ព្រះសង្ឃ​និង​ពលរដ្ឋខ្មែរ​នៅ​ក្រៅ​ប្រទេស​ជូនពរ​ឲ្យ​ពលរដ្ឋខ្មែរ​មានសុខភាព​ល្អ សុវត្ថិភាព​ និង​ជៀសផុត​ពី​ជំងឺ​កូវីដ១៩​

ដោយ ម៉ៅ សុធានី
2021-04-15
Share
ព្រះសង្ឃ​និង​ពលរដ្ឋខ្មែរ​នៅ​ក្រៅ​ប្រទេស​ជូនពរ​ឲ្យ​ពលរដ្ឋខ្មែរ​មានសុខភាព​ល្អ សុវត្ថិភាព​ និង​ជៀសផុត​ពី​ជំងឺ​កូវីដ១៩​ លោក ជុន ច័ន្ទបុត្រ (ឆ្វេង) សម្ភាស​ព្រះតេជព្រះគុណ ហុក សុវណ្ណ (ស្ដាំ) តាមរយៈ​វីដេអូ ស្កេប (Skype) នៅ​ថ្ងៃ​ទី១៥ ខែ​មេសា ឆ្នាំ២០២០។
រូប៖ RFA

ព្រះចៅអធិការវត្ត​ម៉ុងរ៉េអាល់ (Montreal) ប្រទេស​កាណាដា (Canada) ព្រះតេជគុណ ហុក សុវណ្ណ ជូនពរ​ឲ្យ​ប្រជាពលរដ្ឋ​ខ្មែរ​​ទាំង​អស់​​ជួប​​តែ​​សេចក្តីសុខ​​ចម្រើន​​ ជៀស​​ផុត​​​ពីការ​​ឆ្លងរាល​ដាល​​នៃជំងឺកូ​វីដ​១៩ និង​​ត្រូ​វ​អនុវត្ត​ឲ្យ​​បាន​​ខ្ជាប់​ខ្ជួន​​នូវ​វិធី​​បង្ការ​​ការ​​ឆ្លង​នៃ​ជំងឺ​កាចសាហាវ​​មួយ​​នេះ។ ​បន្ថែម​ពីនេះ​​ព្រះតេជគុណ ​ស្នើសុំ​ឲ្យ​​ លោក​​នាយករដ្ឋមន្ត្រី​ហ៊ុន​ សែន​ គិតគូរ​​ដល់​​សុខ​ទុក្ខប្រជាពលរដ្ឋ​​និង​​ប្រទេស​​ជាតិ​ជា​​ធំ​​តាម​រយៈការ​​ផ្សះផ្សារ​ជាតិ និង​​បញ្ឈប់​កា​​រ​ចាប់​​ចង​​ធ្វើបាប​​ប្រជាពលរដ្ឋ​​ខ្លួន​​ឯង​​ត​ទៅ​ទៀ​ត​​៖​ «ក្នុង​ឱកាស​បុណ្យចូលឆ្នាំថ្មី​នេះ តាម​ប្រពៃណី​ជាតិ​ខ្មែរ​ស្រប​តាម​ព្រះពុទ្ធ​សាសនា ថា​ឲ្យ​យើង​ដុះ​ខាត់​ចិត្ត បើឆ្នាំ​ចាស់​មិន​​ល្អ ឆ្នាំ​ថ្មីកាន់​ចិត្ត​​ឲ្យ​ល្អ​​ ធ្វើ​​អំពើ​ល្អ​ កុំសាង​អំពើ​បាប។ ទី២​ អ្នកកាន់​អំណាចខ្មែរ​កុំឲ្យ​ជិះជាន់​ប្រជារាស្ត្រ​របស់​ខ្លួន​កុំធ្វើ​អ្វី​ឲ្យ​ខុស​ប្រយោជន៍​ជាតិ រក្សា​បូរភាព​ទឹកដី ឯករាជ្យភាព​ឲ្យ​បាន​គង់​វង្ស។ ​យើងកុំបៀត​បៀនគេ ​គណបក្ស​ណា​ក៏​ដោយ​ឲ្យ​មាន​សមភាព​បើមាន​ទំនាស់​គ្នា​ពីមុនៗ​មក​ដល់​ឆ្នាំថ្មីនេះ ​ត្រូវរ៉ូវ​គ្នា​វិញ​ហើយ​គណបក្ស​សង្គ្រោះជាតិ​​ដែល​យើង​រំលាយ​គេ​ត្រូវឲ្យ​គេវិ​ញ​ហើយ​ឈប់​ចាប់​គេ​ដាក់​គុកដោយ​ខុស​ច្បាប់»។

