សមត្ថកិច្ច​កំពុង​ស្វែង​រក​អ្នក​កែ​រូបថត​ភរិយា​របស់​លោក ហ៊ុន សែន

ដោយ ប្រាជ្ញ ចេវ
2015.12.31
ប៊ុន រ៉ានី ហ៊ុន សែន ៦២០ ប្រធាន​កាកបាទ​ក្រហម​កម្ពុជា និង​ជា​ភរិយា​នាយករដ្ឋមន្ត្រី អ្នកស្រី ប៊ុន រ៉ានី ហ៊ុន សែន ពេល​ចូល​រួម​ក្នុង​ទិវា​ជាតិ​ប្រឆាំង​ការ​ជួញដូរ​មនុស្ស កាល​ពី​រសៀល​ថ្ងៃ​ទី​១២ ខែ​ធ្នូ ឆ្នាំ​២០១៥ នា​រាជធានី​ភ្នំពេញ។
RFA/Brach Chev

មន្ត្រី​ជាន់​ខ្ពស់​ក្រសួង​មហាផ្ទៃ ឲ្យ​ដឹង​ថា ពេល​នេះ​សមត្ថកិច្ច​ជំនាញ​កំពុង​ស្រាវជ្រាវ​ករណី​អ្នក​ប្រើ​ហ្វេសប៊ុក (Fecebook) កែ​រូប​ភរិយា​របស់​លោក ហ៊ុន សែន ទាញ​ជើង​ដែល​មើល​ទៅ​មាន​លក្ខណៈ​មិន​សមរម្យ។ ចំណាត់​ការ​របស់​សមត្ថកិច្ច​នៅ​ពេល​នេះ បន្ទាប់​ពី​លោក​នាយករដ្ឋមន្ត្រី ហ៊ុន សែន ប្រតិកម្ម​ទៅ​អ្នក​ដែល​កែ​រូប និង​ព្រមាន​ឲ្យ​ទទួល​ខុសត្រូវ​ចំពោះ​មុខ​ច្បាប់។

អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ ឲ្យ​ដឹង​ថា សមត្ថកិច្ច​នឹង​រក​ជន​ដែល​កែ​រូបភាព​អ្នកស្រី ប៊ុន រ៉ានី ឃើញ។ អ្នក​នាំ​ពាក្យ​ដដែល​ថា ករណី​នេះ​ប៉ះពាល់​ខ្លាំង​ដល់​វប្បធម៌ អរិយធម៌​ខ្មែរ ដូច្នេះ​សមត្ថកិច្ច​ត្រូវ​តែ​ចាត់​វិធានការ៖ «អាច​រក​ឃើញ​មាន​អី​ពិបាក​ទេ បច្ចេកទេស​សម័យ​ទំនើប​នេះ។ ខ្ញុំ​ជឿ​ថា អ្នក​ដែល​ធ្វើ​ក៏​មិន​មែន​ចុះ​ពី​លើ​មេឃ​ដែរ»

បន្ទាប់ពី​គេហទំព័រ​ហេ្វសប៊ុក កាល​ពី​ថ្ងៃ​ទី​៣០ ខែ​ធ្នូ បាន​បង្ហោះ​រូប​លំហែ​កម្សាន្ត​ជុំ​គ្រួសារ​នៅ​លើ​ឆ្នេរ​ខ្សាច់​មាត់​សមុទ្រ​ខេត្ត​ព្រះសីហនុ។ អ្នក​ប្រើប្រាស់​ហ្វេសប៊ុក មួយ​ចំនួន បាន​កែ​រូប​លោក ហ៊ុន សែន ទៅ​ជា​ពិការ​ដៃ​ស្ដាំ និង​កែ​រូប​ភរិយា​របស់​លោក​ពី​រូប​ឈរ​ធម្មតា ទៅ​ជា​ឈរ​មិន​សមរម្យ។

លោក​នាយករដ្ឋមន្ត្រី ហ៊ុន សែន ចោទ​ប្រកាន់​ថា អ្នក​ដែល​កែ​រូប​ភរិយា​របស់​លោក​ទៅ​ជា​លក្ខណៈ​មិន​សមរម្យ គឺ​ជា​មនុស្ស​មក​ពី​គណបក្ស​ប្រឆាំង​ជ្រុល​និយម​មួយ​ចំនួន និង​សកម្មជន​បក្ស​ប្រឆាំង។ លោក ហ៊ុន សែន ហៅ​ទង្វើ​នេះ​ថា បំផ្លាញ​ដល់​កិត្តិយស និង​ក្រុម​គ្រួសារ​របស់​លោក។

