ក្រុមកូដករណាហ្គាវើលដ៍ ប្រកាសធ្វើយុទ្ធនាការស្វែងរកដំណោះស្រាយវិវាទការងារ លើបណ្ដាញសង្គមហ្វេសប៊ុក (Facebook) អំឡុងពេលអាជ្ញាធររាជធានីភ្នំពេញតម្រូវឱ្យពួកគេធ្វើចត្តាឡីស័កនៅតាមផ្ទះ។ ពួកគាត់អះអាងថា ទោះបីអាជ្ញាធររកវិធីសាស្ត្ររារាំង ឬដាក់សម្ពាធយ៉ាងណាក្ដី ក៏ក្រុមកូដករនៅតែរក្សាឆន្ទៈចេញធ្វើកូដកម្មដូចដើម បន្ទាប់ពីអនុវត្តវិធានការសុខាភិបាលរួច។ មន្ត្រីសង្គមស៊ីវិលជំរុញឱ្យភាគីពាក់ព័ន្ធបន្តស្វែងរកដំណោះស្រាយឱ្យបានឆាប់ ដោយស្មើភាពគ្នា និងគ្រប់ភាគីយកទទួលបាន។
ក្រុមកូដករណាហ្គាវើលដ៍ថា ទោះស្ថានគ្រួសារជួបការលំបាកផ្នែកជីវភាព និងទទួលរងការទុក្ខបុកម្នេញពីសំណាក់អាជ្ញាធរយ៉ាងណាក្ដី ក៏ពួកគាត់នៅតែរក្សាជំហរធ្វើសកម្មភាពរកដំណោះស្រាយដោយសន្តិវិធីគ្រប់មធ្យោបាយ។ ពួកគាត់សោកស្ដាយចំពោះអាជ្ញាធរពាក់ព័ន្ធ ដែលមិនបានដើរតួនាទីជាអាជ្ញាកណ្ដាលក្នុងការផ្តល់ដោះស្រាយត្រឹមត្រឹមតាមច្បាប់ជូនដល់កម្មករនិយោជិត ដែលទទួលរងអំពើអយុត្តិធម៌។
កូដករ និងជាបុគ្គលិកណាហ្គាវើលដ៍កញ្ញា ម៉ែន សុធីវឌ្ឍនៈ ប្រាប់វិទ្យុអាស៊ីសេរីថា បច្ចុប្បន្នកូដករជាង ១០០នាក់ កំពុងធ្វើចត្តាឡីស័កនៅតាមផ្ទះរៀងៗ ខ្លួន ប៉ុន្តែ ក្រុមកូដករបាននាំគ្នាបង្កើនសកម្មភាពធ្វើយុទ្ធនាការតាមបណ្ដាញសង្គមហ្វេសប៊ុក (Facebook) ដោយបង្ហោះសារ រូបថត និងផ្សាយផ្ទាល់ (Facebook Live) ទាមទារឱ្យអាជ្ញាធរដោះលែងតំណាងសហជីព និងកម្មករត្រឡប់មកវិញ ដើម្បីបន្តការចរចាស្វែងរកដំណោះស្រាយវិវាទការងារឱ្យបានឆាប់។ លើសពីនេះកញ្ញាថា សកម្មភាពនេះ ក៏ចង់បកស្រាយព័ត៌មានពិត និងផ្ញើសារជូនមហាជនអំពីទង្វើអាក្រក់របស់អាជ្ញាធរ ដែលតែងតែលាបពណ៌ ចោទប្រកាន់ និងបង្ក្រាបលើក្រុមកូដករឈានដល់ការប្រើអំពើហិង្សា បៀតបៀនលើស្ត្រីឥតស្រាកស្រាន្តនាពេលកន្លងទៅផងដែរ៖ « ពេលនៅកូដកម្មពួកយើងបានចេញនៅខាងក្រៅ ហើយគេដឹងឮច្រើន តែបច្ចុប្បន្ន ពួកយើងនៅក្នុងផ្ទះ ក៏ពួកយើងអត់នៅស្ងៀមដែរ យើងនៅតែបង្ហាញទៅសាធារណៈថា ពួកយើងអត់បោះបង់ចោលទេ តស៊ូទាំងអស់គ្នារហូតមានដំណោះស្រាយ » ។
ជាមួយគ្នានេះកូដករ និងជាបុគ្គលិកណាហ្គាវើលដ៍ម្នាក់ទៀត លោកស្រី ហោ ម៉ាលីស ថ្លែងថា កន្លងទៅលោកស្រីខកចិត្តជាខ្លាំង ចំពោះអាជ្ញាធររាជធានីភ្នំពេញ និងក្រសួងសុខាភិបាលអនុវត្តវិធានការទប់ស្កាត់ជំងឺកូវីដ១៩ មានស្តង់ពីរ ដើម្បីយកលេសដាក់សម្ពាធ ធ្វើទុក្ខបុកម្នេញលើក្រុមកូដករជាបន្តបន្ទាប់។ លោកស្រីបន្តថា បញ្ហានេះមិនអាចរារាំង ឬបំបាក់ស្មារតីរបស់ពួកគាត់បានឡើយ ផ្ទុយទៅវិញចំពេលធ្វើចត្តាឡីស័កក្រុមកម្មករបាននាំគ្នាធ្វើយុទ្ធការបង្ហោះ និងចែករំលែកសារទាមទាររកដំណោះស្រាយនៅតាមបណ្ដាញសង្គម ហើយចង់បង្ហាញថា ក្រុមកម្មករមិនរាថយនោះទេ៖ « ស្នើឱ្យក្រសួងការងារនិងខាងរដ្ឋបាលរាជធានីភ្នំពេញឈប់ឃាត់ឃាំងក្រុមកូដករទៀត ត្រូវហៅក្រុមហ៊ុនណាហ្គាវើលដ៏មកដោះស្រាយឱ្យដោះលែងដំណាងទាំងប្រាំបី និងកូដករទាំងបីរូបហ្នឹងមក ឈប់ចោទប្រកាន់បទញុះញង់ទៀត ហើយចូលតុចរចាទើបមានដំណោះស្រាយ » ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារ លោក ហេង សួរ និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ដើម្បីឆ្លើយតបជុំវិញរឿងនេះបានទេ នៅថ្ងៃទី២៨ ខែកុម្ភៈ។
រយៈពេលប៉ុន្មានថ្ងៃកន្លងមកនេះ អាជ្ញាធរក្រុងភ្នំពេញបានបង្ក្រាបក្រុមកូដករ ដែលហ៊ានចេញធ្វើកូដកម្មនៅក្បែរអគារបនល្បែងណាហ្គាវើលដ៍ ដោយប្រើកម្លាំងរាប់រយនាក់ចាប់បង្ខំក្រុមកូដករទាំងកម្រោលបញ្ជូនឱ្យទៅធ្វើចត្តាឡីស័កនៅកន្លែងខ្វះអនាម័យ និងគ្មានអាហារបរិភោគគ្រប់គ្រាន់។ ក្រុមកូដករឱ្យដឹងថា ក្រោយពីអាជ្ញាធរដោះលែងក្រុមកូដករជាង ១០០នាក់ចេញពីមណ្ឌលចត្ដាឡីស័ក មានកូដករមួយចំនួនបានធ្លាក់ខ្លួនឈឺជាបន្តបន្ទាប់ និងខ្លះប្រឈមប៉ះពាល់សុខភាព។ សហជីព និងក្រុមកូដករ ចាត់ទុកចំណាត់ការនេះថា ជាទណ្ឌកម្ម ដើម្បីកុំឱ្យពួកគាត់ចេញតវ៉ារកដំណោះស្រាយវិវាទការងារនេះប៉ុណ្ណោះ។
ប៉ុន្តែរដ្ឋបាលរាជធានីភ្នំពេញបានចាត់ទុកការធ្វើកូដកម្មរបស់ក្រុមកូដករគឺ មានចេតនាទុច្ចរិត បង្កអសន្តិសុខ និងរំខានដល់យុទ្ធនាការប្រយុទ្ធប្រឆាំងជំងឺកូដ-១៩។ សាលាក្រុងភ្នំពេញថា នឹងចាត់វិធានការតាមផ្លូវច្បាប់ ប្រសិនបើក្រុមកូដករនៅតែបន្តចេញធ្វើកូដកម្ម និងមិនគោរពតាមវិធានសុខាភិបាល។