គិត​មក​​ទល់​​ពេល​​នេះ​មាន​​សកម្មជន​​គណបក្ស​សង្គ្រោះ​​ជាតិ​និង​​សកម្មជន​​សង្គ​ម​​ជាង​ ៧០ ​នាក់​​ហើយ​​កំពុង​​ជាប់​ឃុំ​​ក្នុង​​ពន្ធនាគារដោយ​​ភាគ​ច្រើន​​ជាប់​ចោទ​​ពី​​បទ​​​រួម​គំនិត​​ក្បត់​និង​​ញុះញង់​ជាដើម។ ចំណែក​អ្នក​​រិះគន់​​តាម​​បណ្ដាញ​សង្គម​ពាក់​ព័ន្ធ​នឹង​​ជំងឺ​កូវីដ​​១៩​​វិញ អាជ្ញាធរក៏បាន​ចាប់ឃុំ​ខ្លួន​​​មនុស្ស​​ជាង ៣០ នាក់ផង​ដែរ​ ​ក្រោ​ម​​ប​ទ​​ចោទ​​​ប្រកាន់​ផ្សេងៗគ្នា​ចាប់តាំង​​​​​ពី​​​ដើម​ខែ​​មករា​​ មក​។

នៅប្រទេស​​បារាំង​​ឯណោះ​​វិញ​ព្រះតេជគុណ រស់ ប៊ុនថន ​គង់នៅ​វត្តធម្មរង្សី​ទីក្រុង​ប៉ារីស (Paris) មាន​ថេរដីកា​ថា សេចក្តីប៉ង​​ប្រាថ្នា​​របស់​​ព្រះអង្គ ​គឺចង់​​ឲ្យ​ប្រទេស​ជាតិ​​​មាន​​ការ​​រីក​ចម្រើន គោរព​សិទ្ធិមនុស្ស​ និង​លទ្ធិប្រជាធិបតេយ្យ​​ពិត​​ប្រាកដ។ ព្រះអង្គ​ស្នើសុំឲ្យ​ក្រុម​មេដឹកនាំ​​ប្រទេស​​សព្វថ្ងៃ​ប្រកាន់​​ខ្ជាប់​នូវ​​សីលធម៌ល្អ​ បញ្ឈប់​ការ​រើស​អើង និង​ប្រព្រឹត្តអំពើល្អ​ ដល់​ពលរដ្ឋ​​ទាំងអស់​ដើម្បី​ឲ្យ​​ពួកគេ​​ទទួល​បាន​​នូវ​​សេចក្តីសុខ ​សុវត្ថិភាព​ និង​សុភមង្គល​ក្នុង​គ្រួសារ​៖ ​«​ក្នុង​​ឱកាស​ឆ្នាំថ្មី​​ប្រពៃណីជាតិ​ខ្មែរ​​យើង​នេះ​អាត្មា​សូម​ជូនពរ​ដល់​បងប្អូន​ខ្មែរ​ទាំងអស់​ទទួល​បាន​នូវសេចក្តីសុខ​ចម្រើន​​ ឆាប់​បានសេ​រីភាព​និងប្រជាធិបតេយ្យដូច​ប្រទេស​ទាំង​ឡាយ​ក្នុង​ពិភព​លោក ​ដែលគេមាន​សិទ្ធិនិង​សេរីភាព។ ហើយសូម​ឲ្យមេដឹកនាំខ្មែរ​ទម្លាក់​នូវ​អស្មិមានៈ​យល់ថា ជីវិត​អត់ទៀង​ជីវិត​មិនឋិ​ត​ឋេរ​ជីវិត​កាន់​តែចា​ស់​ជរាទៅជា​ធម្មតា​ ដូចនេះ ​មាន​តែអំពើល្អ​ សេចក្តីសុខ​មេត្តាធម៌ ​ដល់​ប្រជាពលរដ្ឋរ​បស់ខ្លួនឯងទេ​ ទើបនាំម​ក​នូវ​សេចក្តីសុខចម្រើ​ន​ដល់​ប្រជាពលរដ្ឋ​និង​ប្រទេស​ជាតិយើ​ង​»​។

