នៅក្នុងពិធីសម្ពោធវិមានព្រះបរមរូប ព្រះបរមរតនកោដ្ឋ សម្ដេចព្រះ នរោត្តម សីហនុ ព្រឹកថ្ងៃសុក្រ ទី១១ ខែតុលា លោកនាយករដ្ឋមន្ត្រី ហ៊ុន សែន បានថ្លែងរំលឹកពីព្រះរាជបណ្ដាំចុងក្រោយរបស់ព្រះអង្គ ពីនយោបាយបង្រួបបង្រួម និងផ្សះផ្សាជាតិខ្មែរជាធ្លុងមួយ កុំឲ្យបរទេសមើលងាយ។ ជាងនេះ ប្រមុខដឹកនាំក៏បានថ្លែងពីគុណូបការៈសម្ដេចឪ ក្នុងបុព្វហេតុជាតិមាតុភូមិ។
ក្រៅពីនេះ លោក ហ៊ុន សែន ក៏បានយកឱកាសនោះប្រកាសផ្ដាំផ្ញើដល់អ្នកបន្តវេន ដែលត្រូវដឹកនាំរាជរដ្ឋាភិបាលកម្ពុជា ជំនាន់ក្រោយៗ ឲ្យចងចាំនូវគុណូបការៈរបស់ព្រះរាជបិតាជាតិខ្មែរ គឺមិនមែនត្រឹមតែជាព្រះបិតាជាតិនៅពេលនេះទេ ប៉ុន្តែជាព្រះបិតាជាតិរបស់អ្នកទាំងអស់គ្នារហូតតទៅ។ បន្ថែមលើនេះ លោកប្រមុខដឹកនាំក៏បានប្រកាសឲ្យរក្សាទុកថ្ងៃទី១៥ ខែតុលា ជារៀងរាល់ឆ្នាំ ជាថ្ងៃសម្រាប់បង្កើតឱកាសដល់ប្រជាពលរដ្ឋខ្មែរ គោរពព្រះវិញ្ញាណក្ខន្ធព្រះបិតាជាតិតរៀងទៅ។
លោក ហ៊ុន សែន៖ «ព្រះបិតាជាតិរបស់យើងមិនមែនត្រឹមតែនៅក្នុងដំណាក់កាលនេះទេ។ លោកថាផឹកទឹកត្រូវនឹកដល់ប្រភពទឹក ទទួលផ្លែឈើត្រូវនឹកដល់អ្នកដាំដើម។ ព្រះបិតាជាតិរបស់យើង គឺជាព្រះបិតាជាតិជារៀងរហូត។ ដូច្នេះ ទូលព្រះបង្គំខ្ញុំព្រះករុណាខ្ញុំ សូមអំពាវនាវចំពោះមុខអ្នកជំនាន់ក្រោយ សូមមេត្តារក្សាទុកថ្ងៃទី១៥ តុលា ជារៀងរាល់ឆ្នាំ ដើម្បីបង្កើតឱកាសសម្រាប់ប្រជាពលរដ្ឋគោរពព្រះវិញ្ញាណក្ខន្ធព្រះបិតាជាតិ»។
ថ្លែងនៅចំពោះព្រះភ័ក្ត្រព្រះមហាក្សត្រ សម្ដេចម៉ែ និងមន្ត្រីជាន់ខ្ពស់នៃរាជរដ្ឋាភិបាល ជាពិសេសនៅចំពោះព្រះភ័ក្ត្រព្រះបរមរូប ព្រះបរមរតនកោដ្ឋ សម្ដេចព្រះ នរោត្តម សីហនុ លោក ហ៊ុន សែន បានអះអាងថា នឹងបន្តរក្សាការពាររបបរាជានិយម ការពាររាជបល្ល័ង្ក និងការពារព្រះមហាក្សត្រជាទីគោរពសក្ការៈដ៏ខ្ពង់ខ្ពស់។
យ៉ាងណាក៏ដោយ ពិធីសម្ពោធវិមានព្រះបរមរូប សម្ដេចព្រះ នរោត្តម សីហនុ នាព្រឹកថ្ងៃសុក្រ ទី១១ ខែតុលា មិនឃើញវត្តមានឥស្សរជននយោបាយ ឬអ្នកតំណាងរាស្ត្រគណបក្សសង្គ្រោះជាតិ មកចូលរួមទេ។
លោក កឹម សុខា ប្រធានស្តីទីគណបក្សសង្គ្រោះជាតិ មានប្រសាសន៍ថា មូលហេតុតំណាងរាស្ត្របក្សខ្លួនមិនបានចូលរួមពិធីសម្ពោធវិមានព្រះបរមរូប ព្រះបរមរតនកោដ្ឋ ដោយសារលិខិតអញ្ជើញពីព្រះបរមរាជវាំង បានមកដល់ប្រថុចញ៉ុចពេក គឺមកដល់ល្ងាចថ្ងៃទី១០ ខែតុលា ទៅហើយ ហើយម្យ៉ាងលោកថា បេក្ខជនតំណាងរាស្ត្រគណបក្សសង្គ្រោះជាតិ មួយចំនួន បានចេញទៅខេត្តឆ្ងាយៗ ដើម្បីជួយប្រជាពលរដ្ឋរងគ្រោះទឹកជំនន់ មិនអាចវិលទាន់។
