អតិថិជនទិញផ្ទះពីក្រុមហ៊ុន ឡេង ណាវ៉ាត្រា ទាមទារសំណងពីក្រុមហ៊ុន
2024.07.19
លោក ឡេង ណាវ៉ាត្រា (ឆ្វេង) និងលោកនាយករដ្ឋមន្ត្រី ហ៊ុន ម៉ាណែត។
រូប៖ ហ្វេសប៊ុកលោក ឡេង ណាវ៉ាត្រា
អតិថិជនទិញផ្ទះពីក្រុមហ៊ុន ឡេង ណាវ៉ាត្រា បន្តទាមទារសំណងពីក្រុមហ៊ុន ដោយបាននាំគ្នាបង្ហោះសារលើទំព័រហ្វេសប៊ុក (Facebook) ផ្ទាល់ខ្លួន រិះគន់ខ្លាំងៗមកលើឧកញ៉ា ឡេង ណាវ៉ាត្រា ដែលជាម្ចាស់ក្រុមហ៊ុនថា ជាជនថោកទាប បោកប្រាស់ពលរដ្ឋ និងសប្បាយលើទឹកភ្នែករាស្ត្រ។ ពួកគាត់ថា ការចេញសាររិះគន់ខ្លាំងៗនេះ ដោយសារតែក្រុមហ៊ុនពុំអើពើរកដំណោះស្រាយ ហើយថែមទាំងនិយាយឌឺដង មកកាន់ពួកគាត់ ពេលសួរនាំអំពីផ្ទះ និងលុយសំណង។
រយៈពេល៣ឆ្នាំចុងក្រោយនេះ ពលរដ្ឋរាប់ម៉ឺននាក់ បានរងគ្រោះដោយសារ គម្រោងវិនិយោគដាក់លុយ បានផលចំណេញខ្ពស់ និងការទិញអចលនទ្រព្យជាដើម ដែលករណីនេះបណ្ដាលឱ្យពលរដ្ឋភាគច្រើនខាតបង់ ប្រាក់រាប់ម៉ឺនដុល្លារ ហើយត្រូវជំពាក់បំណុលធនាគារវ័ណ្ឌក ថែមទៀត។ ជាក់ស្ដែង អតិថិជនទិញផ្ទះពីក្រុមហ៊ុន ឡេង ណាវ៉ាត្រា ពុំទាន់ទទួលបានផ្ទះនៅឡើយទេ។អតិថិជនទិញផ្ទះពីក្រុមហ៊ុន ឡេង ណាវ៉ាត្រា លោកស្រី ដួង ម៉ាលី បានបង្ហោះសារិះគន់ខ្លាំងៗលើទំព័រហ្វេសប៊ុករបស់ខ្លួន កាលពីថ្ងៃទី១៧ ខែកក្កដា ថា លោកស្រី បានខាតបង់លុយអស់ជិត ១០ម៉ឺនដុល្លារ ក្រោយពីទិញផ្ទះ ពីក្រុមហ៊ុន ឡេង ណាវ៉ាត្រា នៅម្ដុំផ្លូវជាតិលេខ៦ អា (6A) ក្នុងខេត្តកណ្ដាលហើយ ២ឆ្នាំមកនេះ ពុំទាន់ទទួលបានផ្ទះ សម្រាប់ស្នាក់នៅ នៅឡើយទេ។
លោកស្រី ដួង ម៉ាលី ធ្លាប់ បានទៅសួរនាំព័ត៌មាន ពីក្រុមហ៊ុន ម្ដងរួចមកហើយ កាលពីខែមិថុនា ប៉ុន្តែ ខាងក្រុមហ៊ុន បានបង្ហាញភាពមិនសមរម្យ ដោយនិយាយថា ៤ ទៅ៥ឆ្នាំទៀត ទើបក្រុមហ៊ុនសាងសង់ផ្ទះរួច។ លោកស្រីចាត់ទុកការឆ្លើយតបនេះគឺជារឿងដែលឈឺចាប់បំផុត ព្រោះក្រុមហ៊ុនមិនគោរពតាមកិច្ចសន្យា ព្រោះក្នុងកិច្ចសន្យា ដែលត្រូវឱ្យលោកស្រី ចូលនៅតាំងពីឆ្នាំ២០២២។
