សិស្សជិត២០០នាក់នៅបាត់ដំបងមិនទាន់មានសាលារៀន
2013.05.04
សិស្សសាលាជិត ២០០នាក់ នៅភូមិគំនរបេង ឃុំសិរីមានជ័យ ស្រុកសំពៅលូន ខេត្តបាត់ដំបង នៅពុំទាន់បានចូលរៀនគ្រប់គ្នានៅឡើយ ដោយសារសាលារៀនរបស់ពួកគេត្រូវខ្យល់ព្យុះបំផ្លាញ ហើយពុំទាន់បានជួសជុលឡើងវិញ។
ទន្ទឹមគ្នានេះ ក្រុមគ្រូបង្រៀនបានទៅសុំរោងគោរបស់អ្នកស្រុកឲ្យសិស្សខ្លះរៀនជាបណ្ដោះអាសន្ន រង់ចាំអង្គការក្នុងស្រុកមួយជួយឧបត្ថម្ភជួសជុលសាលារៀននោះឡើងវិញ។
អង្គការក្រៅរដ្ឋាភិបាលមួយឈ្មោះ "សមាគមសិទ្ធិ និងការអភិវឌ្ឍនៃភូមិយើង" (អាដូវៀ = ADOVER = Association For Development Villager All Right) នឹងជួយជួសជុលសាលាបឋមសិក្សាបឹងត្រកួន ដែលខ្យល់ព្យុះបានបោកបក់បំផ្លាញកាលពីមុនរដូវចូលឆ្នាំខ្មែរនោះឡើងវិញ ដើម្បីឲ្យសិស្សសាលាចាប់ពីថ្នាក់ទី១ រហូតដល់ថ្នាក់ទី៦ ដែលជាអ្នករស់នៅក្នុងភូមិដាច់ស្រយាលមួយក្នុងស្រុកសំពៅលូន បានចូលរៀនគ្រប់ៗគ្នា។
មន្ត្រីកម្មវិធីរបស់អង្គការអាដូវៀ លោក ភន សុខេង បញ្ជាក់នៅថ្ងៃទី៤ ខែឧសភា ថា អង្គការមានគម្រោងជួសជុលសាលាបឋមសិក្សាបឹងត្រកួន ឡើងវិញ តាមសំណើរបស់សហគមន៍ក្នុងមូលដ្ឋានដែលបានស្នើសុំ៖ «ឲ្យសហគមន៍ដាក់សំណើមកខាងខ្ញុំ ដាក់គម្រោងថាជួសជុល ថវិកាចំណាយប្រហែលជាងពីរពាន់ដុល្លារ ពីព្រោះឈើរបស់គាត់ហ្នឹង ឈើមូល ខ្យល់បក់ខ្ទេចអស់ វាពុកជើងក្រោម ខ្យល់មកតិចគ្រឹបយកបណ្ដោយ ហើយសិស្សអត់បានរៀនប្រហែលពីរខែមកហើយ»។
លោកបញ្ជាក់ថា គម្រោងជួសជុលសាលាជូនអ្នកភូមិនេះ នឹងត្រូវធ្វើឡើងក្នុងពេលឆាប់ៗខាងមុខនេះ។ សាលាបឋមសិក្សាបឹងត្រកួន ត្រូវបានខ្យល់បោកបក់ឲ្យដួលរលំរាបដល់ដី កាលពីអំឡុងមុនថ្ងៃចូលឆ្នាំខ្មែរ។ សាលារៀននេះមានបីបន្ទប់ សង់ពីកូនឈើតូចៗ មានដំបូលប្រក់ស័ង្កសី។ កន្លងមក មានសិស្សប្រុសស្រីនៅក្នុងភូមិ រៀនចំនួន ១៩០នាក់ និងមានគ្រូបង្រៀន ៥នាក់។
នាយកសាលាបឋមសិក្សាបឹងត្រកួន លោក នង នេន បញ្ជាក់ថា បច្ចុប្បន្នគ្រូបង្រៀនបាននាំសិស្សឲ្យចូលរៀនជាបណ្ដោះអាសន្ននៅតាមរោងគោ និងខ្លះទៀតពុំបានចូលរៀននៅឡើយ៖ «កូនសិស្សខ្ញុំរាប់រយឲ្យរៀន ហើយសុំរោងគោកន្លែងប្រជាជន ខ្ញុំបង្រៀនពីរកន្លែង ព្រឹកល្ងាច ទីតាំងនៅកន្លែងផ្ទះប្រជាជនហ្នឹង រោងគាត់ចាស់ទុកចោលមួយ ហើយរោងមួយទៀតរោងគោគាត់។ ឥឡូវគាត់ចងគោខាងក្រៅ គាត់ឲ្យខ្ញុំដាក់តុបង្រៀននៅក្នុងហ្នឹង។ ដល់កន្លែងរៀន មើលទៅវាមិនគួរសម កូនក្មេងវាដូចមិនចង់រៀន កូនក្មេងវាមកតិច មកក្នុងមួយថ្នាក់បាន ១៥នាក់ ទៅ ២០នាក់ អត់បានច្រើនដូចកាលមានសាលា។ ពីរកន្លែងហ្នឹងសិស្សបាន ៣០-៤០នាក់»។
អាណាព្យាបាល និងមាតាបិតាសិស្សបញ្ជាក់ថា ពួកគាត់បារម្ភដោយសារកូនៗរបស់ពួកគាត់ខកខានពុំបានរៀនសូត្រអស់រយៈពេលជាច្រើនថ្ងៃ ដោយសារតែសាលាបឋមសិក្សាបឹងត្រកួន ស្ថិតនៅភូមិគំនរបេង ជាភូមិដាច់ស្រយាលនៅចុងកាត់មាត់ញក ក្នុងឃុំសិរីមានជ័យ ស្រុកសំពៅលូន ខេត្តបាត់ដំបង នោះ ពុំទាន់បានសាងសង់ឡើងវិញ។
លោក នង នេន ថ្លែងថា ខាងសហគមន៍បានចលនាគ្នារៃអង្គាសលុយបានមួយចំនួន ដើម្បីជួសជុលសាលានោះឡើងវិញ។ ប្រជាពលរដ្ឋនៅក្នុងភូមិគំនរបេង មានសង្ឃឹមថា ការឧបត្ថម្ភរបស់អង្គការក្នុងការជួសជុលសាលានោះ នឹងអាចជួយឲ្យកូនៗរបស់ពួកគាត់បានចូលរៀនឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។