កម្មកររោងចក្រ អ៊ឹម.វ៉េ (M&V) បាននាំគ្នាធ្វើកូដកម្មដោយស្ងៀមស្ងាត់មិនព្រមធ្វើការងារ ដើម្បីទាមទារថៅកែរោងចក្រនេះកុំឲ្យបញ្ឈប់ប្រធានរដ្ឋបាល ដែលពួកគេចាត់ទុកថាជាមនុស្សស្លូតបូត ចេះយល់ពីទុក្ខលំបាករបស់កម្មករ។ ប៉ុន្តែ តំណាងរោងចក្របានចាត់ទុកការបញ្ឈប់ប្រធានរដ្ឋបាលរោងចក្រនេះថាជាកិច្ចការផ្ទៃក្នុងរបស់និយោជក មិនពាក់ព័ន្ធអ្វីជាមួយកម្មករទេ។
រយៈពេល២ថ្ងៃហើយដែលកម្មកររោងចក្រ អ៊ឹម.វ៉េ នៅខេត្តកំពង់ឆ្នាំង បាននាំគ្នាចូលទៅក្នុងរោងចក្រ តែពួកគេមិនធ្វើការងារទេ ដើម្បីបង្ហាញការមិនពេញចិត្តចំពោះថៅកែរោងចក្រដែលបានបញ្ឈប់ប្រធានផ្នែករដ្ឋបាលពីការងារដោយមិនមានហេតុផល។
កម្មការិនីរោងចក្រ អ៊ឹម.វ៉េ ឈ្មោះ មាស ដាណែត បានឲ្យដឹងនៅព្រឹកថ្ងៃទី៨ ខែឧសភា ពីមូលហេតុដែលកម្មករកម្មការិនីនាំគ្នាធ្វើកូដកម្មនេះថា គឺដើម្បីទាមទារឲ្យថៅកែរោងចក្រទទួលយកប្រធានផ្នែករដ្ឋបាលរោងចក្រ គឺលោក ត្រោក ច័ន្ទនរិទ្ធ ឲ្យចូលធ្វើការវិញ។ កម្មការិនីរូបនេះ បានឲ្យដឹងបន្ថែមថា ប្រធានផ្នែករដ្ឋបាលរោងចក្ររូបនេះតែងមានការយោគយល់ចំពោះកម្មករកម្មការិនី និងតែងតែជួយសម្របសម្រួលការងារទំនាក់ទំនងរវាងនិយោជក និងនិយោជិតបានល្អ មិនដែលធ្វើបាបកម្មករឡើយ ទើបកម្មករនាំគ្នាតវ៉ាមិនឲ្យថៅកែបញ្ឈប់គាត់។
កម្មការិនី មាស ដាណែត៖ «ពួកខ្ញុំតវ៉ានេះ ដោយឃើញថា លោកប្រធានផ្នែករដ្ឋបាលរោងចក្រ គឺលោក ត្រោក ច័ន្ទនរិទ្ធ គាត់មានសន្តានចិត្តល្អ ធ្វើការងារត្រឹមត្រូវតាមច្បាប់ និងមិនធ្វើបាបកម្មករទេ បើកម្មករមិនមានកំហុស។ ខ្ញុំសង្កេតឃើញថា រោងចក្រនេះឲ្យតែប្រធានរដ្ឋបាលដែលធ្វើការត្រឹមត្រូវ នៅមិនសុខបានយូរទេ។ តែបើអ្នកដែលធ្វើបាបកម្មករ គឺនៅធ្វើការក្នុងរោងចក្រនេះបានយូរ»។
លោក ត្រោក ច័ន្ទនរិទ្ធ បានឲ្យដឹងថា លោកមិនដឹងពីមូលហេតុដែលថៅកែរោងចក្រ អ៊ឹម.