ក្រុមកូដករណាហ្គាវើលដ៍ (Naga world) ជិត១០០នាក់បានចេញតវ៉ា នៅថ្ងៃទី៨ ខែមករានេះ នៅខាងមុខក្រុមហ៊ុនណាហ្គាវើលដ៍ដោយពួកគេបន្តទាមទារឱ្យតុលាការដោះលែង កញ្ញា ឈឹម ស៊ីថរ និងទាមទារឱ្យក្រុមហ៊ុនត្រូវតែដោះស្រាយវិវាទការងារដែលអូសបន្លាយជាង១ឆ្នាំមកនេះ។
តំណាងកូដករម្នាក់គឺ កញ្ញា ម៉ែន សុធីវឌ្ឍនៈ បានប្រាប់វិទ្យុអាស៊ីសេរីនៅថ្ងៃទី៨ ខែមករា ថា ក្រុមកូដករណាហ្គាវើលដ៍បាននាំគ្នាចែកប៉េងប៉ោងដើម្បីផ្ញើសារទៅដល់សាធារណជនឱ្យបានដឹងពីវិវាទការងារនេះ និងផ្ញើសារទៅដល់រដ្ឋាភិបាលឱ្យដោះលែង កញ្ញា ឈឹម ស៊ីថរ ទម្លាក់បទចោទលើតំណាងកូដករទាំងអស់៖
«យើងព្យាយាមធ្វើគ្រប់បែបយ៉ាងដើម្បីឱ្យថៅកែឈប់ធ្វើព្រងើយកន្តើយហើយដោះលែងប្រធានសហជីព ហើយចូលតុចរចាដោះស្រាយបញ្ចប់វិវាទហ្នឹងគ្រាន់តែយកច្បាប់ការងារដែលសរេសរឡើងក្នុងសៀវភៅការងារក្នុងច្បាប់រើសអើងសហជីពបញ្ហារបស់យើងត្រូវបានបញ្ចប់ហើយ»។
កញ្ញា បន្តទៀតថា ដោយសារការចរចាច្រើនលើកមិនទទួលបានដំណោះស្រាយ ធ្វើឱ្យពួកគាត់ប៉ះពាល់ជីវភាពជាខ្លាំងមានអ្នកខ្លះបង្ខំចិត្តរកការងារធ្វើក្រៅម៉ោងធ្វើដើម្បីជួយដោះទាល់ និងបានប្ដូរផ្លាស់គ្នាមកធ្វើកូដកម្ម ព្រោះពួកគាត់មិនអាចទ្រទ្រង់ជីវភាពគ្រួសារបន្តបាននោះទេ។
កញ្ញា ម៉ែន សុធីវឌ្ឍនៈ អះអាងថា រៀងរាល់ថ្ងៃនេះ ក្រុមកូដករនៅតែទទួលការគំរាមកំហែងពីជនស្លៀកពាក់ស៊ីវិលជិះម៉ូតូតាមពួកគេទៅដល់ផ្ទះ និងគំរាមចាប់ពួកគេដាក់គុកជាដើម។ ទោះបីជាមានការគំរាមកំហែងយ៉ាងនេះក្ដី ក្រុមកូដករនៅតែបន្តធ្វើកូដកម្ម រហូតដល់តែមានដំណោះស្រាយសមរម្យឱ្យពួកគាត់។
ក្នុងអំឡុងចេញតវ៉ាដោយសន្តិវិធីដើម្បីទាមទារដំណោះស្រាយការងារជាង១ឆ្នាំមកនេះក្រុមកូដករនិងថ្នាក់ដឹកនាំសហជីពជាង១០នាក់ត្រូវបានចាប់ឃុំក្នុងពន្ធនាគារព្រៃសនិងអ្នកខ្លះកំពុងជាប់បណ្ដឹងក្រុមហ៊ុនពីបទរំលោភលើលំនៅឋានធ្វើឱ្យខូចខាតដោយចេតនាស្ថានទម្ងន់ទោស។ បច្ចុប្បន្ន មានតែកញ្ញា ឈឹម ស៊ីថរប្រធានសហជីពម្នាក់ប៉ុណ្ណោះកំពុងស្ថិតក្នុងពន្ធនាគារព្រៃសក្រោយពីត្រូវបានចាប់ខ្លួនលើកទី២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។