ប្រជាពលរដ្ឋ​ខ្មែរ​ម្នាក់​ទៀត​នៅ​ប្រទេស​ស្វីស ​(Switzerland)​ លោក​​ឆេង គឹមថៃ ​មាន​ប្រសាសន៍ថា​​ លោកតែងតែ​តាម​ដាន​ព័ត៌មាន​ជាប់ជា​និច្ច​អំពី​​ស្ថា​ន​ការណ៍​នយោបាយ​នៅ​​កម្ពុជា ជាពិសេស​​បច្ចុប្បន្ននេះ គឺ​ការ​រាលដាល​នៃ​ជំងឺកូវីដ១៩​ ដែល​បណ្តាល​ឲ្យមាន​អ្នកស្លាប់​និង​អ្នក​ឆ្លងកាន់តែ​ច្រើន​ឡើងៗ។ លោកសូម​ជូន​ពរ​ឲ្យ​ពលរដ្ឋ​ខ្មែរ​ជួបតែ​សេចក្តីសុខ​ជៀសផុត​ពី​ជំងឺ​ឆ្លងកាច​សាហាវ​នេះ៖​ «ខ្ញុំ​សូម​ជូន​ពរ​ដល់​បងប្អូន​ខ្មែរ​យើង​ទាំងនៅ​ក្នុង​និង​ក្រៅ​ប្រទេស​និង​គ្រប់ទិសទី​ក្នុង​ពិភព​លោក​ ​សូមឲ្យ​បាន​ជួប​នូវ​ពុទ្ធពរ​ទាំង ៤ ប្រការ គឹអាយុ វណ្ណៈ សុខៈ ពលៈ កុំបីឃ្លាង​ឃ្លាត​ឡើយ។ ​ម៉្យាងវិញ​ទៀត​ក៏សូមញា​តិញោម​ពុទ្ធបរិស័ទ​​ទាំងអស់​មាន​សេរីសួស្តី ជ័យ​មង្គល​ សុភមង្គល​ ជាពិសេស​ឲ្យ​ជៀសផុតពី​រោគកាច​សាហាវនេះ​ គឺជំងឺ​កូវីដ១៩នេះ»។

ចំ​ណែក​​ពលរដ្ឋ​​ខ្មែរ​អាមេរិកាំង​ម្នាក់​​រ​ស់​​នៅ​ក្នុង​​រដ្ឋកាលីហ្វរនីញ៉ា (California)​ លោកស្រី ហ្យេម៊ី ម៊ាច ក៏បាន​ប្រាប់​អាស៊ីសេរី​ផងដែរ​​ថា ក្រៅ​​ពី​​សូម​​បួងសួងសុំឲ្យ​​ប្រជាពលរដ្ឋ​​ខ្មែរ​​ទទួល​បាន​​សេចក្តីសុខ​គ្រប់ៗ​គ្នា​ជៀសផុត​​ពី​​ជំងឺកូវីដ១៩ លោកស្រី​ចង់​​ឲ្យ​​ប្រទេស​កម្ពុជាមាន​​ការ​​រួបរួម​គ្នា​​គ្រ​ប់​​គណបក្ស​​ទាំងអស់​​ដើម្បី​​ផល​​ប្រយោជន៍​ជាតិ និង​ប្រជាពលរដ្ឋទូទៅ៖​ «ក្នុងរដូវចូលឆ្នាំថ្មីនេះ ​នាងខ្ញុំសូម​ជូនពរឲ្យ​បងប្អូនខ្មែ​រ​នៅកម្ពុជារ​ដូវ​ចូលឆ្នាំថ្មីនេះ ​យើងចូលឆ្នាំនៅ​តាម​ផ្ទះ​ដើម្បី​កាត់​បន្ថយ​ការឆ្លង​រាល​ដាលជំ​ងឺកូវិដ១៩។ សូមជូនពរ សុំឲ្យមាន​សុវត្ថិភាព ជៀសផុតពី​ជំងឺកាចសាហាវនេះ​ជាពិសេស​ចង់​ឲ្យប្រទេស​កម្ពុជា​មាន​ការ​ផ្សះផ្សារជាតិ​ដើម្បី​សេរីភាពនិង​សេចក្តីសុខរ​បស់ប្រជាពលរដ្ឋទាំងអស់»។