វ៉េ បញ្ឈប់លោកទេ។ ប៉ុន្តែ លោកផ្ដោតការសង្ស័យចំពោះការយោគយល់ច្រើនដល់ទុក្ខលំបាករបស់កម្មករកម្មការិនី ដោយបានអនុញ្ញាតឲ្យពួកគេឈប់សម្រាកត្រឹមត្រូវតាមពេលវេលាកំណត់ និងតែងអនុញ្ញាតច្បាប់ឲ្យកម្មករសម្រាកនៅពេលកម្មករមានធុរៈម្ដងម្កាលនោះ គឺជាមូលហេតុនាំទៅដល់ការបញ្ឈប់លោកពីការងារ៖ «ថ្ងៃ៤ ឧសភា នោះ ខ្ញុំបានសុំច្បាប់ទៅមើលម្ដាយខ្ញុំឈឺធ្ងន់ ស្រាប់តែថ្ងៃ៦ ខ្ញុំត្រឡប់មកវិញ ប្រធានរដ្ឋបាលចិន ហៅខ្ញុំទៅប្រាប់ថា ក្រុមហ៊ុនបញ្ឈប់ខ្ញុំហើយ។ គេបើកលុយខែចុងក្រោយឲ្យខ្ញុំ តែខ្ញុំមិនទទួល។ លុះកម្មករដឹងថារោងចក្រគេបញ្ឈប់ខ្ញុំ កម្មករក៏នាំគ្នាធ្វើកូដកម្មទាមទារមិនឲ្យគេបញ្ឈប់ខ្ញុំទេ»។
ទាក់ទិនចំពោះបញ្ហានេះ តំណាងរោងចក្រ អ៊ឹម.វ៉េ គឺលោក ចាន់ ណាក់ បានចាត់ទុកការបញ្ឈប់ប្រធានផ្នែករដ្ឋបាលរោងចក្រនេះថា ជាកិច្ចការផ្ទៃក្នុងរបស់និយោជក មិនទាក់ទងជាមួយកម្មករទេ៖ «បើយើងនិយាយតាមច្បាប់ គឺគាត់ជាប់ក្នុងបញ្ជីខាងនិយោជក។ អ៊ីចឹងកម្មករគាត់តវ៉ាជាសិទ្ធិរបស់គាត់ តែការបញ្ឈប់នេះ គឺជារឿងផ្ទៃក្នុងរបស់រោងចក្រទេ»។
ប្រធានសហជីពសេរីកម្មករប្រចាំរោងចក្រ អ៊ឹម.វ៉េ អ្នកស្រី ជួប សំអុល មានប្រសាសន៍ថា សហជីពសេរីកម្មករជាតំណាងឲ្យកម្មករ ដូច្នេះសហជីពក៏គាំទ្រមិនឲ្យមានការបញ្ឈប់លោក ត្រោក ច័ន្ទនរិទ្ធ ដែរ ព្រោះវត្តមានរបស់លោកក្នុងរោងចក្រ អាចជួយឲ្យកម្មករមានកម្លាំងចិត្តក្នុងការងារ៖ «កម្មករយល់ថា ការបញ្ឈប់នេះគ្មានមូលហេតុត្រឹមត្រូវ ទើបពួកគាត់តវ៉ា។ កម្មករធ្វើកូដកម្មគ្រប់អគារទាំងអស់ ទាមទារមិនឲ្យបញ្ឈប់លោក ត្រោក ច័ន្ទនរិទ្ធ ទេ ព្រោះការបញ្ឈប់នេះហាក់មានរឿងមិនប្រក្រតី»។
យ៉ាងនេះក្ដី អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ឆ្នាំង គឺលោក សោម ស៊ីណាត មានប្រសាសន៍ថា ក្នុងនាមជាអាជ្ញាកណ្ដាល មន្ទីរការងារកំពុងធ្វើការសម្របសម្រួលរវាងភាគីរោងចក្រ និងភាគីកម្មករ ឲ្យមានការយោគយល់គ្នា ដោយឈរលើគោលការណ៍ច្បាប់។
នៅវេលាម៉ោង ៥ និង ៣០នាទី ថ្ងៃទី៨ ខែឧសភា ដោយមានការសម្របសម្រួលពីមន្ទីរការងារខេត្តកំពង់ឆ្នាំង ភាគីរោងចក្រ អ៊ឹម.វ៉េ (M&V) បានយល់ព្រមទទួលលោក ត្រោក ច័ន្ទនរិទ្ធ ឲ្យចូលធ្វើការវិញហើយ។ ចំណែកកម្មករកម្មការិនី ក៏យល់ព្រមចូលធ្វើការងារជាធម្មតាវិញ នៅព្រឹកថ្ងៃទី៩ ឧសភា ដែរ បន្ទាប់ពីបានធ្វើកូដកម្មតវ៉ាអស់រយៈពេល ២ថ្ងៃកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។