អង្គការសមាគមខ្មែរកម្ពុជាក្រោម សម្ព័ន្ធយុវជនខ្មែរដើម្បីលទ្ធិប្រជាធិបតេយ្យ និងប្រជាពលរដ្ឋច្រើនរយនាក់ បានទៅប្រមូលផ្តុំគ្នានៅក្បែរស្ថានទូតវៀតណាម ប្រចាំកម្ពុជា ដើម្បីបន្តទាមទារឲ្យរដ្ឋាភិបាលវៀតណាម សុំទោសពលរដ្ឋខ្មែរ និងទទួលស្គាល់ប្រវត្តិសាស្ត្រពិតទឹកដីកម្ពុជាក្រោម ដែលវៀតណាម បាននិយាយបំភ្លៃកន្លងមក។
ក្នុងពេលតវ៉ានោះ បាតុករស្រែកជេររដ្ឋាភិបាលវៀតណាម ហើយថែមទាំងដុតទង់ជាតិវៀតណាម ទៀតផង។
ទង់ជាតិវៀតណាម ប្រមាណ ៤ ទៅ ៥ផ្ទាំង និងទង់ក្រដាសជាច្រើនសន្លឹកផ្សេងទៀត ត្រូវបានព្រះសង្ឃ និងប្រជាពលរដ្ឋមួយក្រុមយកមកជាន់ឈ្លី រួចដុតកម្ទេចចោល ដើម្បីសម្ដែងកំហឹងចំពោះរដ្ឋាភិបាលវៀតណាម ដែលមិនព្រមចេញមុខដោះស្រាយបញ្ហាការបំភ្លៃប្រវត្តិសាស្ត្រទឹកដីកម្ពុជាក្រោម និងមិនព្រមសុំទោសប្រជាពលរដ្ឋខ្មែរជាសាធារណៈ។ ពួកគេគំរាមថា អាចនឹងមានការដុតជាបន្តបន្ទាប់ទៀត ប្រសិនបើរដ្ឋាភិបាលវៀតណាម មិនព្រមចេញមុខទទួលខុសត្រូវចំពោះការបំភ្លៃប្រវត្តិសាស្ត្ររបស់ខ្លួន។
«សំឡេង»
ក្រៅពីជាន់ឈ្លី និងដុតទង់ជាតិវៀតណាម បាតុករមួយចំនួនផ្សេងទៀត បានយកស្ទីកឃ័រទង់ជាតិវៀតណាម ទៅបិទជាប់នឹងស្បែកជើង បាតជើង ព្រមទាំងគូទរបស់ពួកគេ ដើម្បីបង្ហាញពីការមិនពេញចិត្តចំពោះប្រទេសវៀតណាម។ ស្របពេលជាមួយគ្នា ក៏មានបាតុករផ្សេងទៀត ខ្លះស្រែកបន្ទរ ខ្លះឡើងថ្លែងចំណាប់អារម្មណ៍របស់ខ្លួនអំពីប្រវត្តិសាស្ត្រទឹកដីកម្ពុជាក្រោម។ ហើយខ្លះទៀត ស្រែកអំពាវនាវឲ្យប្រជាពលរដ្ឋខ្មែរ នាំគ្នាឈប់ប្រើប្រាស់ទំនិញ និងសេវាកម្មរបស់ក្រុមហ៊ុនវៀតណាម នៅកម្ពុជា បន្តទៀត។
«សំឡេង»
នេះជាលើកទី៤ហើយដែលអង្គការសមាគមខ្មែរកម្ពុជាក្រោម និងប្រជាពលរដ្ឋខ្មែរធ្វើបាតុកម្មប្រឆាំងនឹងការបំភ្លៃប្រវត្តិសាស្ត្ររបស់វៀតណាម ហើយក៏ជាលើកទី២ដែរ ដែលឈានដល់ការដុតកម្ទេចទង់ជាតិវៀតណាម ដូច្នេះ បើទោះជារដ្ឋាភិបាលវៀតណាម ធ្លាប់បានទទូចឲ្យរដ្ឋាភិបាលកម្ពុជា ចាត់វិធានការរារាំងមិនឲ្យមានបាតុកម្មប្រឆាំងពួកគេ និងចំពោះអ្នកដែលហ៊ានដុតទង់ជាតិវៀតណាម ក៏ដោយ។ យ៉ាងណាក៏ដោយ ដូចបាតុកម្មមុនៗដែរ មន្ត្រីស្ថានទូតវៀតណាម មិនបានចេញមកជួបក្រុមអ្នកតវ៉ានោះទេ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ដែលជាអ្នកដឹកនាំបាតុកម្មនេះ មានប្រសាសន៍ថា ពលរដ្ឋសម្ដែងកំហឹងឈឺចាប់ចំពោះការបំភ្លៃប្រវត្តិសាស្ត្ររបស់វៀតណាម ហើយលោកសង្ឃឹមថា រដ្ឋាភិបាលវៀតណាម ព្រមប្រកាសទទួលស្គាល់ប្រវត្តិសាស្ត្ររបស់ខ្មែរ ដើម្បីកុំឲ្យជម្លោះប្រវត្តិសាស្ត្រនេះអូសបន្លាយតទៅទៀត៖ «ឃើញគាត់មានកំហឹងជាងមុន យើងស្ទើរតែទប់មិនចង់បាន។ ក្នុងឋានៈយើងអ្នករៀបចំ យើងមានការខិតខំឲ្យអស់ពីសមត្ថភាព យើងទប់កុំឲ្យមានអំពើហិង្សាកើតឡើង ដោយសារយើងឃើញទឹកចិត្តប្រជាពលរដ្ឋ លោកពុះកញ្ជ្រោលខ្លាំង។ ដូច្នេះ ដើម្បីបញ្ចប់បញ្ហានេះ ខ្ញុំសូមអំពាវនាវដល់រដ្ឋាភិបាលខ្មែរ ធ្វើកិច្ចការជាមួយរដ្ឋាភិបាលយួន ឲ្យបានឆាប់ ដើម្បីឲ្យរដ្ឋាភិបាលយួន ទទួលស្គាល់ការពិតនៃប្រវត្តិសាស្ត្រជាលាយលក្ខណ៍អក្សរ នេះគឺបញ្ចប់បញ្ហាទាំងអស់ហើយ»។
មន្ត្រីសាលារាជធានីភ្នំពេញ បានអះអាងថា ពួកគេមិនអនុញ្ញាតឲ្យអង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរដើម្បីលទ្ធិប្រជាធិបតេយ្យ ធ្វើការប្រមូលផ្តុំនៅមុខស្ថានទូតវៀតណាម នោះទេ ដើម្បីរក្សាសណ្ដាប់ធ្នាប់ និងការពារសន្តិសុខសុវត្ថិភាពរបស់ស្ថានទូត។ យ៉ាងណាក៏ដោយ បើទោះជាមានការដាក់ពង្រាយសមត្ថកិច្ចច្រើនរយនាក់នៅក្បែរស្ថានទូតវៀតណាម ក្តី ប៉ុន្តែសមត្ថកិច្ចមិនបានបំបែកការប្រមូលផ្តុំរបស់បាតុករឡើយ។
ប្រធានផ្នែកអង្កេតនៃសមាគមអាដហុក (adhoc) លោក នី ចរិយា ដែលចូលរួមឃ្លាំមើលការប្រមូលផ្តុំរបស់ខ្មែរក្រោមដែរនោះ កត់សម្គាល់ថា ការប្រមូលផ្តុំរបស់ពលរដ្ឋពេលនេះ គឺជាសិទ្ធិសេរីភាពក្នុងការសម្ដែងមតិរបស់ពួកគាត់។ លោកមានប្រសាសន៍ថា ដើម្បីបញ្ចប់ការតវ៉ានេះ រដ្ឋាភិបាលវៀតណាម គួរចេញមុខដោះស្រាយ និងទទួលស្គាល់ប្រវត្តិសាស្ត្រ ដើម្បីបញ្ចៀសកុំឲ្យមានកំហឹងជាតិសាសន៍រវាងប្រជាជាតិទាំងពីរ។ ចំពោះការដុតទង់ជាតិវៀតណាម វិញ លោក នី ចរិយា យល់ថា វាកើតឡើងដោយសារកំហឹងស្នេហាជាតិ ដែលលោកថា សូម្បីតែពលរដ្ឋវៀតណាម ក៏ធ្លាប់ដុតទង់ជាតិចិន ដែរ នៅពេលដែលវៀតណាម មានជម្លោះដែនកោះជាមួយចិន។
លោក នី ចរិយា៖ «កាលណាវៀតណាម ធ្វើរបៀបនេះ គឺជាអំពើមួយដែលខ្ញុំយល់ថា ធ្វើឲ្យមានការដុតនូវកំហឹងជាតិសាសន៍ ហើយអាហ្នឹងវាអាចឈានទៅដល់មានបញ្ហាហិង្សាខាងជាតិសាសន៍ អ៊ីចឹងវាមិនមែនជារឿងមួយល្អទេ បើគ្រាន់តែយើងប្រកាសជាសាធារណៈទទួលស្គាល់ប្រវត្តិសាស្ត្រមួយម៉ាត់ វាមិនមែនជារឿងអីធំដុំសោះ ដែលវៀតណាម គួរតែធ្វើ»។
ការប្រមូលផ្តុំ បានរំសាយទៅវិញនៅម៉ោងប្រមាណ ៤ និង ៣០នាទីរសៀល។ បើតាម លោក ថាច់ សេដ្ឋា បាតុករនឹងទៅប្រមូលផ្តុំគ្នានៅមុខស្ថានទូតវៀតណាម ជាថ្មីទៀតនៅព្រឹកថ្ងៃទី៥ និងទី៦ តុលា។ ចំណែកនៅថ្ងៃទី៧ និងទី៨ តុលា ពួកគេនឹងទៅប្រមូលផ្តុំគ្នានៅទីលានប្រជាធិបតេយ្យ រួចដើរហែញត្តិទៅដាក់នៅមន្ទីររដ្ឋសភា នៅវិមានសន្តិភាព នៅស្ថានទូតបារាំង និងនៅឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។