ស្រដៀង​គ្នា​នេះដែ​រ ពលរដ្ឋខ្មែរម្នាក់ទៀត រស់នៅ​ប្រទេសកាណាដា​លោក ពុទ្ធ វ៉ាន់ណារីន មានប្រសាសន៍ថា ទោះបី​ជាលោក​មករស់​នៅក្រៅប្រទេសជា​ង​ ៤០​ឆ្នាំក៏​ដោយ​ លោក​នៅតែគិត​គូរ​អំពី​សុខទុក្ខ​របស់​ពលរដ្ឋខ្មែរ​នៅក្នុង​ប្រទេស​ជានិច្ច។ លោកបន្តថា ​ដោយសារ​បច្ចុប្បន្ននេះ​ជំងឺកូវីដ១៩ កំពុង​រាលដាល​ខ្លាំង​លោក​ផ្តល់យោបល់​ថា ពលរដ្ឋគួរតែនាំ​គ្នា​ទៅចាក់​វ៉ាក់សាំង​ទៅ បើ​ទោះបីជា​វ៉ាក់សាំង​របស់​ចិន​មាន​ប្រសិទ្ធភាព​ទាបជាង​នៅ​ប្រទេស​លោកខាងលិចក៏​ដោយ​ យ៉ាង​ហោច​ណាស់​ក៏អាច​ការពារ​ខ្លួន​បាន​ខ្លះដែរ៖ «ក្នុង​ឱកាសចូលឆ្នាំខ្មែរនេះ ខ្ញុំបាទ​ សូមជូនពរ​ដល់​ប្រជាជនទាំងអស់រ​ស់នៅស្រុ​ក​ខ្មែរ​ឲ្យ​សុខសប្បាយ​​ឲ្យជៀសផុត​ពី​គ្រោះថ្នាក់​ជា​ពិសេស​គឺជំងឺកូវីដ១៩ ​ដោយ​សារជំងឺនេះ​ជាជំងឺ​កាច​សាហាវ។ ខ្ញុំយល់ថា បងប្អូន​គួរតែ​ចាក់វ៉ាក់សាំងនេះទៅ​គឺថាមិ​នបា​នអី ​ក៏បានកា​រពារខ្លួន​បន្តិច​បន្តួច​ដែរ ពីព្រោះ​ដោយសារកូវីដ​នេះជារឿង​សំខាន់ ដូចនេះសូមបង​ប្អូន​ថែរក្សា​ខ្លួន​ទៅថ្ងៃមុខ»។

ប្រជាពលរដ្ឋខ្មែរ​ដែល​មក​រស់​នៅក្រៅ​​ប្រទេស​ប្រាប់​ថា បើទោះបីពួកគេ​ទទួល​បាន​សេចក្តីសុខ សុភមង្គល និងមានអ្វីៗ​គ្រប់បែបយ៉ាងក៏ដោយ ក៏​បង​ប្អូន​ខ្មែរ​មិន​ដែល​​ភ្លេចប្រទេស​កំណើត​របស់ខ្លួននោះ​ទេ ជាពិសេស​ គឺចង់​ឲ្យប្រទេសជាតិ​រីកចម្រើន​ពិតប្រាកដ​ ដូចប្រទេស​ដែល​ពួកគេ​កំពុង​រស់នៅ។ ពួកគេសំណូមពរ​ សុំ​ឲ្យ​មេដឹក​នាំ ឬ ​អាជ្ញាធរគ្រប់ជាន់ថ្នាក់គិតគូរ​ពី​ស្ថានភាព​លំបាក​របស់ពលរដ្ឋ ចែករំលែកដល់ប្រជាពលរដ្ឋក្រីក្រខ្វះខាត ដើម្បីឲ្យពួកគេ មានស្ថានភាពរស់នៅសមរម្យ មានអាហារហូបចុកគ្រប់គ្រាន់ មានផ្ទះសម្បែងស្នាក់នៅ មានការងារធ្វើក្នុងស្រុក ដើម្បីអាចរស់នៅជួបជុំក្រុមគ្រួសារ ប្រកបដោយសេចក្តីសុខនិងសុភមង្គល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល