សមាជិកគណៈកម្មការរៀបចំយុទ្ធនាការជាសកល សម្រាប់ការអប់រំនៅកម្ពុជា ដែលមានអង្គការជាតិ និងអន្តរជាតិធ្វើការលើវិស័យអប់រំចំនួន១០ បានរួមគ្នាផ្សព្វផ្សាយសកម្មភាពជាសកល ដើម្បីដោះស្រាយបញ្ហាក្នុងការងារអប់រំឆ្នាំ២០១៣។ យុទ្ធនាការនេះ មានរយៈពេល ១សប្ដាហ៍ គឺចាប់ពីថ្ងៃទី៤ ដល់ថ្ងៃទី១០ ខែឧសភា ឆ្នាំ២០១៣។
តើយុទ្ធនាការជាសកលសម្រាប់ការអប់រំក្នុងឆ្នាំ២០១៣ នេះ សង្គមស៊ីវិលផ្ដោតទៅលើបញ្ហាអ្វីជាចម្បង?
កុមារគ្រប់រូបត្រូវការគ្រូបង្រៀនល្អ គឺជាពាក្យស្លោកមួយឃ្លាសម្រាប់យុទ្ធនាការជាសកលក្នុងវិស័យអប់រំ នាឆ្នាំ២០១៣។ យុទ្ធនាការនេះ គឺជាចលនាតស៊ូមួយដែលមានគោលបំណងក្នុងការរួមចំណែក ដើម្បីសម្រេចគោលដៅការអប់រំសម្រាប់ទាំងអស់គ្នាឆ្នាំ២០១៥ របស់ក្រសួងអប់រំ។
ក្រុមអង្គការសង្គមស៊ីវិលជាដៃគូ ដែលធ្វើការលើកកម្ពស់វិស័យអប់រំនៅកម្ពុជា បានយកឱកាសនេះជំរុញឲ្យរដ្ឋាភិបាលធ្វើកំណែទម្រង់ប្រាក់បៀវត្សរ៍ជូនគ្រូបឋមសិក្សា ឲ្យស្មើនឹងគ្រូមធ្យមសិក្សាបឋមភូមិ ពោល គឺគ្រូបង្រៀនកម្រិតបឋម ឲ្យបានប្រាក់ខែស្មើនឹងគ្រូកម្រិតអនុវិទ្យាល័យ ដើម្បីបង្កើនគុណភាពនៃការរៀន និងបង្រៀន។
នៅក្នុងសន្និសីទកាសែត ស្ដីពីកុមារគ្រប់រូបត្រូវការគ្រូបង្រៀនល្អ ដែលរៀបចំដោយអង្គការភាពជាដៃគូអប់រំនៃអង្គការក្រៅរដ្ឋាភិបាល ហៅកាត់ជាភាសាអង់គ្លេសថា នេប (NEP) កាលពីថ្ងៃទី៦ ឧសភា ប្រធានកម្មវិធីអប់រំនៃអង្គការវីអេសអូ (VSO) នៅកម្ពុជា លោក ចន ហ្វ្រេន (John Friend) បានថ្លែងថា ដើម្បីសម្រេចបាននូវគុណភាពនៃការរៀន និងការបង្រៀននេះ គ្រូបង្រៀនត្រូវតែធ្វើជាគ្រូពេញម៉ោង ដោយគ្មានការយាយី ឬការរំខានពីកត្តាផ្សេងទៀតនោះទេ។
លោកសង្កេតឃើញថា គ្រូបង្រៀននៅកម្ពុជា មានមុខរបរ២ ក្រៅពីបង្រៀន គឺគាត់ត្រូវរកចំណូលបន្ថែមដើម្បីបានផ្គត់ផ្គង់ជីវភាពក្នុងគ្រួសារ។ បញ្ហានេះ គឺជាកត្តាដែលនាំឲ្យប៉ះពាល់ដល់ការរៀបចំសកម្មភាពបង្រៀន មានន័យថា គ្រូនឹងបាត់បង់ការយកចិត្តទុកដាក់ចំពោះអាជីពទី១របស់គាត់។
គ្រូបឋមសិក្សាបច្ចុប្បន្នមានបៀវត្សរ៍ចំនួន ៣០ម៉ឺន ២ពាន់រៀល ឬ ៧៥ដុល្លារ ក្នុងមួយខែ ហើយគ្រូបង្រៀនមធ្យមសិក្សាបឋមភូមិ បានបៀវត្សរ៍ជាង ៤២ម៉ឺនរៀល ឬប្រហែល ១០៧ដុល្លារក្នុងមួយខែ។
យ៉ាងណាក៏ដោយ អង្គការភាពជាដៃគូអប់រំនៃអង្គការក្រៅរដ្ឋាភិបាល បានធ្វើការស្ទង់មតិច្រើនជាង ១.១០០នាក់ ក្នុងនោះ ៨៦% នៃអ្នកឆ្លើយតប បង្ហាញថា ប្រាក់ឈ្នួលមូលដ្ឋានសមរម្យគួរតែច្រើនជាង ៩០ដុល្លារក្នុងមួយខែ។ ៥២% ពិតជាមានអារម្មណ៍ថា គ្រូបង្រៀនគួរតែទទួលបានច្រើនជាង ១២០ដុល្លារក្នុងមួយខែ។ ហើយអ្នកឆ្លើយតប ៨០% មានទស្សនៈថា គ្រូបង្រៀន គឺសំខាន់ណាស់ដែលមានតួនាទីអភិវឌ្ឍសេដ្ឋកិច្ចប្រទេស ជាអ្នកជួយកសាងសុខសន្តិភាព និងការចុះសម្រុងគ្នានៅក្នុងសង្គម។
សំណួរ ថាតើគ្រូបឋមអាចបានទទួលប្រាក់ខែដូចគ្រូមធ្យមសិក្សាដែរឬទេ? ចម្លើយថាអាចដំឡើងបាន។