ទាក់ទង​រឿង​នេះ​ដែរ អ្នក​នាំ​ពាក្យ​គណបក្ស​សង្គ្រោះ​ជាតិ លោក យឹម សុវណ្ណ ថា លោក​មិន​គាំទ្រ​ចំពោះ​ការ​បង្ហោះ​រូបភាព​ទាំង​ឡាយ​ដែល​ប៉ះពាល់​ដល់​សេចក្ដី​ថ្លៃថ្នូរ​របស់​បុគ្គល​រូប​ណា​នោះ​ទេ។ ចំពោះ​ការ​ចោទ​ប្រកាន់​របស់​លោក ហ៊ុន សែន  អ្នក​នាំ​ពាក្យ​គណបក្ស​ប្រឆាំង​រូប​នេះ បដិសេធ​ដោយ​អះអាង​ថា គណបក្ស​លោក​មិន​ដែល​ណែនាំ​សមាជិក ឬ​សកម្មជន​របស់​ខ្លួន​ឲ្យ​ធ្វើ​រឿង​បែប​នេះ​នោះ​ទេ៖ «ខ្ញុំ​សុំ​បញ្ជាក់ គណបក្ស​តែងតែ​ណែនាំ​សមាជិក សកម្មជន ប្រជាពលរដ្ឋ​ទូទៅ​ក្តី​ឲ្យ​ប្រើប្រាស់​ហ្វេសប៊ុក​ប្រកប​ដោយ​ភាព​ថ្លៃថ្នូរ នូវ​អ្វី​ដែល​មាន​ប្រយោជន៍​ដល់​សង្គម​ជាតិ»

ចំណែក​ប្រធាន​អង្គការ​វេទិកា​អនាគត លោក អ៊ូ វីរៈ ក៏​មិន​គាំទ្រ​ឲ្យ​មាន​ការ​ប្រើប្រាស់​ហ្វេសប៊ុក ដែល​គ្មាន​សីលធម៌​បែប​នេះ​ដែរ។ មន្ត្រី​សង្គម​ស៊ីវិល​រូប​នេះ​យល់​ថា ការ​ចោទ​ប្រកាន់​របស់​លោក ហ៊ុន សែន ទៅ​គណបក្ស​ប្រឆាំង មិន​មែន​ជា​រឿង​ត្រឹមត្រូវ ប៉ុន្តែ​លោក​ក៏​ទាមទារ​ឲ្យ​គណបក្ស​ប្រឆាំង​ចេញ​មុខ​ថ្កោលទោស​សកម្មភាព​បែប​នេះ មិន​មែន​នៅ​ស្ងៀមស្ងាត់​បែប​នេះ​ឡើយ៖ «គណបក្ស​ប្រឆាំង​គួរ​តែ​ចេញ ​មុខ​មក​ថ្កោលទោស​ពី​សកម្មភាព​បែប​ហ្នឹង​ទៅ ទោះ​គេ​ធ្វើ​លើ​គូ​ប្រកួត​ខ្លួន​ក៏ដោយ ចំណែក​គណបក្ស​កាន់​អំណាច​ក៏​មិន​ត្រូវ​ចោទ​គណបក្ស​ប្រឆាំង​ដែរ»

​នៅ​រយៈពេល​ចុង​ក្រោយ​នេះ លោក ហ៊ុន សែន តែងតែ​ឆ្លើយ​តប​មតិ​​នានា របស់​អ្នក​ប្រើប្រាស់​បណ្ដាញ​សង្គម​ហ្វេសប៊ុក ទាំង​ការ​រិះគន់ និង​សំណើ។ ទាក់ទង​វិធានការ​គេ​ឃើញ​សមត្ថកិច្ច​ស្រាវជ្រាវ​បាន​លឿន​ចំពោះ​តែ​បុគ្គល​ដែល​ប្រមាថ ឬ​គំរាម​មន្ត្រី​រដ្ឋាភិបាល ដូចជា​ករណី​គំរាម​សម្លាប់​ប្រធាន​ក្រុម​ស្រាវជ្រាវ​កិច្ចការ​ព្រំដែន​នៃ​រាជបណ្ឌិត្យសភា  បណ្ឌិត សុខ ទូច និង​រដ្ឋមន្ត្រី​ក្រសួង​មហាផ្ទៃ លោក ស ខេង។ ចំណែក​ឯ​ការ​គំរាម​សម្លាប់​អនុ​ប្រធាន​គណបក្ស​ប្រឆាំង លោក កឹម សុខា សមត្ថកិច្ច​នៅ​មិន​ទាន់​រក​ឃើញ​នៅ​ឡើយ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។