្រីកូដករ ៤នាក់ ដែលជាកម្មករណាហ្គាវើលដ៍ ចេញមុខបកស្រាយតាមគណនេយ្យហ្វេសប៊ុក (Facebook) របស់ខ្លួនថា ពួកគេមិនបានគេចវេះការតាមចាប់ខ្លួនពីខាងសមត្ថកិច្ច ដូចការចុះផ្សាយរបស់សារព័ត៌មានក្នុងស្រុកនោះទេ។ ពួកគេអះអាងថា នឹងចូលខ្លួនបំភ្លឺនៅស្នងការដ្ឋាននគរបាលរាជធានីភ្នំពេញ តាមដីកាបង្គាប់របស់តុលាការ ក្រោយធ្វើចត្តាឡីស័កនៅផ្ទះរួចរាល់តាមវិធានសុខាភិបាល។ សង្គមស៊ីវិល ចាត់ទុកដីការបស់តុលាការក្រុងភ្នំពេញ ដែលចោទក្រុមកម្មករថា រារាំងវិធានសុខាភិបាលនេះ គឺជាអនុវត្តច្បាប់មានស្តង់ដារពីរ និងជារឿងអយុត្តិធម៌ចំពោះពួកគេ ដែលបានទៅផ្ដល់សំណាក និងអនុវត្តតាមការណែនាំរបស់ក្រសួងសុខាភិបាលហើយនោះ។
កម្មករនិយោជិតណាហ្គាវើលដ៍ ៤នាក់ លើកឡើងដូចគ្នាថា ខាងរដ្ឋបាលតុលាការ និងសមត្ថកិច្ចរាជធានីភ្នំពេញ មិនបានទាក់ទងទៅពួកគាត់ឲ្យបានដឹងអំពីដីកានាំខ្លួន ឲ្យចូលបំភ្លឺករណីរារាំងវិធានសុខាភិបាល ត្រង់មាត្រាទី១១ នៃច្បាប់ប្រយុទ្ធប្រឆាំងជំងឺកូវីដ១៩ នោះទេ។
កម្មករណាហ្គាវើលដ៍ម្នាក់ក្នុងចំណោមនោះ គឺកញ្ញា អេង ស្រីបូ ឲ្យដឹងថា លោកស្រីមិនបានចូលរួមធ្វើកូដកម្ម ចាប់តាំងពីថ្ងៃទី៣ មករា រហូតមក ដោយសារមានធុរៈផ្ទាល់ខ្លួន។ កញ្ញាបន្តថា កញ្ញាកំពុងធ្វើចត្តាឡីស័កនៅផ្ទះតាមការណែនាំរបស់ក្រសួងសុខាភិបាល និងសាលារាជធានីភ្នំពេញចំនួន ១០ថ្ងៃ បន្ទាប់ពីបានធ្វើតេស្តរហ័ស ដោយលទ្ធផលអវិជ្ជមាន កាលពីថ្ងៃទី៦ កុម្ភៈ។
កម្មកររូបនេះបញ្ជាក់ថា នឹងចូលខ្លួនបំភ្លឺតាមដីការបស់តុលាការ ព្រោះកញ្ញាមិនបានប្រព្រឹត្តកំហុសដូចការចោទប្រកាន់ទេ៖ «មែនទែនទៅ ខ្ញុំបានផុសវីដេអូនេះនៅក្នុងអគ្គស្នងការជាតិតែប៉ុណ្ណោះ។ ហើយអត់បានផ្ដល់ព័ត៌មានមកដល់រូបខ្ញុំផ្ទាល់ទេ។ ហេតុអ្វីមានប្រើពាក្យថា រូបនាងខ្ញុំគេចវេះ និងប្រើពាក្យថា ចាប់ខ្លួន។ ដោយសារដីកា ផុតកំណត់ត្រឹមថ្ងៃទី១៩ កុម្ភៈ ឆ្នាំ២០២២ ផងដែរ។ អ៊ីចឹង ! ខ្ញុំចេញវីដេអូនេះ ដើម្បីឲ្យអាជ្ញាធរនិងសាធារណជន បានដឹងឲ្យបានជ្រាប។ សូមអរគុណ !»។
