ក្រុមកម្មករណាហ្គាវើលដ៍ បន្តធ្វើកូដកម្ម នៅកំណាត់ផ្លូវរដ្ឋសភា ក្បែរស្ថានទូតអូស្ត្រាលី អស់រយៈពេល ៤១ថ្ងៃហើយ។ ពួកគាត់ទាមទារឲ្យអាជ្ញាធរដោះលែងតំណាងសហជីព ៨នាក់ និងពន្លឿនការដោះស្រាយបញ្ចប់វិវាទការងារជាមួយក្រុមហ៊ុន។
កម្មករផ្នែកកាស៊ីណូ លោកស្រី វុធ លីនដា ថ្លែងថា ដំណោះស្រាយដែលកម្មករចង់បាននៅពេលនេះ គឺដោះលែងតំណាងកម្មករ ៨នាក់មកវិញដោយគ្មានលក្ខខណ្ឌ ហើយបន្តការចរចាតទៅទៀត មិនមែនការទូទាត់ប្រាក់សំណងបញ្ចប់កិច្ចសន្យាការងារនៅក្រសួងការងារនោះទេ ព្រោះនេះជាវិវាទការងាររួម។
ក្រុមកូដករ នឹងបន្តតវ៉ាដោយសន្តិវិធីបែបនេះរហូតដល់អាជ្ញាធរដោះលែងតំណាងពួកគាត់ ហើយក្រុមហ៊ុនត្រូវទទួលយកកម្មករនៅសល់ជាង ៣រយនាក់ឱ្យចូលធ្វើការវិញ។
ចំណែកមន្ត្រីក្រសួងការងារវិញ ពួកគេបន្តចាក់ខ្សែអាត់សំឡេងអំពីខ្លឹមសារលិខិតរបស់ក្រសួង អញ្ជើញកូដករ ឬតំណាងកម្មករឱ្យចូលទៅចរចាលក្ខខណ្ឌមួយចំនួន ដែលមិនទាន់ឯកភាពគ្នា។
កាលពីពេលថ្មីៗ នេះ លោក ស ខេង រដ្ឋមន្ត្រីក្រសួងមហាផ្ទៃ បានអំពាវនាវឱ្យភាគីទាំងអស់ដោះស្រាយវិវាទការងារនៅក្រុមហ៊ុនណាហ្គាវើលដ៏ដោយសន្តិវិធី។ លោកស្នើឱ្យក្រសួងការងារ និងអាជ្ញាធរពាក់ព័ន្ធទាំងអស់រក្សាភាពអត់ធ្មត់ និងសម្របសម្រួលករណីនេះឱ្យបានឆាប់។
ក្រុមអង្គការសង្គមស៊ីវិល និងសហជីពមួយចំនួន ស្នើឲ្យតុលាការទម្លាក់ចោលបទចោទ ហើយដោះលែងថ្នាក់ដឹកនាំសហជីព និងសកម្មជនសហជីពទាំង ៨នាក់ឱ្យមានសេរីភាពវិញ។ ជាមួយគ្នានេះក្រសួងការងារនិងក្រុមហ៊ុនបន្តដោះស្រាយបញ្ចប់វិវាទការងារនេះ ដោយបើកលំហសិទ្ធិការងារ និងទទួលស្គាល់វត្តមានសហជីពនៅកន្លែងធ្វើការឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។