លោកស្រីបានរិះគន់ខ្លាំងៗ មកលើឧកញ៉ា ឡេង ណាវ៉ាត្រា ដែលជាម្ចាស់ក្រុមហ៊ុនថា ជាជនថោកទាប បោកប្រាស់ពលរដ្ឋ ហើយរាំលេងសប្បាយលើគំនរទុក្ខរាស្ត្រ។ លោកស្រីស្នើឱ្យលោក ឡេង ណាវ៉ាត្រា ដោះស្រាយផ្ដល់ជាសំណងជូនពួកគាត់ ឱ្យបានឆាប់ បើពុំដូច្នោះទេ លោកស្រី នឹងបន្តរិះគន់កាន់តែខ្លាំង និងដាក់បណ្ដាសា រាល់ថ្ងៃនៅលើនៅបណ្ដាញសង្គម។
រីឯអតិថិជនម្នាក់ទៀត សុំមិនបញ្ចេញឈ្មោះ ព្រោះបារម្ភពីសុវត្ថិភាព ប្រាប់វិទ្យុអាស៊ីសេរីនៅថ្ងៃទី១៨ ខែកក្កដា ថា ក្រុមហ៊ុន ឡេង ណាវ៉ាត្រា មិនគោរពកិច្ចសន្យាទិញលក់អចលនទ្រព្យនោះទេ។ អតិថិជនរូបនេះថា បានបង់លុយ អស់ជាង៥ម៉ឺនដុល្លារ សម្រាប់ទិញផ្ទះ ប៉ុន្តែ មកដល់ពេលនេះ ជាង២ឆ្នាំហើយ ផ្ទះនៅមិនទាន់សាងសង់រួច។ កញ្ញាបញ្ជាក់ថា តាមកិច្ចសន្យា ត្រូវចូលនៅតាំងពីថ្ងៃទី១៦ ខែកញ្ញា ឆ្នាំ២០២២ ប៉ុន្តែ រហូតមកដល់ពេលនេះ ក្រុមហ៊ុនពុំអើពើ ឬផ្ដល់សំណងណាមួយត្រឡប់មកវិញឡើយ ដែលធ្វើឱ្យកញ្ញាកាន់តែលំបាក ព្រោះត្រូវដោះបំណុលធនាគារផង។
ពលរដ្ឋថ្លែងលាក់ឈ្មោះ៖ «ការសាងសង់ផ្ទះហាក់ធ្វើការអត់ច្បាស់លាស់ លក្ខណៈថា ធ្វើអត់ចប់ម៉ាតួផ្ទះ ។ ធ្វើនេះតិច នោះតិច ពេញទឹកពេញទី រប៉ាត់រប៉ាយពេញហ្នឹង។ ដូចផ្ទះបងអីហ្នឹង គ្រាន់តែចាក់គ្រឹះហើយ ទុកផ្ទះបងចោល១ឆ្នាំ អ៊ីចឹងទៅ យើងអ្នកចាំវាហត់ យើងវាក្ដៅក្រហាយ ។ យើងបានយកលុយទៅទិញផ្ទះវាដាច់ហើយ ផ្ទះដែលត្រូវចូលនៅ បែរជាមិនទាន់បានចូលនៅ»។
វិទ្យុអាស៊ីសេរីពុំអាចទាក់ទងតំណាងក្រុមហ៊ុន ឡេង ណាវ៉ាត្រា និងអ្នកនាំពាក្យលោកនាយករដ្ឋមន្ត្រី ហ៊ុន ម៉ាណែត លោក មាស សោភ័ណ្ឌ ដើម្បីឆ្លើយតបជុំវិញរឿងនេះបានទេនៅថ្ងៃទី១៨ ខែ កក្កដា ដោយហៅទូរស័ព្ទចូលតែគ្មានអ្នកទទួល។
ថ្មីៗនេះទៀត លោកក៏បានបង្ហោះរូបថតជាច្រើនសន្លឹកបង្ហាញពីទិដ្ឋភាពនៃការថតបទចម្រៀងខ្នាតធំដែលមានសិល្បករចូលរួមច្រៀង រួមគ្នារហូតដល់ជាង ៣ពាន់នាក់ សម្រាប់ត្រៀមទុកប្រើប្រាស់នៅថ្ងៃបើកការដ្ឋានសាងសង់ព្រែកជីកហ្វូណនតេជោ នាពេលខាងមុខនេះ ដែលមើលទៅហាក់ជាការចំណាយថវិកា ក្នុងពេលក្រុមហ៊ុនរបស់លោកមិនបានដោះស្រាយបញ្ហាទុក្ខលំបាករបស់អតិថិជនខ្លួនកំពុងមានចំពោះមុខ។