កម្មករម្នាក់ទៀត គឺកញ្ញា អ៊ុក សុភ័ក្រម៉ូលីកា ប្រាប់វិទ្យុអាស៊ីសេរី នៅថ្ងៃទី៨ កុម្ភៈថា កម្មករដែលធ្វើកូដកម្មទាំងអស់មិនជំទាស់ ឬរារាំងដល់ការអនុវត្តវិធានការប្រឆាំងជំងឺកូវីដ១៩ របស់ក្រសួងសុខាភិបាលទេ ក្រោយពេលក្រសួងសុខាភិបាលតម្រូវឲ្យក្រុមកូដករទៅផ្ដល់សំណាកនៅមជ្ឈមណ្ឌលកោះពេជ្រកាលពីថ្ងៃទី៤ កុម្ភៈ។
កញ្ញា បន្តថា ក្រសួងទុកពេលឲ្យកម្មករ ៣ថ្ងៃទៅធ្វើតេស្ត ចាប់ពីថ្ងៃទី៥ ដល់ថ្ងៃទី៧ កុម្ភៈ ប៉ុន្តែព្រះរាជអាជ្ញារងនៃតុលាការក្រុងភ្នំពេញ លោក សៀង ហេង បែរជាចេញដីកាទាំងយប់ឲ្យសមត្ថកិច្ចចាប់កូដករជាបុរស ៣នាក់ ទៅសាកសួរនៅស្នងការដ្ឋានរាជធានីភ្នំពេញ និងបន្តចាប់ខ្លួនកញ្ញា និងកូដករ ៣នាក់ទៀតទៅវិញ។
កញ្ញាស្នើអាជ្ញាធរបញ្ឈប់ការប្រើប្រព័ន្ធតុលាការ គំរាមកំហែង បំបាក់ស្មារតីក្រុមកូដករតទៅទៀតព្រោះថា ការធ្វើកូដកម្មជាង ១ខែកន្លះកន្លងមកនេះ គឺគ្រាន់តែទាមទារឲ្យមានការដោះលែងតំណាងសហជីព ៨នាក់ត្រឡប់មកវិញ និងឲ្យក្រុមហ៊ុនទទួលយកបុគ្គលិកជាង ៣រយនាក់ចូលធ្វើការវិញ មិនគួរបង្កើតរឿងរ៉ាវជាច្រើនលាបពណ៌មកលើក្រុមកម្មករណាហ្គាវើលដ៍បែបនេះឡើយ៖ «ខ្ញុំសូមឲ្យអយ្យការ មុននឹងចូលទៅបំភ្លឺរឿងហ្នឹង។ ខ្ញុំអត់ដឹងថាត្រូវបំភ្លឺរឿងអី ព្រោះថាជាក់ស្ដែង ភស្តុតាងនៅលើគោក។ ពួកខ្ញុំមិនបានរារាំងទេ។ ពួកខ្ញុំព្រមចូលខ្លួនទៅផ្ដល់សំណាក។ មកដល់ថ្ងៃនេះ បុគ្គលិកកម្មករយើងទៅធ្វើសំណាកជាបន្តបន្ទាប់ទៀតដែរ។ មកថាខ្ញុំរារាំង រារាំងកន្លែងណា។ សូមទម្លាក់បទចោទហ្នឹង។ សូមទម្លាក់ការហៅខ្ញុំចូល។ កោះហៅខ្ញុំចូល សូមចេញដីកាកោះហៅក្រុមហ៊ុនណាហ្គាវើលដ៍ផង ព្រោះខ្ញុំក៏បានដំណឹងមកថា បុគ្គលិកដែលកំពុងបម្រើការងារហ្នឹងមានចំនួនលើសលុបដែលបញ្ជូនមណ្ឌលធ្វើចត្តាឡីស័ក។ ហើយបុគ្គលិកដែលកំពុងព្យាបាលក៏មានទៅព្យាបាលនៅអូឡាំពិកហ្នឹងដែរ។ អ៊ីចឹងក្រុមហ៊ុន ក៏ត្រូវតែកោះហៅទៅសួរដែរ ពីការរារាំងដែរ ព្រោះវិធានការក្រុមហ៊ុនកាលពីមុនមក គឺមិនបានអនុវត្តខ្ជាប់ខ្ជួន ដូចអ្វីដែលក្រសួងកំពុងតែឲ្យកូដករអនុវត្តទេ»។
ឆ្លើយតបនឹងរឿងនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់វិទ្យុអាស៊ីសេរីថា សមត្ថកិច្ចអនុវត្តតាមដីកាបង្គាប់របស់តុលាការទៅតាមឈ្មោះ ដែលបានកំណត់ ចំណែកការជូនដំណឹង ឬទាក់ទងទៅពួកគាត់នោះ គឺជាចំណាត់ការខាងរដ្ឋបាលរបស់តុលាការ៖ «ធម្មតា នៅពេលមានដីកាបញ្ជាឲ្យនាំខ្លួន សមត្ថកិច្ចគឺអនុវត្តតាមហ្នឹងហើយ។ ឲ្យតែឃើញបុគ្គលហ្នឹង គឺអនុវត្តតាមជាក់ស្ដែង។ អនុវត្តតាមច្បាប់ អនុវត្តតាមដីកា។ យើងមានដីកាក្នុងដៃ។ ដីកាបញ្ជាឲ្យចូលខ្លួនតាមព្រះរាជអាជ្ញា ឥឡូវយើងកំពុងតែស្វែងរក។ ពេលដែលយើងឃើញ យើងនាំខ្លួនបញ្ជូនទៅតុលាការ»។
វិទ្យុអាស៊ីសេរីមិនអាចសុំការបកស្រាយរឿងនេះ ពីអ្នកនាំពាក្យតំណាងអយ្យការអមសាលាដំបូងរាជធានីភ្នំពេញ លោក ប្លង់ សុផល បានទេ នៅថ្ងៃទី៨ កុម្ភៈ ដោយហៅទូរស័ព្ទចូលតែពុំមានអ្នកទទួល។
ព្រះរាជអាជ្ញារងនៃសាលាដំបូងរាជធានីភ្នំពេញ លោក សេង ហៀង បានចេញដីកាបង្គាប់ឲ្យសមត្ថកិច្ចនាំខ្លួនកម្មករណាហ្គាវើដល៍ដែលធ្វើកូដកម្ម ចំនួន ៧នាក់ កាលពីថ្ងៃទី៥ កុម្ភៈ ទៅសាកសួរនៅការិយាល័យប្រឆាំងភេវកម្ម និងឧក្រិដ្ឋកម្មឆ្លងដែន នៃស្នងការដ្ឋាននគរបាលរាជធានីភ្នំពេញ ឲ្យបានមុនថ្ងៃទី១៩ កុម្ភៈ ដើម្បីសាកសួរពីដំណើររឿង រារាំងដល់ការអនុវត្តវិធានការសុខាភិបាល។
ក្នុងចំណោមនោះ សមត្ថកិច្ចចាប់ខ្លួន លោក ជួប ចាន់ណាត លោក សេង វណ្ណារិទ្ធិ និងលោក សោក សម្បត្តិ នៅយប់ថ្ងៃទី៥ កុម្ភៈ ក្រោយពេលពួកគេចេញពីកន្លែងផ្ដល់សំណាករកជំងឺកូវីដ១៩ នៅមជ្ឈមណ្ឌលកោះពេជ្រ។ សមត្ថកិច្ចបានបញ្ចប់ការសាកសួរកូដករទាំង ៣នាក់ ដោយកសាងសំណុំរឿងបញ្ចូលទៅតុលាការ ពាក់ព័ន្ធករណីរារាំងដល់អនុវត្តវិធានការទប់ស្កាត់ជំងឺកូវីដ១៩។
ទាក់ទងនឹងរឿងនេះ ប្រធានសមាគមអាដហុក លោក នី សុខា មានប្រសាសន៍ថា ករណីចាប់ខ្លួនកូដករ ដោយយកហេតុផលទាក់ទងនឹងជំងឺកូវីដ១៩ នេះ គឺជារូបភាពថ្មីមួយទៀត ដោយអាជ្ញាធរ និងតុលាការ ចង់បំបាក់ស្មារតីក្រុមកូដករណាហ្គាវើដល៍ កុំឲ្យបន្តការទាមទាររកដំណោះស្រាយការងារទៀត។
លោកបន្តថា ការប្រើចំណាត់ការបែបនេះ មិនមែនជាមធ្យោបាយដោះស្រាយបញ្ចប់បញ្ហាទេ ផ្ទុយទៅវិញ វារឹតតែបង្កឲ្យមានភាពឈឺចាប់ និងរឿងអយុត្តិធម៌កាន់ច្រើនឡើង ចំពោះពួកគាត់ទៅវិញ។ លោកស្នើឲ្យតុលាការទម្លាក់ការចោទប្រកាន់ និងដោះលែងពួកគេឲ្យមានសេរីភាពវិញ ហើយជំរុញឲ្យក្រសួងពាក់ព័ន្ធ និងក្រុមហ៊ុន ងាកមកចូលតុចរចាដោះស្រាយវិវាទការងារមួយនេះដោយភាពស្មោះត្រង់ និងតាមច្បាប់៖ «រឿងនេះ រដ្ឋាភិបាលគួរតែងាកទៅរកការដោះស្រាយដោយធ្វើការដោះលែងអ្នកដែលត្រូវបានចាប់ខ្លួន ហើយបញ្ឈប់ការចាប់ខ្លួនតទៅទៀត។ កុំយកបញ្ហាកូវីដហ្នឹងទៅដាក់បន្ទុកលើកូដករទាំងអស់ហ្នឹងតទៅទៀត។ យើងដោះលែងហើយ ឈានទៅរកដំណោះស្រាយមួយដោយឈរលើច្បាប់ យកច្បាប់ការងារជាធំ ដើម្បីដោះស្រាយ។ អាហ្នឹងជារឿងមួយដែលល្អសម្រាប់ភាគីទាំងសងខាង»។
ក្រុមកូដករ ដែលជាបុគ្គលិកកម្មករ នៅក្រុមហ៊ុនបនល្បែងណាហ្គាវើលដ៍ អះអាងថា ពួកគេមិនបានរារាំងវិធានការរបស់អាជ្ញាធរឡើយ។ ក្រោយបញ្ចប់ការអនុវត្តតាមក្រសួងសុខាភិបាល ពួកគេនឹងបន្តការតវ៉ាដោយអហិង្សាតទៅទៀត ដើម្បីអោយមានការដោះលែងតំណាងសហជីព ៨នាក់ ដែលកំពុងជាប់ពន្ធនាគារ ព្រមទាំងកូដករផ្សេងទៀត ដែលទើបចាប់ខ្លួន និងបញ្ចប់វិវាទរវាងពួកគេ និងភាគីក្រុមហ៊ុន ដោយយុត្តិធម៌។
កាលពីពេលថ្មីៗ នេះ ក្រុមអង្គការសង្គមស៊ីវិល សមាគម និងសហជីពដែលធ្វើសកម្មភាពលើកកម្ពស់ និងការពារសិទ្ធិមនុស្ស សិទ្ធិស្ត្រី និងសិទ្ធិការងាររួមគ្នាដាក់លិខិតចំហជូនក្រសួងមហាផ្ទៃ និងរដ្ឋសភា ក្នុងគោលបំណងទាមទារឱ្យមានការដោះលែងជាបន្ទាន់នូវថ្នាក់ដឹកនាំ និងសកម្មជនសហជីពទាំង ៨រូប ដែលតុលាការកំពុងឃុំខ្លួន និងកូដករ ៣នាក់ ដែលតុលាការចោទរឿងរារាំងវិធានសុខាភិបាល ដោយទម្លាក់ចោលនូវការចោទប្រកាន់ទៅលើពួកគេ។ ពួកគេស្នើឲ្យមានការដោះស្រាយវិវាទការងារនៅក្រុមហ៊ុនណាហ្គាវើលដ៍ ដោយភាពស្មោះត្រង់ យុត្តិធម៌ តម្លាភាព និងតាមច្បាប់ស្ដីពីការងាររបស់ព្រះរាជាណាចក្រកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។