អ្នកឃ្លាំមើលសង្គមព្រមានថា វិធានការរបស់ក្រសួងការងារដែលហាមមិនឲ្យផ្សព្វផ្សាយបទចម្រៀង«ភ្ជុំបិណ្ឌនឹកស្រុក» កាន់តែបង្ហាញឲ្យឃើញរបបលោក ហ៊ុន សែន ងាយទៅរករបបផ្ដាច់ការខ្លាំងឡើង និងជាការមិនលើកទឹកចិត្តដល់ស្នាដៃរបស់សិល្បករ។
អ្នកវិភាគឯករាជ្យ និងជាអតីតទីប្រឹក្សារបស់លោក កឹម សុខា ប្រធានគណបក្សសង្គ្រោះជាតិ គឺលោក បណ្ឌិត ឡៅ ម៉ុងហៃ បានប្រាប់អាស៊ីសេរីតាមទូរស័ព្ទថា របបលោក ហ៊ុន សែន មិនត្រូវ ធ្វើការហាមប្រាមលើបទចម្រៀងដែលឆ្លុះបញ្ចាំងពីការពិត ក្នុងសង្គមកម្មកររោងចក្រកាត់ដេរ កាលពីពីរឆ្នាំមុននោះឡើយ។ លោកបន្តថា វិធានការរបស់ក្រសួងការងារនៅពេលនេះ គឺជាការបង្ហាញអំពី អភិបាលកិច្ចដែលមានលក្ខណៈត្រួតត្រា ជាជាងការលើកទឹកចិត្តដល់អ្នកដែលមានទេពកោសល្យ៖ «ទៅឈឺក្បាលវិលមុខអី អាអ៊ីចឹង វាអត់ត្រូវឈឺក្បាលវិលមុខ។ មានកិច្ចការជាច្រើនទៀតដែលត្រូវធ្វើ។ នេះគ្រាន់តែជាបញ្ចេញមនោសញ្ចេតនា ហើយដែលពាក់ព័ន្ធនឹងករណីជាក់ស្ដែង។ មានស្អីតិចត្រួតត្រា ស្អីត្រួតត្រា»។
រដ្ឋមន្ត្រីក្រសួងការងារ លោក អ៊ិត សំហេង កាលពីថ្ងៃទី៣ ខែតុលា បានជំរុញឲ្យលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងអ្នកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ចាត់វិធានការ ផ្អាកការផ្សាយបទចម្រៀង «ភ្ជុំបិណ្ឌនឹកស្រុក» ដែលច្រៀងដោយ លោក ម៉ៅ ហាជី នៃផលិតកម្មថោន។
ក្រសួងការងារលើកឡើងថា ចំណុចពីរតែក្រសួងមានបញ្ហានោះ «កម្មករនិយោជិកមិនទាន់បើកប្រាក់ខែ ក្នុងរដូវបុណ្យភ្ជុំបិណ្ឌដែល ធ្វើឱ្យកម្មករនិយោជិកមិនបានទៅស្រុកកំណើតទៅលេងម៉ែ - ពុក បានត្រឹមតែស្រុកទឹកនេត្រា ហើយបានទូរស័ព្ទប្រាប់ម៉ែ - ពុក បន្ទាប់ពីភ្ជុំបិណ្ឌរួចហើយ បានអាចទៅលេងស្រុកកំណើត»។
លិខិតរបស់លោក អ៊ិត សំហេង បញ្ជាក់ទៀតថា បទចម្រៀងមួយបទនេះ បានធ្វើឱ្យប៉ះពាល់យ៉ាងខ្លាំងដល់គោលនយោបាយរបស់របបលោក ហ៊ុន សែន និងផ្ទុយទាំងស្រុងនូវអ្វីដែលរបបក្រុងភ្នំពេញ កំពុងយកចិត្តទុកដាក់ និងផ្ដល់កិច្ចគាំពារដល់កម្មករនិយោជិក។
ទោះជាយ៉ាងណាក៏ដោយ លោកបណ្ឌិត ឡៅ ម៉ុងហៃ បញ្ជាក់ថា បទចម្រៀងមួយបទនេះ មិនបានធ្វើប៉ះទង្គិចដល់មុខមាត់របបលោក ហ៊ុន សែន និងសន្តិសុខសណ្ដាប់ធ្នាប់សាធារណៈ របៀបរៀបរយសង្គម ឬផ្ទុយនឹងអ្វីដែលមានចែងក្នុងរដ្ឋធម្មនុញ្ញរបស់ព្រះរាជាណាចក្រកម្ពុជានោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។