អតិថិជនទិញផ្ទះពី គម្រោងបុរី ឡេង ណាវ៉ាត្រា មិនមែនមានតែនៅម្ដុំផ្លូវជាតិលេខ៦អា ក្នុងស្រុកមុខកំពូល ខេត្តកណ្ដាលទេ ដែលមិនទាន់ទទួលបានផ្ទះ។ ដោយឡែក អ្នកទិញផ្ទះពី ក្រុមហ៊ុននេះ នៅគម្រោង ផ្លូវជាតិលេខ៣ ក៏មិនទាន់ទទួល បានផ្ទះនៅ ឡើយដែរ។ ពួកគាត់ថា គម្រោងបុរី និងផ្ទះវិឡា នេះ មានរាប់ពាន់គម្រោង បើគិតជា លុយទទួលបានពីអតិថិជន រាប់ម៉ឺនដុល្លារ ដូច្នេះ ប្រសិនបើក្រុមហ៊ុន បោកប្រាស់ ពលរដ្ឋមែន អាជ្ញាធរពាក់ព័ន្ធ ត្រូវតែចាត់វិធានការតាមផ្លូវច្បាប់ ព្រោះថាលុយទាំងនោះគឺ ជាញើសឈាម របស់ពលរដ្ឋ ដែលរកបានដោយលំបាក។
ទាក់ទិនរឿងនេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា ការអូសបន្លាយពេលវេលាដោះស្រាយបញ្ហាឱ្យពលរដ្ឋ ជារឿងដែលពុំល្អឡើយ។ លោកបន្តថា រដ្ឋាភិបាលគួរតែចេញមុខដោះស្រាយឱ្យបានឆាប់រហ័ស ដើម្បីពួកគាត់យកលុយទៅ សងធនាគារ ឬអាចមានផ្ទះស្នាក់អាស្រ័យនៅ សម្រាប់ប្រកបមុខរបរផ្សេងៗ។
លោក នី សុខា៖ «ប្រសិនបើរឿងនេះពលរដ្ឋមិនទទួលបានយុត្តិធម៌ឬក៏មានការអូសបន្លាយពេលវេលាធ្វើឱ្យពលរដ្ឋកាន់តែមានការរងគ្រោះ។ ខ្ញុំគិតថា វាជាគំរូមួយមិនល្អហើយវាអាចជាទម្រង់មួយដែលធ្វើឱ្យមានន័យថា បណ្ដោយឱ្យក្រុមហ៊ុន ឬក៏អ្នករកស៊ីមិនទៀងត្រង់ ឬក៏អ្នករកស៊ីទុច្ចរិត មានការរួចខ្លួនពីសំណាញ់ច្បាប់ អីជាហូរហែហ្នឹង។ អាចជាគំរូមួយហើយវាធ្វើឱ្យប្រជាពលរដ្ឋអស់ជំនឿ អស់សង្ឃឹមទៅលើការដឹកនាំ»។
ឧកញ៉ា ឡេង ណាវ៉ាត្រា គឺជាមនុស្សជិតស្និទ្ធ ជាមួយនឹងមន្ត្រីបក្សកាន់អំណាច ជាគ្រួសារនាយករដ្ឋមន្ត្រី ហ៊ុន ម៉ាណែត ។ អ្នកឃ្លាំមើលបញ្ហាសង្គម លើកឡើងថា ទោះបីជា ឧកញ៉ា ឡេង ណាវ៉ាត្រា បោកប្រាស់ពលរដ្ឋក្ដី ក៏លោក ហ៊ុន សែន និងលោក ហ៊ុន ម៉ាណែត ពិតជាចេញមុខការពារជាសាធារណៈដែរ។ ជាក់ស្ដែង ករណី យឺតយ៉ាវ សាងសង់ផ្ទះឱ្យពលរដ្ឋឆ្នាំ លោក ឡេង ណាវ៉ាត្រា មិនត្រូវបានរដ្ឋាភិបាល ហៅទៅជជែករកដំណោះស្រាយ ជូនពលរដ្ឋនោះទេ។ លើសពីនោះ ប្រធានព្រឹទ្ធសភា លោក ហ៊ុន សែន ចេញមុខសរសើរ លោក ឡេង ណាវ៉ាត្រា ថាជាអ្នក រកស៊ីវ័យក្មេង និងមានទំនួលខុសត្រូវខ្ពស់ទៀតផង។ ប៉ុន្តែសម្រាប់ពលរដ្ឋដែលមិនទាន់បានផ្ទះពីក្រុមហ៊ុន លោក ឡេង ណាវ៉ាត្រា កំពុងមានទុក្ខសោកដោយសារជាប់បំណុលធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