បន្ថែមលើនេះ លោក កឹម សុខា បានឲ្យដឹងថា នៅក្នុងលិខិតអញ្ជើញ គេអញ្ជើញតែបេក្ខជនជាប់ឆ្នោតតំណាងរាស្ត្រអាណត្តិទី៥ ទេ គឺមិនបានអញ្ជើញតំណាងបក្សទេ ទើបបេក្ខជនមិនជុំគ្នា និងមិនបានត្រៀមលក្ខណៈជាមុន។
យ៉ាងនេះក្តី លោកថា នៅព្រឹកថ្ងៃច័ន្ទ ទី១៤ ខែតុលា នាទីស្នាក់ការខណ្ឌទួលគោក ថ្នាក់ដឹកនាំគណបក្សសង្គ្រោះជាតិ នឹងរៀបចំពិធីបង្សុកូលគោរពព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះ នរោត្តម សីហនុ។ ហើយនៅម៉ោង ២រសៀលថ្ងៃដដែល លោក កឹម សុខា ឲ្យដឹងថា បេក្ខជនជាប់ឆ្នោតតំណាងរាស្ត្របក្សខ្លួន នឹងទៅអុចធូបគោរពព្រះវិញ្ញាណក្ខន្ធដល់វិមានព្រះបរមរូប ព្រះបរមរតនកោដ្ឋ នាសួនច្បារខាងកើតវិមានឯករាជ្យ។
លោក កឹម សុខា៖ «គេអត់មានអញ្ជើញតំណាងគណបក្សសង្គ្រោះជាតិ ចូលរួមផង គេអញ្ជើញតែតំណាងរាស្ត្រ។ រឿងមួយទៀត យើងមានកម្មវិធីរបស់យើងនៅព្រឹកថ្ងៃទី១៤ ខែតុលា យើងធ្វើពិធីបង្សុកូលជូនព្រះបរមរូប ព្រះបរមរតនកោដ្ឋ ព្រះករុណា សម្ដេចព្រះ នរោត្តម សីហនុ នៅទីស្នាក់ការបក្សខណ្ឌទួលគោក។ ហើយនៅម៉ោង ២រសៀលថ្ងៃដដែល យើងសុំទៅគោរពវិញ្ញាណក្ខន្ធ ព្រះបរមរូប ព្រះបរមរតនកោដ្ឋ នៅទីកន្លែងវិមានព្រះបរមរូប ដែលទើបសម្ពោធ។ ហើយឥឡូវនេះ យើងកំពុងធ្វើលិខិតដាក់ជូនព្រះបរមរាជវាំង ដើម្បីស្នើចូលគោរពព្រះវិញ្ញាណក្ខន្ធនៅក្នុងវាំងទៀត នៅថ្ងៃទី១៥ ខែតុលា ខាងមុខ»។
ព្រះបរមរូប ព្រះបរមរតនកោដ្ឋ ព្រះករុណា សម្ដេចព្រះ នរោត្តម សីហនុ បានកសាងពីស្ពាន់មួយជំហរ មានកម្ពស់ ៤,៥ម៉ែត្រ ក្នុងសម្លៀកបំពាក់ខោអាវធំ អោបដៃសំយុងមកមុខ បែរព្រះភ័ក្ត្រទៅទិសខាងកើត និងបានតម្កល់លើទម្រមានកម្ពស់ ២,៧ម៉ែត្រ។ វិមានព្រះបរមរូបនេះ បានសាងសង់នៅលើខឿនរាងចតុកោណកែង មានបណ្តោយ ៥៤ម៉ែត្រ និងទទឹង ២៧ម៉ែត្រ និងមានទីតាំងនៅលើសួនច្បារខាងកើតវិមានឯករាជ្យ ក្នុងរាជធានីភ្នំពេញ។
លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានប្រកាសក្នុងពិធីសម្ពោធថា វិមានព្រះបរមរូប ព្រះបរមរតនកោដ្ឋ សម្ដេចព្រះ នរោត្តម សីហនុ បានចំណាយថវិកាសាងសង់ជាង ១លាន ២សែនដុល្លារសហរដ្ឋអាមេរិក (១.២២៩.៨២០ដុល្លារ)។
ទាក់ទិនបញ្ហានេះដែរ ព្រះករុណា ព្រះបាទព្រះបរមនាថ នរោត្តម សីហមុនី និងសម្ដេចព្រះមហាក្សត្រី ព្រះវររាជមាតា នរោត្តម មុនីនាថ សីហនុ បានចេញព្រះរាជសារ ចុះថ្ងៃទី១១ ខែតុលា ថ្លែងអំណរគុណចំពោះលោកនាយករដ្ឋមន្ត្រី ហ៊ុន សែន និងថ្នាក់ដឹកនាំរដ្ឋាភិបាលកម្ពុជា ទាំងអស់ ដែលបានខិតខំកសាងវិមានព្រះបរមរូប ព្រះករុណា ព្រះបរមរតនកោដ្ឋ ដ៏ស្កឹមស្កៃ និងល្អប្រណីត នៅលើសួនច្បារខាងកើតវិមានឯករាជ្យ ហើយបានប្រារព្ធព្រះរាជពិធីសម្ពោធ នៅថ្ងៃទី១១ ខែតុលា នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។