ជុំវិញរឿងនេះ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា ក្រុមកូដករណាហ្គាវើលដ៍តែងទទួលរងនូវអំពើអយុត្តិធម៌គ្រប់រូបភាពពីសំណាក់និយោជករំលោភលើសិទ្ធិការងារ និងអាជ្ញាធររារាំង ចោទប្រកាន់តាមប្រព័ន្ធតុលាការ ដោយសារការអនុវត្តច្បាប់មិនបានត្រឹមត្រូវ និងអព្យាក្រឹត្យ។ លោកថា ការដាក់សម្ពាធដល់កម្មករឱ្យបោះបង់ការធ្វើកូដកម្មមិនមែនជាមធ្យោបាយដោះស្រាយបញ្ចប់វិវាទដោយសន្តិវិធីនោះទេ។ លោក ឃុន ថារ៉ូ មើលឃើញថា ការធ្វើយុទ្ធនាការតាមបណ្ដាញសង្គមទាមទាររកដំណោះស្រាយវិវាទការងារក្នុងស្ថានភាពពួកគាត់រងសម្ពាធសេដ្ឋកិច្ចគ្រួសារ ជាពិសេសអាជ្ញាធរព្យាយាមប្រើប្រាស់គ្រប់មធ្យោបាយរារាំងបែបនេះ អាចជួបឧបសគ្គ ប៉ុន្តែលោកយល់ថាការឈឺចាប់ និងអំពើអយុត្តិធម៌កន្លងទៅនេះ នឹងជំរុញឱ្យពួកគាត់នៅតែមានឆន្ទៈតស៊ូទៅមុខទៀត៖ « ខ្ញុំគិតថា វាក៏អាចជះឥទ្ធិពលទៅដល់មុខមាត់រដ្ឋាភិបាល និងកាតព្វកិច្ចរបស់រដ្ឋក្នុងការបំពេញតួនាទីនៅក្នុងនៅក្នុងការលើកម្ពស់សិទ្ធិការងារ សិទ្ធិមនុស្ស ហើយករណីណាហ្គាវើលដ៍នេះ វាមិនមែនជារឿងថ្មីទេ ដោយវាជារឿងចាស់ អ៊ីចឹងមានន័យថាជាការសើរើវិវាទនៃការរំលោភសិទ្ធិការងារ គួបផ្សំទៅនឹងព្រឹត្តិការណ៍ថ្មីៗចុងក្រោយនេះ ហើយវារឹតតែមានភស្តុតាងដាក់បន្ទុកបន្ថែមទៀតទៅលើរដ្ឋាភិបាលអំពីកាតព្វកិច្ច និងតួនាទីរបស់ខ្លួនទៅនឹងយន្តការរបស់អន្តរជាតិ » ។
ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ កាលពីពេលថ្មីៗ នេះ បានរិះគន់ថា អាជ្ញាធរក្រុងភ្នំពេញកំពុងអនុវត្តវិធានការសុខាភិបាល ដែលមានស្តង់ដារ២ ផ្សេងគ្នារវាងក្រុមកូដករ និងសាធារណជនទូទៅ ដែលបង្ហាញថា អាជ្ញាធរប្រឹងប្រែងរារាំងសកម្មភាពស្របច្បាប់របស់កូដករ។ លើសពីនេះទង្វើរបស់អាជ្ញាធរនេះ ផ្ទុយពីច្បាប់សិទ្ធិមនុស្សអន្តរជាតិ។ អ្នកជំនាញសិទ្ធិមនុស្សថ្កោលទោសអាជ្ញាធរក្រុងភ្នំពេញ និងត្រូវតែបញ្ឈប់ការធ្វើទុក្ខបុកម្នេញការរំលោភបំពានបៀតបៀនលើរូបរាងកាយក្រុមកូដករជាស្ត្រី ដែលចេញតវ៉ារកដំណោះស្រាយដោយសន្តិវិធី។
ក្រុមអង្គការសិទ្ធិមនុស្សជាតិ និងអន្តរជាតិបានទាមទារឱ្យរដ្ឋាភិបាលដោះលែងតំណាងសហជីព និងកម្មករណាហ្គាវើលដ៍ចំនួន ១១នាក់ មានសេរីភាពវិញដោយឥតលក្ខខណ្ឌ។ ពួកគេក៏ស្នើដល់ក្រសួងការងារជំរុញឱ្យថៅកែបនល្បែងណាហ្គាវើលដ៍ចេញមុខដោះស្រាយវិវាទការងារនេះ និងគោរពសិទ្ធសហជីពក្នុងកន្លែងការងារដោយភាពស្មោះត្រង់ យុត្តិធម៌ តម្លាភាព និងតាមច្បាប់ស្ដីពីការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។