អ្នកសម្របសម្រួលកម្មវិធីប្រចាំប្រទេសកម្ពុជា នៃអង្គការអេអ៊ីអេ (AEA) អន្តរជាតិ លោក វន សំភាស់ បានផ្ដល់ចម្លើយជាក់លាក់ថា បើសិនជាចង់ដំឡើងប្រាក់ខែជូនលោកគ្រូអ្នកគ្រូបឋមនៅទូទាំងប្រទេស ពី ៧៥ដុល្លារ ដល់ ១០០ដុល្លារ យើងត្រូវការថវិកាសម្រាប់ដំឡើងជាង ១៦លានដុល្លារអាមេរិក ក្នុងមួយឆ្នាំ ដែលនេះជាបរិមាណដ៏ច្រើនមួយ ប៉ុន្តែវានៅទាបជាងថវិការបស់ក្រសួងអប់រំ ដែលសល់ពីចំណាយនៅឆ្នាំ២០១២ ជាង ២០លានដុល្លារអាមេរិក ដែលជាថវិកាសល់ខាងផ្នែកចំណាយទៅលើបុគ្គលិក។
ទាក់ទងនឹងការដំឡើងប្រាក់បៀវត្សរ៍ជូនគ្រូបឋមសិក្សានេះ ប្រធាននាយកដ្ឋានបឋមសិក្សានៃក្រសួងអប់រំ យុវជន និងកីឡា លោក ចាន់ សុភា បានឆ្លើយមិនឯកភាពចំពោះការស្នើរបស់សង្គមស៊ីវិលនោះទេ។
យ៉ាងណាក៏ដោយ យោងតាមស្មារតីនៅក្នុងសន្និបាតអប់រំ កាលពីដើមឆ្នាំ២០១៣ រដ្ឋាភិបាលតាមរយៈក្រសួងអប់រំ នៅក្នុងសន្និបាត ធ្លាប់មានគម្រោងកាត់បន្ថយគម្លាតប្រាក់បៀវត្សរ៍រវាងគ្រូបឋមសិក្សា និងគ្រូថ្នាក់អនុវិទ្យាល័យដែរ។
អ្នកសម្របសម្រួលកម្មវិធីយុទ្ធនាការ និងការតស៊ូមតិនៃអង្គការភាពជាដៃគូអប់រំនៃអង្គការក្រៅរដ្ឋាភិបាល កញ្ញា លេង ធាវី មានមតិថា បណ្ដាញនេះនឹងនាំយកសារដំឡើងប្រាក់បៀវត្សរ៍ជូនគ្រូបឋមសិក្សាទៅដល់រាជរដ្ឋាភិបាល។
ទន្ទឹមនឹងការជំរុញដំឡើងប្រាក់បៀវត្សរ៍ជូនគ្រូកម្រិតបឋមនេះ ដើម្បីបង្កើនគុណភាពអប់រំនោះ នៅមានកត្តាមួយចំនួនទៀត ដែលបណ្ដាញសង្គមស៊ីវិលធ្វើការលើវិស័យអប់រំដដែលបានផ្ដល់អនុសាសន៍។
វិទ្យាស្ថានស្ថិតិរបស់អង្គការអប់រំវិទ្យាសាស្ត្រ និងវប្បធម៌ នៃអង្គការសហប្រជាជាតិ ហៅកាត់ថា យូណេស្កូ (UNESCO) បង្ហាញថា គ្រូបង្រៀននៅកម្ពុជា បានបង្រៀនសិស្សជាមធ្យមនៅថ្នាក់បឋមសិក្សាច្រើនជាង ៤៨នាក់ក្នុងមួយថ្នាក់។ អត្រានេះចាត់ទុកថាជាប្រទេសដែលគ្រូបង្រៀនម្នាក់ បង្រៀនសិស្សច្រើនជាងគេនៅលើពិភពលោក លើកលែងតែប្រទេស១៥ ប៉ុណ្ណោះ ដែលកម្ពុជា មានពិន្ទុល្អជាង។ បញ្ហានេះ ដោយសារតែគ្រូតិចសិស្សច្រើន។
ក្នុងរបាយការណ៍របស់បណ្ដាញអង្គការភាពជាដៃគូអប់រំនៃអង្គការក្រៅរដ្ឋាភិបាល បានបង្ហាញដែរថា ក្នុងពេលបច្ចុប្បន្ន កម្ពុជា ត្រូវការគ្រូបង្រៀនបឋមសិក្សាចំនួន ៩.៥០០នាក់បន្ថែមទៀត លើចំនួនដែលមានស្រាប់ជាង ៤ម៉ឺន ៤ពាន់នាក់។ ការបន្ថែមនេះ គឺដើម្បីគ្រប់គ្រងការខ្វះគ្រូបង្រៀន ដែលជះឥទ្ធិពលដល់ការសិក្សារបស់សិស្ស មានមធ្យោបាយ ៤យ៉ាង គឺទី១ ដោះស្រាយបញ្ហាគ្រូបង្រៀនសិស្សច្រើនក្នុងថ្នាក់។ ទី២ បញ្ហាគ្រូបង្រៀនពីរថ្នាក់ផ្សេងគ្នាក្នុងមួយថ្ងៃ ឬបង្រៀនពីរវេន។ ទី៣ ដោះស្រាយកុំឲ្យគ្រូបង្រៀនថ្នាក់គួប និងទី៤ ជ្រើសរើសគ្រូកិច្ចសន្យាដែលមានលក្ខណៈសម្បត្តិគ្រប់គ្រាន់ និងទទួលបានការបណ្ដុះបណ្ដាលត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។